E Irinaki i te Rima Akaoraanga o Iehova

“E Iehova e, . . . ei rima koe no [matou] i te au popongi katoa nei; ei ora oki no matou i te tuatau taitaia ra.”​—ISAIA 33:2.

1. No teea tu to Iehova ra rima mana?

E RIMA mana to Iehova ra. Tera ra, i te mea “e Vaerua te Atua” kare tona nga rima i te mea kopapa. (Ioane 4:24) I roto i te Puka Tapu, te akatutu maira te rima i te mana ririnui no te rave angaanga. E no reira, na tona rima ta te Atua ra akaora anga i tona iti tangata. E tika, ‘mei te tiaki mamoe ra ta te Atua akono anga i tana anana. E akaputu aia i te au punua i tona rima, e ei runga ratou i tona umauma kia apai.’ (Isaia 40:11; Salamo 23:1-4) Mei teaa ra te manako tinamou o te iti tangata o Iehova i roto i tona nga rima aroa ra!​—Akaaiteia atu kia Deuteronomi 3:24.

2. Eaa te au uianga te tau nei tatou kia akamanako i konei?

² Akapeea te akaora anga a to Iehova rima i tona iti tangata i te tuatau kua topa e i teianei katoa oki? Eaa te tauturu ta te Atua e oronga ra kia ratou ei putuputuanga? E eaa ra i raukai kia irinaki tona au tangata i tona rima akaoraanga i to ratou tuatau taitaia katoa ra?

Te Angaanga Akaoraanga a to te Atua Rima

3. Te akatika ra te au Tuatua Tapu i te akaoraanga i to Iseraela mei Aiphiti maira ki runga i teaa?

³ I mua ake ka akaoraʼi i to Iseraela mei te tuikaa i Aiphiti i te 3,500 mataiti i topa, kua karanga atura te Atua ki tana peroveta kia Mose: “E karanga atu ki te tamariki a Iseraela, Ko au ko Iehova, e naku kotou e arataki ke mai i te au apainga a to Aiphiti ra, e e matara mai kotou iaku i ta ratou akaao anga mai, e ka akaoraia kotou e au i toku rima i akatikaia nei, e ma te tutaki maata.” (Exodo 6:6) Kia tau ki ta te apotetoro ko Paulo, na te Atua ra i arataki mai i to Iseraela ki vao i Aiphiti “ma te rima marōrō.” (Angaanga 13:17) Kua akatika, te tamariki a Kora e na te Atua to ratou autu anga i te Enua Taputouia ra, i te na ko anga: “Kare oki i rauka te enua i ta ratou uaorai koke, kare oki ratou i ora i to ratou uaorai rima; ko toou ra rima katau, e to rima, e te mārama o to mata: no te mea kua tau roa koe ia ratou.”​—Salamo 44:3.

4. Akapeea te irinaki anga ki runga i te rima akaoraanga o Iehova ra i te tutaki angaia, i te tuatau o te maro anga a to Asura ra?

⁴ Kua aere katoa mai oki to Iehova rima e tauturu i tona iti tangata i te tuatau riri o Asura. I te reira tuatau kua pure te peroveta ko Isaia: “E Iehova e, e aroa mai koe ia matou; te tapapa nei matou ia koe; ei rima koe no [matou] i te au popongi katoa nei; ei ora oki no matou i te tuatau taitaia ra.” (Isaia 33:2) Kua pauia mai te reira pure i te ta angaia e te angera a te Atua e 185,000 i te puakapa Asura ra, e te tuaru anga i te Ariki ia Senakeriba mei Ierusalema ra, oki atura “ma te mata akama.” (2 Paraleipomeno 32:21; Isaia 37:33-37) I tutakiia ana te irinaki anga i te rima akaoraanga o Iehova i te au tuatau ravarai.

5. Eaa ta te rima mana o te Atua i rave no te au Kerititiano takinga kinoia ra i te tuatau openga o te Tamaki Mua o teianei Ao?

