Kua Vaitata te Rangatira Meitaki o te Tamariki a te Atua Ra

“Kua akariroia oki te au mea angaia nei ei puapinga kore ua . . . na tei akariro ra; Ma te tatarianga e kia akaora katoaia te au mea angaia nei i te tapeka o te mate, kia rauka te rangatira meitaki o te tamariki a te Atua ra.”​—ROMA 8:20, 21.

1. Akapeea te akatutu angaia to Iesu atinga i te Ra Tapokiangaara?

KUA orongaia mai e Iehova tana Tamaiti anau tai ei atinga oko tei akatuera ra i te mataara ki te oraanga i te rangi no te 144,000 au tangata e te manakonako anga mutu kore i te enua nei no te toenga atu o te au tangata. (1 Ioane 2:1, 2) Mei tei kiteia ra i te atikara i mua ake nei, kua akatutuia ta Iesu atinga no te au Kerititiano anauia i te vaerua i ta te taunga maata ra tuku anga atinga i tetai toa puakatoro ei atinga nona uaorai, no tona ngutuare, e no te kopu oki o Levi i te Ra Tapokiangaara mataiti ra. I taua ra rai, kua tuku atinga aia i te puaka-nio no te ara a etai katoa atu o to Iseraela ra, mei ta te atinga o Karaiti te ka akapuapinga i te au tangata katoa ra. Na tetai puaka nio ora i apai akatutu ke atu i te au ara taokotaiia a te au tangata katoa ra no te mataiti i topa, ngaro ke atu ki te metepara ra.a​—Levitiku 16:7-15, 20-22, 26.

2, 3. Eaa te aite anga no ta Paulo tuatua anga tei tataia ra ia Roma 8:20, 21?

² I muri ake i te akapapaanga mai i te manakonako anga no te au tangata te ka riro ei ‘tamariki na te Atua’ ki te rangi ra, kua tuatua mai te apotetoro ko Paulo: “Te anoano maata o te au mea angaia nei ma te arōrō, te tatari nei ïa i te akakite angaia mai i te tamariki a te Atua. Kua akariroia oki te au mea angaia nei ei puapinga kore ua, kare ra i te mea anoano, nana ra, na tei akariro ra; Ma te tatarianga e kia akaora katoaia te au mea angaia nei i te tapeka o te mate, kia rauka te rangatira meitaki o te tamariki a te Atua ra.” (Roma 8:14, 17, 19-21) Eaa te aiteanga o teianei tuatua anga?

³ I te angaia mai anga to tatou metua ko Adamu ra ei tetai tangata apa kore ua, kua riro aia ei ‘tamaiti [me kare, tama] na te Atua.’ (Luka 3:23, 38) No te raveanga ara, kua riro aia ki roto i te “tapeka o te mate” e kua tuku atu i te reira tu ki runga i te au tangata ravarai. (Roma 5:12) Kua akatikaia e te Atua kia anauia mai te au tangata ma te “puapinga kore” tei aro atura ia ratou no te akatuangaia ratou i te tu apa ua, inara kua oronga atura aia i te manakonako anga na roto i te “uanga,” koia Iesu Karaiti. (Genese 3:15; 22:18; Galatia 3:16) Te tou maira Apokalupo 21:1-4 ki te tuatau e ‘kore ravaʼi te mate, te aue, te mii, e te mamae oki.’ I te mea e taputou teia ki te “au tangata,” te akapapu maira te reira kia tatou e ka kite te taiate ou o te au tangata i te enua nei i raro ake i te tutara Patireia i te akaora angaia te manako e te kopapa oki kia ora meitaki tikai e te oraanga mutu kore ei ‘tamariki na te Atua’ i te enua nei. I te tuatau o to Karaiti Tutara no te Tauatini Mataiti, ka akaoraia te au tangata akarongo mei “te tapeka o te mate, kia rauka te rangatira meitaki.” I muri ake i te akapapuanga i te tu tiratiratu kia Iehova i te tuatau o te timataanga openga, ka rauka ia ratou te tu rangatira e tuatau ua atu i te ara e te mate akatuangaia maira. (Apokalupo 20:7-10) Te aronga i runga i te enua i reira ka rauka ia ratou “te rangatira meitaki o te tamariki a te Atua ra.”

