Te Manako Anga Kerititiano no te Mana Akaaere

“Kare e mana akaaere mari ra na te Atua.”​—ROMA 13:1, NW.

1. Eaa ra ka karangaiaʼi e ko Iehova te Mana Akaaere Teitei Rava?

TE PIRI ra te mana akaaere ki te taoonga anga. Na te Atua ko Iehova Tei Teitei Rava i oronga mai i te ora ki te au mea katoatoa tei angaia, te au mea ora e te ora kore. Ma te ekoko koreia koia te Mana Akaaere Teitei Rava. E tika te akono ra te au Kerititiano mou i te au manako ngakau o te au mea ora o te rangi tei akakite e: “E tau te kakā ia koe, e te Atu, e te akangateitei, e te mana: naau oki i anga i te au mea ravarai nei, e no toou inangaro i mou ei e i angaiaʼi ratou.”​—Apokalupo 4:11.

2. Akapeea te au tutara tangata mua i tetai tu ra te tuatua anga e kare o ratou tika anga tau no te taomi i to ratou au tangata, e eaa ta Iesu i tuatua kia Ponotio Pilato?

² Ko te tika ua nei e e manganui te au tutara tangata mua tei tauta i te akatika i to ratou mana akaaere na te karangaanga e e atua ratou me kore e komono ratou no tetai atua e kite anga tika ia e kare o te tangata tika anga akatuangaia no te tutara ki rungao i tetai atu au tangata.a (Ieremia 10:23) Te tumu mana akaaere tika anake ua ko te Atua ko Iehova. Kua akakite a Karaiti kia Ponotio Pilato, te kavana Roma o Iudea e: “Kare rava oou e [“mana akaaere,” NW] kia rave mai iaku, naringa kare i orongaia mai toou mana no runga maira.”​—Ioane 19:11.

“Kare e Mana Akaaere Mari ra na te Atua”

3. Eaa ta te apotetoro Paulo i akakite no runga i “te aronga mana taoonga,” e eaa te au uianga ta te au akakite anga a Iesu raua ko Paulo i akatupu mai?

³ Kua tata te apotetoro Paulo ki te au Kerititiano te noo ra i raro ake i te taomi anga a te Patireia Roma e: “Kia kauraro te au meta ravarai i te au mana akaaere teitei, no te mea kare e mana akaaere mari ra na te Atua; te vaira te au mana akaaere tei akanooia i to ratou au ngai i raro ake i te Atua.” (Roma 13:1, NW) Eaa te aite anga o ta Iesu tuatua i te akakite anga aia e kua orongaia te mana akaaere kia Pilato “no runga maira”? E na teea tu to Paulo manako anga e kua tu te au mana akaaere poritiki o tona tuatau i to ratou au ngai tei akanooia e te Atua? Ko ta ratou aite anga ainei e na Iehova tikai i akataoonga i te tutara poritiki takitai o teianei ao?

4. Eaa ta Iesu raua ko Paulo i kapiki ia Satani, e eaa ta Satani i tuatua tei kare i ekokoia e Iesu?

⁴ Akapeea teia i pera ei, mei te mea e kua kapiki a Iesu ia Satani e ko “te ariki o teianei ao,” e kua akairo te apotetoro Paulo iaia e ko “te atua o teianei ao”? (Ioane 12:31; 16:11; 2 Korinetia 4:4) Pera katoa, i te timataanga ia Iesu, kua oronga a Satani kiaia te “mana akaaere” ki rungao “i teianei pa enua,” te karanga anga e kua orongaia teia mana akaaere kiaia. Kua patoi a Iesu i tana oronga anga, inara kare aia i ekoko ana e no Satani te reira mana akaaere no te oronga.​—Luka 4:5-8, akaaite ia NW.

5. (a) Akapeea tatou i te marama anga i ta Iesu e ta Paulo au tuatua no runga i te mana akaaere tangata? (e) Na teea tu te au mana akaaere teitei e kia “akanooia i to ratou au ngai i raro ake i te Atua”?

