Te Atua e Kaitara

“E apai mari i ta Kaisara kia Kaisara; e ta te Atua ra, e apai ïa ki te Atua.”​—LUKA 20:25.

1. (a) Eaa to Iehova turanga akateiteiia ra? (e) Eaa ta tatou kaiou kia Iehova kare ra e tika kia apai tatou kia Kaitara?

I TA Iesu Karaiti oronga anga i tera apiianga, kare e ekoko anga i tona manako e ka riro ta te Atua ra umuumu anga i Tona au tavini ei mea mua i runga ake i tetai ua atu apinga ta Kaitara, me kare te Au-Enua, e umuumu ia ratou ra. E meitaki atu to Iesu kite i to tetai ua atu i te tika o te tuatua mou o ta te tata taramo pure kia Iehova ra: “Ko toou ra basileia, e basileia mutu kore ia, e toou ra mana [tutara]a ka tae ïa ki te au uki ravarai.” (Salamo 145:13) I ta te Tiaporo oronga anga i te mana no te au patireia o te ao katoa nei kia Iesu, kua pau atura Iesu kiaia kua tataia oki: “Ko toou Atua ra ko Iehova taau e akamori, e koia anake rai taau e akarongo.” (Luka 4:5-8) Kare rava e tika kia orongaia te akamori anga kia “Kaisara,” me ko Kaitara te ariki o Roma, ko tetai atu tutara tangata, me kare ko te Au-Enua uaorai.

2. (a) Eaa to Satani turanga i tona pirianga ki teianei ao? (e) Naai i oronga te tika i raukaʼi ia Satani tona turanga?

² Kare a Iesu i akakore e na Satani te au patireia o teianei ao kia oronga atu. I muri iora, kua tapaia a Satani ko “te ariki o teianei ao.” (Ioane 12:31; 16:11) I te vaitata anga ki te openga o te anere mataiti mua T.N., kua tata te apotetoro ko Ioane e: “Kua kite oki tatou e no te Atua tatou, e te vai ua nei rai to te ao ravarai i raro ake i taua vaerua kino ra.” (1 Ioane 5:19) Kare te aiteanga o teia e kua akaruke a Iehova i tona tu ngateitei i rungao i te enua nei. Kia maara e, i ta Satani orongaanga i te tutara anga kia Iesu ki rungao i te au patireia poritiki, kua na ko aia: “E oronga atu au i te au . . . kua tukuia mai oki kiaku.” (Luka 4:6) Te akono ra Satani i te au i rungao i te au patireia o te ao nei no te mea na te Atua anake ra te akatika anga.

3. (a) Eaa te turanga te akono ra te au kavamani o te enua nei ki mua i te aroaro o Iehova? (e) Akapeea ka raukaʼi ia tatou i te tuatua e ko te kauraro anga ki te au kavamani o teianei ao kare te aiteanga e te kauraro ra tatou ia Satani, koia te atua o teianei ao?

³ Mei te reira katoa oki, te akono ra te Au-Enua i tona mana no te mea anake na te Atua koia te Tutara Ngateitei nana i akatika kia rave i te reira. (Ioane 19:11) E no reira, “te aronga mana e noo nei” ka rauka kia tuatuaia e “kua akonoia ïa e te Atua.” Ki raro ake i te mana teitei o Iehova ra, ko to ratou mana e akaaka roa mai ki raro. Inara, e “tavini no te Atua” ratou, “e tavini oki ratou no te Atua,” no te mea te rave ra ratou i te au angaanga anoanoia, kia tamou i te ture e te ikuiku anga, ei akautunga i te aronga rave kino. (Roma 13:1, 4, 6) No reira ka tau te au Kerititiano kia kite e noatu rai e ko Satani te tutara akara koreia o teianei ao, me kare akatereanga, kare ra ratou e kauraro ana ia ratou uaorai kiaia me ka kite ratou i te aiteanga o to ratou kauraro anga ki te Au-Enua. Te akarongo ra ratou i te Atua. I teia mataiti, 1996 nei, ko te Au-Enua poritiki te vaira ei tuanga no “tei akonoia e te Atua,” e akanoonoo anga no te tuatau poto ta te Atua i akatika kia vai mai, e ka tau kia kite te au tavini o Iehova i te enua nei i te reira.​—Roma 13:2.

