Te Tumu i Akamaara ai Tatou i te Kaikai Anga Aiai a te Atu

1, 2. Eaa ta Iesu i rave i te aiai Nisana 14, 33 T.N.? (Akara i te tutu mua o teia atikara.)

I IERUSALEMA i te po ia Nisana 14, 33 T.N., e po marangi ïa. Kua akono a Iesu e tana au apotetoro i te Pasa ei akamaara ki te tangata i ta Iehova akaora anga i to Iseraela mei ia Aiphiti e 1,500 mataiti i topa. Kua akanoo a Iesu i tetai kaikaianga puapinga ma tana au apotetoro tiratiratu e 11, e kaikaianga te ka raveia i te au mataiti ravarai ei akamaara i tona matenga.​—Mataio 26:1, 2.

² Kua pure a Iesu, kua tuku atu i te varaoa opue kore ki tana au apotetoro e kua karanga e: “Ka rave, ka kai.” E oti kua rave aia i tetai kapu uaina, kua pure akaou e kua karanga e: “Ka inu na kotou ravarai.” (Mataio 26:26, 27) Te akatutu maira te varaoa e te uaina i tetai mea puapinga. E maata te au mea ou ta te au apotetoro akarongo mou a Iesu i tamou mai i taua po ra.

3. Eaa te au uianga ta tatou ka uriuri i roto i teia atikara?

³ Kua inangaro a Iesu i tana au pipi kia akamaara i tona matenga i te au mataiti ravarai. Kua kapikiia taua oroa ra i muri mai e ko te ‘Kaikai Anga Aiai a te Atu,’ me kore ko te Akamaaraanga. (1 Korinetia 11:20) I roto i teia atikara ka uriuriia teia au uianga. Eaa ra tatou ka akamaara ai i te matenga o Iesu? Eaa ta te varaoa e te uaina e akatutu maira? Akapeea tatou me akapapa no te Akamaaraanga? Koai ma ka tau kia kai i te varaoa e kia inu i te uaina? E akapeea te au Kerititiano i te akaari anga e te akaperepere ra ratou i to ratou manakonakoanga?

TE TUMU I AKAMAARA AI TATOU I TE MATENGA O IESU

4. Eaa te ka rauka ia tatou no te matenga o Iesu?

⁴ No te mea kua ara a Adamu, kua iri mai te ara e te mate ki runga ia tatou. (Roma 5:12) Kare tetai ua atu tangata ara e rauka i te oronga ki te Atua i tona oraanga me kore i te oraanga o etai ke ei oko. (Salamo 49:6-9) Tera ra kua akaatinga a Iesu i tona oraanga apa kore no tatou e kua oronga i te puapinga o taua oko ra ki te Atua. No tana i rave, kua akatuera a Iesu i te mataara no tatou kia rauka te manakonakoanga no te ora mutu kore, e kia akarangatiraia mei te ara e te mate.​—Roma 6:23; 1 Korinetia 15:21, 22

5. (a) Akapeea tatou i kite ei e te aroa maira te Atua raua ko Iesu ia tatou? (e) Eaa ra tatou ka aere ei ki te Akamaaraanga?

⁵ Kua akaari te Atua i tona aroa no te tangata na roto i te oko. (Ioane 3:16) Kua akaari katoa a Iesu i tona aroa na te akaatinga anga i tona uaorai ora no tatou. I mua ake ka aere mai ei aia ki te enua nei, “tei te au tamariki a te tangata ra [to Iesu] mataora anga.” (Maseli 8:30, 31) Rekareka tikai tatou i ta Iehova raua ko Iesu i rave no tatou! Ko te tumu teia i akono ei tatou i te akauenga a Iesu kia “pera kotou ei manako anga iaku,” na te aere anga ki te Akamaaraanga.​—1 Korinetia 11:23-25.

TA TE OROA E AKATUTU MAIRA

6. Eaa ta tatou i mārama no runga i te varaoa e te uaina i ko i te Akamaaraanga?

⁶ I ko i te kaikaianga openga a Iesu e tana au pipi, kare a Iesu i rave ana i tetai temeio kia taui i te varaoa ki tona kopapa me kore te uaina ki tona toto. Kua tuatua aia no runga i te varaoa e: “Ko toku kopapa teia.” Tuatua aia i te uaina e: “Ko toku toto teia, no te koreromotu ou ra, tei akamaringiia no te tangata e manganui.” (Mareko 14:22-24) Taka ua ra e, e akatutu ua anga te varaoa e te uaina.

