Tatarianga i te ‘Anoano Maata ma te Arōrō’

“Te anoano maata o te au mea angaia nei ma te arōrō, te tatari nei ïa i te akakite angaia mai i te tamariki a te Atua.”​—ROMA 8:19.

1. Eaa te tu aiteite i rotopu i te turanga o te au Kerititiano o teia tuatau e to te au Kerititiano o te anere mataiti mua ra?

TE AKATUTU nei te turanga o te au Kerititiano mou i teia tuatau i to te au Kerititiano o te anere mataiti mua ra. Na tetai totou i tauturu i te au tavini o Iehova i taua tuatau ra kia akataka e aea te Mesia e mama mai ei. (Daniela 9:24-26) Na taua totou rai i akakite mai i te akapou anga ia Ierusalema inara kare e au apinga e raukai i te au Kerititiano te kite na mua ake e aea e akapouiai taua oire ra. (Daniela 9:26e, 27) Mei te reira katoa oki, na tetai totou i akariro i te Aronga Apiipii Pipiria ngakau tae o te 19 anere mataiti ra kia aroro atu. Na te kapitianga i te “itu ua atu te tuatau” ia Daniela 4:25 ra ma “to te etene tuatau,” kua akataka ratou e ka rauka ia Karaiti te mana Patireia i te 1914. (Luka 21:24, King James Version; Ezekiela 21:25-27) Noatu rai e manganui te au totou o te Puka a Daniela, kare tetai o te reira i akakite ki te Aronga Apiipii Pipiria i teia tuatau kia akataka i te tuatau tikai e akapouiai te akatereanga a Satani o te au mea nei. (Daniela 2:31-44; 8:23-25; 11:36, 44, 45) Inara, kare e roaia ka rokoia mai teia, no te mea te noo nei tatou i “te tuatau openga ra.”​—Daniela 12:4.a

Tu Matakite i te Tuatau o to Karaiti Parutia

2, 3. (a) Eaa te akakite maira i te akapapu anga maata e te noo nei tatou i te tuatau o to Karaiti parutia i te mana ariki? (e) Eaa te akaari maira e ka tau kia vai matakite te au Kerititiano i te tuatau parutia o Iesu Karaiti ra?

² E tika, kua tuku tetai totou i te au Kerititiano ki roto i tetai tu tapapa anga i mua ake i to Karaiti akataoonga angaia ma te mana Patireia ra i te 1914. Inara ko te “akairo” ta Karaiti i oronga ra no tona parutia e te openga o te akatereanga o te au mea nei te akakite maira i te au tupuanga. E ko te maata anga o te reira ka kiteia i muri ake i te akamata anga tona parutia. Taua au tupu anga ra​—e au tamaki, e onge kai, e au ngaruerue enua, e au maki mate, e tupu maata te rave kino, e takinga kino i te au Kerititiano, e te tutuanga i te tuatua meitaki o te Patireia i te ao katoa nei​—ka riro ei akapapu anga maata e te noo nei tatou i te tuatau o to Karaiti parutia i tona mana ariki anga i teianei.​—Mataio 24:3-14; Luka 21:10, 11.

³ Inara, ko te tumu katoa o ta Iesu ako anga ki tana au pipi i tona akarukeanga koia oki: “E matakite oki ia kotou, e akamaroiroi, . . . ka ara.” (Mareko 13:33, 37; Luka 21:36) Na te tatauanga matakite i te katoa anga o teianei au akamaroiroi anga kia ara te akaari ra e kare a Karaiti i tuatua maata ana no tetai vai matakite anga no te akairo o te akamataanga o tona parutia. Kareka ra, te ikuiku ra aia i tana au pipi mou kia matakite i te tuatau o tona parutia. Eaa ra ta te au Kerititiano mou te tau ra kia vai matakite?

4. Eaa te akakoro anga te ka akatupuia na te akairo ta Iesu i oronga ra?

⁴ Kua oronga atu a Iesu i tana totou meitaki i te pauanga ki te uianga: “E akakite mai koe ia matou i te tupu anga o taua au mea nei [te au tupu anga te ka taki atu ki te akapou anga o te akatereanga ngati Iuda o te au mea nei], e te akairo o toou [parutia], e te openga o te ao nei.” (Mataio 24:3, akaaite ia NW.) Kare te akairo akakiteia maira e akataka anake i te parutia o Karaiti mari ra i te au tupu anga katoa oki te ka taki atu ki te openga o teianei akatereanga kino o te au mea nei.

