Akonoanga i to Tatou Akatapu Anga “I Tera Rā i Tera Rā”

“Kia inangaro te tangata i te aru mai iaku ra, e akaruke aia iaia uaorai, ka rave ei i tana satauro i tera rā i tera rā, ka aru mai ei iaku.”​—LUKA 9:23.

1. Eaa tetai mataara e raukaʼi ia tatou i te vaito i to tatou autu anga ei Kerititiano?

“E AU tangata tika tikai ainei tatou no te akatapu anga?” Ko te pauanga i teia uianga, kia tau ki ta John F. Kennedy, koia te 35 o te Peretiteni o te Unaite Teite, ko tetai tumu ia no te vaitoanga i te meitaki o te aronga i roto i te opati kavamani. Ka rauka i taua uianga ra i te rave ma te puapinga oonu atu ei tetai timata anga i to tatou meitaki ei au orometua Kerititiano.

2. Akapeea ta tetai tikitinari akataka anga i te tuatua “akatapu anga”?

² Inara, eaa te akatapu anga? Kua akatakaia mai te reira e te Webster’s Ninth New Collegiate Dictionary ei “tetai angaanga me kare e rave anga i te akatapuanga ki tetai peretana tu-Atua ora me kare ki tetai angaanga tapu,” “e akatapuanga me kare e akataka ke anga no tetai akakoro anga takake,” “e akamori anga tuku atinga iaia uaorai.” I te akara anga kua taiku a John F. Kennedy i taua tuatua ra ei aite anga no te “akamori anga tuku atinga iaia uaorai.” No tetai Kerititiano, e maata atu te aite anga o te akatapu anga.

3. Eaa te akatapu anga Kerititiano?

³ Kua tuatua a Iesu Karaiti ki tana au pipi: “Ko tei inangaro i te aru mai iaku, e akaruke aia iaia uaorai, e rave i tana satauro, ka aru mai ei iaku.” (Mataio 16:24) Ko te akataka ke anga no te rave angaanga tu-Atua kare e ko te raveanga anake i tetai angaanga akamori i te Tapati me kare kia aere atu ki etai ngai akamori anga. Te kapiti ra i te katoa anga o te tu oraanga o tetai ra. E riro ei ei Kerititiano tona aite anga kia akaruke iaia uaorai me kare kia akakore iaia uaorai i te tavinianga i te Atua ta Iesu Karaiti i tavini ra, koia a Iehova. Kapiti atu oki, ka rave tetai Kerititiano i tana “satauro” na te akakoromakianga i raro ake i tetai ua atu mamaeanga te ka tupu mai no te rave anga ei pipi na Karaiti.

Te Akaraanga Apa Kore

4. Eaa tei akatutuia mai e to Iesu papetito anga?

⁴ Iaia i te enua nei, kua akakite a Iesu eaa te o atura ki te akatapuanga iaia uaorai kia Iehova. Ko tona au manako koia oki: “Kare koe i inangaro i te tarangaara e te atinga ra, e kopapa ra taau ïa i akono noku.” Ei reira kua tuatua katoa aia: “I na, e taku Atua, te aere nei au e akatika i toou anoano (kua tataia te tuatua noku ra i roto i te pokaikai tuatua ra).” (Ebera 10:5-7) Ei tetai mema no te iti tangata akatapuia ra, kua akatapuia aia kia Iehova i tona anau mai anga. Inara, i te akamata anga o tana angaanga orometua i te enua nei, kua oronga aia iaia uaorai no te papetito anga ei akatutu anga i tona oronga anga iaia uaorai kia rave i te anoano o Iehova, tei tau ra nona kua kapiti katoa i te orongaanga i tona oraanga ei atinga oko. Na te reira tana akanoo anga i te akara anga no te au Kerititiano kia rave noatu eaa ta Iehova ka anoano mai.