Te Au Tavini Taito o Iehova e te Au-Enua

4. Eaa ra a Iehova i akatikaʼi ia Iosepha kia riro ei tangata mana i roto i te kavamani o Aiphiti ra?

⁴ I mua ake i te tuatau Kerititiano, kua akatikaia e Iehova etai o tana tavini kia rave i te au taoonga teitei i roto i te au kavamani Au-Enua. Ei akatauanga, i te 18 anere mataiti M.T.N., kua riro ko Iosepha te paraimi minita o Aiphiti ra, koia to raro ua ake ia Pharao tei tutara ra i reira. (Genese 41:39-43) Na te au tupu anga i muri iora i akakite e na Iehova i akatanotano i teia kia raukaʼi ia Iosepha i te tavini ei tetai mana i te akatinamouanga i te ‘uanga o Aberahama,’ tana anaunga, no te akatupuanga i Tana au akakoro anga. Inara, ka tau kia maaraia e i okoia a Iosepha ki roto i te tuikaaanga ki Aiphiti, e te ora ra aia i te tuatau kare te Ture a Mose e kare katoa oki “te ture a te Mesia” i runga i te au tavini o te Atua ra.​—Genese 15:5-7; 50:19-21; Galatia 6:2.

5. Eaa ra te au ngati Iuda tuikaaia ra i akaueiaʼi kia “kimi i te au” o Babulonia?

⁵ I etai anere mataiti i muri iora kua akauruia e Iehova a Ieremia koia te peroveta tiratiratu ra kia tuatua atu ki te au ngati Iuda tuikaaia ra kia kauraro ki te aronga tutara i Babulonia ra e kia pure oki no te tu au o taua oire ra. I roto i tana reta kia ratou, kua tata aia: “Te na ko maira Iehova Sabaota ra, te Atua o Iseraela, ki te au tuikaa katoa ra, . . . E kimi oki kotou i te au no taua oire ra, tei apai tuikaaia kotou e au ra i reira, e e pure kia Iehova i te reira; ko to te reira au, ko to kotou katoa rai ïa au.” (Ieremia 29:4, 7) I te au tuatau ravarai e tumu to te au tangata o Iehova kia “kimi i te au” no ratou uaorai e te enua te ngai e noo ra ratou, e e raukaʼi te tu rangatira no te akamori ra ia Iehova.​—1 Petero 3:11.

6. Noatu rai kua orongaia kia ratou te au turanga teitei o te kavamani ra, na roto i teea au mataara ta Daniela ratou ko tona nga oa e toru ra akakore anga i te tuku ua no runga i te Ture a Iehova ra?

⁶ I te tuatau o te tuikaa anga ki Babulonia ra, kua tuku a Daniela ratou ko nga ngati Iuda tiratiratu e toru ra kia te tereniia e te Au-Enua ia ratou i tuikaaia ra kia Babulonia e kua riro ratou ei au tavini teitei ki Babulonia ra. (Daniela 1:3-7; 2:48, 49) Inara, noatu i to ratou tuatau terenianga, kua akono ratou i te turanga ngaueue kore no runga i te kai manga te ka rauka kia taki atu ia ratou kia aati i te Ture ta to ratou Atua, ko Iehova, i oronga atura na roto ia Mose. No teia tu kua akameitakiia ratou. (Daniela 1:8-17) I te akatu anga te Ariki ko Nebukanesa ra tetai tiki a te Au-Enua, i te akaraanga kua akaueia nga oa Epera e toru o Daniela kia aere atu ma to ratou au oa akaaere Au-Enua ra ki te akatapu anga i te tiki ra. Inara, kare ratou toko toru i “tipapa . . . ki raro i reira ka akamori ei” i te itoro Au-Enua ra. I reira, kua tutaki akaou a Iehova i to ratou tu tiratiratu. (Daniela 3:1-6, 13-28) Mei te reira katoa i teia tuatau, te akangateitei ra te Au Kite o Iehova i te reva o te enua te noo ra ratou i reira, inara kare ratou e rave i tetai angaanga akamorianga i te reira.​—Exodo 20:4, 5; 1 Ioane 5:21.