5. Akapeea ta Iesu akakite anga e noatu te vai nei tona parutia i te pae vaerua, ka “aere mai” ra aia a muri akera?

⁵ Kua akakite a Iesu e i te tuatau o tona “parutia” (pa·rou·siʹa, i te Ereni) ka aere mai aia ma te mana e te kaka maata. No taua “aere anga mai” ra (tei akakiteia e te au tu o te tuatua Ereni erʹkho·mai), kua akakite aia: “Ei reira e kiteaʼi te akairo o te Tamaiti a te tangata ki runga i te rangi: e ei reira te au kopu-tangata ravarai o te ao nei e aue ei, kia kite ratou i te Tamaiti a te tangata i te aere anga mai na roto i te tiao rangi, ma te mana e te kakā maata. . . . E teianei kia kite kotou i tetai parabole i te suke nei; kia tupu te kao, e kia puera te rau, te kite ra kotou e, kua vaitata i akaū i reira. Koia katoa kia kite kotou i taua au mea katoa nei, kua vaitata ïa [Karaiti], tei te pae ngutupa, kia kite oki kotou. . . . Kia matakite oki, kare kotou i kite i te ora e tae mai ei to kotou Atu. . . . E teianei kia vai teateamamao rai kotou no te mea, ei te ora manako koreia e kotou, e tae mai ei te Tamaiti a te tangata.”​—Mataio 24:30, 32, 33, 42, 44.

Eaa ka Aere Mai ei a Iesu Karaiti?

6. Ka akapeea te akatupu anga i te akapou anga ia “Babulonia Maata”?

⁶ Noatu rai e tei konei aia ei Ariki mei te 1914 mairai, ka tika kia akava a Iesu Karaiti i te au akatereanga e te aronga takitai oki i mua ake i te raveanga akapou anga ki runga i te aronga tana ka kite e te rave kino ra. (Akaaite ia 2 Korinetia 5:10.) Kare e roaia ka tuku a Iehova ki roto i te au manako o te au tutara poritiki kia akapou ia “Babulonia Maata,” koia te patireia akonoanga pikikaa o te ao nei. (Apokalupo 17:4, 5, 16, 17) Kua tuatua tikai te apotetoro ko Paulo e ka akapou a Iesu Karaiti i “taua tangata ara ra”​—koia te au orometua apoteiti o Kerititome, ko tetai tuanga manako maataia no “Babulonia Maata.” Kua tata a Paulo: “Ei reira taua Kino ra e akakiteiaʼi, ko ta te Atu ïa e rave e pou takiri atu i te aʼo o tona vaa, e e akakore takiri atu i te kakā o tona [parutia ra].”​—2 Tesalonia 2:3, 8, akaaite ia NW.

7. Kia tae maira te Tamaiti a te tangata ma tona kaka, eaa te akavaanga tana ka rave?

⁷ I te tuatau poto ki mua, ka akava a Karaiti i te au tangata o te pa enua na runga i te tumuanga o ta ratou akono anga i tona au taeake te vai nei i te enua. Ka tatau tatou: “E kia tae maira te Tamaiti a te tangata ma tona kakā, e te aronga angela tapu ravarai, ei reira aia e noo ei ki rungao i tona terono kakā; E akaputuputuia to te pa enua ravarai ki mua i tona aroaro: e nana e akataka ia ratou, mei te tiaki mamoe e akataka i te mamoe e te puaka-nio ra: E tuku aia i te mamoe ki tona rima katau, kareka te puaka-nio, ei te rima kaui ia. . . . Ei reira te Ariki e tuatua mai ei [ki te au mamoe], na ko maira, Koia mou taku e karanga atu kia kotou nei, Ko kotou i pera i tetai taeake mea ngiti rava o taku au taeake nei, kua pera mai ïa iaku. . . . Ko [te au puaka-nio] ka aere ke ïa i te mate mutu kore, kareka te aronga tuatua-tika ra, ei te ora mutu kore ïa.”​—Mataio 25:31-46.

8. Akapeea ta Paulo akataka anga i to Karaiti aere mai anga kia rave i te akavaanga ki runga i te aronga tau kore i te Atua ra?

