E Tane e te Tangata Pakari—Akatauanga i te Au Apainga

‘Te akaaere ka tau ei tane vaine okotai.’​—1 TIMOTEO 3:2.

1, 2. Eaa ra te turanga akaipoipo koreia o te au orometua i tau kore ei i te Tuatua Tapu?

I TE anere mataiti mua ra, kua tamanako maata te au Kerititiano tiratiratu i te akatauanga i ta ratou apainga tuke tuke. I ta te apotetoro ko Paulo tuatua anga e te Kerititiano tei vai takaua ra e “tuatua meitaki roa tana,” ko te aite anga ainei e ko taua tu tangata ra ka meitaki atu te tavini anga ei tetai akaaere i roto i te putuputuanga Kerititiano ra? Te akariro ra ainei aia i te noo takaua ei umuumuanga no te aronga pakari ra? (1 Korinetia 7:38) Te umuumuia ra te noo akaipoipo koreia no te au orometua Katorika. Inara te tau ra ainei i te Tuatua Tapu te noo anga akaipoipo koreia te au orometua? Te akatikaia ra e te au Akonoanga Otototi Itinga to ratou au orometua kotinga ei au tangata akaipoipoia, inara auraka to ratou au epitekopo ra. Te rotai ra ainei te reira ma te Pipiria?

² E manganui to te 12 au apotetoro a Karaiti ra, ko ratou te au mema pange o te putuputuanga Kerititiano ra, e au tangata akaipoipoia ratou. (Mataio 8:14, 15; Ephesia 2:20) Kua tata a Paulo e: “Kare aina e tika ia matou kia arataki aere i te tuaine vaine mou ra, mei tetai papaki aposetolo katoa ra, e mei te au taeake oki o te Atu ra, e mei ia Kepha [ko Petero]?” (1 Korinetia 9:5) Te akatika ra te New Catholic Encyclopedia e “te ture no te akaipoipo koreia na te ekaretia te akamata anga mai” e ko “te au orometua o te K[oreromotu] O[u] ra kare i raro ake i te apainga kia akakore i te akaipoipo anga.” Te aru nei te Au Kite o Iehova i te akaraanga Tuatua Tapu kare ra i to te ture ekaretia.​—1 Timoteo 4:1-3.

Taoonga Aronga Pakari e te Akaipoipo te Tau Ra

3. Eaa te au tumu Tuatua Tapu te akaari maira e ka tika ua te aronga akaaere Kerititiano ra ei au tangata akaipoipoia ra?

³ Kare i te umuumuanga e ka tau te au tangata akataoongaia ra ei akaaere kia kore e akaipoipoia, kua tata a Paulo kia Tito: “Teia te mea i vaoo ei au ia koe i Kereta na, kia akameitaki koe i tei toe ra, kia akataoonga i te aronga orometua [Ereni, pre·sbyʹte·ros] i te au oire katoa ra mei taku i ikuiku ia koe na: Ko te tangata apa kore, vaine okotai ra, e te tamariki akarongo, kare i tapepeia i te kaimoumou, e te akongata. Ei tangata apa kore te episekopo [Ereni e·piʹsko·pos, no reira mai te tuatua “episekopo”] e tikaʼi, mei te akaaere a te Atua ra.”​—Tito 1:5-7.

4. (a) Akapeea tatou i kite ei e kare te akaipoipo anga i tetai umuumu anga no te au akaaere Kerititiano? (e) Eaa te tu meitaki o tetai taeake takaua ra ei tetai o te aronga pakari ra?

⁴ I tetai pae, kare te akaipoipo anga i tetai umuumu anga Tuatua Tapu no te taoonga aronga pakari. Kua vairai a Iesu ei tangata takaua. (Ephesia 1:22) Ko Paulo, tetai akaaere meitaki roa i roto i te putuputuanga Kerititiano i te anere mataiti mua ra, kare i akaipoipoia i reira. (1 Korinetia 7:7-9) I teia tuatau nei, e manganui te au Kerititiano takaua ra tei tavini ei aronga pakari. Penei e no to ratou tu takaua tei akatika ra kia maata atu to ratou taime kia rave i ta ratou au angaanga ei au akaaere.

