Kia Mou Apa Kore Ma te Ki i te Kite

“Te tauta marie anga [aia] i te pure ia kotou kare e tivata, kia mou apa kore rai kotou ma te ki i te kite i te au anoano katoa o te Atua ra.”​—KOLOSA 4:12.

1, 2. (a) Eaa ta te aronga o vao i kite no te au Kerititiano mua ra? (e) Akapeea ta te puka o Kolosa akaata anga i te manako aroa?

E MANAKO anga oonu to te au pipi a Iesu i to ratou au oa akamori. Kua akakite a Tertullian (koia tetai tangata tata o te rua e te toru anere mataiti T.N.) i te takinga meitaki ta ratou i akaari ki te au matiroeroe, te aronga putaua, e te aronga ruaine oki. Kua akamanako maata taua au akakite anga aroa ra i te aronga akarongo kore e kua tuatua tetai papaki no te au Kerititiano, ‘E akara oki i to ratou aroa tetai i tetai.’

² Te akaata maira te puka o Kolosa i taua manako aroa o te apotetoro ko Paulo raua ko tona oa ko Epaphera no te au taeake e te au tuaine i Kolosa. Kua tata a Paulo kia ratou: I to Epaphera “tauta marie anga i te pure ia kotou kare e tivata, kia mou apa kore rai kotou ma te ki i te kite i te au anoano katoa o te Atua ra.” I te tuatau o te 2001, ka akono te Au Kite o Iehova e ko to ratou irava mataiti i teia au tuatua o Kolosa 4:12: “Kia mou apa kore rai kotou ma te ki i te kite i te au anoano katoa o te Atua ra.”

3. Eaa nga apinga e rua ta Epaphera ra i pure?

³ Ka kite koe e ko ta Epaphera au pure no tona aronga akaperepere e rua nga tuanga: (1) e “kia mou apa kore rai” ratou e (2) kia mou ratou “ma te ki i te kite i te au anoano katoa o te Atua ra.” Kua kapitiia teia akakite anga i roto i te au Tuatua Tapu ei puapinga no tatou. No reira e ui kia koe uaorai, ‘Eaa taku uaorai e umuumu ra kia rave kia mou apa kore rai ma te ki i te kite i te au anoano katoa o te Atua ra? E me ka rave au i te reira, eaa te tupu anga?’ E akara tatou.

E Tauta kia “Mou Apa Kore”

4. Kua umuumuia to Kolosa kia “apa kore” i roto i teea tu?

⁴ Kua inangaro tikai a Epaphera e “kia mou apa kore rai” tona au taeake e te au tuaine pae vaerua i Kolosa ra. Ko te tuatua ta Paulo i taiku i konei kua uriia e “apa kore” ka tau rai te tu apa kore ua, ki katoa me kare pakari. (Mataio 19:21, Ebera 5:14; Iakobo 1:​4, 25) Penei kua kite koe e ko tetai tei papetitoia ra ei Kite no Iehova kare te aite anga e e Kerititiano tupu maata aia. Kua tata a Paulo ki te aronga Ephesia tei noo ra ki te opunga rā o Kolosa, e kua tauta te au tiaki e te au orometua kia tauturu “kia riro [ratou] ravarai ei tangata pakari, i te akarongo okotai, e te kite i te Tamaiti a te Atua ra, kia taea te aite ra i te ki o te Mesia i te maata.” I etai atu ngai kua raurau a Paulo i te au Kerititiano kia riro “i te kite ra, ei tangata pakari.” ​—Ephesia 4:​8-13; 1 Korinetia 14:20.

5. Akapeea e raukai ia tatou te akariro i te tu apa kore ei akakoro anga tikai?

⁵ Me kare etai i Kolosa ra i riro ake ei tangata pakari i te pae vaerua, me kare ei tangata kite, kua tau te reira ei akakoro anga na ratou. Kare ainei e tau ko te tika katoa te reira i teia tuatau? Noatu me kua papetitoia tatou e au rau ngauru ua atu mataiti kua topa me kare i ou ua akenei, te kite meitaki ra ainei tatou e te tere ra tatou ki mua i to tatou kite e te au manako anga? Te akamanako ra ainei tatou i te au kaveinga Pipiria i mua ake ka tuku tikaʼi? Te au tumu te piri atura ki te Atua e te au apinga no te putuputuanga ra te tupu maata ra ainei i roto i to tatou oraanga, kare i etai taime ua? Kare e rauka ia tatou te akatutu i konei i te au aerenga ravarai penei kia akaata tatou i taua tupuanga ra kia apa kore, inara e akamanako ana i nga akatauanga e rua.