Te Tuatua Nei Ratou “E Aere Mai”

4. Eaa te aite anga e kia “rave ua mai aia i te vai ora”?

⁴ Mei teaa ra tetai manakonako anga kia akanooia ki mua i te tangata nei! No reira rai te au Kerititiano anauia i te vaerua te vai nei i runga i te enua i maroiroi ei te aratakianga i te tuatuaanga kia etai atu no te reira! Te aronga te ka riro ei tuanga no te “vaine akaipoipo ou” a te Punua-mamoe akakakaia ra, koia Iesu Karaiti, kua o atu te toenga o te aronga akatainuia ra ki roto i te akatupu anga i teia au tuatua totouia: “E te tuatua nei te Vaerua ma te vaine akaipoipo ou ra, E aere mai. E ko tei akarongo ra, ka tuatua katoa aia e, E aere mai. E ko tei kaki ra, ka aere mai. E tei anoano ua ra, ka rave ua mai aia i te vai ora.” (Apokalupo 21:2, 9; 22:1, 2, 17) Kare, kare te au puapinga o te atinga oko o Iesu e kotingaia ki te aronga 144,000 akatainuia ra. Ka rave ua atu te vaerua o te Atua ra i te angaanga na roto i te aronga toenga o te pupu vaine akaipoipo ou i runga i te enua nei i te na koanga “E aere mai.” E ko tei akarongo tei kaki ra no te tuatua tika te patiia ra kia tuatua “E aere mai,” ma te akatikaanga iaia uaorai kia rave i te au apinga maata a Iehova ra no te ora.

5. Koai ma ta te Au Kite o Iehova e mataora ra kia vai mai ki roto ia ratou ra?

⁵ E akarongo to te Au Kite o Iehova i te apinga orongaia mai e te Atua no te oraanga na roto ia Iesu Karaiti. (Angaanga 4:12) Te mataora ra ratou e te vaira i roto ia ratou te aronga ngakau tiratiratu te anoano ra kia kite i ta te Atua au akakoro anga e kia rave oki i tona anoano. Te tuera ra to ratou au Are Uipaanga Patireia ki te aronga katoatoa te inangaro ra kia ‘aere mai e kia inu ua i te vai o te ora’ i teia “tuatau openga” nei.​—Daniela 12:4.

Au Taui Anga ma te Topaanga te Tuatau

6. Akapeea te rave anga a te vaerua o te Atua ra ki runga i te au tavini o Iehova i te au tuatau ke ke ra?

⁶ E tuatau ta te Atua ra kia akatupu i tana au akakoro anga, e te tupu ra te reira ki tana au akonoanga ma te au tangata nei. (Koheleta 3:1; Angaanga 1:7) Noatu rai e kua aere mai to te Atua vaerua ki runga i tona au tavini i mua ake i te tuatau Kerititiano ra, kare ratou i anauia ei tamariki vaerua nana. Inara, akamata mai ia Iesu ra, kua tae ta Iehova tuatau kia taangaanga i te vaerua tapu kia akaanau mai i te au tane e te au vaine ki tetai akatuanga anga ki te rangi ra. E akapeea oki i to tatou tuatau nei? Ko taua vaerua rai te angaanga ra ki rungao i te “mamoe ke atu” a Iesu, inara kare te reira e akakeu ana i te manakonako anga e te anoano ki roto ia ratou no te oraanga i te rangi. (Ioane 10:16) Ma te ora mutu kore ki runga i te enua parataito ei manakonako orongaia mai e te Atua ra no ratou, te turu rekareka ra ratou i te toenga o te aronga akatainuia i te orongaanga i te tutu aere i teia tuatau o te tauianga mei te ao taito ki to te Atua ra ao ou no te tuatua tika ra.​—2 Petero 3:5-13.

7. Eaa te angaanga no te mou ra tei manakoia e te Aronga Apiipii Pipiria, inara eaa ta ratou i kite no runga ia parataito?