7. (a) Eaa te tu anga meitaki ta Daniela i akono, noatu rai tona turanga teitei i te akapapaanga kavamani o Babulonia? (e) Eaa te au taui anga tei tupu mai i te au tuatau Kerititiano nei?

⁷ I muri ake i te topa anga te papaanga tutara ou o Babulonia, kua orongaia kia Daniela tetai taoonga teitei o te kavamani i raro ake i te mana o Madai raua ko Peresia tei mono ra i to Babulonia. (Daniela 5:30, 31; 6:1-3) Inara kare aia i akatika i tona turanga teitei kia taki atu iaia ki te akakoreanga i tona tiratiratu. I te umuumu anga te ture Au-Enua e kia akamori aia i te Ariki ia Dariu e auraka ia Iehova, kare aia i akatika. No te reira tumu kua tiria aia ki roto i te vaarua o te au riona, inara kua akaoraia aia e Iehova. (Daniela 6:4-24) Tera ra, no te tuatau teia i mua ake i te Kerititiano. I te oti anga te akanooia te putuputuanga Kerititiano ra, kua riro mai te au tavini o te Atua “tei raro ake ra [ratou] i te ture i te Mesia.” E manganui i te au apinga tei akatikaia i raro ake i te akatereanga ngati Iuda ra kua tuke te manakoia, kua akatumuia ki runga i te mataara o ta Iehova ra akonoanga i teianei ma tona au tangata.​—1 Korinetia 9:21; Mataio 5:31, 32; 19:3-9.

To Iesu Tu Manako i te Au-Enua

8. Eaa te tupu anga tei akakite maira e kua tamou marie a Iesu i tona manako kia kore e o atu ki te angaanga poritiki?

⁸ I to Iesu Karaiti tuatau i runga i te enua nei, kua akanoo aia i te au turanga teitei ake no tana au pipi, e kua akakore aia i te piri anga ravarai ki roto i te poritiki me kare te au angaanga vaeau katoa oki. I muri ake i ta Iesu ra angai temeio anga i etai tauatini tangata ma nga manga kerite e nga ika meangiti e rua, kua anoano te au tangata ngati Iuda kia mou iaia e akariro iaia ei ariki poritiki. Inara kua kopae viviki atu ra Iesu ia ratou e oki akaou atura aia ki runga i te au maunga. (Ioane 6:5-15) No runga i teia tupu anga, te tuatua ra The New International Commentary on the New Testament: “E pakari te manako iti tangata i roto i te au ngati Iuda i taua tuatau ra, e kare e ekoko anga e manganui to te aronga tei kite i taua temeio ra kua manako e koia ra tetai arataki tu-Atua akameitakiia, koia tikai tetai ei arataki ia ratou kia patoi atu i to Roma. No reira kua akapapa ia ratou uaorai kia akariro iaia ei ariki.” Kua akakite mai te reira e “kua kopae takiri” a Iesu i teia oronga anga ei arataki poritiki aia. Kare a Karaiti i turu i tetai ua atu meameaau i te tutara anga a to Roma. Ko te tika, kua totou aia eaa te ka tupu i te patoi anga te ka raveia i muri ake i tona matenga​—e maata te au mate no te au tangata o Ierusalema e te akapouanga i taua oire ra.​—Luka 21:20-24.