⁵ Kua oronga a Iehova i te taoonga tutara ki rungao i teianei ao kia Satani na te akatikaanga iaia kia ora i muri ake i tona meameaau anga e i muri ake i tona timata anga ia Adamu raua ko Eva e akatupu atura ia raua kia meameaau i Tona taoonga ngateitei. (Genese 3:1-6; akaaite ia Exodo 9:15, 16.) No reira, ko te aite anga tikai o ta Iesu e ta Paulo au tuatua koia oki i muri ake i to te tokorua mua i Edene patoi anga i te teokaratia, me kore te tutara-Atua, kua akatika a Iehova i te au tangata akatakakeia kia akatupu i te au akatereanga mana akaaere te ka akatika ia ratou kia noo ki roto i tetai totaiete mako. I tetai au taime, e raukaʼi i te akatupu i tona akakoroanga, kua akatupu a Iehova i tetai au tutara me kore au kavamani kia topa. (Daniela 2:19-21) Tetai pae kua akatika aia kia mana ua rai. I te au tutara ta Iehova i akakoromaki ra kia vai ua, ka rauka te reira kia karangaia e kua “akanooia i to ratou au ngai i raro ake i te Atua.”

Te Au Kerititiano Mua e te Au Mana Akaaere Roma

6. Akapeea te au Kerititiano mua i te manako anga i te au mana akaaere Roma, e no teaa ra?

⁶ Kare te au Kerititiano mua i piri ana ki te au pupu akonoanga ngati Iuda tei koreromotu atura e te tamaki atu i te au Roma te noo ra i Iseraela. Tera ua kia rave te au mana akaaere Roma, ma ta ratou akatereanga akapapa tikaia, i te tamou i te tu mako i te enua e i te tai; te patu i te au ara vai puapinga e manganui, te au mataara, e te au ana; e te rave ua i te akono i te au mea noa nei, kua manako te au Kerititiano ia ratou ei ‘tavini no te Atua kia meitaki ratou.’ (Roma 13:3, 4) Kua akatupu te ture e te tu mako i tetai mareva tei rauka ra i te au Kerititiano i te tutu aere i te tuatua meitaki ki te ngai mamao, mei tei akaueia e Iesu. (Mataio 28:19, 20) Ma te akava ngakau meitaki ra, kua rauka ia ratou i te tutaki i te au tero tei koiia e te au Roma, noatu e kua taangaangaia etai au moni no te au akakoro anga kare te Atua i mareka ra.​—Roma 13:5-7.

7, 8. (a) Eaa ta tetai tatau meitaki anga ia Roma 13:1-7 e akaari maira, e eaa ta te au aerenga tuatua e akaari maira? (e) I raro ake i teea au turanga i kore ei te au mana akaaere Roma i riro ei ‘tavini no te Atua,’ e i teia turanga nei eaa to te au Kerititiano mua tu i akatupu?

⁷ Te akaari maira tetai tatau anga meitaki o te au irava mua e itu o Roma pene 13 i te “au mana akaaere teitei” poritiki e e ‘tavini no te Atua’ no te akapaapaa i te aronga rave i te meitaki e te akautunga i te aronga rave i te kino. Te akaari maira te manako tuatua e ko te Atua, kare te au mana akaaere teitei, tei manako ra i tei meitaki e tei kino. Me te umuumu ra te emepera Roma me kore tetai atu mana akaaere poritiki i te au mea tei araiia e te Atua me kore, na te tuatua anga, i te arai i te au mea ta te Atua i umuumu ra, kare aia e angaanga akaou ra ei tavini no te Atua. Kua akakite a Iesu e: ‘E apai i ta Kaisara kia Kaisara; e ta te Atua, ki te Atua.’ (Mataio 22:21) Me maro mai te Tutara Enua Roma i te au mea na te Atua, mei te akamori anga me kore te oraanga o tetai tangata, ka aru te au Kerititiano mou i te ako anga apotetoro: “Ko te Atua ta matou e akarongo e tikaʼi auraka te tangata.”​—Angaanga 5:29.