⁸ Mei tei akaariia maira i te parapore o te au mamoe e te au puakanio ra, na Iesu e rave i te akavaanga openga ki runga i te aronga rave tau kore katoatoa ra i te Atua. Kua akapapu atura Paulo ki te aronga taeake akarongo tamamaeia ra “ko te ora ia tana e tuku mai no tatou katoa nei, kia mama mai te Atu ra ko Iesu mei te rangi mai, ma tana au angela mana katoa ra, ma te ai mura ra, i te tuku anga mai i te mate i te aronga kare i kite i te Atua, e tei kore i akarongo i te evangelia o to tatou Atu o Iesu Mesia: Ko te ka akautungaia mai ïa i te mate mutu kore mei te aroaro atu o te Atu ra, e te kakā o tona mana; Kia tae ki te rā e tae mai ei aia ra, kia akakakaia aia i tona aronga tapu.” (2 Tesalonia 1:7-10) Ma teianei au tupu anga marekaanga ki mua ia tatou nei, kare ainei tatou e tau kia akono i te akarongo e kia vai te anoano maata i te matakite anga no te aere anga mai o Karaiti?

Tatari Anga Anoano Maata no to Karaiti Mama Anga Mai

9, 10. Eaa te aronga akatainuia te vai nei i runga i te enua i tatari anoano maatai no te mama mai anga o Iesu Karaiti?

⁹ “Te mama anga mai o te Atu a Iesu mei te rangi maira” kare e riro ei akapou anga anake i te aronga kino ra mari ra kia tutaki katoa oki i te aronga tuatua tika. Penei ka mamae ua atu te toenga o te au taeake akatainuia o Karaiti te vai nei i runga i te enua i mua ake i te mama anga mai o Karaiti, inara te rekareka ra ratou i to ratou manakonako anga kaka i te rangi. Kua tata te apotetoro ko Petero ki te au Kerititiano akatainuia ra: “E rekareka ra, i te mea, te rave katoa ra kotou i te au mate o te Mesia: e kia akakiteia mai tona kakā, kia rekareka katoa kotou i te pereperekavana maata.”​—1 Petero 4:13.

¹⁰ Te manako ra te aronga akatainuia kia vai tiratiratu tae roa ‘kia akaputuia ratou e Karaiti kia vaitata iaia ra’ kia riro “te timata anga” o to ratou akarongo “ei akameitaki, ei teitei, e ei meitaki, i te mama anga mai o Iesu Mesia.” (2 Tesalonia 2:1; 1 Petero 1:7) No taua au Kerititiano tiratiratu anauia i te vaerua ra, ka rauka kia tuatuaia: “E kua akakite puia te tuatua o te Mesia ki roto ia kotou na. Kare akenei kotou i topa ki muri i te au meitaki ravarai nei; i te tatari anga i to tatou Atu ia Iesu Mesia i te mama anga mai.”​—1 Korinetia 1:6, 7.

11. Ia ratou e tatari ra i te mama mai anga o Iesu Karaiti, eaa ta te au Kerititiano akatainuia e rave ra?

¹¹ Te kapiti ra te toenga o tei akatainuia i te au manako ngakau o Paulo, tei tata ra: “Te karanga nei oki au e, kare teianei au mate ravarai e tau kia arite atu i te kakā e akakiteia mai ia tatou nei.” (Roma 8:18) Kare e umuumuia to ratou akarongo kia pangeia na te akatakataka anga te au taime. Kua rave maata ratou i ta Iehova ra angaanga, i te orongaanga i te akatauanga meitaki no to ratou au oa, koia te “mamoe ke atu” ra. (Ioane 10:16) Kua kite teia aronga akatainuia nei e te vaitata nei te openga o teianei akatereanga kino, e kua akarongo ratou i ta Petero ra akamaroiroi anga: “Ka tatua na i te taukupu o to kotou ngakau, kia akono meitaki, kia tatari ua atu ei i te aroa ua te ka apaiia mai no kotou i te mama anga mai o Iesu Mesia ra.”​—1 Petero 1:13.

“Te Anoano Maata o te Au Mea Angaia”

12, 13. I akapeea te ‘akariro anga kia puapinga kore ua’ te au tangata angaia maira, e eaa ta te au mamoe ke atu e tapapa maira?

¹² E apinga ainei ta te au mamoe ke atu te ka tapapa atu ma te anoano maata? E mea tikai te pera ra ratou. I muri ake i te tuatuaanga no te manakonako anga kaka o te aronga akatamarikiia na Iehova ei “tamariki” anauia i te vaerua e ‘aronga tuanga e te Mesia’ i te Patireia no te rangi, kua tuatua a Paulo: “Te anoano maata o te au mea angaia nei ma te arōrō, te tatari nei ïa i te akakite angaia mai i te tamariki a te Atua: (Kua akariroia oki te au mea angaia nei ei puapinga kore ua, kare ra i te mea anoano, nana ra, na tei akariro ra;) Ma te tatarianga e kia akaora katoaia te au mea angaia nei i te tapeka o te mate, kia rauka te rangatira meitaki o te tamariki a te Atua ra.”​—Roma 8:14-21; 2 Timoteo 2:10-12.