⁵ Na te rima mana o te Atua i akaora i te au Kerititiano akatainuia ra i te tuatau openga o te Tamaki Mua o teianei Ao. I te 1918 kua takinga kinoia te opati maata o te Pupu Akaaere e to ratou au enemi ra, e kua tapekaia te au taeake tei rongo meitakiia. No te mataku i te au mana o teianei ao, vaitata roa te akamutu te aronga akatainuia ra i ta ratou angaanga akakitekite aere. Inara kua pure ratou kia akaoraia te reira e kia tamaia te ara no te rave kore anga e pera katoa oki te tu viivii no te mataku ra. Kua pau atura te Atua na te akariroanga i te au taeake tei tapekaia ra kia akamataraia mai, ma te akakore anga i te akaapa ia ratou ra i muri ua maira. Ko te tupu anga no te au tuatua mou tei akakiteia i ta ratou uruoaanga i te 1919 ra e te riringianga mai te vaerua tapu o te Atua tei akakeu ia ratou kia rave i te angaanga, kua akaoraia mai tei akatainuia ra no te angaanga kia Iehova ma te mataku kore ei akatupu anga i ta Ioela 2:28-32.​—Apokalupo 11:7-12.

Tauturu i Roto i te Putuputuanga

6. Akapeea tatou i kite ei e ka rauka kia akakoromaki i te turanga timataia i roto i te putuputuanga ra?

⁶ I te Atua e turu ra i te katoa anga o tana akaaerenga, te akatamou ra tona rima i etai aronga tataki tai i roto i reira. Inara, kare te au turanga i te apa kore ua i roto i te au putuputuanga no te mea e apa ua te au tangata ravarai. (Roma 5:12) E no reira ka tupu ra te au tu timata anga ki etai au tavini o Iehova i roto i te putuputuanga i etai tuatau. Ei akatauanga, noatu e i rave a Gaio i te “mea tika” i te ariki akamanuiri anga i te au taeake tutaka aere ra, kare a Dioterepe i ariki ia ratou e kua tamata i te titiri i te aronga tei ariki ra ki vao i te putuputuanga. (3 Ioane 5, 9, 10) Inara, kua tauturu ua atura Iehova ia Gaio e etai atu kia rave tamou i te akaari aroa anga ei turu i te angaanga tutuanga i te Patireia. Ka tau rai te irinaki anga ma te pure ki te Atua kia tauturu ia tatou i te rave tamou anga i te au angaanga tiratiratu ia tatou e tatari ra kia akatikatikaia tetai turanga te timata ra i to tatou akarongo.

7. I akono te au Kerititiano tiratiratu ra i to ratou akatapu anga ki te Atua noatu rai e eaa te au tu i te putuputuanga i Korinetia ra?

⁷ Me ko koe tetai tei kapitiia atu ma te putuputuanga o Korinetia i te anere mataiti mua ra. I tetai tuatau, kua akakokoia te tu taokotai o te reira e etai pupu akatupu pekapeka, pera katoa oki te takino anga i tona vaerua na te akakoromaki anga i te rave anga akaturi ra. (1 Korinetia 1:10, 11; 5:1-5) Kua rave ratou te aronga akarongo ra tetai i tetai ki te au akavaanga o teianei ao, e kua taumaro tetai papaki no etai au tumu tuke tuke. (1 Korinetia 6:1-8; 8:1-13) Kua akariro te pekapeka, te vareae, te riri, e te tu tau kore katoa kia ngata roa te oraanga. Kua akaekoko katoa tetai papaki i to Paulo mana taoonga e kua aviri i tona kite i te tuatua. (2 Korinetia 10:10) Inara, kua rave te aronga tiratiratu tei kapitiia atu ki taua putuputuanga ra i te akono i to ratou akatapu anga ki te Atua i taua tuatau timata anga ra.

8, 9. Eaa ta tatou ka tau kia rave me ka tupu mai tetai turanga timataanga ki mua ia tatou i roto i te putuputuanga?

⁸ Me akamata mai tetai tu timata anga, ka tau tatou kia piri vaitata ki te iti tangata o te Atua ra. (Akaaiteia atu kia Ioane 6:66-69.) Kia akakoromaki tatou tetai ki tetai, ma te manakoanga e ka roa atu tetai papaki ia etai atu i te kakau anga i ‘te tangata ou’ e te akakakau anga ia ratou uaorai ma te aroa, te takinga meitaki, te taakaaka, te maru, e te akakoromaki anga roa. I te mea e tuke tuke te au akono anga a te au tavini o te Atua ra, ka tau tatou katoatoa kia akaari i te aroa e kia akakore katoa oki i te ara.​—Kolosa 3:10-14.

