E Tutu Aere e te Akakite Ua Atu

¹ Ei ‘arataki, e ei tutara,’ kua akateateamamao a Iesu i tana au pipi no te angaanga maata no te tutu aere e vai maira ki mua. (Isaia 55:4; Luka 10:​1-12; Anga. 1:8) Kua akataka mai te apotetoro ko Petero i te akauenga ta Iesu i oronga kia ratou na roto i teia au tuatua: “E kua ikuiku maira aia ia matou e tuatua aere matou ki te tangata, e akakite ua atu oki e, koia tei akonoia e te Atua ei Akava i tei ora e i tei mate ra oki.” (Anga. 10:42) Eaa te kapiti maira i roto i te akakite ua atu?

² Ka maata ta tatou ka apii mai mei te akamanako anga i te akaraanga o te apotetoro ko Paulo. I te araveianga i te aronga pakari mei te putuputuanga i Ephesia, kua akamaara atu aia kia ratou: “E kare rava akenei e mea e meitaki ei kotou na i vaioia e au, kare akenei au i tivata i te ako atu ia kotou e te apii ia kotou i te ngai tangata, e i tera are i tera are, I te tuatua marie anga atu ki te ngati Iuda ma te Eleni i te tataraara i te Atua, e te akarongo i to tatou Atu ia Iesu Mesia.” Noatu kua aro atu aia uaorai i te au timataanga, kua tauta pakari a Paulo i te akakite atu i te tuatua meitaki ki te manganui. Kare aia i mareka ana i te akakite ua i etai au apiianga mou ki tana aronga e akarongo maira, mari ra kua tauta aia i te akakite “i te ako katoa a te Atua.” E raukai teia, kua papa aia no te tauta pakari e te akaatinga anga. Kua akakite mai aia: “Kare ra au e akono ua atu i taua au mea katoa ra, kare oki au i anoano ua i taku ora, mei te mea e, e mea apinga naku uaorai, kia akaoti ra au i toku oro anga ma te rekareka, e te taoonga i rauka iaku i te Atu ra ia Iesu, kia akakite ua atu au i te evangelia o te aroa ua o te Atua.”​—Anga. 20:​20, 21, 24, 27, NW.

³ Akapeea tatou i te aru anga i to Paulo akaraanga i teia tuatau? (1 Kori. 11:1) Na te kimi marie anga i te au ngutuare tangata tei tau noatu me te aro atura tatou i te au timataanga, na te tauta anga i te itae i te au tangata o te au pupu eteniki katoatoa e te au reo ma te tuatua meitaki, e na te tatanu maroiroi anga i te inangaro o te aronga e kitea ra e tatou. (Mata. 10:​12, 13) Te umuumu nei teia i te tuatau, te maroiroi, e te inangaro no te tangata.

⁴ Ka Rauka Ainei ia Koe i te Tavini ei Painia Tauturu? Penei ka tau a Mati e Aperira ei nga tuatau meitaki noou no te akakite ua atu na te painia tauturu anga. Mei teaa ra te akamaroiroi anga i te mataiti i topa ake nei i te kite anga atu e manganui tei tauta pakari i te painia tauturu!

⁵ Kua akakeuia tetai tuaine pakari e 80 mataiti ma te au manamanata e manganui i te pae kopapa e te akamaroiroi anga tei orongaia mai e ta Iehova akaaerenga. Kua tata mai aia: “Kua riro te reira i te akakeu akaou i te inangaro o toku ngakau no tetai tuatau roa, e kua riro te reira ei akamaroiroi iaku kia rave au i te painia tauturu no tetai akaou mai tuatau.” No reira kua iki aia no Mati. “Ko te mea mua taku i rave,” i nana ei, “koia oki kia akamanako e eaa te ka o mai e me ka rauka rai. Kua tuatua au i te reira ki taku tamaine no te mea ka inangaro au i tana tauturu. Kua tapoitirere mai aia iaku na te rave anga mai i tetai pepa akaki nana uaorai.” I roto i taua marama ra, kua akapou te tuaine pakari e 52 ora i roto i te angaanga orometua. “E manganui te tuatau kua pure au kia Iehova kia akaou i toku maroiroi me kite au e te akamata ra au i te roiroi. I te openga ra o te marama, kua mataora tikai au e kua merengo, e kua akameitaki au ia Iehova e manganui te tuatau no te tauturu anga mai iaku. Ka inangaro au i te tamata akaou i te reira.” Penei ka akamaroiroi tona tupuanga mataora i tetai papaki tei inangaro tikai i te painia tauturu noatu te au manamanata i te pae kopapa.

