Ka Rauka ia Iehova te Akariro ia Koe Kia Maroiroi

“Te oronga nei aia i te maroiroi no tei paruparu; e te akamaata nei aia i te maroiroi no tei apikepike.”​—ISAIA 40:29.

1, 2. Eaa etai akapapu anga i to Iehova ra mana maata tikai?

KO IEHOVA te Atua “mana maata.” Te kite nei tatou i te akapapu anga i to te Atua ra “mana mutu kore anga e te Atua anga” i te mekameka o tana au mea i anga mai ra. Ko te aronga kare e akatika i taua akakite anga e koia Tei Anga maira kare a ratou kotoe anga.​—Salamo 147:5; Roma 1:19, 20.

² Te kite maataia ra te mana o Iehova e i ta te au taineti akara oonu anga ki roto i te ao katoa e pini ua ake, ma te totoaanga tona au pupu etu kare e rauka kia tatauia no te anere ua atu e te mirioni ua atu au mataiti marama. I tetai po poiri e te atea, e akara atu ki te au rangi ra kia kite me ka kore ainei koe e manako mei ta te tata taramo ra: “Kia akara au i to au rangi i te angaanga a to maikao-rima na; te marama e te au etu taau i anga ra; Eaa te tangata nei, i manako mai ei koe iaia? e ta te tangata nei tamaiti, i akono mai ei koe iaia?” (Salamo 8:3, 4) E mei teaa ra te meitaki ta Iehova ra akono anga i te tangata nei, ia tatou! Kua oronga aia i te kainga enua manea no te tangata mua e te vaine. Noatu rai ko tona one e mana tona​—i te akatupu ngangaere, ma te akatupuanga i te kai meitaki ei akamatutu. Kua rauka i te tangata e te au manu te maroiroi kopapa mei teia akakite anga mai i te mana o te Atua ra.​—Genese 1:12; 4:12; 1 Samuela 28:22.

3. I te pae atu i te au apinga kopapa o te ao katoa e pini ua ake, eaa etai atu apinga te akakite maira i to te Atua mana?

³ I te pae atu o te manea o te au rangi e te akaieie o te ngangaere e te au manu o te enua nei, te akakite maira ratou kia tatou i te mana o te Atua ra. Kua tata te apotetoro ko Paulo: “Te au mea oki nona tei kore e tau kia akara ra, tei kitea puia nei ïa, i te au mea katoa i angaia nei, mei te maani anga mai i teianei ao; koia oki, tona ra mana mutu kore anga, e te Atua anga.” (Roma 1:20) Inara te vaira tetai atu akakite anga i tona mana te tau ra to tatou manako anga e te ariki anga. ‘Eaa ia,’ penei ka manako ua koe, ‘te akakite maira i to te Atua mana kia maata atu i to te ao katoa e pini ua ake?’ Ko te pauanga ko Iesu Karaiti ia. Ko te tika, i raro ake i te akauru anga kua tuatua te apotetoro ko Paulo e ko Karaiti tei patitiia ra ki te rakau “te mana ïa o te Atua e te pakari o te Atua.” (1 Korinetia 1:24) ‘No teaa ra te reira?’ penei ka ui koe, ‘E eaa te puapinga o te reira ki runga i toku oraanga i teianei tikai?’

Mana na Roto i Tana Tamaiti

4. Akapeea te akaari anga mai i to te Atua ra mana i te pirianga ma tana Tamaiti ra?

⁴ Kua akakite muaia to te Atua mana i tona anga mai anga i tana Tamaiti anau tai, i angaia mai i tona uaorai tu. Kua tavini atu teia Tamaiti vaerua ia Iehova “ei pu rave angaanga” na te taangaanga i te mana maata o te Atua ra i te anga mai i etai atu au apinga ravarai. (Maseli 8:22, 30, NW) Kua tata a Paulo ki tona au taeake Kerititiano i Kolosa: “E nana oki i anga i te apinga tini ravarai nei, ko to te rangi, e to te enua nei, ko tei akaraia nei e te kore e akaraia . . . nana ïa i anga, e nona anake.”​—Kolosa 1:15, 16.

5-7. (a) I te tuatau kua topa, i akapeea te au tangata i o atu ei i te au akakite anga i te mana o te Atua ra? (e) Eaa te tumu te vaira kia irinakiia e ka rauka kia kiteia te mana o te Atua i te au Kerititiano o teia tuatau nei?

