E Papu te Manakonako Anga Tuakaouanga!
“Te irinaki nei au ki te Atua . . . e tuakaouanga to tei mate.”—ANGAANGA 24:15.
1. Eaa ka raukai ia tatou kia manakonako i te tuakaouanga?
KUA oronga mai a Iehova i te au tumu tau tikai no te manakonako anga i te tuakaouanga. Tei ia tatou tana tuatua e ka tu mai tei mate ra, e tu akaouanga kia ora. E ko tana akakoroanga no te aronga te moe ra i te mate e mea papu ka akatupuia. (Isaia 55:11; Luka 18:27) Ko te tika, kua akaari ke mai ana te Atua i tona mana kia akatu mai i tei mate ra.
2. Akapeea tatou ka puapingai i te manakonako anga tuakaouanga?
2 Na te akarongo i ta te Atua ra i akakoro no te akatuanga i tei mate na roto i tana Tamaiti, ia Iesu Karaiti, ka rauka kia akamaroiroi ia tatou i te au tuatau pekapeka ra. Ka rauka i te papu anga no te manakonako anga tuakaouanga kia tauturu katoa ia tatou kia tamou marie i te tiratiratu ki to tatou Metua i te rangi noatu kia tae ki te matenga. E mea tika, ka akamaroiroiia to tatou manakonako anga tuakaouanga ia tatou e akamanako ra i te au akaora akaouanga tei tataia ra ki roto i te Pipiria ra. Pouroa teia au temeio kua raveia na roto i te mana mei ko mai i te Atu Ngateitei ia Iehova ra.
Kua Rauka ia Ratou to Ratou i Mate ra na te Tuakaouanga
3. Eaa tei akamanaia ra e Elia kia rave i te matenga te tamaiti a tetai vaine takaua i Zarephata?
3 Na roto i tetai akamanako akaouanga mareka no te akarongo tei akakiteia mai e te au kite i mua ake i te akonoanga Kerititiano ra, kua tata te apotetoro ko Paulo: “I rauka akaou oki ta te au vaine tamariki i mate ra i akaora akaouia ïa.” (Ebera 11:35; 12:1) Tetai o taua aronga vaine ra e takaua putaua i te oire Phenia i Zarephata. No tona tu oronga ua ki te peroveta a te Atua ko Elia, kua tamou temeio roaia tana varaoa e te inu oki i te tuatau onge ra tei akaora ra iaia e tana tamaiti katoa oki. I te mate anga tana tamaiti i muri akera, kua tuku iora Elia iaia ki runga i tona uaorai roi, kua pure, kua tipapa akera aia ki runga i taua tamaiti ra e toru taime, e kua pati atura: “E taku Atua, e Iehova e, teia taku tuatua kia koe, e akaoki mai koe i te vaerua, o teianei tamaiti ki roto iaia.” Kua akariro te Atua i te vaerua, me kare ora, kia oki mai ki roto i taua tamaiti ra. (1 Ariki 17:8-24) E akamanako ana i te rekareka o taua vaine takaua ra i te tutaki angaia tona akarongo na te tuakaouanga mua tei tataia ra—ko tana uaorai tamaiti akaperepere ra!
4. Eaa te temeio ta Elisaia i rave i Sunema ra?
4 Tetai atu vaine tei rauka maira tana tei mate na te tuakaouanga kua noo ki te oire i Sunema ra. Ko te vaine aia a tetai tangata ruaine, kua akaari aia i te tu takinga meitaki ki te peroveta ko Elisaia raua ko tona tavini. Kua tutakiia aia ma tetai tamaiti. Inara i etai mataiti i muri iora, kua pati atura aia i taua peroveta ra kia aere mai, e kua kite atura i te tamaiti kua mate i roto i tona are. I muri ake i ta Elisaia pure anga e te raveanga i etai atu takainga, “kua maana akera te kopapa o taua tamaiti ra.” “Kua maretie iora taua tamaiti ra e itu akera maretie anga, e kua puera akera te mata o te tamaiti.” Kare e ekoko anga kua rekareka maata te metua vaine e tana tamaiti oki i taua tuakaouanga ra. (2 Ariki 4:8-37; 8:1-6) Inara mei teaa atu to raua mataora anga me akatuia mai raua ki te oraanga i te ‘tuakaouanga meitaki rava’—tetai te ka akanoo ki mua ia raua i te tika kia kore e mate akaou! Mei teaa ra tetai tumu no te akameitaki anga ki te Atua aroa o te tuakaouanga, koia Iehova!—Ebera 11:35.