⁶ Ko tetai tungane tei akanoo poitirere ia mai mei tana angaanga kua taangaanga meitaki i taua turanga i te painia tauturu. I taua marama ra, kua tupu te maroiroi kiaia no te angaanga tutu aere, e i te openga o te marama, kua akamata aia i tetai apii Pipiria ou. I te akamanakoanga no runga i taua tupuanga: “Koia tikai taua marama!” Mei teaa ra tona mataora e kua rauka iaia ta Iehova aratakianga e te tauturu! Ae, kua riringi mai a Iehova i te akameitakianga mou ki rungao iaia no te tauta anga pakari tei raveia e te taeake i roto i te angaanga orometua, e ka rave akapera katoa aia noou.​—Malaki 3:10.

⁷ No te manganui, kare i te mea ngoie te painia tauturu. Inara, noatu te au apainga i te pae o te angaanga e te ngutuare tangata e pera katoa i to tetai uaorai au manamanata, kua rauka i tetai au tungane e te tuaine e manganui i te rave akapera. I te akakite ua atu anga e putuputu te taime te o maira i te akaatinga anga i to tetai uaorai tuatau akaperepere e te maroiroi, inara kare e rauka i te akaaiteia atu te au akameitakianga.​—Maseli 10:22.

⁸ E tuatau tau a Mati e Aperira no te painia tauturu. Te vai maira e rima openga epetoma i roto ia Mati. I te akapuapinga anga i teia e te taangaanga meitaki anga i te au ora aiai penei ka rauka i tetai te angaanga tamou ra kia painia tauturu. I te pae mai, penei ka rauka ia koe i te taangaanga meitaki i te au ra orote i te marama o Aperira. Penei ka orote mai tetai mei te apii e te angaanga, e ko te ka tauturu kia rauka ia ratou e 50 ora tei akatakaia ra. E raukai i te akapapa i te 50 ora i roto i te angaanga orometua no Mati me kare no Aperira, ka rauka ainei ia koe i te taangaanga i tetai o te akaraanga o te akapapaanga no te painia tauturu tei kapitiia mai ki roto i teia atikara? E uriuri i taau akapapaanga ki tetai papaki; kare e ekoko anga e ka akamaroiroiia tetai i te kapiti atu kia koe i roto i te angaanga orometua. Me kare e rauka ia koe i te painia tauturu, e akanoo i tetai akakoroanga takake no teia nga marama, e e tauturu atu i te aronga ka rauka i te painia. E akanoo i taau au parani i teianei e raukai i te tutu ua atu i roto ia Mati e Aperira.

⁹ Akaari i te Arikianga no te Akamaara Anga: I te au mataiti tataki tai i te tuatau o te Akamaara Anga, kua akakeu te tu ariki meitaki no te oko i te tauatini ua atu kia ‘taporoporo marie i te tuatau’ kia riro atu ei au painia tauturu. (Ephe. 5:​15, 16) I Nu Tireni i te mataiti i topa ake nei, e 1,570 painia tauturu ia Mati e e 690 i roto ia Aperira. Ko te avereti o te reira e 1,130 no teia nga marama tataki tai. Me akaaiteia te reira ki te avereti o te numero 225 o te aronga tei painia tauturu ana i te marama okotai no te au marama o mua ake no te mataiti tavini anga. Ko te tuatau Akamaara Anga tetai tuatau meitaki no te akaari i to tatou ariki ma te ngakau tae i te atinga oko o Karaiti na te akamaata anga i ta tatou angaanga i roto i te angaanga orometua.