⁵ Ko tatou tetai tuanga o te ‘au apinga tei angaia ki runga i te enua nei.’ No reira ka rauka ainei kia akatotoaia mai te mana o te Atua kia tatou tangata nei? Ae ra, i roto i ta te Atua au akonoanga ma te au tangata apa ua nei, kua oronga a Iehova i te mana i etai tuatau ki tona au tavini kia raukaʼi ia ratou i te rave i tona au akakoro anga. Kua kite a Mose e, ko te mea matauia, ka ora te au tangata apa ua nei e 70 me kare 80 mataiti. (Salamo 90:10) Akapeea a Mose uaorai? Kua ora aia e 120 mataiti, inara “kare tona mata i avarevare, kare oki tona maroiroi i iti.” (Deuteronomi 34:7) Noatu rai e kare te aiteanga e ka akamaroiroi te Atua i tona au tavini tataki tai kia ora mei te reira te roa me kare kia vai maroiroi oki, te akapapu maira te reira e ka rauka ia Iehova i te akamaroiroi mai i te au tangata nei.

⁶ I te akaarianga katoa i tei rauka i te Atua i te akamaroiroi i te au tangata e te au vaine ko tana ia i rave ki te vaine a Aberahama ra. “I raukaʼi ia Sara te maroiroi i to ei ra, e anau maira tana tamaiti, ope uaʼi tona tuatau tikai, no te mea i manako aia e, e tuatua-mou tana ta tei tuatua maira.” Me kare e akamanako i akapeea ta te Atua akamaroiroi anga i te au akava e etai ke i Iseraela ra: “Ia Gideona, ia Baraka, ia Samasona, ia Iepheta; ia Davida oki, ia Samuela, e te au peroveta ra . . . kua akamaroiroiia i te paruparu anga.”​—Ebera 11:11, 32-34.

⁷ Ka rauka katoa oki i taua mana ra kia taangaangaia kia tatou nei. A, penei kare tatou e manakonako atu i teianei i tetai uanga na roto i tetai temeio, me kare penei kare tatou e akaari i te ririnui mei ia Samasona ra. Inara ka rauka tatou kia maroiroi, mei ta Paulo i tuatua ra ki te au tangata i Kolosa ra. Ae, kua tata a Paulo ki te au tane, au vaine, e te au tamariki, mei te aronga ta tatou e kite nei i te au putuputuanga i teia tuatau, e kua karanga aia e ko ratou kua “akamaroiroiia mai i te au maroiroi katoa.”​—Kolosa 1:11.

8, 9. I te anere mataiti mua ra, i akapeea te kitea anga o te mana o Iehova i te au tangata mei ia tatou nei rai?

⁸ I te tuatau o ta Iesu angaanga orometua i te enua nei, kua akataka meitaki maira Iehova e te angaanga ra tona mana na roto i tana Tamaiti. Ei akatauanga, i tetai tuatau i aere atu ei te aronga tini kia Iesu i Kaperenauma, “e tei reira te mana o te Atu i te akaora ia ratou.”​—Luka 5:17.

⁹ I muri mai i tona tuakaou anga, kua akapapu atu a Iesu i tana au pipi e ‘ka rauka ia ratou te mana i te vaerua tapu, kia aere mai te reira i rungao ia ratou.’ (Angaanga 1:8) E tika ra! Kua akakite mai tetai tata tuatua enua i te au tupu anga i etai ra tokoiti ua i muri ake i te Penetekote 33 T.N.: “Kua viviki rava atura to te au aposetolo akakite anga atu i te tuakaouanga o te Atu ra o Iesu.” (Angaanga 4:33) Ko Paulo uaorai tetai tei akariroia ra kia maroiroi no te angaanga ta te Atua i akaue ra iaia kia rave. I muri ake i tona ariu ke anga ei pipi e te kite akaou anga tona nga mata, kua “maroiroi rava aturā Saula, e muteki atura iaia te ngati Iuda e noo i Damaseko ra, tupu marie atura e ko te Mesia teia.”​—Angaanga 9:22.