⁹ I muri ake i etai mataiti e manganui te tavini anga ia Iehova, kua karanga tetai taeake: “Me e apinga tetai tei maata rava kiaku nei, ko te nooanga vaitata ia ki ta Iehova ra akaaerenga akara mataia nei. Na taku i kite i toku ou anga i apii mai iaku i te pakari kore o te irinaki i te manakoanga tangata ua nei. I te papu anga toku manako i te reira tumu, kua akapapaia toku manako kia vai rai au i te pae o te akaaerenga tiratiratu ra. Akapeea atu oki e raukai i tetai ta Iehova akaperepere anga e tana akameitakianga?” Te akaperepere katoa ra ainei koe i toou tuatau no te tavini ia Iehova ma tona iti tangata rekareka ra? (Salamo 100:2) Me koia ia, kare roa koe e tuku i tetai apinga kia kika ke ia koe mei ta te Atua ra akaaerenga me kare kia akapou i toou pirianga ma Tei akaora ra tona rima i te aronga katoatoa i inangaro iaia ra.

Te Tauturu me Rokoia Tatou e te Timata Anga

10. (a) Akapeea te pure i te tauturu anga i te au tangata o te Atua kia aro atu i te timataanga? (e) Eaa te akapapu anga ta Paulo i oronga mai ia 1 Korinetia 10:13 ra?

¹⁰ Ei aronga tiratiratu tataki tai tei piri atu ki ta te Atua ra akaaerenga, tei ia tatou nei tana tauturu i te tuatau o te timata anga. Ei akatauanga, ka tauturu aia ia tatou kia tamou i to tatou tu tiratiratu me ka rokoia mai tatou e te timata anga. Ka tika tatou kia pure rotai atu ki ta Iesu au tuatua ra: “Auraka e akaruke ia matou kia timataia mai, e akaora ra ia matou i te kino,” koia a Satani te Tiaporo. (Mataio 6:9-13) Mei tera te tu, ka pati tatou i te Atua e auraka e tuku ia tatou kia kore e akarongo kiaia me timataia mai tatou. Ka pau katoa mai aia i ta tatou au pure no te pakari kia autu i te au timata anga. (Iakobo 1:5-8) E ka papu ra i te au tavini o Iehova tana tauturu mai, no te mea kua karanga a Paulo: “Kare kotou i rokoia e te timataanga, mari ra mei ta te tangata nei rai: e tuatua-mou ra ta te Atua, e kare aia e vaoo ia kotou kia timataia, mari ra ko te tika ia kotou kia akakoromaki ra; e akatupu katoa aia i te akapuanga i taua timataanga ra, kia tika ia kotou kia akakoromaki.” (1 Korinetia 10:13) Eaa te tumu o te reira timataanga, e akapeea ta te Atua ra akatupu anga i te akapuanga?

11, 12. Eaa te au timataanga tei tuku ua ra to Iseraela kia o atu ratou ki roto, e akapeea tatou ka puapingaiaʼi i tei tupu kia ratou ra?

¹¹ Te aere mai ra te timataanga no ko mai i te au turanga te ka rauka kia akavare ia tatou kia kore e tiratiratu ki te Atua. Kua karanga a Paulo: “Kua riro oki taua au mea ra ei akaraanga na tatou, kia kore tatou e noinoi i te au mea kikino ra, mei ia ratou [to Iseraela] i noinoi ra. Auraka katoa kotou e araara itoro, mei tetai papaki o ratou ra; koia oki tei tataia ra e, ‘Kua noo te au tangata ki raro e kai e e inu oki, e kua tu akera ki runga e ura.’ Auraka katoa tatou e akaturi, mei tetai papaki o ratou i akaturi ra, e mate iora e rua ngauru e toru ara i te tausani i te rā okotai ra. Auraka katoa tatou e timata atu [ia Iehova], mei tetai papaki o ratou i timata ra, e mate iora i te ovi. Auraka katoa kotou e urutoe, mei tetai papaki o ratou i urutoe ra, e pou iora ratou i te akapou ra.”​—1 Korinetia 10:6-10.