¹³ No te ara a Adamu kua akariroia tona au uanga katoatoa “ei puapinga kore ua,” kua anauia mai i te tapeka anga ki te ara e te mate. Kare i rauka ia ratou uaorai te akamatara mai ia ratou mei taua tapeka anga ra. (Salamo 49:7; Roma 5:12, 21) Mei teaa ra, to te au mamoe ke anoano anga “kia akaora katoaia . . . i te tapeka o te mate”! Inara i mua ake ka tupu ei te reira, ka tika etai apinga ke kia tupu kia tau ki ta Iehova ra au taime e te au tuatau oki.

14. Eaa te ka o atu ki “te akakite angaia mai i te tamariki a te Atua,” e akapeea oki ta te reira akatupu anga i to te au tangata ‘akaora i te tapeka o te mate’?

¹⁴ Ka tika te toenga o te “tamariki a te Atua” tei akatainuia ra kia ‘akakite mai’ na mua. Eaa te ka kapitiia ki teianei? Kia tae ki ta te Atua ra taime tau, ka riro ia kia kiteaia e te au mamoe ke e kua oti tei akatainuia i te “akairoia” e kua akakakaia kia tutara kapiti ma Karaiti. (Apokalupo 7:2-4) Ka ‘mama katoa mai’ oki te “au tamariki a te Atua” tei akatuakaouia mai me kapiti atu ratou ma Karaiti katoa i te akapouanga i te akatereanga kino a Satani o te au mea nei. (Apokalupo 2:26, 27; 19:14, 15) I reira, i te tuatau o to Karaiti Tutara Anga no te Tautani Mataiti, ka ‘akakite mai’ ratou ei au aerenga kau taunga no te tuaanga i te au puapinga o to Iesu ra atinga oko ki te au tangata “angaia” ra. Ka riro teianei ei tupu anga no te “akaora katoaia [te au tangata] i te tapeka o te mate” e ka tomo atu i muri iora ki “te rangatira meitaki o te tamariki a te Atua ra.” (Roma 8:21; Apokalupo 20:5; 22:1, 2) Ma taua au manakonako anga memeitaki ra, e tumu ainei tetai no te au mamoe ke ra kia kore e “tatari nei ïa i te akakite angaia mai i te tamariki a te Atua” ma te “anoano maata”?​—Roma 8:19.

E Ora to te Akakoromaki o Iehova

15. Eaa ta tatou kare e tau kia ngaropoina no runga i ta Iehova ra akanoo anga taime no te au tupu anga apinga?

¹⁵ Ko Iehova te Tiaki Taime Maata. Ka papu tana taime no te au tupu anga te au mea kia apa kore ua. Penei kare e akara anga meitaki te tupu anga o te au mea ki ta tatou i manako. Inara, ka rauka kia akarongo tikai tatou e ka tupu ta te Atua ra au taputou katoatoa. (Iosua 23:14) Penei ka tuku aia i te au apinga kia roa atu i ta te aronga e manganui i manako. Inara e kimi tatou kia kite i tona au aerenga e kia mareka oki i tona pakari. Kua tata a Paulo: “Aue te oonu o te apinga nui o te pakari e te kite i te Atua e! e te kimi anga taea kore o tana akatauanga e, tona au aerenga i te kitea kore kia kimi e! Koai oki tei kite i te ngakau o te Atu? e koai ïa tana tumu korero?”​—Roma 11:33, 34.

16. Koai ma te ka puapingaia ine i to Iehova ra akakoromaki anga?

¹⁶ Kua tata a Petero: “E aku au akaperepere e, ko te reira au mea ta kotou e tatari ana [koia te akapou anga o te “rangi” taito e te “enua” taito e to ratou mono angaia na te “rangi ou” e te “enua ou” ta te Atua i taputou mai], ka akamaroiroi, kia rokoia mai kotou e ia ma te au, ma te topata kore, e te apa kore. E e karanga kotou i te akakoromaki maata o to tatou Atu ra, ko te ora ïa.” No to Iehova ra akakoromaki maata, e au mirioni ua atu kua rauka ia ratou te tuatau kia akaoraia na roto i te “rā o te Atu,” te ka aere poitirere mai “mei te keia ra.” (2 Petero 3:9-15) Te akatika ra tona akakoromaki anga ia tatou takitai kia ‘rave akaoti ua i to tatou uaorai ora, ma te mataku e te rutetetete.’ (Philipi 2:12) Kua tuatua Iesu e ka tika ‘kia matakite tatou’ e “e ara” me te anoano ra tatou kia marekaia mai e kia autu ‘kia tu tatou ki mua i te aroaro o te Tamaiti a te tangata’ a te tuatau e aere mai ei aia no te akavaanga.​—Luka 21:34-36; Mataio 25:31-33.