5. Akapeea a Elisaia i o atu ei ki tetai temeio noatu rai i muri ake i tona matenga?
5 Noatu rai i muri ake i to Elisaia matenga e te tanumanga, kua akariro te Atua kia ririnui tona au ivi na te vaerua tapu ra. Ka tatau tatou: “Te tanu ra to Iseraela i tetai tangata, i na, kua kite atura ratou i tetai takanava [Moabi]; kua titiri atura ratou i taua tangata ra ki roto i te tanumanga o Elisaia ra; e kia tukuia taua tangata ra ki raro, e tukuia atura i te au ivi o Elisaia, te ora ua aia ra, e kua tu ua maira ki runga i tona vaevae.” (2 Ariki 13:20, 21) Mei teaa ra te poitirere e te mataora o taua tangata ra! E tamanako ana i te rekareka ka tupu me akatuia mai ta tatou au akaperepere ra ki te oraanga kia rotai ma te akakoroanga puapinga maata a te Atua ko Iehova ra!
Kua Akatu Mai te Tamaiti a te Atua i Tei Mate
6. Eaa te temeio ta Iesu i rave i vaitata i te oire i Naina ra, e penei akapeea te akatupu anga a teianei kia tatou?
6 Kua oronga te Tamaiti a te Atua, koia Iesu Karaiti kia tatou i etai tumu tau no te irinakianga e ka rauka kia akatuia mai tei mate ra, ma te manakonako anga no te ora mutu kore. Na tetai tupu anga tei rokoia i vaitata i te oire o Naina ka rauka kia tauturu ia tatou kia kite e ka rauka kia tupu taua temeio ra na roto i te mana orongaia mai e te Atua. I tetai atianga, kua aravei atura Iesu i te aronga te aue ra i te apaianga mai i te kopapa o tetai tangata ou ra ki vao i te oire no te tanumanga. Ko te tamaiti okotai ua aia na tetai vaine takaua. Kua tuatua atura Iesu kiaia: “Auraka e aue.” Akatuki atura aia i taua paata tupapaku ra e kua karanga atura aia: “E teianei tangata ou, ka tu ki runga, te karanga atu nei au kia koe.” Kua tu maira aia e kua tuatua mai te vaa. (Luka 7:11-15) Ka akamaroiroi tika mai teianei temeio i to tatou irinaki anga e e mea papu te manakonako anga tuakaouanga.
7. Eaa tei tupu ma te tamaine a Iairo ra?
7 E akamanako, katoa oki, i tetai tupu anga tei o atura Iairo, ko tetai tutara o te tunako i Kaperenauma ra. Kua pati atura aia ia Iesu kia aere mai e tauturu i tana tamaine akaperepere e 12 mataiti, tei vaitata ra i te mate. Kare i roaia kua ripotiia mai e kua mate taua tamaine ra. I te raurauanga ia Iairo mamae ngakau ra kia akono i te akarongo, kua aere kapiti atura raua ko Iesu ki tona kainga, te ngai e aue ra tetai urupu. Kua kata ratou i ta Iesu tuatua anga kia ratou: “Kare te tamaine nei i mate, kua moe ra.” Inara kua mate tikai aia, mari ra kua akaari atu a Iesu e ka rauka kia akatuia mai te au tangata kia ora mei te akaara maira ia ratou i te moe tinainai ra. Kua mou atura aia i te rima o taua tamaine ra, e kua tuatua atu: “E maine, ka tu ki runga.” Kua tu maira taua tamaine ra i reira, e ‘kua va ua iora ona nga metua’ ma te rekareka maata. (Mareko 5:35-43; Luka 8:49-56) Kare e ekoko anga, ‘ka va ua’ te au mema o te pamiri me akatuia mai ta ratou au akaperepere kua mate ra kia ora ki runga i tetai enua parataito.