⁸ I te patoi anga te au Kerititiano mua no te rave i te akamori anga emepera e te itoro, te akaruke i ta ratou au uipaanga Kerititiano, e te akamutu i te tutu aere i te tuatua meitaki kua apai mai ia i te takinokino anga. Kua irinakiia e kua tamateia te apotetoro Paulo i te au akaue anga a Emepera Nero. Kua takinokino katoa tetai atu au emepera, ko Domitian, Marcus Aurelius, Septimius Severus, Decius, e Diocletian tikai, i te au Kerititiano mua. I teia au emepera e to ratou mana akaaere i raro ake i te takinokino anga i te au Kerititiano, kare ratou e angaanga tikai ra ei ‘tavini no te Atua.’

9. (a) Eaa te tika ra no te au mana akaaere poritiki teitei, e noea mai te ririnui e te mana akaaere o te puaka taae poritiki? (e) Eaa te ka tau kia karangaia no te kauraro anga Kerititiano ki te aronga mana akaaere?

⁹ Te riro katoatoa ra teia ei akatutu e koi riro ei te au mana akaaere poritiki ei akanoo anga “tei akonoia e te Atua” no te akono tamou i tetai totaiete tangata mako, ka vai tamou ratou ei tuanga o te akatereanga o teianei ao koia ko Satani oki te atua. (1 Ioane 5:19) No roto ratou i te akaaerenga poritiki o te ao katoa tei akatutuia e “te puaka taae” o Apokalupo 13:1, 2. No ko mai te ririnui e te mana akaaere o teia puaka taae i “te taae maata,” ko Satani te Tiaporo ra. (Apokalupo 12:9) Ma te tau i reira, tei raro ake e kare ko te katoa anga ta te Kerititiano kauraro anga i teia au mana akaaere.​—Akaaite ia Daniela 3:16-18.

Akangateitei Anga Tau no te Mana Akaaere

10, 11. (a) Akapeea a Paulo i te akaari anga e kia akangateitei tikai tatou i te au tangata mana akaaere? (e) Akapeea e eaa ra te au pure ka raveiaʼi no te “ui ariki, e te aronga mana katoa ra”?

¹⁰ Inara, kare te aite anga e kia akatupu te au Kerititiano i tetai tu marokiakia e te patoitoi ki te au mana akaaere poritiki. E tika, e manganui teia au tangata kare i tau kia akangateiteiia i to ratou au oraanga takake, me kore i te ngai tangata. Inara, kua akaari te au apotetoro na roto i to ratou akaraanga e ta ratou ako anga, e kia akangateiteiia te au tangata mana akaaere. I to Paulo tu anga ki mua i te ariki rave ainga kopu tangata ko Heroda Ageripa II, kua tuatua aia kiaia ma te ngateitei tei tau ra.​—Angaanga 26:2, 3, 25.

¹¹ Kua akakite katoa a Paulo e e mea tau i te taiku i te au mana akaaere o teianei ao i roto i ta tatou au pure, i te ngai tikai me kapikiia ratou kia tuku i te au tuatua tei pa ra i to tatou oraanga e te au angaanga Kerititiano. Kua tata aia e: “E tamata ana au i te ako atu ia koe e, ei te akaora, te pure, te pati, e te akameitaki i te Atua, i te tangata katoa nei; I te ui ariki, e te aronga mana katoa ra, kia noo kanga koreia mai tatou, ma te au, ma te akono i te Atua, e te au mea tika tikai. E mea meitaki oki te reira, e te tau ki mua i te aroaro o to tatou Ora ra o te Atua. Ko tei inangaro i te tangata katoatoa kia ora, e kia rauka te kite i te tuatua-mou.” (1 Timoteo 2:1-4) Penei na to tatou tu akangateitei ki teia au mana akaaere e arataki atu ki to ratou akatikaanga ia tatou kia rave va ua i ta tatou angaanga o te tautaanga i te akaora “i te tangata katoatoa.”

12, 13. (a) Eaa te ako anga tau meitaki ta Petero i oronga no runga i te mana akaaere? (e) Akapeea tatou i te tapu anga atu “i te vaa o te kite kore o te tangata neneva ra” tei akatupu i te tu iriiri ki runga i te Au Kite o Iehova?