7. Eaa ta te varaoa opue kore e akatutu maira?

⁷ I taua aiai ra, kua taangaanga a Iesu i te varaoa opue kore tei toe mai mei te oroa Pasa. (Exodo 12:8) Tetai taime i roto i te Pipiria, te akatutu maira te opue i te ara. (Mataio 16:6, 11, 12; Luka 12:1) Ko te varaoa opue kore ta Iesu i taangaanga, te akatutu maira i tona kopapa ara kore. (Ebera 7:26) Ko te tumu teia i taangaanga ai tatou i te varaoa opue kore i ko i te Akamaaraanga.

8. Eaa ta te uaina e akatutu maira?

⁸ Ko te uaina ta Iesu i taangaanga, te akatutu maira i tona toto, koia oki tona ora, mei te uaina rai ta tatou e taangaanga ra i ko i te Akamaaraanga i teia tuatau. I tetai ngai i vao mai ia Ierusalema ko Golagota te ingoa, kua mate aia no tatou e kua oronga i tona ora “kia matara te ara.” (Mataio 26:28; 27:33) Me kua āriki rekareka tatou i taua apinga aroa ra, ka akapapa tatou ia tatou uaorai no te Akamaaraanga i te au mataiti ravarai. Akapeea tatou me rave i teia?

AU MATAARA KIA AKAPAPA

9. (a) Eaa ra tatou ka rave ei i te tatauanga Pipiria no te Akamaaraanga? (e) Eaa toou manako no te oko?

⁹ Tetai mataara i te akapapa no te Akamaaraanga koia oki kia rave i te tatauanga Pipiria no te Akamaaraanga te ka kiteaia i roto i te puka Examining the Scriptures Daily. Na te tatau anga i te au tua Pipiria e tauturu ia tatou kia akamanako oonu i ta Iesu i rave i mua ake i tona matenga.a (Akara i te tataanga rikiriki i raro.) “E tapapa ua ana matou i te Akamaaraanga,” i tata ai tetai tuaine. “E mea inangaroia teia i te au mataiti ravarai. Maara iaku toku tu anga i roto i te kainga tanu mate . . . , i te akara atu anga i toku papa tei mate e kua tukia toku ngakau no te oko. . . E tika, kua kite au i te au irava e akapeea me akamārama i te reira! Inara toku akamanako anga i te tu kino tikai o te mate, kua rekareka tikai toku ngakau no te kite anga i te ka rauka ia tatou na roto i taua oko akaperepereia ra.” Na te akamanako oonu anga i te atinga o Iesu e tauturu ia tatou tataki tai kia akapapa no te Akamaaraanga.

10. Eaa atu ta tatou ka rave kia akapapa no te Akamaaraanga?

¹⁰ Tetai atu mataara i te akapapa ia tatou koia oki kia akamaata i to tatou taime i roto i te angaanga orometua, i te pati anga i te tangata kia aere mai ki te Akamaaraanga. Penei ka painia tauturu tatou. Me tuatua tatou ki etai ke no runga i te Atua, tana Tamaiti, e te manakonakoanga no te ora mutu kore, ka merengo tatou no tei rave i ta te Atua e anoano maira ia tatou.​—Salamo 148:12, 13

11. Eaa a Paulo i karanga ai e kua kai e kua inu tetai au tangata Korinetia i te oroa ma te tau kore?

¹¹ Me akapapa no te Akamaaraanga, e akamanako oonu i ta Paulo i tata ki te au Kerititiano i Korinetia. (E tatau ia 1 Korinetia 11:27-34.) Kua akakite aia e ko tetai ua atu tangata tei kai i te varaoa e tei inu i te uaina ma te tau kore, me kore kare aia i akangateitei i te reira, ka apa aia no runga i “te kopapa e te toto o te Atu.” No reira me rave tetai tangata akatainuia i te tarevake e kua kai i te varaoa e kua inu i te uaina, “kua kai ïa e kua inu i te akaapa nona uaorai.” I te tuatau o Paulo, e manganui te au tangata Korinetia tei rave i te tarevake. Penei kua kaikai maata e kua inu maata ratou i te uaina i mua ake e i te tuatau o te Akamaaraanga, e kua varevarea moe. Te akaari ra ratou i te tu akangateitei kore no te Akamaaraanga, no reira i to ratou kai anga i te varaoa e te inu anga i te uaina, kare te Atua i mareka.

12. (a) Kua akaaite atu a Paulo i te Akamaaraanga ki teaa? Eaa te akamatakiteanga tana i oronga ki te aronga tei kai i te varaoa e tei inu i te uaina? (e) Eaa ta tetai tei kai i te varaoa e tei inu i te uaina ka rave me kua o aia ki roto i te ara kino?