5. Akapeea ta Iesu akakite anga i tetai manako meitaki no te au apinga kopapa ra?

⁵ I muri ake i tona papetito anga kua aru a Iesu i tetai tu oraanga tei taki atu ki tetai matenga ei atinga. Kare aia i manako i te kimianga moni me kare i te akono anga i tetai oraanga noonoo ua. Mari ra, kua koropiniia tona oraanga i tana angaanga orometua. Kua akamaroiroi atu aia i tana au pipi kia “na mua . . . i te kimi i te basileia o te Atua, e te tuatua-tika nana ra,” e kua akono ra aia uaorai i teia au tuatua. (Mataio 6:33) Pera katoa, kua tuatua aia i tetai tuatau: “E ana to te suoli, e toanga to te manu o te reva, kareka te Tamaiti a te tangata, kare ona urunga upoko.” (Mataio 8:20) E rauka ua iaia i te akapapa i tana au apiianga kia taomi mai i te moni mei ko mai i tana au pipi ra. I te mea e kamuta aia e rauka ua iaia i te akataka i tetai tuatau kia maani i tetai apinga manea ei oko kia rauka mai iaia etai moni ario toko iti. Inara kare aia i taangaanga i tona tu karape ei kimi kia puapinga i te apinga kopapa. Ei au tavini akatapuia no te Atua, te aru ra ainei tatou ia Iesu i te akonoanga i te manako tika no te au apinga kopapa?​—Mataio 6:24-34.

6. Akapeea tatou me aru i to Iesu tuku atinga iaia uaorai ei au tavini akatapuia no te Atua ra?

⁶ I te tukuanga i tana angaanga ki te Atua ei mea mua, kare a Iesu i kimi i tona uaorai puapinga. Ko tona ora anga i te toru e te apa mataiti o tana angaanga orometua i te ngai tangata ra ko tetai ia no te tuku atinga iaia uaorai. I tetai atianga i muri ake i tetai ra maata te angaanga, kare ua i akataka i te taime no te kaikai anga, kua mareka ua a Iesu i te apii atu i te au tangata tei “mate ratou i te roiroi, e kua pueurikiriki keia, mei te mamoe tiaki kore ra.” (Mataio 9:36; Mareko 6:31-34) Noatu rai “e roiroi akerā Iesu i te aerenga,” kua tamata aia i te tuatuaanga ma tetai vaine Samaria tei aere maira ki te ruavai a Iakoba i Sikara. (Ioane 4:6, 7, 13-15) Kua akamanako aia i te meitaki o etai ke ra i mua ake i tona uaorai. (Ioane 11:5-15) Ka rauka ia tatou i te aru ia Iesu na te orongaanga ei atinga i to tatou uaorai au inangaro kia tavini atu i te Atua e etai ke ra. (Ioane 6:38) Na te manakoanga e akapeea tatou e akamareka tikai i te Atua kare e kia rave ua i te tuanga meangiti ua o tei umuumuia ra, ka akono tatou i reira kia tau ki to tatou akatapu anga.

7. Akapeea tatou me aru ia Iesu i te oronga tamou anga i te akangateitei anga kia Iehova?

⁷ Kare ra a Iesu i tauta ana kia ariu atu te manako anga ki aia uaorai na te tauturuanga i te au tangata. Kua akatapuia aia ki te Atua kia rave i Tona anoano. No reira kua akapapu aia e kia riro te kaka katoa ia Iehova, i tona Metua, no te apinga ravarai i raveia ra. I te kapiki anga tetai tutara iaia “Orometua Meitaki,” ma te taikuanga i te tuatua “meitaki” ei tetai taoonga, kua karanga atura a Iesu kiaia, na ko atura: “Ko te Atua anake ra te meitaki.” (Luka 18:18, 19; Ioane 5:19, 30) Te aite ra ainei tatou, kia Iesu, e viviki i te arataki ke atu i te akangateitei mei ia tatou uaorai kia riro atu no Iehova ia?

8. (a) Ei tetai tangata akatapuia, akapeea a Iesu i te akataka keanga iaia uaorai mei teianei ao? (e) Akapeea tatou me aru iaia?

⁸ I roto katoa i tona oraanga akatapuia i runga i te enua nei, kua akakite a Iesu e kua akataka aia iaia uaorai no te angaanga tu-Atua. Kua akono ma aia iaia uaorai kia raukaʼi iaia i te oronga iaia uaorai mei tetai “punua mamoe kino kore e te maki kore” ei atinga oko. (1 Petero 1:19; Ebera 7:26) Kua akono aia i te au apiianga katoatoa o te Ture a Mose ra, na reira te akatupuanga i te Ture. (Mataio 5:17; 2 Korinetia 1:20) Kua rave aia i tana uaorai apii anga no te akono tau ra. (Mataio 5:27, 28) Kare e rauka i tetai ke ra i te akaapa tika atu iaia no te au ravenga kikino. E tika, kua “rikarika [aia] i te kino.” (Ebera 1:9) Ei au tavini no te Atua ra, e aru tatou ia Iesu i te tamou anga i to tatou au oraanga e pera katoa ta tatou au ravenga kia ma ki mua i te aroaro o Iehova ra.