⁷ Kua akamata te Atua i ‘te arataki mai i te au tamariki e manganui ki te kakā meitaki’ i te riringianga mai i te vaerua tapu ia Penetekote 33 T.N., e i te akara anga kua akanoo aia i te tuatau no te ki takiri anga te “Iseraela [vaerua] o te Atua” ra kia tae ki te 144,000 katoa. (Ebera 2:10; Galatia 6:16; Apokalupo 7:1-8) Akamata mai i te 1879, kua putuputu te taiku anga i tetai angaanga mou tei kapiti ra i te au Kerititiano akatainuia i roto i teianei makatini. Inara ko te Aronga Apiipii Pipiria (tei tapaia i teianei ei Au Kite o Iehova) kua kite katoa oki e te mou maira te au Tuatua Tapu i te manakonako no te ora mutu kore ki runga i te enua parataito. Ei akatauanga, kua tuatua te itiu o te Watch Tower Tiurai 1883: “Me oti ia Iesu te akanoo i tona patireia, e kua tapeka i te kino, e te vai atura, ka riro teianei enua ei tetai parataito, . . . e ko te aronga katoatoa i roto i to ratou tanumanga ka aere mai ki roto i te reira. E na te riroanga kia akarongo i tana au ture ka noo ratou e tuatau uatu i roto i reira.” I te topa anga te tuatau, kua akameangitiia mai te mou o te aronga akatainuia ra, e kua rave marieia mai te aronga tataki tai kare ra o ratou manakonako no te rangi, kua raveia mai ei mou ki roto i ta Iehova akaaerenga. I reira, kua oronga te Atua ki tona au tavini akatainuia, te au Kerititiano anau akaouia, i te kite oonu tau.​—Daniela 12:3; Philipi 2:15; Apokalupo 14:15, 16.

8. Akapeea te kiteanga i te manakonako no te enua i te tupu anga i te akamata anga nga mataiti mua o te 1930 ra?

⁸ Mei te 1931 maira te taokotaianga o te aronga e manakonako anga to ratou no te enua nei ma te putuputuanga Kerititiano ra. I taua mataiti ra, kua akamarama atura Iehova i te toenga o te au Kerititiano anauia i te vaerua kia kite e te taiku ra Ezekiela pene 9 ki teianei pupu no te enua nei, tei akairoia no te ora atu ki roto i te ao ou a te Atua ra. I te 1932 kua manako akaotiia e ko taua aronga mei te mamoe rai o teia tuatau nei kua akatutuia mai e te oa o Iehu koia Ionadaba (Iehonadaba) ra. (2 Ariki 10:15-17) I te 1934 kua akataka meitakiia e ka tau te “aronga Ionadaba” kia “oronga,” me kare kia akatapu ia ratou uaorai ki te Atua. I te 1935 te “aronga maata rava,” me kare “urupu maata”​—tei manakoia ra ei tetai pupu rua vaerua te ka riro ei “au oa” no te vaine akaipoipo ou a Karaiti i te rangi ra​—kua akatakaia ei au mamoe ke atu ma te manakonako anga no te enua. (Apokalupo 7:4-15; 21:2, 9; Salamo 45:14, 15) E maata oki mei te 1935 maira te raveanga te aronga akatainuia i te aratakianga i te kimi anga no te au tangata tu tika te inangaro ra kia ora e tuatau ua atu ki runga i tetai enua parataito.

9. I muri ake i te 1935, eaa etai o te au Kerititiano ra i akamutu ei te kai i te oroa i te Kaikai Anga Aiai a te Atu ra?

⁹ I muri ake i te 1935 ko tetai papaki o te au Kerititiano tei kai ra i te varaoa e te uaina i te Kaikai Anga Aiai a te Atu ra kua akamutu te kai i te reira. No teaa ra? No te mea kua kite ratou e ko to ratou manakonako anga no te enua, e kare no te rangi. Kua tuatua tetai vaine tei papetitoia ra i te 1930: “Noatu ra kua manakoia te [kaikaianga] e ko te mea tika ia kia rave, e maata oki no te aronga rave maroiroi i te angaanga orometua i te au tuatau ravarai, kare rava au i irinaki e e manakonako anga toku no te rangi ra. I reira, i te 1935, kua akataka meitakiia mai kia matou e te akaputuia ra tetai urupu maata ma te manakonako anga kia noo e tuatau ua atu ki runga i te enua. E manganui matou tei rekareka i te kite anga e e tuanga matou no taua urupu maata ra, e kua akamutu matou i te kaikaianga i te oroa ra.” Noatu ra ko te au puka Kerititiano kua tauiia te tu. Ko to te au mataiti mua ana kua akapapaia no te au pipi a Iesu tei anauia i te vaerua, mei te 1935 aere mai ko Te Punanga Tiaki e etai atu au puka a te “tavini akono meitaki” kua oronga mai i te kai vaerua tei tau ki tei umuumuia no te aronga akatainuia e to ratou au oa e manakonako anga to ratou no te enua.​—Mataio 24:45-47.