¹² Kua anoano ra to Iseraela i te au mea kikino ra i to ratou tuku ua anga ki te timataanga kia noinoi i te akaputuanga e te kaianga i te manu kueira tei oronga temeioia maira e te Atua. (Numero 11:19, 20, 31-35) I mua akera, kua rave ratou i te akamori itoro i te tuatau kare a Mose i koia ratou ra kua tupu te timataanga kia akono i te akamori anga punua puakatoro. (Exodo 32:1-6) E au tauatini ua atu tei mate i te o atu anga ki te timataanga e kua rave i te akaturi ma te au vaine Moabi ra. (Numero 25:1-9) I te tuku ua anga to Iseraela ki te timataanga e kua urutoe no te akapou anga ia Kora, ia Datana, e Abirama meameaau ra, ma to ratou au oa katoa ra, e 14,700 tei mate i tetai maki mate tei tukuia maira e te Atua. (Numero 16:41-49) Ka puapingaia tatou i teia au tupuanga me ka kite tatou e kare i te maata roa teia au timataanga kia kore e rauka i to Iseraela i te kopae ke atu. Ka rauka ra ia ratou naringa ratou i akono i te akarongo, e naringa i akameitaki i ta te Atua ra utuutu anga aroa, e naringa i ariki i te tika o tana Ture ra. Ei reira te rima o Iehova ka akaorai ia ratou ra, mei ta te reira katoa ka raukai i te akaora ia tatou nei.

13, 14. Akapeea ta Iehova ra akaora anga i tona au tavini me ka rokoia mai e te timataanga?

¹³ Ei au Kerititiano, te aro atu nei tatou i te au timataanga tei matauia e te tangata nei. Inara, ka rauka kia vai tamou to tatou tiratiratu ki te Atua na te pureanga no tana tauturu e te akonoanga kia kopae ke atu i te timataanga. E tiratiratu te Atua, e kare aia e tuku ia tatou kia timataia kia tere atu i te ka rauka ia tatou i te akakoromaki ra. Me ka tiratiratu tatou kia Iehova, kare rava e kore e rauka ia tatou i te rave i tona ra anoano. Nana e akono i te mataara e raukai ia tatou na te akamaroiroianga ia tatou kia akakoromaki i te timataanga ra. Ei akatauanga, me ka takinga kinoia mai, penei ka timataia tatou kia tuku ua atu i te manakonako anga kia kore e tamamaeia e kia kore e mate. Inara me te irinaki ra tatou i te rima mana o Iehova, kare te timataanga e itae ki te turanga e kore ei aia e akamaroiroi mai i to tatou akarongo e kia oronga mai kia rava to tatou maroiroi kia tamou i te tu tiratiratu. Mei ta te apotetoro ko Paulo i tuatua ra e: “Kua kako matou i te mate, kare ra i apiapi: kua pekapeka matou, kare ra i ope te manakoanga: Kua takinga-kinoia, kare ra i akarukeia: kua uriia ki raro, kare ra i mate rava.”​—2 Korinetia 4:8, 9.

¹⁴ Kua akatinamou katoa oki a Iehova i tona iti tangata na te akonoanga i tona vaerua tapu ei akamaaraara mai e ei apii mai. Na te reira e apai mai i te au tumu Tuatua Tapu ki te manako e ka tauturu ia tatou kia kite e akapeea te akono anga i te reira kia raukai te kopae ke i te timataanga. (Ioane 14:26) Kua marama te au tavini tiratiratu o Iehova i te au maroanga te o maira ki tetai timataanga a kare e akavareia kia aru i te mataara tei tarevake ra. Kua oronga mai te Atua i te mataara kia raukai ia ratou te akakoromaki e noatu ka mate kare ra e tuku ua ki te timataanga ra. (Apokalupo 2:10) Kapiti katoa oki ki te tauturuanga i tona au tavini na tona vaerua tapu ra, te taangaanga ra a Iehova i tana au angera ei tauturu i tana akaaerenga.​—Ebera 1:14.