Au Akaraanga Akamatakiteanga

9. Eaa te akaraanga akamatakite anga ta Paulo i taiku ra, e eaa tatou i tau ei kia akamanako i teia akara anga?

⁹ Ei tuke anga ma ta Iesu akaraanga, tei ia tatou te akaraanga akamatakiteanga a to Iseraela ra. Noatu rai i muri ake i ta ratou akatika anga e ka rave ratou i te au mea katoatoa ta Iehova e akaue atu ia ratou kia rave, kare ratou i rave ana i tona anoano. (Daniela 9:11) Kua akamaroiroi atura te apotetoro ko Paulo i te au Kerititiano kia apiiia ratou mei te apinga tei tupu ra ki to Iseraela. E akara matatio tatou i etai au apinga i tupu i ta Paulo i taiku i tana reta mua ki to Korinetia ra e kia kite eaa te au topa anga te ka tau kia kopae keia e te au tavini akatapuia o te Atua ra i to tatou tuatau nei.​—1 Korinetia 10:1-6, 11.

10. (a) I akapeea to Iseraela ‘noinoi anga i te au mea kikino ra’? (e) Eaa ra i maata atu ei te apainga a to Iseraela i te rua o te taime i urutoe ei ratou no te kai, e eaa ta tatou ka kite mei teia akara anga akamatakiteanga?

¹⁰ Te mea mua, kua akamatakite a Paulo ia tatou e auraka “e noinoi i te au mea kikino ra.” (1 Korinetia 10:6) Penei ka akamaara atu te reira ia koe i te atianga i to Iseraela i urutoe ra no te kai anga mana anake ua. Kua tuku mai a Iehova i te au manu kia ratou. Kua tupu tetai apinga aiteite e vaitata i te okotai mataiti i mua akera i te metepara i Sini, i mua ua ake i to Iseraela akatika anga i to ratou akatapu anga kia Iehova. (Exodo 16:1-3, 12, 13) Inara kare i aiteite tikai te turanga. I ta Iehova ra oronga anga i te au manu i te taime mua ra, kare aia i tuku i te apai anga ki runga i to Iseraela no to ratou urutoe anga. Inara, i teia taime, e tuke te turanga. “E te kai rai i te kai i to ratou vaa, kare rai i ngaua, kua tupu akera te riri o Iehova i taua au tangata ra, e kua ta iorā Iehova i taua au tangata ra i te mate maata roa.” (Numero 11:4-6, 31-34) Eaa te taui anga? Ei iti tangata akatapuia, kua riro i teianei na ratou te apai anga. No to ratou ngere i te ariki anga no ta Iehova ra au apinga i oronga atu kua taki atu ia ratou kia akaapa ia Iehova, noatu rai ta ratou taputou anga kia rave i ta Iehova au apinga ravarai i tuatua atu! Te aiteite ra i teia tuatau nei te akaapaanga i ta Iehova ra kaingakai. Kua kore tetai papaki e ariki i ta Iehova au apinga orongaia mai na roto i “te tavini akono meitaki e te pakari.” (Mataio 24:45-47) Inara, kia maara e, te tau ra i to tatou akatapu anga kia tamou meitaki ki to tatou manako i ta Iehova i rave no tatou e kia ariki i te kaikai vaerua ta Iehova e oronga maira.

11. (a) I akapeea to Iseraela i te akaviivii anga i ta ratou akamori ia Iehova ma te akamori itoro ra? (e) Akapeea tatou e apaʼi i tetai tu akamori itoro?