8. Eaa ta Iesu i rave i te ngai tanumanga o Lazaro ra?
8 E a ra to Lazaro matenga i to Iesu akavaitata anga ki tona tanumanga e kua akaateaia atu te toka i te ngai tomo anga atu. I muri ake i te pureanga ki mua i te au tangata ra kia kite ei te aronga akara atura e te irinaki ra aia ki runga i te mana orongaia mai e te Atua ra, kua tuatua maata atu a Iesu: “E Lazaro, ka aere mai ki vao!” E kua aere maira aia ki vao! Kua takaiia nga rima e nga vaevae ma te au takai tanumanga, i vaiia oki te mata i te kakau. “Ka tatara, e tuku atu iaia kia aere ana,” ta Iesu i karanga atu. I te kiteanga i teia temeio, e manganui tei aere maira kia akapumaana i nga tuaine o Lazaro, ia Maria raua ko Mareta, kua tuku atura i to ratou akarongo kia Iesu. (Ioane 11:1-45) Kare ainei teianei tataanga e akaki ia koe ma te manakonako anga e ka akatuia mai taau au akaperepere kia ora ki roto i ta te Atua ra ao ou?
9. Eaa ka papu ei ia tatou e ka rauka ia Iesu i teianei kia akatuakaou mai i tei mate ra?
9 Ia Ioane Papetito i roto i te tapekaanga, kua tuku atura Iesu i teianei tuatua akapumaana ngakau: “Te rauka nei te kite i te matapo, . . . kua akatuia tei mate.” (Mataio 11:4-6) I te mea ia Iesu i te enua nei kua akatu mai i tei mate ra, e mea tika rai ka rauka iaia te rave i te reira ei mea ora vaerua akamanaia e te Atua ra. Ko Iesu “te tuakaouanga e te ora,” e mei teaa ra te akapumaana anga kia kite e i te tuatau vaitata ki mua “e akarongo ei te aronga katoa i roto i te rua i tona reo, e kua aere mai ki vao”!—Ioane 5:28, 29; 11:25.
Akamaroiroi Mai Etai Atu Tuakaouanga to Tatou Manakonako Anga
10. Akapeea koe me akataka i te tuakaouanga ripoti muaia ra ma tetai apotetoro?
10 I ta Iesu tono anga i tana au apotetoro ki vao ei aronga tutu Patireia, kua na ko atura: “E akatu i tei mate.” (Mataio 10:5-8) Inara, e raukai kia rave i teia, ka tau ratou kia irinaki i te mana o te Atua. I Iopa i te 36 T.N., kua moe i roto i te mate te vaine akono i te Atua ko Doreka (Tabita) ra. Kua kapiti tana au angaanga meitaki i te maanianga kakau no te au vaine takaua, i roto ra ia ratou te aue anga maata no tona matenga. Kua akapapa te au pipi no tona tanumanga e kua pati atu i te apotetoro ko Petero, penei no te akapumaana anga. (Angaanga 9:32-38) Kua akaatea atura aia i te aronga katoa mei te pia i runga ra, kua pure, e kua karanga atu: “E Tabita, ka tu.” Puera akera tona mata, e kite ia Petero kua noo tu ua maira aia ki runga. Kua akariro teianei ripoti anga mua o te tuakaouanga na tetai apotetoro i te aronga e manganui kia akarongo. (Angaanga 9:39-42) Te oronga katoa maira kia tatou i tetai atu tumu no te manakonako anga i te tuakaouanga ra.
11. Eaa te tuakaouanga openga tei tataia ra i te Pipiria?
11 Kua tupu te tuakaouanga openga tei tataia i te Pipiria ra ki Teroa. I to Paulo noo anga ki reira i tona tutaka anga i te toru o tona tere mitinari, kua tamou marie atura tana ako anga atu e turuaipo akera. No te roiroi e penei no te vera o te au ramepa e manganui e no te au turanga urupu i te ngai uipaanga, kua moe tetai tangata ou ko Eutiko tona ingoa e kua topa iora aia ki raro i te toru o te tupati pia. E tei te rave angaia atu aia “kua mate takiri rava,” kare i ngaro ake te manako. Kua tipapa iora Paulo ki rungao ia Eutiko, na ko akera ki te aronga i reira: “Auraka ana kotou e aue; te vai nei te aʼo i roto iaia.” Kua akakite a Paulo e kua akaoraia te oraanga o te tangata ou ra. Kua “mareka rava akera” te aronga i reira ra. (Angaanga 20:7-12) I teia tuatau, te kite ra te au tavini o te Atua i te akapumaana anga maata i te kite anga e ko to ratou au oa i mua ana i te tavini i te Atua ra ka kite i te tupu anga o te manakonako anga tuakaouanga ra.