¹² Na te akaaite anga i te Akamaaraanga ki tetai kaikaianga, kua akamatakite a Paulo i te aronga tei kai i te varaoa e tei inu i te uaina e: “Kare e tika ia kotou kia inu i te kapu a te Atu, e te kapu a te au demoni: e tika ia kotou kia kai i te kaingakai a te Atu ra, e te kaingakai a te au demoni.” (1 Korinetia 10:16-21) Me rave tetai tangata e kai ana i te varaoa e te inu ra i te uaina i tetai ara kino, ka anoanoia aia i te pati ki te aronga pakari no te tauturu. (E tatau ia Iakobo 5:14-16.) Me kua tataraara aia i tana i rave, kare aia e akaari i te tu akangateitei kore no te atinga o Iesu me kai aia i te varaoa e me inu i te uaina i ko i te Akamaaraanga.​—Luka 3:8.

13. Eaa tatou ka pure ei no runga i te manakonakoanga ta te Atua i taputou mai kia tatou?

¹³ Ka tau katoa tatou kia akapapa no te Akamaaraanga na te pure anga e te akamanako oonu anga i te manakonakoanga ta te Atua i taputou mai kia tatou tataki tai. Kare roa tatou e inangaro i te akaari i te tu akangateitei kore no te atinga o Iesu. No reira kare tatou e kai i te varaoa e e inu i te uaina me kare i papu ia tatou e ko tatou tetai o te aronga akatainuia. Koai ma i reira te ka tau kia kai i te varaoa e kia inu i te uaina?

KOAI MA TE KA TAU KIA KAI I TE VARAOA E KIA INU I TE UAINA?

14. No te mea e tuanga te aronga akatainuia no te koreromotu ou, eaa ta ratou ka rave i ko i te Akamaaraanga?

¹⁴ Kua papu tikai i te aronga e kai ra i te varaoa e e inu ra i te uaina i ko i te Akamaaraanga e e tuanga ratou no te koreromotu ou. Kua tuatua a Iesu no te uaina e: “Teianei kapu, ko te koreromotu ou ïa i toku nei toto.” (1 Korinetia 11:25) Kua papau a Iehova i te Ture koreromotu ki te ngati Iseraela inara i muri mai, kua tuatua aia e ka komono aia i te reira ki tetai koreromotu ou. (E tatau ia Ieremia 31:31-34.) Kua papau te Atua i teia koreromotu ou ki te aronga akatainuia. (Galatia 6:15, 16) Na te matenga o Iesu i akamana i teia koreromotu. (Luka 22:20) Ko Iesu te Rotopu o teia koreromotu ou. E tuanga te aronga akatainuia no te koreromotu ou te ka kapiti atu kia Iesu i te rangi.​—Ebera 8:6; 9:15.

15. Koai ma tei riro ei tuanga no te koreromotu o te Patireia? Me kua vai tiratiratu ratou, eaa to ratou tikaanga?

¹⁵ Kua kite te aronga akatainuia e e tuanga katoa ratou no te koreromotu o te Patireia. (E tatau ia Luka 12:32.) Kua papauia teia koreromotu i rotopu ia Iesu e tana au pipi akatainuia tei kapiti atu ki “tona au mamae.” (Philipi 3:10) Ko te aronga akatainuia tiratiratu i teia tuatau, e tuanga katoa ratou no teia koreromotu. Ka tutara ratou ei au ariki e Karaiti i te rangi e mutu kore ua atu. (Apokalupo 22:5) Ko ratou tei tau kia kai i te varaoa e kia inu i te uaina i te tuatau o te Kaikai Anga Aiai a te Atu.