¹¹ I muri maira, kua akamatakite a Paulo: “Auraka katoa kotou ei araara idolo, mei tetai papaki o ratou ra.” (1 Korinetia 10:7) I konei i te akara anga te taiku maira te apotetoro i te akamori anga punua puakatoro i muri ua ake i te akaoti anga te au Iseraela i te koreromotu ma Iehova i Maunga Sinai ra. Penei ka tuatua koe, ‘Ei tetai tavini akatapuia no Iehova ra, kare rava au e o atu ki roto i te akamori itoro.’ Inara, e tamanako ana, e mei te manako o to Iseraela ra, kare ratou i akamutu i te akamori ia Iehova; tera ra, kua akamata ratou i tetai ravenga no te akamori punua puakatoro​—tetai apinga rikarika ki te Atua. Eaa tei o atu ki teia tu akamori? Kua akono te au tangata i te oronga au atinga ki mua i taua punua puakatoro ra, e ei reira “kua noo te au tangata ki raro e kai e e inu oki, e kua tu akera ki runga e ura.” (Exodo 32:4-6) I teia tuatau, penei ka karanga tetai papaki e te akamori ra ratou ia Iehova. Inara penei ko to ratou oraanga te akaariu keia ra kare ki runga i te akamori ia Iehova, mari ra ki runga i te tamataora anga i te au apinga o teianei ao, e ka tauta ratou kia tauru atu i ta ratou angaanga kia Iehova takapini i teia au apinga. E tika, kare teia i kino roa mei te tupouanga ki tetai punua puakatoro auro ra, inara kare ia i tuke roa te kaveinga. Ko te akariroanga i te anoano o tetai uaorai ei atua e mamao ke mai ia i te akonoanga i te akatapu anga o tetai ra kia Iehova.​—Philipi 3:19.

12. Mei tei tupu ki to Iseraela ma Baala-peora ra, eaa ta tatou i kite no te akarukeanga ia tatou uaorai?

¹² Kua o katoa atu tetai tu tamataora anga ki roto i tetai mai akara anga akamatakiteanga ta Paulo i taiku ra. “Auraka katoa tatou e akaturi, mei tetai papaki o ratou i akaturi ra, e mate iora e rua ngauru e toru ara i te tausani i te rā okotai ra.” (1 Korinetia 10:8) To Iseraela, tei akavareia e te akamareka tau kore tei orongaia ra e te au tamaine o Moabi, kua takiia atu ki roto i te akamorianga kia Baala-peora i Sitima. (Numero 25:1-3, 9) Te akarukeanga ia tatou uaorai kia rave i to Iehova ra anoano te kapiti ra i te arikianga i tana au turanga no tei ma e te tau. (Mataio 5:27-30) I teia tuatau no te topaanga te au turanga, te akamaaraia mai nei tatou i te anoanoia kia vai ma ua tatou uaorai i te au tu akono tau kore katoatoa, ma te kauraroanga ki to Iehova ra mana taoonga kia akataka i tei meitaki e tei kino.​—1 Korinetia 6:9-11.

13. Akapeea ta Phinehaza akara anga i te tauturu anga ia tatou kia kite e eaa te kapitiia ra ma te akatapu anga kia Iehova?

¹³ I te topa anga te aronga e manganui ki roto i te ereere o te akaturi i Sitima ra, kua vai ra tetai papaki i te akono anga i te akatapu anga a te iti tangata ra kia Iehova. I o ratou ra, ko Phinehaza tei meitaki roa te maroiroi. I tona akara atu anga i tetai tangata Iseraela ra i te arataki anga mai i tetai vaine ngati Midiana ki roto i tona puakapa, kua rave iora Phinehaza i te korare i tona rima e kua ko atura ia raua ravarai. Kua tuatua maira Iehova kia Mose: “Kua akaanga ke io nei a Phinehaza . . . i toku riri i te tamariki a Iseraela, i te maroiroi nona i rotopu ia ratou noku nei, i kore ei i pou te tamariki a Iseraela iaku i taua riri noku ra.” (Numero 25:11) Te kore e tuku ua i te tu taemoemo atu ia Iehova​—ko te aite anga ia o te akatapu anga. Kare tatou e tau kia tuku ua i tetai ua atu apinga kia mono i te ngai o tei tau ra no te akatapu anga kia Iehova i roto i to tatou ngakau. Ka akakeu katoa oki to tatou maroiroi no Iehova kia akono tatou kia vai ma ua te putuputuanga na te ripotianga i te tu tau kore ki te aronga pakari, auraka kia tuku ua i te reira.

14. (a) Akapeea to Iseraela i te timata anga ia Iehova? (e) Akapeea te tauturu anga a te akatapu anga takiri kia Iehova kia kore tatou “e akaparuparu”?