9. (a) Akapeea ta Iesu akataka anga i te pirianga o tona Patireia ki teianei ao? (e) Eaa te arataki anga ta Iesu i oronga ki tana au pipi no ta ratou au akonoanga ma te au kavamani o teianei ao?

⁹ I mua poto ake i tona matenga, kua tuatua atura Iesu ki te tangata komono takake o te ariki o Roma i Iudea ra: “Kare to teianei ao taku basileia: naringa no teianei ao taku basileia, kua akamaroiroi ïa toku au tavini, kia kore au e tukuia ki te ngati Iuda; kare ra toku basileia i to ko nei.” (Ioane 18:36) Kia tae roa ki te akaope anga a tona Patireia te tutara a te au kavamani poritiki, ka aru ra te au pipi a Karaiti i tona akaraanga. Ka akarongo ratou ki taua au mana tei akanooia ra kare ra ratou e tamanata atu i ta ratou au angaanga poritiki ra. (Daniela 2:44; Mataio 4:8-10) Kua oronga atu a Iesu i te au kaveinga no tana au pipi, i te na ko anga: “E apai mari i ta Kaisara kia Kaisara; e ta te Atua ra, e apai ïa ki te Atua.” (Mataio 22:21) I mua akera, i roto i tana Tuatua i runga i te Maunga ra, kua tuatua a Iesu: “E ko te akaue mai kia koe e aere i tetai maile, aere ua atu korua e rua maile.” (Mataio 5:41) I roto i te akapapa anga o teia tuatua, kua akatutu maira Iesu i te kaveinga o te kauraro marekaanga ki te au akauenga tau, me i roto i te au pirianga tangata me kare i roto i te au umuumu anga kavamani te rotai ra ma te ture a te Atua ra.​—Luka 6:27-31; Ioane 17:14, 15.

Au Kerititiano e Kaitara

10. Kia tau ki ta tetai tata tuatua enua, eaa te turanga tau ta te au Kerititiano mua i mou no runga ia Kaitara?

¹⁰ Ko teianei au kaveinga poto ua ei akatere i te pirianga i rotopu i te au Kerititiano e te Au-Enua ra. I roto i tana puka The Rise of Christianity, kua tata te tata tuatua enua ko E. W. Barnes e: “A te au anere mataiti katoa te aere maira, me ka ekoko tetai Kerititiano i tana angaanga ki te Au-Enua ra, ka ariu atu aia ki ta Karaiti apiianga mana ra. Ka tutaki aia i tana au tero: penei e teiaa te moni patiia maira kua riro kia kore e rauka te akakoromaki anga i mua ake i te topa anga te Patireia o te Opunga Ra ra​—mari ra ka tutaki te Kerititiano ia ratou. Ka ariki katoa aia i etai atu au apainga a te Au-Enua, kia kore ra aia e akaueia mai kia oronga atu kia Kaitara i te au apinga na te Atua ra.”

11. Eaa ta Paulo ako anga i te au Kerititiano kia akono ma te au tutara o teianei ao?

¹¹ No te rotai anga ki teia i tuatuaʼi te apotetoro ko Paulo ki te au Kerititiano i Roma ra, e manga tere atu i te 20 mataiti i muri ake i te matenga o Karaiti ra e: “Kia kauraro marie te tangata katoatoa i te aronga mana taoonga ra.” (Roma 13:1) E vaitata i te tai ngauru mataiti i muri akera, i mua poto ake i te rua o tona tapekaanga e tona tamate anga i Roma, kua tata a Paulo kia Tito: “E akakite atu ia ratou [te au Kerititiano Kereta ra] e e kauraro marie i te ui ariki e te aronga mana, e akarongo i te aronga akava ra, e akatika i te au angaanga memeitaki ravarai, Auraka rava e akakino atu i te tangata ravarai, eiaa ei tauetono, kia maru ra, e te akono i te mea maru i te tangata katoa ra.”​—Tito 3:1, 2.