6. Eaa tetai ngai penei e raukai i tetai kia tere atu ki mua kia riro kia apa kore ua, mei ia Iehova rai?

⁶ Akatauanga tai: Penei kua tupu ake tatou i roto i tetai reva tei akairoia ra e tetai manakoanga kino me kare e riri ki te au tangata no tetai atu iti tangata ke, pa enua, me kare no tetai ngai ke. I teianei kua kite tatou e kare te Atua e akono i te tu o te tangata e ka tau katoa oki kia kore tatou. (Angaanga 10:​14, 15, 34, 35) I roto i to tatou putuputuanga me kare kotinga, te vaira te au tangata tataki tai no reira mai, no reira te koropini ra tatou ia ratou. Inara, akapeea te maata o to tatou tamou marie anga i roto i o tatou ngakau i etai au manako ngakau tau kore me kare au tarotokaka i taua aronga tangata no taua au enua? ‘E tu riri ua ainei to tatou,’ te viviki ra i te manako i tetai apinga tau kore me ka rave tetai no taua enua ra i te apa me kare ka akakino meangiti ua ia tatou na tetai tu? E ui ia koe uaorai, ‘Ka umuumuia ainei au kia tere atu ki mua i te akariro anga kia aite te manako mei to te Atua ra no te akono i te tangata?’

7. Te riroanga kia apa kore mei tetai Kerititiano penei ka kapiti i te raukaanga teea manako no etai ke ra?

⁷ Te akatauanga rua: Kia tau ki ta Philipi 2:3, ka tau tatou “auraka takiri e mea e raveia ma te taumāro, e te akanengonengo puapinga kore; ei ngakau akaaka ra, i te manako akameitaki atu tetai ki tetai, auraka iaia uaorai.” Akapeea tatou i te tereanga ki mua i teia tu? E au tu paruparu e te maroiroi oki to te tangata taki tai ra. Me i te tuatau kua topa e viviki tatou i te kite i te au tumu paruparu o etai ke, kua tere ainei tatou ki mua, i te kore anga e manako atu ia ratou kia vaitata i te tu “apa kore ua”? (Iakobo 3:2) I teianei, kia maata atu i to mua ana, te rauka ra ainei ia tatou kia kite​—e kia kimi​—no te au tu i meitaki atura etai ke ia tatou? ‘Ka akatika au e e meitaki atu teia tuaine iaku i te akakoromaki ua.’ ‘Te akaata ra tera tangata i te akarongo manako papu maata.’ ‘Te papu ra e, koia tetai orometua meitaki atu iaku nei.’ ‘E meitaki atu aia i te akatere i tona tu.’ Penei kua umuumuia etai o to Kolosa ra kia tere atu ki mua i teia mataara. Te pera ra ainei tatou?

8, 9. (a) I teea tu ta Epaphera pure anga no to Kolosa kia “mou” apa kore? (e) Te ‘mouanga apa kore’ te tuatua ra no teaa i te tuatau ki mua?

⁸ Kua pure a Epaphera e kia “mou apa kore” to Kolosa ra. Te taka meitaki ra, kua pure a Epaphera ki te Atua e i te mea te apa kore ra to Kolosa, te pakari ra, e au Kerititiano ki katoa, ka “mou” ratou, me kare ka rave tamou marie ua atu rai.