‘Te Tataka Ke ra te Manako o te Tane Akaipoipoia’

5. Eaa te tika Tuatua Tapu te ka tau te au taeake akaipoipoia kia kite?

⁵ Me akaipoipo tetai tangata Kerititiano, ka tau aia kia kite e te rave ra aia i te au apainga ou te ka akapou i tona taime e te manako. Te tuatua ra te Pipiria: “Te tangata kare i akaipoipo ra, te akono ra ïa i ta te Atu, i te mea e marekaʼi te Atu: Kareka tei akaipoipoia ra te akono ra ïa i te au mea o teianei ao, i te mea e marekaʼi tana vaine [“e tataka ke ra aia,” NW].” (1 Korinetia 7:32-34) Na teea tu te tataka ke anga?

6, 7. (a) Eaa tetai turanga te “akatataka ke ra” i te tangata akaipoipoia? (e) Eaa te ako anga ta Paulo e oronga atura ki te au Kerititiano akaipoipoia? (ng) Akapeea teia i te mana anga ki runga i ta tetai tangata iki anga kia ariki i tetai angaanga?

⁶ Ko tetai apinga, ka akakore te tangata akaipoipoia i tana tuatua i rungao i tona uaorai kopapa. Kua akataka meitaki mai a Paulo i teia: “Kare oki tei te vaine te tuatua i tona uaorai kopapa, tei te tane ra; mei te reira to te tane, kare tei iaia te tuatua i tona uaorai kopapa, tei te vaine ra.” (1 Korinetia 7:4) Penei ka manako tetai papaki o te aronga te tamanako ra i te akaipoipo e e meangiti ua te puapinga o teia no te mea kare te ainga i te apinga maata i to raua akaipoipo anga. Inara, i te mea ko te tu ma i mua ake i te akaipoipo anga ko tetai mea umuumuia i te Tuatua Tapu, kare te au Kerititiano i kite tikai i te pirianga tau ki to ratou tokorua no te tuatau ki mua.

⁷ Kua akaari maira Paulo e noatu ko tetai nga tokorua tei ‘akanoo i to raua manako i ta te vaerua ra’ ka tika kia akamanako i te au umuumu anga ainga o tetai e tetai ra. Kua ako atu aia i te au Kerititiano i Korinetia ra: “E o atu te tane i te mea takinga-meitaki ki te vaine e tikaʼi; e pera katoa te vaine ki te tane. Eiaa korua e akataka ia korua uaorai, mari ra ei ngai poto ake, kia tika ia korua; kia rauka ta korua akakoreanga kai e te pure: ka kapipiti akaou ei korua, kia kore a Satani e tapikipiki mai ia korua no tei kore e tika ia korua kia akakoromaki.” (Roma 8:5; 1 Korinetia 7:3, 5) E mea mii ra, e kua tupu etai au tu akaturi anga i te kore anga e aru i teianei ako. No teia tu, ka tau tetai Kerititiano akaipoipoia ra kia paunu matakite i te au tumu i mua ake i te arikianga i tetai angaanga te ka akataka ke iaia mei tana vaine no tetai tuatau roa ra. Kare iaia taua tu rangatira mei tana i matau ana no te ori aere anga iaia e takaua ra.

8, 9. (a) Eaa te aite anga o ta Paulo i tuatua ra e ko te au Kerititiano akaipoipoia “te akono ra ïa i te au mea o teianei ao”? (e) Eaa ta te au Kerititiano akaipoipoia ra ka tau kia rave?