10. Penei akapeea tetai tei tiratiratu kore o tei akatainuia ra i te mono angaia?

¹⁰ Me ka riro tetai o te aronga akatainuia ra kia tiratiratu kore. Ka anoanoia ainei tetai ei mono? Kua akakite maira Paulo mei te reira te tu i roto i tana uriuri anga i te orive akatutuia ra. (Roma 11:11-32) Me te umuumuia ra kia monoia tetai tei anauia ra i te vaerua, e mea tika ka oronga atu te Atua i te kapikianga no te rangi ki tetai e meitaki ra tona akarongo i te raveanga i te akamori anga kiaia no te au mataiti e manganui.​—Akaaite ia Luka 22:28, 29; 1 Petero 1:6, 7.

E Manganui te Au Tumu no te Akameitaki

11. Noatu eaa te tu o to tatou manakonako anga, eaa ta Iakobo 1:17 e akapapu maira kia tatou?

¹¹ Te au ngai ravarai e tavini ei tatou ia Iehova ma te tiratiratu, ka akamerengo mai aia i to tatou au umuumu anga e te au anoano tika oki. (Salamo 145:16; Luka 1:67-74) Me e manakonako anga tikai to tatou no te rangi me kare e manakonako anga no te enua, e manganui ta tatou au tumu no te akameitaki i te Atua ra. Te rave tamou marie ra aia i te au apinga ei meitaki no te aronga te aroa ra iaia. I tuatua te pipi ko Iakobo e “te au mea memeitaki i o maiia ra, e te au mea tika ravarai, no runga ïa, no runga mai i te Metua o te au mārama ra,” i te Atua ko Iehova. (Iakobo 1:17) E tamanako ana tatou i etai tokoiti ua o aua mea orongaia maira e te au akameitakianga oki.

12. Eaa ka raukaʼi ia tatou kia tuatua e kua oronga mai a Iehova kia tatou taki tai o tana au tavini tiratiratu i tetai manakonako anga meitaki?

¹² Kua oronga mai a Iehova ki tona au tavini tataki tai tiratiratu ra i tetai manakonako anga meitaki. Kua kapiki aia i tetai papaki ki te oraanga i te rangi. Ki tona au kite i mua ake i te akonoanga Kerititiano, kua oronga a Iehova i te manakonako anga meitaki no tetai tuakaouanga ki te ora mutu kore i runga i te enua. Ei akatauanga, e akarongo to Aberahama i te tuakaouanga e kua tatari atu i “te oire tumu mou”​—koia te Patireia o te rangi i raro ake i te reira ka akatuakaouia aia ki te oraanga i te enua. (Ebera 11:10, 17-19) Pera katoa oki, i teianei tuatau o te openga, te oronga nei te Atua ki te aronga e au mirioni ua i te manakonako anga no te oraanga mutu kore ki runga i tetai enua parataito. (Luka 23:43; Ioane 17:3) E tika tikai, ko tetai ua atu ta Iehova ra i oronga atu i taua manakonako anga meitaki ra ka tau kia akameitaki oonu no te reira.

13. Akapeea te angaanga o to te Atua ra vaerua tapu ki rungao i tona au tangata ra?

¹³ Te oronga maira Iehova i tona vaerua tapu ei apinga aroa ki tona au tangata. Ko te au Kerititiano te orongaia ra tetai manakonako anga i te rangi kua akatainuia ma te vaerua tapu. (1 Ioane 2:20; 5:1-4, 18) Inara, ko te au tavini o te Atua e au manakonako anga to ratou no te enua te tauturuia ra e te aratakiia ra e te vaerua. Ko Mose tetai i roto ia ratou, iaia ra te vaerua o Iehova, mei te 70 tangata katoa oki tei akataoongaia ra ei tauturu iaia. (Numero 11:24, 25) I raro ake i te mana o te vaerua tapu, kua tavini a Bezaleela ei tangata karape i te angaanga i te tapenakara o to Iseraela ra. (Exodo 31:1-11) Kua aere katoa mai te vaerua o te Atua ki rungao ia Gideona, ia Iepheta, ia Samasona, ia Davida, ia Elia, ia Elisaia, e etai ke atura. Noatu rai e kare teia aronga tataki tai o te tuatau taito ra e aratakiia mai ki te kaka i te rangi ra, kua aratakiia ratou e kua tauturuia e te vaerua tapu, mei te au mamoe ke atu a Iesu ra i teia tuatau nei. E no reira, kare te rauka anga ia tatou te vaerua o te Atua e riro te aite anga e tei ia tatou te kapikianga no te rangi. Inara, te oronga maira te vaerua o Iehova i te arataki anga, te tauturu ra oki ia tatou kia akatupu i etai atu angaanga orongaia mai e te Atua ra, te oronga maira kia tatou i te mana maata meitaki, e te akatupu ra ki roto ia tatou i tona au ua te inangaro, te rekareka, te au, te akakoromaki, te takinga-meitaki, te meitaki, te pikikaa kore, te maru, e te akono meitaki. (Ioane 16:13; Angaanga 1:8; 2 Korinetia 4:7-10; Galatia 5:22, 23) Kare ainei tatou e tau kia akameitaki no teianei apinga aroa ua no ko mai i te Atua ra?