¹⁴ Kua taiku katoa oki a Paulo i tetai atu akara anga akamatakiteanga: “Auraka katoa tatou e timata atu [“ia Iehova,” NW], mei tetai papaki o ratou i timata ra, e mate iora i te ovi.” (1 Korinetia 10:9) Te tuatua ra a Paulo i konei no te tuatau i akaapa ra to Iseraela i te Atua kia Mose i te riro anga kia “taitaia roa akera te ngakau o te tangata i taua arataa ra.” (Numero 21:4) Te rave ra ainei koe i te reira tarevake? I toou akatapu anga ia koe uaorai kia Iehova, i manako ainei koe tei te pae ua maira a Aramagido? Kua roa atu ainei to Iehova akakoromaki anga i taau i manako ana? Kia maara e, kare tatou i akatapu ia tatou uaorai kia Iehova no tetai tuatau akatakaia me kare kia tae ua kia Aramagido. Ka vai tamou marie ra to tatou akatapu anga e tuatau ua atu. No reira ra, “auraka tatou e roiroi i te takinga-meitaki, ei te tuatau tikai oki tatou e kokoti ei, kia kore tatou e akaparuparu.”​—Galatia 6:9.

15. (a) Koai ta to Iseraela i urutoe ra? (e) Akapeea to tatou akatapu anga kia Iehova i te akakeu anga ia tatou kia akangateitei i te mana taoonga teokaratiki?

¹⁵ I te openga ra, kua akamatakite a Paulo no runga i te riroanga ei aronga “urutoe” i te au tavini akataoongaia o Iehova ra. (1 Korinetia 10:10) Kua urutoe kino rava to Iseraela ia Mose raua ko Aarona i te apai mai anga e 10 o te aronga 12 ra i te ripoti kino i muri ake i te tutaka anga i te enua o Kanaana i tonokia ra ratou. Kua tuatua katoa ratou i te monoanga ia Mose ei upoko ei arataki kia oki atu ki Aiphiti. (Numero 14:1-4) I teia tuatau, te ariki ra ainei tatou i te arataki anga te orongaia maira kia tatou na roto i te angaanga a te vaerua tapu o Iehova? Mei te kiteanga i te maata o te kai vaerua i te kaingakai te orongaia maira e te tavini akono meitaki e te pakari, te taka meitaki ra koai ta Iesu e taangaanga nei i te tua anga “i te kai na ratou i te ora mou ra.” (Mataio 24:45) I te akatapu anga ma te meta katoa kia Iehova te umuumuia ra tatou kia akaari i te akangateitei no tona au tavini akataoongaia ra. Auraka rava tatou e riro kia aite atu ki tetai papaki o te aronga urutoe o teia tuatau nei ei tuatua akatutu ua tei ariu ke ra ki tetai atu upoko ou, kia arataki akaou atu ia ratou ki roto i teianei ao.

Ko Toku Maroiroi Katoa Ainei Ia?

16. Eaa te au uianga penei ka anoano te au tavini akatapuia o te Atua ra kia ui ia ratou uaorai?

¹⁶ Kare to Iseraela e topa ki roto i taua kino maata ra naringa i maara ratou e ko to ratou akatapu anga kia Iehova ra kare i kotingaia. Kare i aite atu ki taua aronga Iseraela ra, kua akono a Iesu Karaiti i tona akatapu anga kia tae ki te otinga. Ei au pipi na Karaiti ra, ka aru tatou i tana akaraanga no te akamori anga ma te meta katoa ra, i te akonoanga i to tatou oraanga kare “i te anoano o te tangata, ma te akono ra i te inangaro o te Atua.” (1 Petero 4:2; akaaite ia 2 Korinetia 5:15.) Ko to Iehova anoano i teia tuatau nei i “te tangata katoatoa kia ora, e kia rauka te kite i te tuatua-mou.” (1 Timoteo 2:4) No tera akakoro anga, ka tutu aere tatou “i teia tuatua meitaki o te basileia” i mua ake i te taenga mai te openga. (Mataio 24:14) Eaa te maata ta tatou tauta anga e tuku nei ki roto i teia angaanga? Penei ka anoano tatou kia ui ia tatou uaorai, ‘Ko toku maroiroi katoa ainei ia?’ (2 Timoteo 2:15) E tuke tuke te au turanga. Te mareka ra a Iehova kia taviniia aia i “ta te tangata i rauka ra, kare i tei kore i rauka iaia ra.” (2 Korinetia 8:12; Luka 21:1-4) Kare tetai e tau kia akara atu i te oonu e te ngakau tae o te akatapu anga o tetai ke ra. Ka tau ra te aronga tataki tai kia akamanako i te maata o tona uaorai akamori anga ia Iehova. (Galatia 6:4) Ka tau to tatou inangaro no Iehova kia akakeu ia tatou kia ui, ‘Akapeea ka raukaʼi iaku i te akamataora ia Iehova?’