16. Akamārama mai i te aiteanga o Roma 8:15-17.

¹⁶ Papu tikai i te aronga akatainuia e e tamariki ratou na te Atua e ka tau ratou kia kai i te varaoa e kia inu i te uaina. (E tatau ia Roma 8:15-17.) Akakite a Paulo e te kapiki ra ratou e: “E Aba, e taku Metua.” Ko te aiteanga o te tuatua “Aba” i roto i te reo Arama, e tu aroa te reira mei te tuatua “papa,” e e tu ngateitei mei te tuatua “metua tane.” Te akaari maira teia i te pirianga akaperepere i rotopu i te aronga akatainuia e Iehova tei “akatamariki” ia ratou. Na te vaerua o te Atua “tei akakite ïa e” ko ratou tana au tamariki akatainuia. Kare te aiteanga e kare ratou e inangaro i te noo ki te enua nei. Kua kite ra ratou e me vai tiratiratu ratou e tae ua atu ki te mate, ka riro ratou ei au ariki e Iesu i te rangi. E kua kite ratou e ko ‘te akatainuanga tei rauka ia ratou,’ no ko mai ïa ia Iehova. I teia tuatau, kare e maata ana te 144,000 tamariki a te Atua e toe nei i te enua nei. (1 Ioane 2:20; Apokalupo 14:1) E pirianga vaitata to ratou kia Iehova no reira ratou i kapiki ei iaia e “E Aba, e taku Metua.”

AKAPEREPERE I TOOU MANAKONAKOANGA AKATUMUIA KI RUNGA I TE PIPIRIA

17. Eaa te manakonakoanga o te aronga akatainuia? Akapeea ratou i kite ei e ko ratou te aronga akatainuia?

¹⁷ Me ko koe tetai o te au Kerititiano akatainuia, ka tuatua putuputu koe no runga i toou manakonakoanga i te rangi i roto i taau pure. E ka riro mai te au Tuatua Tapu ei akakeuanga ririnui ki runga ia koe. Ei akaraanga, me tuatua te Pipiria no te akaipoipoanga i te rangi i rotopu ia Iesu e tana “vaine,” ka kite koe e te tau ra teia kia koe e te tapapa ra koe i te reira. (Ioane 3:27-29; 2 Korinetia 11:2; Apokalupo 21:2, 9-14) Me akataka mai te Pipiria i to te Atua aroa no te aronga akatainuia, ka kite koe e te tuatua ra aia kia koe. E me tatau koe i te au ikuikuanga no te aronga akatainuia i roto i te Tuatua a te Atua, ka akakeuia koe e te vaerua tapu kia akono i te reira. Ka riro te vaerua tapu o te Atua i te “akakite ïa” e tei te rangi toou manakonakoanga.

18. Eaa te manakonakoanga o te “mamoe ke atu”? Eaa toou manako no runga i teia manakonakoanga?

¹⁸ Me ko koe tetai o te “aronga maata rava” o te “mamoe ke atu,” kua oronga te Atua i te tikaanga noou kia noo ki runga i te enua Parataito e mutu kore ua atu. (Apokalupo 7:9; Ioane 10:16) Eaa toou manako no te tuatau ki mua? Ka rekareka koe me akamanako oonu i ta te Pipiria e akakite maira no te Parataito a te tuatau ki mua. Te tapapa atura koe kia noo e toou ngutuare tangata e te au oa i roto i tetai ao kua kī i te au. Inangaro koe kia kite i te openga o te onge, te putaua, te mamaeanga, te maki e te mate. (Salamo 37:10, 11, 29; 67:6; 72:7, 16; Isaia 33:24) Inangaro tikai koe kia kite i te aronga akaperepereia e koe me akatuia mai ratou mei te mate. (Ioane 5:28, 29) Ka akameitaki maata koe ia Iehova no teia manakonakoanga umere! Noatu e kare koe e kai i te varaoa e e inu i te uaina, ka tae mai koe ki te Akamaaraanga no te mea kua āriki rekareka koe i te atinga oko o Iesu.

KA TAE MAI AINEI KOE?

19, 20 (a) Akapeea e rauka ai ia koe te ora mutu kore? (e) Eaa koe ka aere ei ki te Akamaaraanga?

¹⁹ Ka rauka ia koe te ora mutu kore i runga nei i te enua me kore i te rangi, me akatupu koe i te akarongo ki roto i te Atua ko Iehova, ia Iesu Mesia, e te oko. Me tae mai koe ki te Akamaaraanga, akamanako oonu no runga i toou manakonakoanga e te puapinga maata o te matenga o Iesu. Muri ake i te opunga rā i te Varaire, Aperira 3, 2015, mirioni ua atu tangata takapini i teia ao ka aere ki te Akamaaraanga i ko i te au Are Uipaanga Patireia e tetai atu au ngai ke.

²⁰ Me akapapa meitaki tatou i te aere ki te Akamaaraanga, ka āriki rekareka tatou i te atinga oko o Iesu. Na te akarongo meitaki anga ki te ako i ko i te Akamaaraanga, ka akakeuia koe kia akaari i te aroa no etai ke e te akakite kia ratou i to Iehova aroa e tona akakoroanga no tatou pouroa. (Mataio 22:34-40) Tauta kia tae mai koe.