10. Akapeea te maroiroi no ko mai i te Atua i te tauturu anga ia Paulo ra?

¹⁰ E tika ra e kua anoanoia e Paulo kia maata atu te maroiroi, me akamanako tatou i te ririnui i te pae vaerua e te manako tei umuumuia no te akono i nga tere mitinari e toru tei aere ra e tauatini ua atu au maire. Kua akakoromaki katoa oki aia i te au tu ngata ravarai, te akakoromaki marieanga i te au tapekaanga e te aro atu anga i te tamate anga. I akapeea ia? Kua pau maira aia: “Kua tauturu maira te Atu iaku, kua akamaroiroi maira; kia kitea ravaia te tuatua i ako aereia nei e au.”​—2 Timoteo 4:6-8, 17; 2 Korinetia 11:23-27.

11. No runga i to te Atua ra mana, eaa te manakonako anga ta Paulo i taiku no tona au taeake tavini i Kolosa ra?

¹¹ Kare i te mea poitirere i reira, e ko Paulo, i te tataanga “i te au taeake akarongo i te Mesia” i Kolosa, kua akapapu atura kia ratou e ka rauka “te akamaroiroiia mai i te au maroiroi katoa, kia tau i [to Iehova] mana kakā, kia maata atu te akakoromaki, e te maru anga kia roa, ma te rekareka.” (Kolosa 1:2, 11) Noatu rai e kua tuatuaia taua au tuatua ra ki te au Kerititiano akatainuia ra, pouroa te aronga te aru ra i to Karaiti au tapuae ka rauka kia puapinga maataia mei ta Paulo i tata ra.

Akamaroiroiia i Kolosa

12, 13. Eaa te akakiteia maira i te reta ki to Kolosa ra, e penei eaa tei tupu i te reira?

¹² Penei kua akatumuia te putuputuanga i Kolosa, i te tuanga Roma o Asia ra, na roto i te tutu aere anga a te Kerititiano tiratiratu ko Epaphera tona ingoa. I te akara anga e i tona rongo anga i to Paulo tapekaanga i Roma vaitata i te 58 T.N., kua papa te manako o Epaphera kia aere e atoro i te apotetoro ra e akamaroiroi atu iaia ma tetai ripoti meitaki no te aroa e te ngaueue kore o tona au taeake i Kolosa. Penei katoa oki kua tuku atu a Epaphera i tetai ripoti tiratiratu no etai au manamanata i te putuputuanga i Kolosa ra tei anoanoia kia akatikatikaia. Pera katoa oki, kua tupu te manako ngakau raurau ia Paulo kia tata atu i tetai reta akamaroiroi anga e te ako anga i te putuputuanga. Penei katoa ko koe tetai te ka akamaroiroiia mei te Kol pene 1 o taua reta ra, no te mea te akamarama maira e akapeea a Iehova i te akamaroiroi anga i tona au tavini.

¹³ Ka rauka ua ia koe i te tamanako e akapeea te manako ngakau o te au taeake tungane e te au tuaine i Kolosa i ta Paulo akataka anga ia ratou ei “au taeake akarongo i te Mesia.” Kua tau ra ratou kia akameitakiia no to ratou ‘aroa i te aronga tapu katoa ra’ e no te ‘akatupuanga ua o te tuatua meitaki nei,’ mei to ratou akamata anga mai ei au Kerititiano! Ka rauka ainei teia au tu tuatua kia tuatuaia no to tatou putuputuanga, e no tatou tataki tai oki?​—Kolosa 1:2-8.

14. Eaa to Paulo anoano no te aronga i Kolosa ra?

¹⁴ No te maata to Paulo mareka anga i te ripoti i tae atura kiaia e kua tuatua aia ki to Kolosa e kare aia i tivata i te pureanga no ratou e te patianga ‘kia akakiia mai ratou i te kite i te anoano o te Atua i te pakari i te au mea ravarai e te kite i te vaerua; Kia tau to ratou aerenga i te Atu.’ Kua pure aia e ‘kia tupu te au angaanga meitaki katoa ia ratou, e kia maata oki to ratou kite i te Atua; ma te akamaroiroiia mai i te au maroiroi katoa, kia tau i tona mana kakā, kia maata atu te akakoromaki, e te maru anga kia roa, ma te rekareka.’​—Kolosa 1:9-11.