⁸ I roto i teea tu e raukaʼi kia tuatuaia e ko te au tane Kerititiano akaipoipoia, kapiti katoa te aronga pakari, “te akono ra ïa i te au mea o teianei ao [koʹsmos]”? (1 Korinetia 7:33) Te kite puia ra e kare a Paulo i tuatua ana no te au apinga kino o teianei ao, ta te au Kerititiano mou ka kopae ke atura. (2 Petero 1:4; 2:18-20; 1 Ioane 2:15-17) Te apii maira te Tuatua a te Atua ia tatou “e kopae tatou i te akono kore i te Atua, e te anoano o teianei ao [ko·smi·kosʹ], kia noo tatou ma te tau meitaki, te tuatua-tika, e te akono i te Atua, i teianei ao.”​—Tito 2:12.

⁹ No reira, ko te Kerititiano akaipoipoia, “te akono ra ïa i te au mea o teianei ao” i te mea te tau ra aia kia akamanako i te au mea rikiriki e tuanga ra no te oraanga akaipoipo matauia ra. Te kapiti ra teia i te are, te kai, te kakau, te tamataora​—te kapiti katoa ra etai atu au apinga manakoia ra me e tamariki etai. Inara noatu no nga tokorua kare e tamariki, me kia puapingaia te akaipoipo anga, ka tau te tane e te vaine kia manako maata “i te mea marekaʼi” to raua tokorua akaipoipo tetai e tetai ra. Ko teia te manako tika no te aronga pakari Kerititiano ia ratou e akatau ra i ta ratou au apainga.

Te Au Tane Meitaki Pera Katoa ei Aronga Pakari Meitaki

10. No tetai Kerititiano kia tau ei tangata pakari, eaa ta tona au taeake e te au tangata katoa o vao ra ka tau kia kite?

¹⁰ Noatu rai e kare te akaipoipo anga i tetai apinga umuumuia no te taoonga aronga pakari, me ka akaipoipoia tetai tangata, i mua ake i tona akatika angaia no te akataoonga anga ei tetai no te aronga pakari, ka tau tikaʼi aia kia akakite i te tautaanga kia riro ei tetai tane meitaki e te aroa, i te akonoanga i te upoko anga meitaki. (Ephesia 5:23-25, 28-31) Kua tata a Paulo: “Kia inangaro tetai tangata i te taoonga episekopo ra, kua inangaro aia i te angaanga meitaki. Ei tangata apa kore ra te episekopo e tikaʼi, ei tangata vaine okotai.” (1 Timoteo 3:1, 2) E mea tau kia kiteia e te rave maata ra tetai tangata pakari kia riro ei tane meitaki, noatu me e Kerititiano katoa oki tana vaine e me kare ia. Ko te tika ra, noatu ko te au tangata o vao i te putuputuanga ka tau katoa kia kite e te akono meitaki ra aia i tana vaine e etai atu au apainga nana ra. Kua akakite katoa maira Paulo: “Ei rongo meitaki oki tona i te aronga ki vao ra e tikaʼi; ko te rokoia aea aia i te akakino, e te ereere a te diabolo.”​—1 Timoteo 3:7.

11. Eaa te aite anga o te takiota tuatua “ei tangata vaine okotai” ra, no reira eaa te matakite anga tau no te aronga pakari kia rave?

¹¹ Inara, ko te takiota tuatua “ei tangata vaine okotai” te akakore ra i te tere atu i te okotai vaine, e te akakite katoa ra i te tu tiratiratu i te akaipoipo. (Ebera 13:4) Te aronga pakari tikaʼi te umuumuia ra kia matakite me te tauturu ra i te au tuaine i roto i te putuputuanga. Ka tau ratou kia kopae i te aere anga okotai ua i te atoroanga i tetai tuaine te anoano ra i te ako anga e te akapumaana. Ka rave meitaki ratou kia aere kapiti atu ma tetai atu o te aronga pakari, tetai tavini orometua, me kare ra ma tana vaine me e aere anga i tetai aravei anga akamaroiroianga.​—1 Timoteo 5:1, 2.