Te Tuakaouanga —E Manakonako Anga Tuanga Roa
12. Eaa te irinaki anga ta Paulo i akakite iaia i mua i te Kavana o Roma ko Feliki ra?
12 I te timata anga ki mua i te Kavana o Roma ko Feliki, kua akakite a Paulo: “Te akarongo [nei au] i te au tuatua ravarai i tataia i roto i te ture, e te au peroveta ra: Te irinaki nei au ki te Atua . . . e e tuakaouanga to tei mate, te aronga tuatua-tika e te aronga tuatua-tika kore.” (Angaanga 24:14, 15) Akapeea te au tuanga o te Tuatua a te Atua, mei “te Ture” rai, i te tou anga atu ki te akatuanga i tei mate ra?
13. Eaa ka raukai kia taikuia e i tuatua te Atua i te tuakaouanga ra i tana oronga anga i te totou mua ra?
13 Kua taiku te Atua uaorai i tetai tuakaouanga i tana oronga anga i te totou mua i Edene ra. I te akavaanga i “te ovi taito” ia Satani i te Tiaporo ra, kua tuatua te Atua: “Ka tuku oki au i te ke ia korua ko te vaine, e to uanga e tona uanga; nana e akaparuparu i to mimiti, e naau e akaparuparu i tona pooavae.” (Apokalupo 12:9; Genese 3:14, 15) Te akaparuparu anga i te pooavae o te uanga o te vaine ra te aiteanga ko te tamate anga ia Iesu Karaiti. Me ka akaparuparu te Uanga ra i te mimiti o te ovi i muri iora, ka tika kia akatuia mai a Karaiti mei te mate maira.
14. Akapeea a Iehova i riro ei ‘kare i te Atua no tei mate, no tei ora ra’?
14 Kua akakite a Iesu: “Kareka te tuakaouanga o te aronga i mate, kua akakite mai oki a Mose, iaia i karanga atu i te Atu i te pu ngangaere ra, i ‘te Atua no Aberahama, e te Atua no Isaaka, e te Atua no Iakoba.’ Kare oki aia i te Atua no tei mate, no tei ora ra; te ora katoatoa ra iaia.” (Luka 20:27, 37, 38; Exodo 3:6) Kua mate ke ana a Aberahama, a Isaaka, e Iakoba, inara kua papu roa te akakoro anga a te Atua kia akatuakaou ia ratou ra kia akatupuia e kiaia kua riro ratou mei te mea rai e te ora ra.
15. Eaa i raukai ia Aberahama tetai tumu no te irinaki anga i te tuakaouanga ra?
15 E tumu rai ta Aberahama no te manakonako i te tuakaouanga ra, no te mea ia raua ko tana vaine, ko Sara, kua ruaine, e kua mate to raua rauka anga kia anau tamariki, kua akaora temeio maira te Atua i to raua mana anau anga. Kua aite teianei mei tetai tuakaouanga rai. (Genese 18:9-11; 21:1-3; Ebera 11:11, 12) I te vaitata anga ta raua tamaiti, koia Isaaka, i te 25 mataiti, kua tuatua te Atua kia Aberahama kia tuku atinga iaia. E ia Aberahama kua papa ra kia ta ia Isaaka kia mate, kua tapu atura te angera a Iehova i tona rima. Kua karanga oki a Aberahama “e tika i te Atua kia akatu mai iaia mei te mate maira: e kua rauka akaou maira iaia mei reira mai ei aiteanga.”—Ebera 11:17-19; Genese 22:1-18.
16. Te moe ra Aberahama i roto i te mate i teianei, e te tatari ra i teaa?
16 Kua manakonako a Aberahama i tetai tuakaouanga i raro ake i te tutara a te Mesia, koia te Uanga taputouia ra. Mei tona ngai akara maianga i tona oraanga i mua ake i te riro anga ei tangata, kua kite mai te tamaiti a te Atua i te akarongo o Aberahama ra. Ei te tangata ko Iesu Karaiti ra, kua tuatua aia ki te au ngati Iuda ra: “I rekareka ana oki to kotou metua ko Aberahama i toku nei tuatau kia kite aia.” (Ioane 8:56-58; Maseli 8:30, 31) I teianei te moe ra a Aberahama i roto i te mate, te tatari ra i tetai tuakaouanga ki te oraanga ki runga i te enua i raro ake i te Patireia Mesia o te Atua ra.—Ebera 11:8-10, 13.