14. Akapeea tatou e puapingaiaʼi mei ta te Atua ra au apinga aroa no te kite e te pakari?

¹⁴ Te kite e te pakari e apinga oronga mai na te Atua te tau ra kia akameitaki tatou, me no te rangi me kare no te enua to tatou manakonako anga. Te tauturu ra te kite meitaki ia Iehova ia tatou “kia timata oki [tatou] i te au mea e maata ua atu te meitaki” e “kia tau to [tatou] aerenga i te Atu i te au mea katoa e mareka mai ei ra.” (Philipi 1:9-11; Kolosa 1:9, 10) Te akono ra te pakari tau i te Atua ei paruru anga e ei arataki i te ora anga. (Maseli 4:5-7; Koheleta 7:12) Te akatumuia ra te kite meitaki e te pakari ki runga i te Tuatua a te Atua, e ko te toenga tokoiti o te aronga akatainuia ra te akapiri vaitataia atura ki ta te reira tuatua no to ratou manakonako anga i te rangi ra. Inara, kare ko te inangaro no te Tuatua a te Atua, e te kite meitakianga i te reira te akataka maira i ta te Atua akakiteanga e kua kapikiia tatou ki te ora anga ki te rangi ra. Te au tangata mei ia Mose raua ko Daniela ra kua tata i etai tuanga o te Pipiria, inara ka akatuakaouia ratou ki te oraanga ki runga i te enua nei. Noatu me no te rangi e no te enua ainei to tatou manakonako anga, te rauka nei ia tatou katoatoa te kai vaerua na roto mai i “te tavini akono meitaki e te pakari” ta Iehova i mareka ra. (Mataio 24:45-47) Mei teaa ra te akameitaki anga tatou katoatoa no te kite tei rauka mai i teianei!

15. Eaa tetai o ta te Atua ra apinga aroa maata rava, e akapeea ta tatou manako anga i te reira?

¹⁵ Tetai o ta te Atua ra apinga maata rava i oronga ua mai ko te apinga aroa o to Iesu ra atinga oko te akapuapinga ra ia tatou me e manakonako to tatou no te rangi me kare e manakonako no te enua nei. No te maata te aroa mai o te Atua i to te ao nei, “kua tae rava ki te oronga anga mai i tana Tamaiti anau tai, kia kore e mate te akarongo iaia, kia rauka ra te ora mutu kore.” (Ioane 3:16) E na to Iesu ra aroa i akakeu iaia “kia oronga i tona ora ei oko no te tangata e manganui.” (Mataio 20:28) Mei ta te apotetoro ko Ioane i akataka maira, ko Iesu Karaiti “koia oki te tarangaara i ta tatou nei ara [ta te aronga akatainuia ra]; kare oki i ta tatou anake ra, i ta to te ao katoa nei ra.” (1 Ioane 2:1, 2) No reira, ka tau tatou katoatoa kia akameitaki oonu no teianei oronga anga aroa no te ora ki te oraanga mutu kore.b

Ka Tae Ainei Koe?

16. Eaa te tupu anga maata te ka akamaaraia i muri ake i te opunga ra ia Aperira 11, 1998, e koai ma te ka tau kia tae mai?