12. Eaa te akataka anga tau no te au vaine a te aronga pakari e te au tavini orometua ra ka tika kia tauta pakari?

¹² Inara, i te papaanga i te au umuumu anga no te aronga pakari e te au tavini orometua, kua oronga katoa te apotetoro ko Paulo i tetai tuatua ako anga no te au vaine a te aronga te akamanakoia ra no taua angaanga ra. Kua tata aia: “Mei te reira katoa te au vaine i te maru e tikaʼi, eiaa ei tapepe ua, ei maroiroi ra, e te pikikaa kore, i te au mea katoa ra.” (1 Timoteo 3:11) E maata te ka rauka i tetai tane Kerititiano i te rave ei tauturu i tana vaine kia tau i taua akataka anga ra.

Au Angaanga Tau i te Tuatua Tapu ki te Vaine

13, 14. Noatu rai me kare te vaine a tetai tangata pakari i te oa Kite, eaa ra i tau ei aia kia noo ma ia katoa ra e kia riro ei tetai tane meitaki?

¹³ Inara, ko teianei ako anga tei orongaia ra ki te au vaine a te aronga pakari me kare ta te au tavini orometua te akakite maira e ko taua au vaine ra e au Kerititiano akatapuia ratou uaorai. Te mea matauia, ko teia te tu no te mea te umuumuia ra te au Kerititiano kia akaipoipo “kia tau ra i te Atu.” (1 Korinetia 7:39) Inara ka peea tetai taeake kua akaipoipo ke ra ki tetai tei akarongo kore ra i tona akatapu anga i tona oraanga kia Iehova, me kare kua topa tana vaine ki vao i te tuatua mou no tetai tarevake kare ra nona?

¹⁴ Kare teia uaorai, e arai iaia kia kore e riro ei tetai o te aronga pakari ra. Kare katoa oki te reira e akatika iaia kia taka ke i tana vaine no te kore ua e kapiti mai ki tona au irinaki anga. Kua apii mai a Paulo e: “Kua topiriia koe ki te vaine? Eiaa e kimi i te matara.” (1 Korinetia 7:27) Kua tuatua katoa aia: “E vaine akarongo kore ta tetai taeake, e i tika i taua vaine ra kia noo rai kiaia, auraka aia e tuku ke atu iaia. Kia aere ke ra tei kore i akarongo ra, aere ua atu ïa: kare te taeake e te tuaine e ii i te reira. Kua akonoia ra tatou e te Atua, ei au ta tatou. Eaa oki koe e kite ei, e maine e, kare taau tane e ora ia koe? E eaa oki koe e kite ei, e tama e, kare taau vaine e ora ia koe?” (1 Korinetia 7:12, 15, 16) Noatu rai me kare tana vaine i tetai Kite, ka tau ra tetai tangata pakari kia riro ei tane meitaki ia.

15. Eaa te ako anga ta te apotetoro ko Petero i oronga atura ki te au tane Kerititiano, e penei eaa te au tupu anga me ka riro tetai tangata pakari ei tane manako kore?

¹⁵ Me e vaine akarongo tana e me kare, ka tau te tangata pakari Kerititiano kia kite e te anoano ra tana vaine i tona manako anga aroa. Kua tata te apotetoro ko Petero: “Koia katoa oki kotou, e te au tane, e noo ia ratou [ko ta kotou au vaine] ra ma te kite, i te akangateitei anga i te vaine, i te āriki paruparu ra, e ei atu katoa oki i te aroa ua ra i te ora; kia kore ta kotou pure e topa.” (1 Petero 3:7) Tetai tane tei akakoro tikai kia kore e akono i te au mea anoanoia no tana vaine te akakino ra i tona uaorai pirianga ma Iehova; ka rauka ia kia arai i tona akavaitata anga kia Iehova mei “te tumurangi, kia kore te pure e tae atu ki roto ra.” (Te Aue o Ieremia 3:44) Ka rauka kia taki atu teia ki tona riroanga kia akakoreia i te tavini anga ei tetai akaaere Kerititiano ra.