17. Eaa te pirianga i rotopu i te akamori anga e te ariki anga? E akatutu mai?

¹⁷ Ka oonu atu to tatou akamori anga ia Iehova me tupu to tatou ariki anga iaia. Kua akatapu iaia uaorai kia Iehova tetai tamaroa Tiapani e 14 ona mataiti e kua akatutu i teia akatapu anga na te papetito anga i te vai. I muri akera, kua anoano aia kia kimi i te kite teitei e kia riro mai aia ei tangata taineti. Kare aia i manako ana i te angaanga orometua tamou, inara ei tavini akatapuia, kare aia i anoano i te akaruke ia Iehova e tana akaaerenga akara mataia. E raukaʼi tana angaanga i akakoro ra, kua aere aia ki tetai apii teitei. I reira kua kite aia i te aronga tei akaotiia ta ratou apii teitei i te akatapu anga i to ratou oraanga katoa ki to ratou au kamupani me kare ki ta ratou au apii. Kua tamanako ua aia, ‘Eaa ra taku e rave nei i ko nei? Ka rauka tikai ainei iaku i te aru i to ratou tu oraanga e ka akatapu ei iaku uaorai ki te angaanga kopapa? Kare ainei e kua oti au i te akatapuia kia Iehova?’ Ma te ariki anga akaouia, kua akamata aia ei painia tamou. Kua oonu atu tona kite i tona akatapu anga e kua akakeu iaia kia akapapu i tona ngakau kia aere atu ki te ngai te anoanoia maira aia. Kua aere aia ki te Apii Terenianga Orometua e kua rauka mai tana ngai angaanga kia tavini ei tetai mitinari i tetai enua ke.

18. (a) Eaa te maata anga o tei o atura ki to tatou akatapu anga kia Iehova? (e) Eaa te tutaki ka rauka ia tatou kia kokoti mei to tatou akatapu anga kia Iehova?

¹⁸ Te kapiti ra te akatapu anga i to tatou oraanga katoa. Ka tau tatou kia akaruke ia tatou uaorai e “i tera rā i tera rā” kia aru i ta Iesu akara anga meitaki. (Luka 9:23) I te akaruke anga ia tatou uaorai, kare tatou e pati ia Iehova i tetai orote. Ka aru to tatou oraanga kia tau ki te au kaveinga ta Iehova i akanoo mai no tona au tavini. Noatu rai me i te au ngai te rauka ra ia tatou uaorai i te iki ta tatou ka rave, ka meitaki tatou kia kite me te rave ra tatou i te meitaki rava kia akono i tetai oraanga akatapuia kia Iehova. Ia tatou e tavini ra iaia i tera ra i tera ra, ma te raveanga i to tatou maroiroi katoa kia akamareka iaia, ka autu tatou ei au Kerititiano e ka akameitakiia ma te katakata anga mareka anga mei ko mai ia Iehova ra, koia Tei tau ra no to tatou akamori anga ma te meta katoa ra.

Ka Rauka Ia Koe te Akataka?

◻ Eaa tei o atu ki te akatapu anga no Iesu Karaiti ra?

◻ Eaa i tau ei kia kopae ke tatou i te urutoe ia Iehova?

◻ Na teea mataara ka raukaʼi ia tatou i te kopae kia kore te akamori itoro kikite e tomo mai ki to tatou oraanga?

◻ Na te maaraanga i teaa e tauturu ia tatou kia kore “e akaparuparu” i te raveanga i to te Atua ra anoano?

[Tutu i te kapi 17]

Auraka te au Kerititiano akatapuia “e roiroi i te takinga-meitaki”