¹⁰ Ia Aperira 16 e vaitata maira, e akamaara ana e eaa tikai te aiteanga o te Akamaara Anga kia koe. E akamanako ana i te au tupuanga tei taki atu ki to Karaiti matenga e te au mea tei tamanata maata i tona manako e te ngakau. E akamanako, katoa, ana i te tu rekareka tei akanooia ki mua ia Iesu e i akapeea te reira i te tauturu iaia kia akakoromaki i taua turanga takinga kino. E akamaara ana i tona turanga i teianei ei Upoko no te putuputuanga te akaaere ra i te angaanga tutu aere e te akariro anga i te tangata ei pipi. (1 Kori. 11:3; Ebera 12:2; Apo. 14:​14-16) No reira e akaari mai i toou tu ariki no ta Karaiti i rave pouroa na te rave maata anga i te ka rauka ia koe i roto i te angaanga tutu aere mei tei tau ki toou au turanga.

¹¹ Akamaroiroi i Tetai Atu kia Akakite Ua Atu: Na te kapiti anga ki roto i te angaanga painia tauturu, tei roto te aronga pakari e te au tavini orometua i te turanga meitaki no te akamaroiroi i tetai papaki. I te angaanga anga ma te au papuritia i roto i te angaanga orometua e te rave anga i te au atoroanga tiaki, e au tuatau meitaki to ratou uaorai no te tauturu i tetai papaki kia rave maata atu i teia angaanga takake. Ka tau tatou katoatoa kia pure no runga i teia, te akaketaketa anga atu i ta tatou au angaanga taokotai i roto i te akakite ua atu anga.

¹² I te mea e ka taokotai te aronga pakari e te au tavini orometua ma te au akanoonooanga a te putuputuanga no te akamaata i te angaanga no nga marama o Mati e Aperira, ka tau te akaaere tavini e kia manako no te akanoonoo i te angaanga tutu evangeria. Ka tau aia kia akanoonoo i te au ngai aravei anga no te angaanga koro, te au ra, e te au ora tei tau no te maataanga o te papuritia e kia akakite putuputuia teia. Penei ka raveia te au akanoonooanga no te aravei i te au tuatau tuketuke i te ra, te akanooanga i te tuatau no te katoatoa i roto i te putuputuanga kia kapiti atu ki roto i te au tu akakitekite anga tuketuke. Penei ka kapiti mai teia i te rave anga i te ngai pitiniti, te akakite anga ki runga i te mataara, te atoro anga mei tera are ki tera are, te oki anga i te atoro akaou, e te akakite anga na roto i te terepaoni. I te pae mai, ka tau aia kia akanoo e kua rava te au puka, te au makatini, e kia rauka te ngai ka angaangaia i taua marama ra.

¹³ Te ka orongaia no Mati ko te puka Te Kite, ma te akakoroanga no te akamata i te au apii Pipiria. Ka kiteaia te au tuatuaanga no te oronga anga i te puka Te Kite i roto i te kapi o roto ake o te Our Kingdom Ministry o Tianuare 2002. Te ka orongaia ia Aperira ko te au makatini Punanga Tiaki e te Awake! E tauta i te taangaanga i te au tuatuaanga e kiteaia ra i roto i “Te ka Tuatuaia no te Au Makatini.” Ka tau te katoatoa kia akanoo i te tuatau no te akateateamamao meitaki no te akakite ua atu.

¹⁴ Mei teaa ra to tatou akameitakianga kia angaanga i raro ake i te akaaerenga a te Upoko o te putuputuanga, ko Iesu Karaiti, e kia rauka te akameitakianga no te akakite aere i te tuatua meitaki ki tetai papaki! I nga marama o Mati e Aperira e vaitata maira, e tauta akaou tatou i te akariro ia raua e ko nga marama meitaki roa atu ia no tatou ia tatou e akarongo ra i ta Karaiti akauenga kia tutu aere e kia akakite ua atu.

[Pia i te kapi 4]

Au Mataara Tuketuke no te Painia Tauturu ia Mati e Aperira 2003

Ra Au Ora

Monite 1 2 — — 2 —

Ruirua 1 — 3 — — —

Ruitoru 1 2 — 5 — —

Paraparau 1 — 3 — — —

Varaire 1 2 — — — —

Maanakai 5 4 3 5 6 7

Tapati 2 2 3 2 2 3

Mati 56 56 54 55 50 50

Aperira 50 50 51 53 — —

Ka tau ainei etai o teia au akapapaanga noou?