16. Eaa te tumu maata ta Paulo i akataka maira, e akapeea ra te manako ngakau tau o te aronga pakari no teia?

¹⁶ Mei tei akatakaia maira, ko te tumu maata o ta Paulo taumaro anga koia oki me akaipoipo tetai tangata, ka akakore aia i tetai tuanga o tona tu rangatira iaia e tangata takaua ra tei akatikaia aia kia akono “i ta te Atu ma te iroirongata kore.” (1 Korinetia 7:35) Te akaari maira te au ripoti e kare tetai papaki o te aronga pakari akaipoipoia ra e tau ana te manako anga ki runga i te au tuatua akauruia a Paulo i au taime ravarai. I to ratou anoano kia rave i ta ratou e manako ra te ka tau te aronga pakari meitaki kia rave, penei kare ratou e manako i etai o ta ratou au angaanga a te tane ra. Ka kite etai i te tu ngata kia akakore i tetai angaanga na te putuputuanga, noatu rai me na te arikianga i te reira ka taka meitaki ia e tau kore i te pae vaerua ki ta ratou vaine. Te rekareka ra ratou i te au angaanga kia aere kapiti ma te akaipoipo anga, inara te mareka ra ainei ratou kia rave i te au apainga te kapitiia ra ma te reira?

17. Eaa tei rokoia ki tetai au vaine, e penei akapeea teia e kopaeiaʼi?

¹⁷ E tika rai, e mea meitaki te maroiroi ei tetai tangata pakari. Inara, te tau ra ainei tetai Kerititiano me i te raveanga i tana au angaanga i roto i te putuputuanga, kare aia e manako ana i tana au apainga tau i te Tuatua Tapu no tana vaine? I te anoanoanga kia turu i te aronga i roto i te putuputuanga, ka manako katoa te tangata pakari tau i te pae vaerua o tana vaine. Tetai papaki o te au vaine a te aronga pakari kua riro kia apikepike i te pae vaerua, e kua “akangaa pai” oki i te pae vaerua. (1 Timoteo 1:19) I te mea e na te vaine te apainga no tona uaorai ora, i etai turanga ko te manamanata i te pae vaerua ka rauka ua kia kopae keia naringa aia ‘i angai e i akaperepere’ i tana vaine, “mei ta te Atu i te ekalesia nei.” (Ephesia 5:28, 29) E mea tau rai, ka tika te aronga pakari ‘kia matakite ia ratou uaorai, e te anana katoa.’ (Angaanga 20:28) Me kua akaipoipoia ratou, te kapiti ra teia i ta ratou au vaine.

‘E Pekapeka ra i te Kopapa Nei’

18. Eaa etai au tu o te “pekapeka” tei tupu ra ki te au Kerititiano akaipoipoia, e eaa te tupu anga kino ki te au angaanga a tetai tangata pakari ra?

¹⁸ Kua tata katoa oki te apotetoro: “Kare ra koe e ara kia akaipoipo; e kia akaipoipo oki te tamaine paretenia ra, kare ana e ara. E pekapeka ra to te reira i te kopapa nei; e akaperepere ra au ia kotou.” (1 Korinetia 7:28) Kua anoano a Paulo kia tauturu atu i te aronga te ka rauka kia aru i tana akatauanga no te noo takaua mei te au apiapi te papu ra e ka tupu mai ma te akaipoipo anga. Noatu ra no nga tokorua kare e tamariki, ka kapiti teia au pekapeka i te au manamanata no te maki me kare te au tu ngata no te pae i te moni pera katoa oki te au apainga tau i te Tuatua Tapu no nga metua ongai ruaine o tetai tokorua ra. (1 Timoteo 5:4, 8) Ka tika tetai tangata pakari ra, na roto i te tu akaraanga, kia ariki i teia au apainga, e penei ka akariro ke teia i tana au angaanga ei tetai akaaere Kerititiano. E mea mataora, e maata te aronga pakari te rave ra i te angaanga meitaki i te raveanga i ta ratou au apainga i te ngutuare tangata e te putuputuanga oki.