⁹ Kare e rauka kia manako tatou e ko te aronga taki tai tei riro ra ei Kerititiano, ko tetai tei pakari ra, ka vai tamou marie ua atu rai. Kua tuatua a Iesu e ko tetai tamaiti angera a te Atua “kare aia i mou i te tuatua-mou.” (Ioane 8:44) E kua akamaara atura Paulo i to Korinetia no tetai papaki i te tuatau kua topa tei tavini ra ia Iehova no tetai tuatau inara kua puapinga kore i muri akera. Kua akamatakite atu aia i te au taeake tei akatainuia ra i te vaerua: “Ko te manako ra e te tu ra aia, kia matakite aia ko te inga aea.” (1 Korinetia 10:12) Te kapiti atura teia i te akaketaketa anga ki te pure e kia “mou apa kore” to Kolosa ra. Me riro ratou kia apa kore, kia ki katoa, ka tau ratou kia akakoromaki, auraka e unui ki muri, kia maromaroa, me kare kia panu ke atu. (Ebera 2:1; 3:12; 6:6; 10:39; 12:25) Na reira ka riro ratou kia “apa kore” i te ra o to ratou akara matatio anga e te mareka anga openga oki.​—2 Korinetia 5:10; 1 Petero 2:12.

10, 11. (a) Eaa te akaraanga ta Epaphera i akanoo mai no tatou i te pure? (e) Kia tau ki ta Epaphera i rave, eaa te manako taau ka inangaro kia rave?

¹⁰ Kua oti akenei ia tatou i te uriuri manako te puapinga o te pureanga no etai ke ra ma te ingoa, i te akataka meitakianga i te patianga kia tauturu a Iehova ia ratou, kia akapumaana ia ratou, kia akameitaki ia ratou, e kia oronga i te vaerua tapu kia ratou. Mei te reira katoa te tu o ta Epaphera au pure no to Kolosa ra. E ka rauka ia tatou​—ko te tika ka tau tatou kia kite i roto i taua au tuatua ra i tetai manako puapinga no ta tatou ka tuatua kia Iehova i te pure anga no tatou uaorai. Kare e ekoko anga, ka tau tatou kia pati no ta Iehova ra tauturu kia riro tatou tataki tai i te openga ra kia “mou apa kore.” Te pera ra ainei koe?

¹¹ Eaa koe i kore ei e taiku i toou turanga na roto i te pure? E tuatua ki te Atua i te vaito o toou tupuanga kia riro ei “apa kore,” kia ki katoa, kia pakari. E pati akatenga iaia kia tauturu ia koe kia kite i te au ngai te umuumuia ra koe kia tupu atu i te pae vaerua. (Salamo 17:3; 139:​23, 24) Kare e ekoko anga, te vaira etai ngai noou kia itae atu. Ei reira, auraka e reka kore no teia, e pati taka meitaki ki te Atua, kia tika tika atu no te tauturu kia tere ki mua. E rave i teia kia tere atu i te okotai taime. Ko te tika, eaa i kore ei e akatika e a teia epetoma e aere mai nei ka pure koe a tetai tuatau roa kia “mou apa kore” koe. E parani oki kia rave maata atu i te reira ia koe e akamanako ra i te irava mataiti. I roto i taau au pure, e akamanako atu ki runga i te au tu penei ka unui koe ki muri, te maromaroa, me kare te panu ke atura mei te angaanga a te Atua e akapeea e raukai ia koe te kopae no te raveanga i te reira.​—Ephesia 6:​11, 13, 14, 18.

E Pure no te Ki i te Kite

12. Eaa ra te tumu maata i umuumu ei to Kolosa ra e kia “ki i te kite” ra?

¹² Kua pure katoa oki a Epaphera no tetai atu apinga tei riro ra ei puapinga me ka kitea to Kolosa i te tuanga arikiia ki te Atua. Te aite ra te umuumu anga o te reira no tatou. Eaa te reira? Kua pure aia e kia mou ratou “ma te ki i te kite i te au anoano katoa o te Atua ra.” Kua koropiniia ratou e te au manako tuke ra e te au apiianga akakino, ko etai o te reira e akaraanga akavare i te akamori mou. Ei akatauanga, kua taomiia ratou kia akono i etai au ra takake no te akakore anga kai me kare no te kaikaianga, mei tei umuumuia ra i mua ana i te akamori anga ngati Iuda. Kua manako maata te au orometua pikikaa ki runga i te au angera, kua rave taua au vaerua ririnui ra i te apai atu i te Ture kia Mose ra. E tamanako ana i te kauraro anga ki taua au tu taomi anga ra! Kua tupu tetai oripu anga tini no te au manako tuke tuke.​—Galatia 3:19; Kolosa 2:​8, 16-18.