Tauturu i te Au Apinga no te Tangata Tataki Tai

15. Eaa te tauturu ka kitea e tatou tatakitai i roto i te Peʼe na Solomona ra?

¹⁵ Te aronga katoa te piri atura ki ta Iehova ra akaaerenga ka tauturu aia i to ratou oraanga tataki tai. Ei akatauanga, penei te kimi ra tetai papaki i tetai tokorua Kerititiano no te akaipoipo. (1 Korinetia 7:39) Me i tau kore tetai, penei ka meitaki kia akamanako ia Solomona ariki o Iseraela ra. Kare i rauka iaia te rima o tetai tamaine Sulami ra no te akaipoipo anga no te mea kua inangaro aia ki tetai tiaki mamoe taakaaka ra. Ka tau te tataanga a te ariki ra no teianei tumu kia tapaia ko Te Peʼe no ta Solomona Inangaro Kare ra i Akatikaia. Penei ka akatae tatou i te roimata me ka puapinga kore ua ta tatou uaorai tamataanga i tetai tei inangaroia ra e tatou, inara kua ora atu a Solomona i te reira tau kore anga, e ka rauka katoa ia tatou te reira. Ka rauka i te vaerua o te Atua i te tauturu ia tatou kia akaari i te tu akono meitaki e etai atu tu tau i te Atua ra. Te tauturu maira tana Tuatua ia tatou kia ariki i te tika putuputu ra i te akatupu te mamae, e kare e rauka i tetai tangata i te inangaro i tetai ua atu ra. (E Peʼe na Solomona 2:7; 3:5) Inara, te akaari maira te Peʼe na Solomona e penei ka rauka kia kitea tetai tokorua akarongo te inangaro akaperepere mai ra ia tatou. E maata atu oki i te reira, ko teia “peʼe meitaki rava” kua akatupuia i te inangaro o te Tiaki mamoe Meitaki ra, koia a Iesu Karaiti, no tana “vaine akaipoipo” ou e 144,000 au pipi akatainuia ra.”​—E Peʼe na Solomona 1:1, NW; Apokalupo 14:1-4; 21:2, 9; Ioane 10:14.

16. Penei eaa te “pekapeka i te kopapa nei” ka kapitiia mai ki te au Kerititiano akaipoipoia ra?

¹⁶ Noatu rai ko te aronga tei akaipoipo i tetai tei akarongo ra e “pekapeka ra to te reira i te kopapa nei.” (1 Korinetia 7:28) Te vaira te au tu apiapi e te au manamanata no te tane e te vaine e ta ratou tamariki oki. (1 Korinetia 7:32-35) Penei na te maki e akatupu mai i te au apainga e te manamanata. E penei na te takinga kino anga me kare te rava kore o te moni e akariro kia rave anga ngata no te metua tane Kerititiano kia akapapa i te au apinga anoanoia no tona ngutuare tangata. Pera katoa oki me ka akataka keia te au metua i ta ratou tamariki i te tapekaanga, e ko tetai papaki ka tamamaeia e ka tamateia. Inara i te reira au tu katoatoa, ka rauka ia tatou i te kopae i te au timataanga kia akakore i te akarongo me ka irinaki tikai tatou i te rima akaoraanga o Iehova.​—Salamo 145:14.

17. Eaa te manamanata o te ngutuare ta te Atua i akamaroiroi atura ia Isaaka raua ko Rebeka kia raukai ia raua i te akakoromaki atu?

¹⁷ Penei ka tau tatou kia akakoromaki i etai au timataanga no te tuatau roa. Ei akatauanga, penei ka akatupu tetai tamaiti i te pekapeka no tona nga metua akono ra i te Atua na te akaipoipoanga i te tokorua akarongo kore. Kua tupu te reira i te ngutuare tangata o te pateriareka ko Isaaka e tana vaine ko Rebeka. Kua akaipoipo ta raua tamaiti 40 mataiti ra ko Esau e rua nga vaine Ngati Heta e kua riro mai raua “ei mamae ngakau no Isaaka raua ko Rebeka.” Ko te tika e, “kua karanga atura Rebeka kia Isaaka: ‘Kua rikarika roa au i teia oraanga noku i nga tamaine a Heta nei. Me ka rave a Iakoba [tetai atu tamaiti na raua] i te vaine no te au tamaine a Heta mei teia no te au tamaine o te enua nei, eaa te puapinga o te oraanga kiaku?’” (Genese 26:34, 35; 27:46, NW) I te akara anga, kua tamamaeia te meta tuatua tika o Rebeka e taua manamanata roa ra. (Akaaiteia atu kia 2 Petero 2:7, 8.) Inara, kua mou atura te rima o Iehova ia Isaaka raua ko Rebeka, kua rauka ia raua i te akakoromaki i taua timataanga ra ma te tamouanga i te pirianga maroiroi ma Ia katoa ra.