Akamaroiroiia Oki i Teia Tuatau

15. Akapeea e raukaʼi ia tatou i te akakite i te tu akono tau ki ta Paulo i tata ki to Kolosa ra?

¹⁵ Mei teaa ra te akatauanga meitaki ta Paulo i akanoo mai no tatou! Te anoanoia maira ta tatou au pure e to tatou au taeake takapini i te enua nei e kia akakoromaki marie ratou e kia tamou i to ratou rekareka noatu rai to ratou au mamaeanga. Mei ia Paulo rai, ka tau tatou kia taka meitaki ta tatou au pure me tae mai te nuti e ko te au taeake i tetai atu putuputuanga, me kare tetai atu enua, te rokoia ra e te au tuatau ngata rava. Penei kua rokoia tetai putuputuanga i te pae mai e tetai tumatetenga natura me kare tetai tu ngata i te pae vaerua. Me kare penei te akakoromaki ra etai au Kerititiano i tetai enua te mamae ra i te tamaki anga ia ratou uaorai me kare te taanga tetai kopu i tetai kopu. Na roto i te pure ka tau tatou kia pati i ta te Atua tauturu i to tatou au taeake ‘kia tau to ratou aerenga i te Atu,’ kia akatupu i te au ua Patireia ia ratou e akakoromaki marie ra, e te tupu anga kia maata te kite. Na teia mataara ka rauka i te au tavini o te Atua te mana o tona vaerua, “ma te akamaroiroiia mai i te au maroiroi katoa.” Ka papu ia koe e ka akarongo mai toou Metua e ka akono mai.​—1 Ioane 5:14, 15.

16, 17. (a) Mei ta Paulo i tata ra, eaa te mea tau no tatou kia akameitaki? (e) I teea tu i tataraiaʼi te au tangata o te Atua e i akakoreiaʼi ta ratou ara?

¹⁶ Kua tata a Paulo e ka tau to Kolosa kia ‘akameitaki i te Metua, i tei akatau mai ia ratou i tetai tuanga i te kainga o te aronga tapu i te marama ra.’ Kia pera katoa tatou i te akameitaki i to tatou Metua i te rangi ra no to tatou ngai i roto i tana akanoonoo anga, me i te rangi me kare i te tuanga o tona Patireia i te enua nei. I akapeea te Atua i te akatau anga i te au tangata apa ua nei i roto i tona nga mata? Kua tata a Paulo ki tona au taeake akatainuia ra: “Ko tei akaora ia tatou i te mana o te poiri, e kua akaumu ia tatou ei roto i te basileia o tana Tamaiti akaperepere; Nona i raukaʼi to tatou ora, ko te ara i akakoreia, i tona toto.”​—Kolosa 1:12-14.

¹⁷ Noatu me eaa to tatou manakonako anga, no te rangi me no te enua nei, ka akameitaki tatou i te Atua i te au ra tataki tai no to tatou akaora angaia mei teia akatereanga kino o te poiri, tei akaotiia na to tatou akarongo i te oronga anga oko maata i te atinga oko o ta Iehova ra Tamaiti akaperepere. (Mataio 20:28) Kua puapingaia te au Kerititiano akatainuia ra i te vaerua mei te oko tei tukuia ra kia ratou na tetai mataara tuke kia raukaʼi ratou te ‘akaumuia ki roto i te basileia o te Tamaiti o to te Atua akaperepere.’ (Luka 22:20, 29, 30) Inara ko te “au mamoe ke atu” ka puapinga katoa oki mei taua oko ra noatu rai i teianei. (Ioane 10:16) Ka rauka ia ratou ta te Atua ra akakore anga ara kia rauka mai tetai turanga tuatua tika ki mua iaia ei au oa nona. E tuanga maata ta ratou i te akakitekiteanga i te “evangelia o te basileia nei” i teia tuatau openga nei. (Mataio 24:14) I runga atu i te reira, tei ia ratou te manakonako anga umere no te riro takirianga ei tuatua tika e te tu apa kore i te pae kopapa, a te openga o te Tauatini Mataiti o to Karaiti Tutara. Ia koe ka tatau i te akataka anga ia Apokalupo 7:13-17, e akara me kare koe e akatika e ko teia te akapapu anga i te akaora angaia e te akameitaki anga oki.