13. Na te kiteanga i teea tumu e tauturuiai to Kolosa, e akapeea te reira i te tauturuanga ia tatou?

¹³ Kua patoi atura Paulo na te akaketaketaanga i te tuanga a Iesu Karaiti. “Kua āriki kotou i te Atu ra i te Mesia ia Iesu, kia akono kotou i tana: Kia akaia ki roto iaia, e kia patuia ki rungao iaia, e kia akatinamouia kotou i te akarongo, mei tei apiiia atu ia kotou na.” Ae, e umuumu anga tetai (na to Kolosa e na tatou oki) no te irinaki anga ki katoa i te tuanga a te Karaiti i roto i ta te Atua akakoro anga e i to tatou oraanga oki. Kua akataka maira Paulo: “Tei roto iaia oki te ki katoa o te Atua i te noo marie anga. E kua meitaki rava kotou iaia, te upoko ïa i te aronga mana e te aronga au katoa ra.”​—Kolosa 2:​6-10.

14. Eaa ra te manakonako anga i riro ei ei apinga tika tikai no te aronga i Kolosa ra?

¹⁴ To Kolosa e au Kerititiano akatainuia i te vaerua ra. E manakonako anga taka meitaki to ratou, e oraanga i te au rangi ra, e tei ia ratou te au tumu ravarai kia tamou marie kia kaka taua manakonako anga ra. (Kolosa 1:5) Ko “te anoano ia o te Atua” e kia ki i te kite ratou no te papu o to ratou manakonako anga. Ka tau ainei etai o ratou kia ekoko i taua manakonako anga ra? Kare rava ia! Ka tau ainei kia tuke i teia tuatau no te aronga katoa tei ia ratou ra te manakonako orongaia mai e te Atua no te oraanga ki roto i tetai parataito i te enua nei? Kare, tikai! Ko taua manakonako anga te taka meitaki ra e e tuanga ia no “te anoano o te Atua.” E akamanako ana i teianei i teia nga uianga: Me ko koe tetai te tauta ra kia riro e ko tetai o te “urupu maata” te ka ora atu i “te mate maata,” akapeea te tika tikai o toou manakonako anga? (Apokalupo 7:​9, 14) Ko tetai tuanga ainei ia no toou “ki i te kite i te au anoano katoa o te Atua ra”?

15. Eaa te au papaanga ta Paulo i akanoo tei kapiti ra i te manakonako anga?

¹⁵ No te “manakonako anga” kare tatou e tuatua ana no tetai inangaro taka kore ua, me kare te moemoea anga. Te kite nei tatou i teia mei te au tumu i orongaia maira e Paulo i mua akera ki to Roma. I roto i aua tumu ra, te au apinga tataki tai tei taikuia te kapitiia atura me kare te taki atura ki tetai atu. E akamanako i te ngai ta Paulo i tuku ra i te “manakonako anga” ki roto i tana uriurianga: “Kia rekareka katoa tatou i te au tumatetenga, i te mea kua kite tatou e na te au tumatetenga e akatupu i te tamou marie; e na te tamou marie anga, e tupu mai ei te tu marekaia; na te tu marekaia, e raukaʼi te manakonako anga, e kare te manakonako anga e taki atu ki te mareka kore anga; no te mea kua riringiia mai te aroa o te Atua ki roto i to tatou ngakau na roto i te vaerua tapu.”​—Roma 5:​3-5, NW.

16. Ia koe e apii ra i te tuatua mou Pipiria, eaa te manakonako anga tei rauka ia koe?

¹⁶ I ta te Au Kite o Iehova ra tua anga mai i te tuatua Pipiria kia koe, penei kua mou i toou manako tetai tuatua mou, mei te tu o tei mate ra me kare te tuakaouanga ra. No te aronga e manganui, ko te kite ouanga maata ko te rauka anga te oraanga akatumuia ki runga i te Pipiria ki roto i tetai parataito i te enua nei. E tamanako ana i toou akarongo mua anga i taua apiianga ra. Mei teaa ra tetai manakonako anga umere​—ka kore atu te maki e te ruaine anga, ka rauka kia ora atu koe kia rekareka i te au ua o taau angaanga, e ka tupu te au ma te au manu katoa ra! (Koheleta 9:​5, 10; Isaia 65:​17-25; Ioane 5:​28, 29; Apokalupo 21:​3, 4) Kua rauka ia koe tetai manakonako anga meitaki!