¹⁶ Ka tau te akameitaki anga no te oko ta te Atua i oronga mai na roto i tana Tamaiti kia akakeu ia tatou kia tae atu ki te au Are Uipaanga Patireia me kare ki etai atu ngai e akaputu ei te Au Kite o Iehova i muri ake i te opunga ra ia Aperira 11, 1998, kia akamaara i te matenga o Karaiti. I tana akamata anga i teianei akamaara anga ma tana au apotetoro tiratiratu ra i te po openga o tona ora anga i te enua nei, kua tuatua Iesu: “E akapera kotou ei manako anga iaku.” (Luka 22:19, 20; Mataio 26:26-30) E tokoiti ua te aronga toenga o tei akatainuia ra te ka kai i te varaoa akaopue koreia, ra ei akatutuanga i to Iesu kopapa tangata ara kore, ra e te uaina muramura kairo koreia, ra tei akatutu maira i tona toto akamaringiia ei atinga. Ko te au Kerititiano anauia i te vaerua anake te ka tau kia kai no te mea ko ratou anake tei roto i te koreromotu ou ra e i roto i te koreromotu Patireia ra e tei ia ratou te akakite anga kare e rauka kia akakoreia no te vaerua tapu o te Atua ra e e manakonako anga to ratou no te rangi ra. E au mirioni ua atu etai ke atu te ka tae mai ei aronga akarakara akangateitei te akameitaki ra no te aroa tei akaariia mai e te Atua raua ko Karaiti i te akono anga i te atinga o Iesu tei akatupu ra kia rauka te oraanga mutu kore.​—Roma 6:23.

17. Eaa ta tatou te ka tau kia maara no runga i te akatainuanga i te vaerua ra?

¹⁷ Te au manako akonoanga o mua ana, te au manako ngakau ketaketa tei tu mai no te matenga o tetai tei akaperepereia ra, te au tu ngata te kapitiia maira i teianei ma te oraanga i te enua nei, me kare te manako ngakau no te rauka mai anga tetai akameitaki anga taka ke no ko mai ia Iehova penei ka taki atu i etai kia manako tarevake e no ratou te oraanga ki te rangi ra. Inara ka tau tatou ravarai kia maara e kare te au Tuatua Tapu e akaue mai ana ia tatou kia kai i te oroa Akamaaraanga ei akaari i to tatou akameitaki anga no te atinga oko o Karaiti ra. Pera katoa oki, tei runga te akatainuanga vaerua i teianei, “kare to te anoano, kare oki to te oro, no te Atua ra i aroa maira,” Tei akaanau maira ia Iesu ei tetai Tamaiti vaerua e tei arataki maira e 144,000 anake etai atu tamariki kia akakakaia.​—Roma 9:16; Isaia 64:8.

18. No te maata anga o te aronga te tavini ra ia Iehova i teia tuatau, eaa te au akameitakianga te vai mai ra ki mua ia ratou?

¹⁸ Ko te oraanga mutu kore ki runga i te enua parataito te manakonako anga te orongaia maira e te Atua ki te maata anga o te au tangata te tavini ra ia Iehova i teia tuatau openga nei. (2 Timoteo 3:1-5) Kare e roaia, ka rekareka ratou i te reira parataito meitaki tikai. Ka riro i reira na te au tamaiti a te Ariki e akaaere i te au apinga i te enua nei i raro ake i te tutara mei te rangi maira. (Salamo 45:16) Ka vairaʼi te au turanga ponuiaau i te akono anga te aronga noo i te enua kia tau ki te au ture a te Atua e kia maata atu te apii anga i ta Iehova ra au akakoro anga. (Isaia 9:6, 7; Apokalupo 20:12) Ka maata oki te angaanga, i te patuanga are e te akavi i te enua. (Isaia 65:17-25) E tamanako oki i te au kapiti anga ngutuare tangata mataora i te oki akaou mai anga tei mate ra ki te ora anga! (Ioane 5:28, 29) I muri ake i tetai timataanga openga, ka kore atu te au tu kikino ravarai. (Apokalupo 20:7-10) No te tuatau mutu kore i muri atura, ka akakiia te enua ma te au tangata apa kore ua te ka ‘akaoraia mei te tapeka anga o te mate e tei rauka ia ratou te rangatira meitaki o te tamariki a te Atua ra.’

[Au Tataanga Rikiriki i Raro]

Akapeea Koe me Pau?

◻ Eaa te aiteanga e kia “rave ua mai aia i te vai ora”?

◻ Noatu me to tatou manakonako anga no te rangi me kare no te enua, eaa te au tumu tau no tatou kia akameitaki ki te Atua ra?

◻ Eaa te akono anga oroa mataiti te ka tau tatou ravarai kia akaputu atu?

◻ No te maata anga o to Iehova ra au tangata, eaa ta te tuatau ki mua te mou maira?

[Tutu i te kapi 18]

E au mirioni ua atu kua akamata i ‘te rave ua ra i te vai ora.’ Tei roto ainei koe ia ratou?