Tupu Anga te Kiteanga i “te Aronga Mana Taoonga”

12. (a) Eaa ta Charles Taze Russell i manako ei turanga tika no tetai Kerititiano i te pirianga ki te aronga mana kavamani? (e) No te tavinianga i te au vaeau ra, eaa te au manako tuke tuke o te au Kerititiano akatainuia ra i te tuatau o te Tamaki I o Teianei Ao?

¹² Mei te 1886 maira, kua tataia e Charles Taze Russell ki roto i tana puka The Plan of the Ages e: “Kare a Iesu e kare katoa oki te au Apotetoro i tamanata atu i te au tutara enua na roto i tetai ua atu mataara. . . . Kua apii atura ratou i te Ekaretia kia akarongo i te au ture, e kia akangateitei i te aronga mana no to ratou taoonga, . . . kia tutaki i ta ratou au tero akatakaia, e auraka ra me te patoi ra i te au ture a te Atua (Anga. 4:19; 5:29) auraka e patoi atu i tetai ua atu ture akanooia ra. (Roma 13:1-7; Mata. 22:21) I akono ra a Iesu e te au Apotetoro e te ekaretia mua ra ratou katoa i te ture, noatu rai e i takake ratou, e kare i o atu ki tetai tuanga i roto i te au kavamani o teianei ao.” Kua akataka tika maira teia puka i “te au mana teitei,” me kare “te aronga mana taoonga,” tei taikuia maira e te apotetoro ko Paulo, ei te aronga mana kavamani tangata nei. (Roma 13:1, King James Version) I te 1904 kua tuatuaia mai i te puka The New Creation e ko te au Kerititiano mou “ka tau kia kiteaia i roto i te aronga maata akono i te ture o teia tuatau nei​—kare ei akapekapeka, kare ei tauetono, kare ei kimi tarevake ra.” Kua riro te aite anga maramaia e tetai papaki no teia e e kauraro takiri anga ki te aronga mana, noatu kia rave katoa i te angaanga i roto i te au nuku vaeau ra i te Tamaki I o Teianei Ao. Inara ko etai, kua manako e te patoi ra te reira i ta Iesu i tuatua maira e: “Ko tei rave i te koke ra, ka mate ïa i te koke.” (Mataio 26:52) E mea tika ra, te anoanoia tetai kiteanga taka meitaki atu no te kauraro anga Kerititiano i te aronga mana taoonga ra.

13. Eaa te taui anga i te kite i te akataka anga o te au mana teitei tei orongaia mai i te 1929 ra, e i akapeea te riro anga o te reira ei puapinga?

¹³ I te 1929, i te tuatau te akamata ra te au ture o te au kavamani tuke tuke ra i te arai i te au apinga ta te Atua i akaue maira me kare kia akaue i te au mea te araiia maira e te ture a te Atua ra, kua irinakiia e ko nga mana teitei ka tika e te Atua ko Iehova raua ko Iesu Karaiti.b Ko teia te maramaanga o te au tavini o Iehova i te tuatau kino i mua ake e i te tuatau oki o te Tamaki II o Teianei Ao ra e aere mai ki te Tamaki Anu ra, ma tona aite anga mataku ra e tona teateamamao anga vaeau. I te akara anga ki muri, ka tika kia tuatuaia e ko teia manako anga no te au mea, i to te reira akapaapaaanga i te tu teitei o Iehova e tana Karaiti, kua tauturu i te au tangata o te Atua kia tamou marie i tetai turanga takake i teianei ao ma te kore e tuku ua na roto katoa i teianei tuatau ngata.

Kauraro Anga Kotingaia

14. Akapeea te tupu anga o te marama i te akataka anga ia Roma 13:1, 2 e te au tuatua tapu tei piri atu ra ki te reira i te 1962?