17, 18. (a) Akapeea te papaanga ta Paulo i oronga ki to Roma ra i te taki atu anga ki te manakonako anga? (e) Eaa te aite anga o te tu manakonako anga ia Roma 5:​4, 5, e tei ia koe ainei te reira?

¹⁷ I muri iora, penei kua aro atu koe i etai patoianga me kare takinga kinoanga. (Mataio 10:​34-39; 24:9) Noatu i roto i te au mataiti ou ua akenei, kua raveia te au kainga o te Au Kite i tetai au enua tuke tuke me kare kua maroia e kia riro ei aronga kimi ora. Tetai ia ratou kua takinokinoia, kua raveia ta ratou au puka Pipiria, me kare kua riro ana ei aronga pikikaaia na roto i te ripoti i roto i te nuti. Noatu e eaa te tu takinokino anga ka aro atu koe, mei ta Roma 5:3 i tuatua, ka rekareka koe i te tumatetenga, e kua apai mai te reira i tetai tupu anga meitaki. Mei ta Paulo i tata, kua akatupu mai te tumatetenga i te akakoromaki ki roto ia koe. I reira kua taki atu te akakoromaki ki tetai tu marekaia. Kua kite koe e te rave ra koe i te mea tika, i te raveanga i te anoano o te Atua, no reira kua manako ngakau papu koe e kua rauka ia koe tona mareka anga. I ta Paulo au tuatua, kua kite koe i te riroanga ki roto i “tetai tu marekaia.” I te rave ua atuanga, kua tata a Paulo e “kua akatupu te tu marekaia i te manakonako anga.” Penei ka akara anga manga tuke te reira. Eaa ra Paulo i tatai i te “manakonako anga” kia mamao mai ki roto i taua tata anga ra? Kare ainei oou manakonako anga i mua roa akera, i toou akarongo anga mua i te tuatua meitaki ra?

¹⁸ Te taka meitaki ra, e kare a Paulo e tuatua ana i konei i to tatou manako ngakau i te akamataanga o te manakonako no te oraanga apa kore ua. Ko tana e taiku ra te aere mamao ke atura i te reira; te oonu ke atura ia, e maata atu te akakeuanga. Me akakoromaki tiratiratu tatou e ka kite oki e tei ia tatou to te Atua marekaanga, ka riro teia ei tupuanga maata i te kapitianga atu e te akamaroiroianga i to tatou manakonako anga. Te manakonako anga o tatou i teianei kua riro ei mea tika tikai, e mea ketaketa maata, e te tau tikai no tatou. Ka kaka maata atu teia manakonako oonu. Ka totoa i roto ia tatou i to tatou uaua ravarai. “Kare oki te manakonako anga e taakama mai, no te mea kua riringiia mai te anoano o te Atua ki roto i to tatou ngakau e te Vaerua Tapu.”

19. Akapeea i tau ei toou manakonako kia riro ei tuanga no taau au pureanga putuputu?

¹⁹ Ko ta Epaphera pure akatenga te reira e kia vai akatukiia tona au taeake e te au tuaine i Kolosa e kia irinaki oki i tei vai maira ki mua ia ratou, “ma te ki i te kite i te au anoano katoa o te Atua ra.” Kia pure aiteite putuputu atu tatou tataki tai i te Atua no to tatou manakonako anga. I taau uaorai pure anga, e kapiti atu i toou manakonako no te ao ou. E akakite atu kia Iehova i te maata o toou inangaro no te reira, ma te irinaki anga ki katoa e ka tae mai te reira. E pati atu kiaia no te tauturu kia akaoonu atu e kia atea atu oki i toou irinaki anga. Mei ta Epaphera i pure ra e kia rauka i to Kolosa te “ki i te kite i te au anoano katoa o te Atua,” e rave pera katoa. E rave putuputu oki.

20. Me e tokoiti ua te aronga tei tapae ke mai mei te aerenga Kerititiano, eaa i kore ei e tau kia riro ei tumu no te maromaroa?