E Tatari Marie ma te Akakoromaki Anga

17. Eaa te au tuatua a te apotetoro ko Paulo ka tau tatou kia tauru ki to tatou ngakau?

¹⁷ Kua raurau a Paulo i tona au taeake i te pae vaerua kia tamou i to ratou mata “eiaa i te au mea akaraia ra, i te au mea akara koreia ra.” (2 Korinetia 4:16-18) Kare aia i anoano apinga kia arai mai i to ratou akara anga i te tutaki i te rangi tei akanooia ki mua ia ratou ra. Me no te au Kerititiano akatainuia tatou me kare no te au mamoe ke ra tatou, e tamou marie tatou ki roto i te manako i taua manakonako anga meitaki ra tei akanooia mai ki mua ia tatou e auraka e unui ki muri. E ‘tatari marie tatou ma te akakoromaki anga,’ ma te akapapuanga e “kare ra tatou i to te aronga i unui ki muri e mate atu; no te aronga ra i rauka te akarongo e ora atu ei te vaerua.”​—Roma 8:25; Ebera 10:39.

18. Eaa ra ka raukai ia tatou kia akaruke irinaki atu i te au taime e te au tuatau ki roto i nga rima o Iehova ra?

¹⁸ Ka rauka ia tatou kia akaruke te irinaki atu i te au taime e te au tuatau ki roto i nga rima o Iehova. “Kare e tavarevare” te tupu anga o tana au taputou ka tau ra ki tana taime i akapapa. (Habakuka 2:3) I teianei, te kapiti maira ta Paulo akamaroiroi anga kia Timoteo i tetai atu aiteanga no tatou. Kua tuatua aia: “E teianei e ako ua atu nei au ia koe ki mua i aroaro o te Atua, e to te Atu ra ia Iesu Mesia, ko te akava i te ora ra, e i tei mate, kia mama mai aia kia tae ki tona basileia; E akakite ua koe i te tuatua; kia tamou marie rai, i te atianga tau, e te atianga tau kore . . . E rave i te angaanga a te apii evangelia, e rave akaope takiri i to taoonga na.”​—2 Timoteo 4:1-5.

19. Te vaira tetai taime no te au tangata o Iehova kia rave i teaa, e no teaa ra?

¹⁹ Kua tae te au oraanga ki te kotinga​—to tatou uaorai e to tatou au tangata tupu. Kua tata a Paulo: “Kia matakite ia koe, e taau e apii ra; e tamou tika rai i te reira: tei te akapera oki e oraʼi koe, e te aronga katoa e akarongo mai ia koe ra.” (1 Timoteo 4:16) Te poto rava nei te taime no teianei akatereanga kino o te au mea nei. Ia tatou e tatari nei ma te anoano maata i te au tupu anga mareka tei mua ia tatou, kia matakite tikai tatou e te vai nei te taime e te tuatau a Iehova no tona au tangata kia tutu aere i te tuatua meitaki o te Patireia. Ka tika taua angaanga ra kia akaotiia kia tau ki tona merengo anga. “I reira ra,” mei ta Iesu i tuatua, “ko te openga iora ïa.”​—Mataio 24:14.

[Tataanga Rikiriki i Raro]

Na te Akamanako Akaou Anga

◻ No runga i te au akataka anga taime, i akapeea i aiteite ei to tatou turanga ki to te au Kerititiano o te anere mataiti mua ra?

◻ Eaa ra ka tikai te au Kerititiano “kia matakite,” noatu i te tuatau o to Karaiti parutia ra?

◻ Eaa ra te au tangata angaia maira i anoano maatai i “te akakite anga ia mai i te au tamariki a te Atua” ra?

◻ Eaa ra ka raukai ia tatou kia akaruke irinaki atu i te au taime e te au tuatau ki roto i nga rima o Iehova ra?

[Tutu i te kapi 17]

Ka tika te au Kerititiano kia vai ara ua i te tapapa anga i te aere anga mai o Karaiti

[Tutu i te kapi 18]

Te rave angaanga maata ra te toenga o te aronga akatainuia i te tavini anga ia Iehova, kare i akatumu ana i to ratou akarongo ki runga i te akataka anga taime ra