¹² Kua tata te apotetoro Petero e: “E kauraro i te au taoonga katoa o te tangata i te Atu ra; i te ariki ra ei runga rava atu ïa; E te au tutara ra, e aronga ungaia mai e ia ei tutaki atu i te aronga i rave i te kino ra, e ei akameitaki i te aronga i rave i te meitaki ra. Ko to te Atua ïa anoano, kia mopani kotou i te vaa o te kite kore o te tangata neneva ra i ta kotou tuatua meitaki. Ei aronga rangatira kotou, auraka ra taua rangatira ra e akariroia ei tapoki tuatua kino, ei tavini ra kotou no te Atua. E akangateitei atu i te tangata ravarai. E aroa atu i te au taeake. Ka mataku i te Atua. Ka akateitei i te ariki.” (1 Petero 2:13-17) Mei teaa atura i te ako anga tau meitaki! Ka tau tatou kia kauraro katoa tikai i te Atua ei au tavini nona, e ka oronga tatou i te kauraro anga i raro ake e te ngateitei ki te au mana akaaere poritiki tei tukuia no te akautunga i te aronga rave kino.

¹³ E manganui te au mana akaaere noa tei kiteaia e e tuke ua ake rai to ratou au manako no runga i te Au Kite o Iehova. No te mea i te maata anga o te taime kua tarevake to ratou akakite angaia e te au enemi akakino ra o te iti tangata o te Atua. Me kore penei ko ta ratou anake ua i kite no runga ia tatou no roto mai ia i te au ravenga akakitekite anga maata, koia oki e papaki tai ua ana rai ta ratou akakite anga. I etai au taime ka rauka ia tatou i te akamutu i teia tu iriiri na roto i to tatou tu ngateitei tikai e i te ngai ka rauka, na te orongaanga i tetai akatutu anga tika tikai o te angaanga e te au irinakianga a te Au Kite o Iehova ki te au mana akaaere. No te au opita angaanga ua, te oronga maira te poroutia Jehovah’s Witnesses in the Twentieth Century i tetai akamarama anga tau meitaki. No tetai akakite anga maata atu, ka rauka te puka Jehovah’s Witnesses​—Proclaimers of God’s Kingdom i te orongaia kia ratou, e puka memeitaki tei tau ra tetai ngai i runga i te au vairanga puka o te au ngai vairanga puka o teia ngai me kore o te enua.

Te Mana Akaaere i Roto i te Au Kainga Kerititiano

14, 15. (a) Eaa te akapapa anga mana akaaere i roto i tetai ngutuare Kerititiano? (e) Eaa tikai te tu o te au vaine Kerititiano ki ta ratou au tane, e no teaa ra?

¹⁴ Te kitea uaia ra e me kua umuumuia te au Kerititiano e te Atua kia akangateitei i te au mana akaaere o teianei ao, e tau ratou kia akangateitei i te akatereanga mana akaaere tei akatumuia e te Atua i roto i te au ngutuare Kerititiano. Kua akapapa te apotetoro Paulo na roto i te au tuatua poto ua i te kaveinga o te taoonga upoko tei kiteia i rotopu i te iti tangata o Iehova. Kua tata aia e: “Teia ra toku inangaro, kia kite kotou e, ko te Mesia te upoko o te tangata ravarai nei; e to te vaine ra upoko, ko te tane ïa; e to te Mesia upoko, ko te Atua ïa.” (1 Korinetia 11:3) Ko te kaveinga teia o te teokaratia, me kore tutara-Atua. Eaa te o maira ki roto i te reira?

¹⁵ Ka akamata te akangateitei anga no te teokaratia ki te kainga. Ko tetai vaine Kerititiano tei kare ra i akangateitei i te mana akaaere o tana tane i tei tau iaia ra​—noatu e e taeake irinaki e me kare—​kare ia e teokaratiki ana. Kua ako a Paulo i te au Kerititiano: “Ma te tatomo marie kotou tetai ki tetai ma te mataku i te Atua. E te au vaine noo tane ra, e kauraro kotou ki ta kotou uaorai au tane, mei ta kotou e kauraro i te Atu ra. Ko te tane oki te upoko o te vaine, mei te Mesia katoa ra te upoko ïa i te ekalesia; ko te ora oki aia no taua kopapa nona nei. Etai teianei mei te ekalesia e kauraro i te Mesia nei, koia katoa oki te au vaine ki ta ratou uaorai au tane i te au mea katoa nei.” (Ephesia 5:21-24) Mei te au tane Kerititiano te kauraro anga i te taoonga upoko o Karaiti, e tau katoa te au vaine Kerititiano kia kite i te pakari o te kauraroanga i te mana akaaere tei orongaia mai e te Atua ki ta ratou au tane. Ka apai mai teia i te merengo anga oonu kia ratou e tei puapinga rava atu, te akameitakianga a Iehova.