Akakite Anga mei te Ture Maira e te Au Salamo
17. Akapeea “te au apinga akanooia maira i te Ture” i te tou atu anga ki te tuakaouanga o Iesu Karaiti ra?
17 Kua rotai to Paulo manakonako anga tuakaouanga ma “te au apinga akanooia maira i te Ture.” Kua tuatua te Atua ki to Iseraela: “E apai mai kotou i tetai ruru i taua popo o ta kotou kai akaū ki te taunga ra. E [ia Nisana 16] nana e ruru i taua ruru sitona ra ki mua i te aroaro o Iehova ra, kia marekaia mai na kotou.” (Levitiku 23:9-14) Penei ma teianei ture i roto i te manako, kua tata Paulo: “Kua tu akaou tikai ra te Mesia mei te mate maira, kua riro ïa ei momua no te aronga i topa te moe ra.” Ei “momua,” kua akatuakaouia mai a Iesu ia Nisana 16, 33 T.N. I muri akera i te tuatau o tona parutia, ko te tuakaouanga o te aronga i ‘muri akera’—tana au pipi akatainuia i te vaerua ra.—1 Korinetia 15:20-23; 2 Korinetia 1:21; 1 Ioane 2:20, 27.
18. Akapeea ta Petero akaari anga e kua totouia mai to Iesu tuakaouanga i roto i te au Salamo ra?
18 Te oronga katoa maira Salamo i te turu anga no te tuakaouanga. I te ra o Penetekote 33 T.N., kua taiku maira Petero te apotetoro mei ia Salamo 16:8-11, i te na ko anga: “Te na ko maira oki a Davida [ia Karaiti], Kua tuku au ia Iehova ei mua ua rai iaku, tei toku rima katau oki aia, kia kore au e ngaueue: I marekaʼi toku ngakau, e te rekareka nei toku arero; ka moe katoa oki toku kopapa nei ma te tiaki: kare oki koe e vaoo i toku vaerua i ade; kare oki koe e tuku i to Mea Tapu ra, kia kite i te pe.” Kua kapiti katoa atu Petero: “[Ko Davida] ra i kite takere ana i te reira, i tuatuaʼi i te tuakaouanga o te Mesia, kare tona vaerua e vaooia i ade, e kare tona kopapa i tuku uaia kia kite i te pe. Ko taua Iesu nei rai ta te Atua i akatu akenei ki runga.”—Angaanga 2:25-32.
19, 20. I naea a Petero i tatau mai ei ia Salamo 118:22, e akapeea te akapiri anga i teia ma te matenga e te tuakaouanga o Iesu?
19 I etai ra i muri iora, kua tu atu a Petero ki mua i te Sunederi e kua tatau akaou atu mei te au Salamo ra. Kua uriia atu i akapeea tana rapakau anga i tetai tangata pirikoki ra, kua tuatua atu te apotetoro ra: “Kia kite kotou ravarai, e te tangata katoatoa o Iseraela nei e, no te ingoa o Iesu Mesia no Nazareta, ta kotou i akasatauro io nei, ko tei akatuia mai e te Atua mei te mate maira, nona i tu atu ei teianei tangata i mua i to kotou aroaro ma te maki kore nei. ‘Ko [Iesu] te toka teia i akarukeia e kotou, e te aronga patu are, e kua akariroia io nei ïa ei toka tiavā.’ Kare rava oki e ora i tetai ke: kare atu oki e ingoa i akakiteia mai ki te tangata i raro ake i teianei rangi, e oraʼi tatou nei.”—Angaanga 4:10-12.
20 Kua tatau mai a Petero i konei ia Salamo 118:22, ma te akapirianga i ta te reira i tuatua ki to Iesu ra matenga e te tuakaouanga. Kua akakeuia e to ratou au arataki akonoanga, kua kopae ke te au ngati Iuda ra ia Iesu. (Ioane 19:14-18; Angaanga 3:14, 15) No te kopaeanga ‘a te aronga patu ra i te toka’ i tupu ei to Karaiti matenga, inara ko te riroanga ‘taua toka ra ei upoko no te tiava’ kua akakite mai i tona akatu angaia mai ei vaerua kaka i te rangi ra. Mei ta te tata taramo i totou maira, ‘ko ta Iehova uaorai teia i oronga mai.’ (Salamo 118:23) No te akariro anga i te “toka ra” ei Upoko no te tiava ra kua kapiti atu i te akateiteianga iaia ei Ariki Akataoongaia.—Ephesia 1:19, 20.