18. Eaa te akaongi anga tei taikuia ra ia Kolosa ta te Atua e akono nei i teianei?

¹⁸ Te tauturu maira te reta a Paulo ia tatou kia kite i te maata ta tatou kaiou ki te tangata maata rava atu tei ora ana. Eaa ta te Atua e rave ra na roto ia Karaiti? “[Koia ia] kia ongi oki iaia te au mea katoa i roto iaia uaorai i te au i rauka i te toto o tona satauro; ko to te rangi, e to te enua nei oki, kia ongi rai iaia.” Ko te akakoro anga a te Atua kia akaoki mai i te au mea ravarai tana i anga kia rotai takiri ma ia katoa, kia aite ki te tu i mua ake i te meameaau i Edene ra. Ko Tei taangaangaia i te anga mai anga i te au mea ravarai koia tikai Tei taangaangaia nei i teianei ei akaoti i teia akaongi anga.​—Kolosa 1:20.

Akamaroiroiia no Teea Akakoro Anga?

19, 20. Tei runga i teaa to tatou tu tapu e te apa kore?

¹⁹ Ka aere mai te au apainga ki te aronga o tatou tei akaongiia ra ki te Atua. I ki ua ana tatou i te ara e kua akatakakeia mei te Atua. Inara i teianei, i te akarongo anga i te atinga o Iesu e ma to tatou au manako kare i runga i te au angaanga rave kino, te tu akatumuia ra tatou i roto i te tu “tapu e te apa kore, e te tapepeanga kore, ki mua i [te Atua].” (Kolosa 1:21, 22) E tamanako ana, mei to te Atua kore ra i akama i te au kite tiratiratu i taito ra, no reira kare katoa aia e akama ia tatou, kia karangaia aia ei Atua no tatou nei. (Ebera 11:16) I teia tuatau, kare e rauka i tetai i te akaapa mai ia tatou no te mou tarevake i tona ingoa mekameka, kare katoa oki no to tatou mataku i te akakitekite i taua ingoa ra ki te au openga o te enua nei!

²⁰ Inara e akamanako ana i te akamatakite ta Paulo i akakite mai ia Kolosa 1:23: “Kotou oki i noo tamou tikai i te akarongo, kua akatumu e kua tinamou tikai, kare i ngaueue i te akinanga i te evangelia nei, ta kotou i akarongo akenei, e tei akakiteia akenei ki te tangata ravarai i raro ake i teianei rangi.” E maata te vaira ki runga i to tatou tamou marie i te tiratiratu ia Iehova, i te aruanga i te au tapuae o tana Tamaiti akaperepere ra. E maata ta Iehova raua ko Iesu i rave no tatou! E akaari tatou i to tatou aroa ia raua na te aruanga i te ako a Paulo.

21. Eaa ra i maataʼi te tumu no tatou kia rekareka i teia tuatau?

²¹ E mea tau e kua rekareka te au Kerititiano o Kolosa i te akarongo anga e ko ‘te evangeria ta ratou i akarongo ana’ kua oti i te “akakiteia [atu] ki te tangata ravarai i raro ake i teianei rangi.” I teia tuatau nei e maata atu te rekareka i te akarongo anga i te mamao o te akakitekite anga i te tuatua meitaki o te Patireia e te aronga e tere roa atu i te a e te apa mirioni Au Kite i te au enua e tere atu i te 230. Eaa oki, i te au mataiti tataki tai e vaitata i te 300,000 no te pa enua ravarai te riro mai ra kia akaongiia ki te Atua!​—Mataio 24:14; 28:19, 20.

22. Noatu rai me ka kite tatou i te mamaeanga, eaa ta te Atua ka rauka kia rave no tatou?

²² Noatu rai e i te akara anga tei roto a Paulo i te are tapekaanga i te tuatau i tataʼi aia i te reta ki to Kolosa ra, kare aia i tuatua tangi i tona tu kino i tetai ua atu mataara. Kareka ra, kua karanga aia e: “Te rekareka nei au i toku nei mate ia kotou i teianei.” Kua kite a Paulo eaa te tu o “te akakoromaki, e te maru anga kia roa, ma te rekareka.” (Kolosa 1:11, 24) Inara kua kite aia e kare aia i rave i teia i tona uaorai maroiroi. Na Iehova ra i akamaroiroi iaia! Mei te reira katoa oki i teia tuatau. E au tauatini ua atu Au Kite tei tapekaia e tei takinga kinoia kare ra i ngaro to ratou rekareka i te tavinianga ia Iehova. Kareka ra, kua ariki ratou i te tika o te au tuatua a te Atua te kitea ra ia Isaia 40:29-31: “Te oronga nei aia i te maroiroi no tei paruparu . . . Ko te aronga ra e tapapa ia Iehova, e rauka ïa te maroiroi ou.”