²⁰ Auraka e akaaere keia te manako me kare e akamaromaroaia no te mea e kare ko te katoatoa ka mou i te tu apa kore ra e ma te ki i te kite. Penei ka topa etai, ka akaariu keia, me kare ka unui ua ki muri. Kua tupu te reira i roto i te aronga piri vaitata ua kia Iesu, ki tana au apotetoro. Inara i to Iuda riro anga ei pikikaa, kua taroaroa ainei etai atu apotetoro ra me kare kua akamutu? Kare, tikai! Kua akakite a Petero ia Salamo 109:8 kia akaari e ka riro na tetai atu e mono i to Iuda ngai. Kua ikiia tetai ei mono, e kua rave ua atu to te Atua aronga tiratiratu ra i ta ratou angaanga tutu aereanga. (Angaanga 1:​15-26) Kua tamanako tikai ratou kia mou apa kore ua ma te ki i te kite.

21, 22. Na roto i teea tu e riro ei kia kitea toou mouanga apa kore ma te irinaki ngaueue kore?

²¹ Ka rauka kia papu tikai ia koe e ko toou mou apa kore uaanga e ma te ki i te kite i te au anoano katoa o te Atua ra kare ia e kitea koreia. Ka kitea ia e ka arikiia oki. Eai ma?

²² Ko toou au taeake e te au tuaine, tei matau e tei aroa oki ia koe, ka kite ratou. Noatu e kare te maataanga e tuatua i te reira, ka aite ra te tupu anga ki ta tatou e tatau ia 1 Tesalonia 1:​2-6: “Te akameitaki nei matou i te Atua ia kotou ravarai, kare e tivata, i te akaiki anga ia kotou i ta matou nei pure; kare oki e tivata i te manako i te ravenga o to kotou akarongo, i te angaanga o to kotou inangaro, e te akakoromaki o to kotou irinaki i to tatou Atu ia Iesu Mesia, i te aroaro o te Atua o to tatou Metua; . . . I te mea kare ta matou evangelia i tae tuatua vaa ua atu ia kotou na, ma te mana katoa ra, e ma te Vaerua Tapu, e ma te kite pu tikai; . . . E i riro mai nei oki kotou ei aru ia matou, e i te Atu oki.” Ka manako ngakau aiteite te au Kerititiano tiratiratu takapini ia koe ia ratou e akara ra e te “mou apa kore rai kotou ma te ki i te kite i te au anoano katoa o te Atua ra.”​—Kolosa 4:12.

23. I teia mataiti e aere mai nei, eaa taau ka tauta i te rave?

²³ Mei tei papu ra, ka akara mai toou Metua i te rangi ra e ka marekaia oki. Kia irinaki i te reira. No teaa ra? No te mea te mou apa kore ua ra koe ma te ki i te kite “i te au anoano katoa o te Atua ra.” Kua tata akamaroiroi atura Paulo ki to Kolosa no to ratou aerenga ‘kia tau ia Iehova i te au mea katoa e mareka mai ei aia.’ (Kolosa 1:10) Ae, ka rauka i te au tangata apa ua ra kia akamareka ki katoa iaia ra. Kua rave to kotou au taeake e te au tuaine Kolosa i te reira tikai. Te au Kerititiano te koropini ra ia koe i teianei tikai te rave pera ra. Ka rauka katoa ia koe kia akapera! No reira, i teia mataiti e aere mai nei, e akono i taau au pure i te au ra tataki tai katoa e taau au angaanga putuputu oki kia akapapu e te tamanako ra koe “kia mou apa kore rai kotou ma te ki i te kite i te au anoano katoa o te Atua ra.”

Maara Ainei ia Koe?

• Eaa te o atura ki toou “mou apa kore” anga?

• Eaa te au apinga no runga ia koe uaorai te tau ra koe kia taiku i roto i taau pure?

• Mei tei taikuia ra ia Roma 5:​4, 5, eaa te tu manakonako anga taau e anoano ra kia rauka?

• Kua akamaroiroi ta tatou apiianga ia koe kia mou i teea akakoro anga i te mataiti e aere mai nei?

[Tutu i te kapi 20]

Kua pure a Epaphera e kia mou apa kore tona au taeake Kerititiano, ma te ki i te kite no Karaiti e to ratou manakonakoanga

[Au Tutu i te kapi 23]

Toou manakonako papu e te ki i te kite te aite katoa ra ki to etai e au mirioni ua atu