Au Uianga a te Aronga Tatau

I te rongo anga e tei te ngutupa a Petero koi tapeka uaia ra, eaa ra te au pipi i karanga ai: “Ko tana angela ïa”?​—Angaanga 12:15.

Penei kua tarevake te au pipi i te akamanakoanga e ko tetai angera karere te akatutu ra ia Petero te tu ua maira i te ngutupa. E akamanako ana te aerenga tuatua o teia irava.

Kua opuia a Petero e Heroda, ko tei tamate ia Iakobo. E no reira e tumu meitaki ta te au pipi i te irinaki e ka aravei katoa a Petero i tetai taopenga anga aiteite. Kua tapekaia ki te auri pirianganaoa, na te au vaeau tino ngauru ma ono i tiaki ia Petero. I tetai po i reira, na roto i te temeio kua akamataraia aia e kua taki ia atu e tetai angera ki vao i te are auri. I te kite meitaki tikai anga a Petero eaa te tupu ra, kua na ko akera aia: “Kua kite pu tikai au e, kua tono mai te Atu i tana angela, e kua akaora iaku i te rima o Heroda.”​—Angaanga 12:1-11.

Kua aere viviki atu a Petero ki te are o Maria te metua vaine o Ioane Mareko, e manganui oki tei putuputu atu i reira. I tona topapa atu anga ki runga i te pa o te ngutupa, kua aere atu tetai tavini tamaine ko Rhoda i te akara atu. E nakirokiro akera aia i te reo o Petero, kua oro atura aia i te akakite atu ki te aronga ra e kare akera i eeu i te pa kia tomo mai aia ki roto! I te akamataanga, kare roa te au pipi i irinaki ana e tei te ngutupa a Petero. Mari ra, kua manako tarevake ua ratou e: “Ko tana angela ïa.”​—Angaanga 12:12-15.

Kua irinaki ana ainei te au pipi e kua tamate takereia a Petero e ko tona vaerua kopapa kore ra tei te ngutupa ra? Kare e tau ana e ko te reira te tu, no te mea kua kite te au pipi a Iesu i te tuatua mou o te Tuatua Tapu no runga i tei mate ra​—“kare a ratou apinga i kite.” (Koheleta 9:5, 10, NW) Eaa, i reira, te aiteanga a te au pipi i te na ko anga ratou: “Ko tana angela ïa”?

Kua kite te au pipi a Iesu e i te au tuatau o te tuatua enua, kua oronga te au angera i te tauturu uaorai ki to te Atua iti tangata. Ei akaraanga, kua tuatua a Iakoba no ‘te angela i akaora iaku i te au kikino katoa nei.’ (Genese 48:16) E no runga i te tamaiti ou ua i rotopu ia ratou, kua karanga atu a Iesu ki tana au pipi: “Kia matakite ko te akavaavaa aea kotou i tetai o teianei aronga tangata rikiriki, te karanga atu nei au kia kotou, Ko to ratou au angela i te rangi, e tika ïa i te akara anga i te mata o taku Metua i te ao ra.”​—Mataio 18:10.

Ma te umere, te oronga ra te Young’s Literal Translation of the Holy Bible i te tuatua agʹge·los (“angera”) ei “karere.” I te akaraanga e irinakianga tetai i rotopu i etai au ngati Iuda e i te au tavini tataki tai o te Atua ra e angera uaorai tona​—te aiteanga i reira, e “angera tiaki.” E tika, kare teia manako e apii tikaia ra i roto i te Tuatua a te Atua. Noatu rai, ka tano rai oki e i te na ko anga te au pipi, “Ko tana angela ïa” e te manako ua ra ratou e ko tetai angera karere te akatutu ra ia Petero te tu ua maira i te ngutupa.