Sirakusa e Ngai Tapuanga i to Paulo Teretereanga

MEI te mataiti 59 T.N., te teretere atura tetai pai mei te enua o Melita i te Metiterenia, e te aere atura ki Itaria. Te akairo ra te pai i tetai akatutuanga o te nga “Maanga tamaroa” a Dia, tei manakoia e ko te nga atua te paruru ra i te au mataro. Te akakite maira te tata Pipiria ko Luka e kua ‘tae atura te pai ki Sirakusa’ i te pae taatai i te tua tonga itinga o Sicily e ‘toru po i te noo anga ki reira.’ (Angaanga 28:11, 12) Ko tetai aronga i runga i te pai ko Luka, ko Arisetareko e te apotetoro ko Paulo, te apainaia ra ki Roma kia akavaia.​—Angaanga 27:2.

Kare tatou e kite me kua akatikaia a Paulo i te eke atu ki Sirakusa. Me kua rauka iaia me kore tona au oa teretere, eaa ra ta ratou ka kite atu?

I te au tuatau o te Ereni e te Roma, mei aiteite rai to Sirakusa tu puapinga ki to Atene e to Roma. Kia tau ki te peu akonoanga, kua akatumuia te reira e te au Korinetia i te 734 M.T.N. No etai tuatau kua rongonui a Sirakusa, e ko te ngai te reira i anau mai ei te au tangata rongonui i te au tuatau taito, mei te tangata tata i te au tua kangakanga ko Epicharmus e te tangata kite karape i te tare ko Archimedes. I te 212 M.T.N., kua autu to Roma ia Sirakusa.

Penei ka oronga mai tetai atoroanga ki teia oire maata ou nei i tetai akatutuanga kia koe no runga ia Sirakusa i te tuatau o Paulo. E rua tuanga o te oire​—ko tetai ko te enua meangiti ko Ortygia, ko te ngai paa i tapu ei te pai o Paulo, e tetai mai ko te enua maata.

I teia tuatau, i runga i te enua ka kite atu koe i te au ngai pururu aere o te iero taito rava atu i Sicily​—te iero o Apolo, no te tuatau o te ono anere mataiti M.T.N. Te vai katoa ra te au poupou o tetai iero tei akatapuia kia Atena, no te tuatau o te rima anere mataiti M.T.N., inara e tuanga te reira i teianei no tetai are pure.

Ka kite mai koe i te oire maata ou tikai i runga i te enua maata, e ka rauka ia koe i te atoro atu i te paka Neapolis te ngai e vai ana te au apinga taito. Vaitata ua atu ki tona ngai tomo anga, te tu ra tetai are teata Ereni. Te akatutu maira te reira i tetai akaraanga umere rava tikai e vai nei o te au are teata Ereni. I te akara atu anga ki te tai, te oronga maira te reira i tetai akanoonooanga manea tikai no te aronga tarekarekaanga. I te ope tikai o te paka i te tua tonga, ko te ngai tamataoraanga Roma no te tuatau e toru anere mataiti T.N. Mei te apa punupunu rai tona akaraanga, e 140 mita i te roangarere e e 119 mita i te atea, e ko te toru o te are teata maatamaata rava atu te reira i Itaria.

Me ka rauka ia koe i te atoro atu ia Sirakusa, e noo koe ki runga i tetai ngai nooanga i te pae taatai i Ortygia, e akatuera koe i taau Pipiria kia Angaanga 28:12, e e akamanako ua i te apotetoro ko Paulo i runga i te pai e teretere marie ua maira ki roto nei i te uapu.

[Tutu/​Mapu i te kapi 30]

(No runga i teia, akara i te puka)

Melita

Sicily

Sirakusa

ITARIA

Rhegium

Puteoli

Roma

[Tutu i te kapi 30]

Au ngai pururu o tetai are teata Ereni i Sirakusa