Kua Rave Ratou i te Anoano o Iehova

Kua Autu a Paulo i Rungao i te Au Tu Kino

TEI roto a Paulo i tetai turanga kino. Tei runga aia ma etai atu 275 aronga i tetai pai i roto i te uriia o Eurokalido ra​—koia te matangi kino maata rava o te Mediterranean. No te kino maata o taua uriia ra kare te ra i kiteaia i te ao, e kare katoa te au etu i kiteaia i te po. E mea matauia ra e, kua mataku te au patete no to ratou au oraanga. Inara, kua akapumaana atura Paulo ia ratou na te tuatuaanga i tei akakite tu-Atua ia kiaia na roto i te moemoea: “Kare rava tetai o kotou nei e mate, mari ra ko te pai.”​—Angaanga 27:14, 20-22.

I te 14 po o taua uriia ra, kua kite akera te aronga pai​—e 20 au fathom te oonu o te vai.a E vaitata iti atura kua akatonga akaou iora ratou. I teia taime e 15 au fathom te oonu o te vai. Kua vaitata mai te enua! Inara kua apai mai teianei nuti meitaki i tetai manakoanga tumatetenga. Ko te akaoripuanga i te po i roto i te vai papaku, penei ka u te pai ki runga i te au toka e ka ngaa i reira. E mea pakari ra, kua tuku te aronga pai ra i te au tutau. Kua anoano tetai papaki o ratou kia tuku iora te poti ki raro i te tai, e ka na runga ratou i te reira.b Inara kua arai atura Paulo ia ratou. Kua karanga atura aia ki te rangatira anere e te au vaeau: “Kia kore teianei aronga e noo i runga i te pai nei, kare kotou e ora.” Kua akarongo atu te rangatira anere ra kia Paulo, e i teianei kua tatari te au patete e 276 katoa ra i te akirata.​—Angaanga 27:27-32.

Pai Ngaa

I tera mai popongi, kia akara atura te au patete o te pai i tetai ava ma te one. Ma te manakonako ouanga, kua tatara iora i nga tutau, e uti akera te kie maata kia ki i te matangi. Kua tere tika atura te pai ki uta​—kare e ekoko anga i roto ia i te au kapikipiki anga rekareka.​—Angaanga 27:39, 40.

Inara ma te poitirere ua, kua u atura te pai ki runga i tetai ngai papaku. Ma te kino rava atu oki, kua papaki atu te au ngaru teimaa ki te tuanga muri o te pai ra, e kua ngaangaa ke atura ia. Kua manakoia kia akaruke te au patete katoatoa i te pai! (Angaanga 27:41) Inara kua oronga teia i tetai manamanata. E manganui taua aronga i runga i te pai ra​—kapiti katoa ia Paulo—​e aronga tapekaia. I raro ake i te ture a Roma, ko te tiaki te ka tuku i tana mou auri kia matara ke, ka riro nana e apai te utunga tei akatakaia no taua mou auri ra. Ei akatauanga, me ka oro ke atu tetai tei ta tangata ra, ka riro na te tiaki akono tau kore ra e tutaki ma tona uaorai oraanga.

No te mataku i taua au tupuanga ra, kua manako te au vaeau ra kia tamate i te au mou auri katoa ra. Inara, kare te rangatira vaeau, tei akaoaoa atura kia Paulo i akatika. Kua akaue aia i te aronga katoatoa te ka rauka kia rere atu ki roto i te tai e kia kau atu oki ki uta. Ko te aronga kare e kite i te kau ka tika kia mou atu i te au papa rakau me kare etai apinga no te pai ra. Kua itae takitai atu te au patete ki uta mei taua pai tei ngaaia ra. Kua tau tikai ki ta Paulo au tuatua ra, kare tetai oraanga okotai i mate!​—Angaanga 27:42-44.

Temeio i Melita

Kua kiteaia e taua pupu roiroi ra te akapuanga ki runga i tetai enua ko Melita te ingoa. Te aronga tei noo ki reira “e au tangata reo ke ke,” e “au barbarian” tikai (e barʹba·ros i te reo Ereni).c Inara kare te au tangata Melita i te aronga kino. Ei tuke anga ra, kua tata a Luka, koia tetai oa tutaka aere no Paulo e, “kua takinga-meitaki maira te au tangata maori ra ia matou; kua taʼu iora i te ai, e arataki atura ia matou ravarai ki reira, no te ua e topa ua maira, e no te anu oki.” Kua kapiti atu a Paulo uaorai ki te aronga maori o Melita i te koianga i te vaie e te tukuanga oki ki runga i te ai ra.​—Angaanga 28:1-3, tataanga i raro ake.

Poitirere ua, kua mou atu tetai vipera i te rima o Paulo! Kua manako te au tangata o taua enua ra e e ta tangata a Paulo. Penei kua manako ratou e ka akautunga te Atua i te aronga rave ara na te takino atu anga i te tuanga o tona kopapa tei rave ra i te ara. I na! E poitirere maata to taua aronga maori ra, kua ruru atura Paulo i taua vipera ra ki roto i te ai. Mei ta Luka tataanga akara mata i tuatua ra, “te tapapa ra ratou [ia Paulo] i te ee anga, e te inga anga aia ki raro, ka mate rava atu ei i reira.” Kua taui ke atura taua aronga o Melita ra i to ratou au manako e kua na ko akera ia Paulo, e atua ia.​—Angaanga 28:3-6.

Kua akapou a Paulo e toru marama i muri akera ki Melita, i taua tuatau ra kua rapakau atura aia i te metua o Popilio, koia te tangata maata o taua enua ra, tei ariki akamanuiri maira ia Paulo, e etai atu tei makiia ra. Kapiti katoa oki, kua ruru atura Paulo i te au ua tuatua mou, i te akatupuanga i te au akameitakianga e manganui ki te au tangata akono meitaki o Melita ra.​—Angaanga 28:7-11.

Apiianga no Tatou

I te tuatau o tana angaanga orometua, kua aro atu a Paulo i te au akaaoanga e manganui. (2 Korinetia 11:23-27) I roto i te tataanga i runga akenei, kua riro aia ei tetai tei tapekaia no te tuatua meitaki ra. I reira, kua aro atu aia i te au timataanga manako koreia ra: ko tetai uriia kino e te rokoia anga e te ngaa pai. I roto i teia katoa, kare a Paulo i ngaueue i tana manako anga kia riro ei tetai tangata totomapu no te tuatua meitaki ra. No te au tupuanga, kua tata aia: “I te au ngai katoa e te au mea katoa, kua piki ïa au i te merengo o te pongi, te taonga nui e te ngere. E tika iaku te au mea ravarai nei i te Mesia, ko tei akamaroiroi mai iaku nei.”​—Philipi 4:12, 13.

Auraka rava e tau te au manamanata o te oraanga kia akaparuparu mai i ta tatou manako anga kia riro ei au orometua totomapu no te Atua mou ra! Me ka tu mai tetai timataanga tei manako koreia ra, e tuku tatou i ta tatou apainga ki runga ia Iehova ra. (Salamo 55:22) Ei reira, ka tapapa marie atu tatou kia kite e akapeea tana akariro anga kia rauka ia tatou te akakoromaki anga i taua timataanga ra. I teianei, e rave ua atu tatou i te tavinianga tiratiratu iaia, ma te irinaki anga e te manako maira aia no tatou. (1 Korinetia 10:13; 1 Petero 5:7) Na te vai ngaueue koreanga, noatu eaa te ka tupu mai, ka rauka ia tatou​—mei ia Paulo rai​—kia autu i rungao i te au tu kino.

[Au Tataanga Rikiriki i Raro]