23, 24. Eaa te tuatua ngaro te taikuia ra ia Kolosa 1:26?

²³ E puapinga maata kia Paulo te angaanga tutu aere i te tuatua meitaki no runga ia Karaiti. Kua inangaro aia kia ariki etai atu i te puapinga o ta Karaiti tuanga i roto i ta te Atua akakoro anga, no reira kua akataka aia i te reira ei “tuatua ngaro kare i kitea i te au tuatau e te au uki taito ra.” Kare ra e ka vai te reira ei tuatua ngaro. Kua tuatua katoa maira Paulo: “Kua akakiteia mai i teianei ki te aronga tapu nona ra.” (Kolosa 1:26) I te akamata anga mai te meameaau i Edene ra, kua oronga mai a Iehova i tetai taputou no te au mea meitaki te aere maira, i te totouanga e ‘ka akaparuparu te uanga a te vaine ra i te mimiti o te ovi.’ (Genese 3:15) Eaa te aiteanga o teia? No etai au uki, no etai au anere mataiti, kua vai rai te reira ei mea ngaro. I muri mai kua tae mai a Iesu, e “kua akakite pu mai i te ora mutu kore i te evangelia nei.”​—2 Timoteo 1:10.

²⁴ Ae, ko te “tuatua ngaro” te koropini ra ia Karaiti e te Patireia Mesia. Kua taiku mai a Paulo e “ko to te au rangi,” te tuatua ra i te aronga te ka akatuangaia i te tutara anga Patireia ma Karaiti katoa. Ka riro na teia aronga e apai mai te au akameitakianga kare e rauka kia tuatuaia, ki “to te enua,” katoa, ko ratou te aronga te ka rekareka i tetai parataito mutu kore ki konei. Ka rauka ia koe kia kite i te tau tikai o te reira, no Paulo kia taiku “i te meitaki maata kakā o taua tuatua ngaro nei.”​—Kolosa 1:20, 27.

25. Mei tei akakiteia maira ia Kolosa 1:29, eaa te tu akono tau no tatou i teianei?

²⁵ Kua manakonako mai a Paulo i tona ngai i te Patireia. Inara kua kite aia e kare te reira i tetai apinga nona kia noonoo ua e te manakonako anga. “I rave ei oki au i te angaanga, i te uapou marie anga ma te maroiroi nona; ko tana i rave io nei i roto iaku nei ma te ririnui maata.” (Kolosa 1:29) E tamanako ana e kua akono a Iehova ia Paulo na roto ia Karaiti kia maroiroi i te rave i tetai angaanga orometua no te akaoraanga. Ka rauka katoa ia Iehova i te rave i te reira no tatou i teia tuatau nei. Inara ka tau tatou kia ui ia tatou uaorai, ‘Tei iaku ainei te vaerua tutu evangeria taku i mou ana i toku kite mua anga i te tuatua mou ra?’ Eaa taau pauanga? Eaa te ka tauturu ia tatou tataki tai kia rave tamou marie i te ‘angaanga pakari e te uapouanga ia tatou uaorai kia tau ki te angaanga o te mana o Iehova ra’? Tei runga te atikara te aru mai nei i teia tumu tikai.

I Tamanako Ainei Koe?

◻ Eaa ka papu ei ia tatou e ka rauka ia Iehova i te akakite i tona mana no te au tangata nei?

◻ Eaa te tu manako anga no ta Paulo au tuatua ia Kolosa pene 1 ra?

◻ Akapeea ta te Atua ra raveanga i te akaongi anga tei taikuia ra ia Kolosa 1:20?

◻ Na tona mana, eaa ta Iehova ka rauka kia rave kia oti na roto ia tatou nei?

[Mapu/​Tutu i te kapi 8]

(No runga i teia, akara i te puka)

KOLOSA