¹⁴ I te 1961 kua oti te New World Translation of the Holy Scriptures. Kua umuumuia tetai apii anga oonu i te reo irava tikai o te au Tuatua Tapu. Na te urianga papu tikai i te au tuatua tei taikuia ra kare ia Roma pene 13 anake mari ra i te au takiota tuatua katoa ia Tito 3:1, 2 e 1 Petero 2:13, 17 kua akariro kia taka papu e ko te tuatua “aronga mana taoonga” te taiku ra, kare i te Mana Teitei, ko Iehova, e tana Tamaiti, ko Iesu, mari ra i te aronga mana kavamani tangata nei. I te tuanga openga o te 1962, kua neneiia te au atikara i Te Punanga Tiaki tei oronga maira i tetai akataka anga tika no Roma pene 13 e kua oronga katoa i te manako taka meitaki atu i to tei mouia ra i te tuatau ia C. T. Russell. Kua akakite mai teia au atikara e ko te kauraro anga Kerititiano ki te aronga mana kare e tika e ei kauraro takiri. Ka tika ia ei mea kotingaia, kia kore te reira e apai i te au tavini o te Atua kia patoi i ta te Atua au ture. Kua akaketaketa katoa mai etai atu atikara o Te Punanga Tiaki i teia tumu puapinga maata.c

15, 16. (a) Eaa te tu tau meitaki atu ta te kite anga ou ia Roma pene 13 ra i taki atu? (e) Eaa nga uianga te vai maira kia pauia?

¹⁵ Na teia taviri ki te kite tika ia Roma pene 13 i raukaʼi i te au tangata o Iehova kia akatau atu i te kauraro anga no te aronga mana poritiki ra ma tetai turanga tuku kore anga no runga i te au kaveinga puapinga maata o te au Tuatua Tapu ra. (Salamo 97:11; Ieremia 3:15) Kua akatika te reira ia ratou kia rauka te manako tika no to ratou ra pirianga ma te Atua e ta ratou au akonoanga ma te Au-Enua. Kua akapapu mai te reira e ia ratou e apai ra i ta Kaitara kia Kaitara, kare ratou e manako kore i te apai i ta te Atua ki te Atua ra.

¹⁶ Inara eaa tikai ta Kaitara au apinga? Eaa te au apinga tau kia patiia e te Au-Enua ki tetai Kerititiano ra? Ka uriuri manakoia teia nga uianga i roto i te atikara te ka aru mai.

[Au Tataanga Rikiriki i Raro]

E mea reka kia akamanakoia, i roto i tana tuatua anga no Roma pene 13, kua tata a Poropeta F. F. Bruce e: “Te taka meitaki maira i te au tataanga, mei te tataanga tikai ta te au apotetoro i tata ra, e ka tika te au-enua kia akaue anake ua kia rave ki roto i te au kotinga o te au akakoro anga tei akatumuia i te tu-Atua​—koia oki, kia arai takiriia te au-enua me ka pati kia orongaia ki aia te kauraroanga te tau ra ki te Atua anake ua.”

Ka Rauka Ainei ia Koe i te Akataka?

◻ Eaa i kore ei te aite anga o te kauraro anga ki te aronga mana e e kauraro anga ia kia Satani?

◻ Eaa to Iesu tu manako ki te au poritiki o tona tuatau ra?

◻ Eaa te ako anga ta Iesu i oronga ki tana au pipi no ta ratou au akonoanga ma Kaitara ra?

◻ Akapeea ta Paulo ako anga i te au Kerititiano kia akono atu ma te au tutara o te au enua ra?

◻ I akapeea te kiteanga i te akataka anga i te aronga mana i te tupu anga i te au mataiti kua topa akenei?

[Tutu i te kapi 10]

I to Satani oronga anga i te mana poritiki kiaia, kare a Iesu i ariki ana

[Tutu i te kapi 13]

Kua tata a Russell e “ka tau kia kiteaia [te au Kerititiano] ki roto i te aronga maata tei akono i te ture o teia tuatau nei”