16, 17. (a) Akapeea te au tamariki tei utuutuia mai i roto i te au kainga Kerititiano i te akataka anga ia ratou uaorai mei te manganui o te au mapu ou i teia tuatau, e eaa to ratou akakoro anga? (e) Akapeea a Iesu i te riro anga mai ei akaraanga memeitaki no te au mapu ou i teia tuatau, e eaa ta ratou e akamaroiroiia ra kia rave?

¹⁶ Te rekareka ra te au tamariki teokaratiki i te akaari i te tu ngateitei tau ki to ratou au metua. I te au uki ou i te au tuatau openga ra, kua akakiteia no ratou e ka “akarongo kore ki te metua.” (2 Timoteo 3:1, 2) Inara ki te au tamariki Kerititiano te karanga ra te Tuatua akauruia na te Atua e: “E te au tamariki e, e akarongo i to kotou au metua i te au mea katoa nei, e mea mareka te reira na te Atu.” (Kolosa 3:20) Na te akangateitei anga i te mana akaaere o te au metua te akamareka ra ia Iehova e ka apai mai i tana akameitakianga.

¹⁷ Kua akatutuia teia i to Iesu turanga. Te akakite ra ta Luka papaanga e: “E oki maira aia e ko raua katoa [tona nga metua] ki Nazareta, akarongo atura ia raua . . . Tupu aturā Iesu i te maata anga e te pakari, e te akaperepereia mai e te Atua e te tangata katoa.” (Luka 2:51, 52) E 12 o Iesu mataiti i te reira taime, te verepa Ereni tei taangaangaia i konei te tuatua tikai ra e “akarongo atura” aia i tona nga metua. No reira kare tona tu kauraro i ope ana i tona tuatau mapu ou anga. Me te inangaro ra kotou e te au mapu ou i te tere ki mua i te pae vaerua e kia marekaia e Iehova e te au tangata tu atua, ka akangateitei kotou i te mana akaaere i roto e i vao ake i te kainga.

Te Mana Akaaere i Roto i te Putuputuanga

18. Koai te Upoko o te putuputuanga Kerititiano, e koai ma tana i oronga i te mana akaaere ra?

¹⁸ I te tuatuaanga i te anoano no te tu mako i roto i te putuputuanga Kerititiano, kua tata a Paulo e: “Kare oki te Atua i te tumu o te kononinoni pu ua, no te au ra . . . E rave ra te au mea ravarai ma te tika e te manea [me kare, “e tau ki te papaanga,” NW tata anga i raro ake].” (1 Korinetia 14:33, 40) No te au mea kia tupu na roto i tetai tu mako, kua oronga a Karaiti, te Upoko o te putuputuanga Kerititiano, i te mana akaaere ki te au tangata akarongo. Ka tatau tatou e: “E kua akono oki aia i tetai pae, ei aposetolo; tetai pae, ei peroveta; tetai pae, ei apii evangelia; e tetai pae, ei tiaki, e ei orometua; Ei akatau i te aronga tapu, no te angaanga orometua . . . Kia akatika ra tatou i te tuatua-mou ma te aroa, kia tupu te tau iaia, i te upoko, i te Mesia, i te au mea katoa nei.”​—Ephesia 4:11, 12, 15.

19. (a) Koai ma ta Karaiti i akataoonga ki rungao i te au apinga nana i te enua nei, e koai tana i oronga i te mana akaaere takake ra? (e) Eaa te oronga anga mana akaaere te tupu ra i roto i te putuputuanga Kerititiano, e eaa ta teia e umuumu ra ia tatou?