18. Eaa te timataanga tei rauka ia C. T. Russell i te akakoromaki atu ma te tauturu a te Atua ra?

¹⁸ E mea taitaia me ka apikepike roa te rave a tetai mema papetitoia o te ngutuare i te angaanga a te Atua ra. (Akaaiteia atu kia 2 Timoteo 2:15.) Inara, ko tetai papaki kua akakoromaki i te pae vaerua i te kore anga te tokorua, mei ia Charles T. Russell rai, koia te peretiteni mua o te Watch Tower Society. Kua tipu tana vaine i tona pirianga ma te Totaiete ra e kua akaruke mai iaia i te 1897, i muri ake i to raua akaipoipo anga e vaitata i te 18 mataiti. Kua rave aia i te oroanga kia tataraia raua ko tana tane e te ture i te 1903, e kua akatikaia mai te reira i te 1908. Kua taka meitaki tona mamae ngakau i tana akakite anga ki tana vaine na roto i te pepa i muri ua ake i to raua tatara anga: “Kua pure akatenga au ki te Atu noou. . . . Kare ra au e akateimaa atu ia koe no toku tu mii, e kare katoa oki au e tauta kia tangi mai koe iaku na te akakiteanga i toku manako ngakau, i toku akaraanga i toou au kakau i etai tuatau e pera katoa etai atu apinga naau tei akaoki mai ki toku manako i toou tu tikai i mua ana​—te ki i te aroa te tangi e te tauturu—​i te vaerua o Karaiti ra. . . . E akamanako ana ma te pure eaa taku ka tuatua atu. E kia papu ia koe te koi o toku nei mamae, tona tupu anga oonu ki roto i toku manako, kare ko toku anake tu maromaroa no te toenga atu o toku aaere anga i teianei oraanga mari ra ko toou topa anga, e taku akaperepere, toou ngere openga kore, ko taku ia e kite nei.” Noatu rai te reira mamae ngakau, kua turu te Atua ia Russell e tae roa ki te openga o tona oraanga i te enua nei. (Salamo 116:12-15) Ka mou tamou rai a Iehova i tona au tavini tiratiratu ra.

Ki Vao i te Au Pekapeka Katoatoa

19. Eaa ta tatou ka akamarama me ka tamouia mai te au manamanata taitaia ra?

¹⁹ Kua kite te iti tangata o Iehova iaia e “e Atua no te au angaanga akaoraanga,” ko Tei “rave i ta tatou apainga i tera ra i tera ra.” (Salamo 68:19, 20, NW) E no reira, ei aronga tataki tai tei akatapuia te piri atura ki tana akaaerenga i te enua nei, auraka rava tatou e tuku ua no te ngakau kore me ka tupu tamou mai te au manamanata taitaia ra. Kia maara e “ko te Atua to tatou akapuanga e te maroiroi, e tauturu vaitata roa ïa kia rokoia e te tumatetenga.” (Salamo 46:1) Ka tutakiia mai to tatou irinaki anga kiaia ra. “Kua kimi au ia Iehova, e kua tuatua maira aia kiaku,” ko ta Davida i tuatua, “e kua akaora iaku i te au mea katoa taku i mataku ra. . . . Kua kapiki atura taua tangata i mate nei, e kua akarongo mairā Iehova, e kua akaora atura iaia i tona katoa ra au tumatetenga.”​—Salamo 34:4-6.

20. Eaa te uianga te vai mai ra no te akamanako anga?

²⁰ Ae, te akaora ra to tatou Metua i te rangi ra i tona au tangata i te au tu tumatetenga ravarai. Te turu ra aia i tana akaaerenga i te enua nei, te oronga maira i te tauturu i roto i te au apinga no te putuputuanga e pera katoa te au apinga no te aronga tataki tai. Ae, “kare oki a Iehova e akaruke i tona au tangata.” (Salamo 94:14) E akamanako tatou i teianei i etai atu mataara no ta Iehova ra tauturu anga i tona au tangata tataki tai ra. Akapeea to tatou Metua i te rangi ra i te akamaroiroi anga i tona au tavini tei maki ra, te taitaia ra te manako, te mamae ngakau no tetai tei mate ra, me kare te taitaia ra no to ratou uaorai apa? Ka kite rai tatou, i teia au tumu katoa, ka tau tatou kia irinaki i te rima mana o Iehova ra.

Akapeea Koe me Pau?

◻ Akapeea te akaora anga a te rima o Iehova i te tuatau i muatangana ra?

◻ Akapeea ta Iehova tauturu i tona au tangata i te putuputuanga i teia tuatau nei?

◻ Eaa ta te Atua tauturu oronga mai no te au apinga o te tangata tataki tai?

◻ Eaa ta tatou ka tau kia rave me ka tamouia mai te au manamanata taitaia ra?

[Tutu i te kapi 8, 9]

Kua arataki maira te Atua i to Iseraela ki vao i Aiphiti “ma te rima maroro ra”