Turu Anga na te Manakonako Anga Tuakaouanga
21, 22. Eaa te manakonako anga ta Iobu i akakite, tei tataia ia Iobu 14:13-15, e akapeea ka raukai i teia te akapumaana i te aronga mamae ngakau i teia tuatau nei?
21 Noatu e kare tatou uaorai i akara atu i tetai tei akatuia maira mei te mate, kua kite tatou i etai tataanga no te Tuatua Tapu te ka akapapu mai kia tatou i te tuakaouanga ra. No reira, ka rauka ia tatou, kia irinaki i te manakonako anga tei akakiteia mai e te tangata tuatua tika ko Iobu. I tona mamaeanga, kua pati aia: “Naringa koe [e Iehova] e akapipini iaku ki te vaarua . . . angairi koe e akataka i te taime noku, ka maara mai ei iaku nei! Kia mate te tangata nei, ka ora akaou ainei aia? . . . Naau e kapiki mai, e naku e io atu kia koe: e tangi rai koe ki te angaanga a to rima ra.” (Iobu 14:13-15) Ka ‘tangi ra te Atua ki te angaanga a tona rima ra,’ ma te inangaro maata anga kia akatuakaou mai ia Iobu ra. Mei teaa ra te manakonako anga ta te reira e oronga maira no tatou!
22 Penei ka riro tetai mema o te pamiri tei mataku ra i te Atua kia maki kinoia, mei ia Iobu ra, e penei ka tuku ua ki te enemi ra ki te mate. Penei ka tae te roimata o tei mamae ngakau, mei ia Iesu i aue ra i te matenga o Lazaro. (Ioane 11:35) Inara mei teaa te akapumaana anga kia kite e ka kapiki mai te Atua i te aronga tana i maara maira e ka io mai! Ka riro e mei te mea rai e kua oki mai ratou mei tetai tere—kare e maki e kare e tu paruparu, mari ra te ora meitaki ra.
23. Akapeea tetai papaki i te akakite anga i to ratou irinaki anga i te manakonako anga i te tuakaouanga ra?
23 Kua akakeu te matenga o tetai Kerititiano ruaine tiratiratu ra i tona au oa akarongo kia tata atu: “E ariki mai i to matou aroa oonu no te takake anga to kotou metua vaine. E tuatau poto ua te vaira e turou mai ei tatou iaia—i te tu manea e te maroiroi!” Kua tuatua nga metua tei takake ra ta raua tamaiti: “Mei teaa ra to maua akara atuanga ki te tuatau e ara mai ei a Jason! Ka akara aia takapini iaia e ka kite atu i te Parataito tana i manakonako atu. . . . Mei teaa ra tetai akakeu anga no te aronga o ta tatou tei akaperepere iaia, kia tae atu ki reira katoa.” Ae, e mei teaa oki to tatou akameitaki anga e te papu ra te manakonako anga tuakaouanga ra!
Eaa Taau Pauanga?
• Akapeea ka raukai i te akarongo i ta te Atua ra oronga anga no te akatuanga i tei mate ra i te akapuapinga anga ia tatou?
• Eaa te au tupu anga tataia ki roto i te au Tuatua Tapu te oronga tumu maira kia tatou no te manakonako anga i te tuakaouanga ra?
• Eaa ka raukai kia tuatuaia e ko te tuakaouanga tetai manakonako anga tuanga roa?
• Eaa te manakonako akapumaana anga ka rauka ia tatou kia irinaki atu no tei mate ra?
[Tutu i te kapi 10]
Ma te mana mei ko mai ia Iehova ra, kua akaora a Elia i te tamaiti ou a tetai vaine takaua
[Tutu i te kapi 12]
I ta Iesu akatu anga i te tamaine a Iairo kia ora, kua va ua tona nga metua ma te rekareka anga
[Tutu i te kapi 15]
I te ra o Penetekote 33 T.N., kua akakite mataku kore te apotetoro ko Petero e kua akatuakaouia mai a Iesu mei te mate ra