¹⁹ I teia tuatau openga, kua akataoonga a Karaiti i te pupu “tavini akono meitaki e te pakari” ki rungao i “te au apinga ravarai nana ra,” me kore te au inangaro o te Patireia i te enua nei. (Mataio 24:45-47) Mei to te anere mataiti mua rai, te akatutuia ra teia tavini e tetai pupu akaaere o te au tangata Kerititiano akatainuia ta Karaiti i oronga ra i te mana akaaere kia rave i te au tukuanga tuatua e te akataoonga i tetai atu au akaaere. (Angaanga 6:2, 3; 15:2) E oti, ka oronga te Pupu Akaaere i te mana akaaere ki te au Kumiti Manga, te au akaaere tapere e te kotinga, e te aronga pakari i roto i te au putuputuanga takitai e tere atu i te 73,000 o te Au Kite o Iehova i te au enua katoa. Te tau ra tatou kia turu e te akangateitei i teia au tangata Kerititiano akono meitaki.​—1 Timoteo 5:17.

20. Eaa te akaraanga te akaari maira e te mareka kore ra Iehova i te aronga kare e akangateitei ana i te au taeake Kerititiano mana akaaere?

²⁰ No runga i te tu ngateitei ta tatou ka oronga ki te aronga mana akaaere i roto i te putuputuanga Kerititiano, ka rauka tetai akaaite anga meitaki i te raveia no te tu kauraro ta tatou ka oronga ki te au mana akaaere noa nei. Me aati tetai tangata i tetai ture tangata ta te Atua i akatika ra, ko te utunga tei tukuia e “te aronga tutara” ra, ma te tika, e akaari anga teia i te riri o te Atua ki rungao “i te tangata i rave i te kino ra.” (Roma 13:3, 4) Me ka riri a Iehova me aati tetai tangata i te au ture tangata e kare e akangateitei ana i te au mana akaaere o teianei ao, mei teaa atura tona mareka kore maata anga me kopae tetai Kerititiano akatapuia i te au kaveinga Puka Tapu e te akangateitei kore i te au taeake Kerititiano mana akaaere!

21. Eaa te ako anga Tuatua Tapu ka mataora tatou i te aru, e eaa te ka uriuriia i roto i te atikara ka aru mai?

²¹ I te mea e ka akatupu i te Atua kia mareka kore na te raveanga i tetai tu meameaau me kore akatakake, ka aru tatou i te ako anga a Paulo ki te au Kerititiano i Philipi: “E tenana, e aku au akaperepere e, kare akenei kotou i tivata i te akono, kare ra iaku anake i noo ki o kotou na, kua maata ra iaku i taka ke io nei, e rave akaoti ua i to kotou uaorai ora ma te mataku e te rutetetete. Ko te Atua oki tei angaanga ki roto ia kotou, i te inangaro e te rave, mei tana i anoano ra. E rave i te au mea ravarai ma te urutoe kore, e te taumāro kore. Kia riro kotou ei aronga apa kore, e te kino kore, ei tamariki na te Atua, kare e akakino anga, i rotopu i te uki piko e te māro: kia kakā kotou i rotopu ia ratou mei te rama i teianei ao.” (Philipi 2:12-15) Kare mei te uki piko e te maro tei apai mai i te manamanata mana akaaere ki rungao ia ratou uaorai, te papa ua ra to Iehova iti tangata i te kauraro i te mana akaaere. I reira ratou e kokoti ei i te au puapinga maata, mei ta tatou ka kite i roto i te atikara ka aru mai.

[Au Tataanga Rikiriki i Raro]

Te Uriuri Anga

◻ Koai te Mana Akaaere Teitei Rava, e eaa ra tana mana akaaere i tau tikai?

◻ Na teea tu te aronga mana taoonga e kia “akanooia i to ratou au ngai i raro ake i te Atua”?

◻ Eaa te taime kare te aronga mana taoonga i te ‘tavini no te Atua’?

◻ Eaa te akatereanga mana akaaere te vaira i roto i te au pamiri Kerititiano?

◻ Eaa te oronga anga mana akaaere te tupu ra i roto i te putuputuanga Kerititiano?

[Au Tutu i te kapi 18]

Kua akakite a Iesu e: “E apai mari i ta Kaisara kia Kaisara”