19. Eaa te aite anga o ta Paulo i tuatua ra: “E tau i te aronga e vaine ta ratou ra, kia riro mei te mea e kare”?

¹⁹ Kua tuatua katoa a Paulo: “Te poto nei te tuatau. E tau i te aronga e vaine ta ratou ra, kia riro mei te mea e kare.” (1 Korinetia 7:29) Inara, i te manako anga i tana i tuatua ana i roto i teianei pene ki to Korinetia, te kitea ra e kare te aite anga o tana tuatua e ka tau te au Kerititiano akaipoipoia ra kia akono kore i ta ratou vaine. (1 Korinetia 7:2, 3, 33) Kua akaari mai aia i te aite anga o tana tuatua, i tana tata anga: “E te aronga i rave i to teianei ao ra, mei te mea e kare i rave; te ngaro ke nei oki te tu o teianei ao.” (1 Korinetia 7:31) E maata atu oki i teianei i to te tuatau ia Paulo ra me kare i to te apotetoro ko Ioane ra tuatau, “te ngaro ke nei teianei ao.” (1 Ioane 2:15-17) No reira, ko te au Kerititiano akaipoipoia tei kite ra i te umuumuia kia rave i etai au atinga i te aruanga ia Karaiti kare e rauka kia akapou takiri aia i te au rekareka anga e te au ravenga o te akaipoipo anga ra.​—1 Korinetia 7:5.

Au Vaine Tuku Atinga ia Ratou Uaorai

20, 21. (a) Eaa te au atinga ta te au vaine Kerititiano e manganui te rekareka ra i te oronga? (e) Eaa ta te vaine ka tika kia manako atu i tana tane, noatu rai me ko tetai tangata pakari aia?

²⁰ Mei te aronga pakari e rave atinga kia puapingaiaʼi etai ke, e manganui te au vaine a te aronga pakari kua tauta kia akatau i ta ratou apainga i te akaipoipo anga ma te au apinga puapinga maata o te Patireia. E au tauatini ua atu au vaine Kerititiano te mataora ra kia taokotai atu kia raukaʼi i ta ratou tane te rave i ta ratou au angaanga ei au akaaere. Te inangaro ra a Iehova ia ratou no teia, e te akameitaki ra aia i te vaerua meitaki ta ratou e akaari ra. (Philemona 25) Inara, te akakite maira ta Paulo ako anga e ka tau te au vaine a te au akaaere kia manako tika atu i tetai tuatau tau e te manako anga mei ko mai i ta ratou tane ra. Ko te apainga Tuatua Tapu ia a te aronga pakari akaipoipoia ra kia rava te tuatau ki ta ratou vaine ei akatau i ta ratou apainga ei tane e ei akaaere oki.

²¹ Inara ka peea me ka kapiti atu ki tana tuanga ei tane, e metua katoa oki tetai tangata pakari Kerititiano ra? Kua kapitiia atu teia ki tana au apainga e ka akatuera mai i tetai atu apainga no te akaaere, mei ta tatou ka kite i te atikara te aru mai nei.

Na te Tu Akamanako Akaouia

◻ Eaa te au tika tau i te Tuatua Tapu te akakite ra e ka rauka kia riro tetai tangata akaipoipoia ei akaaere Kerititiano?

◻ Me ka akaipoipoia tetai o te aronga pakari takaua ra, eaa te mea tau nana kia tamanako?

◻ Na roto i teea au tu to te Kerititiano akaipoipoia “te akono ra ïa i te au mea o teianei ao”?

◻ Akapeea ta te au vaine e manganui a te aronga akaaere ra akaari anga i tetai vaerua meitaki no te tuku atinga ia ratou uaorai?

[Tutu i te kapi 17]

Noatu te rave ra i te au angaanga teokaratiki, ka tau tetai tangata pakari kia akono aroa i tana vaine