E Akono i te Akamaaraanga ma te Tau

I TE aiai o Nisana 14, 33 T.N., to Iesu akatumu anga i te Akamaaraanga.a Koi oti ua akera aia i te akono i te akamaara anga Pasa ma tana au apotetoro e 12, no reira i papu ei ia tatou te ra. I muri ake i te tuaruanga i te pikikaa ra, ko Iuda, “kua rave iorā Iesu i te manga, kua akameitaki atura, vavaʼi iora, tuku atura kia ratou ra, na ko atura, Ka rave, ka kai; ko toku kopapa teia. Kua rave iora aia i te kapu, e oti akera i te akameitaki, tuku atura kia ratou ra, kua inu iora ratou ravarai. Kua na ko atura aia kia ratou, Ko toku toto teia, no te koreromotu ou ra, tei akamaringiia no te tangata e manganui.”​—Mareko 14:22-24.

Kua akaue a Iesu i tana au pipi kia akamaara i tona matenga no te mea e puapinga te reira. (Luka 22:19; 1 Korinetia 11:23-26) Nona anake ua te atinga te ka rauka i te tutaki i te au tangata nei mei te taumaa anga o te ara e te mate tei iri mai. (Roma 5:12; 6:23) Te varaoa e te uaina tana i taangaanga ra e nga akatutu anga te reira o tona kopapa e tona toto tiama. Te kite anga i te ra tikai, ka rauka ia tatou i te akono i te akamaara anga i taua ra aiteite ra i te mataiti tataki tai, mei tei raveia i te Pasa ngati Iuda ra. Inara kia rave tatou i te reira ma te tau. No teaa ra?

Kua karanga te apotetoro Paulo ko te aronga te ka piri atu i te kai anga i nga oroa o te varaoa e te uaina ka “akakite ïa kotou i te matenga o te Atu, e tae ua mai aia ra.” (1 Korinetia 11:26) Te akakoro anga i reira o te akamaara anga no runga i te matenga o Iesu e te aiteanga o te reira no te tangata nei. Ka riro te akamaara anga ei mea manako tikaiia, e tuatau no te akaataanga i te tu meitaki o te Atua e to tatou tu ariki no Iehova e tana Tamaiti. (Roma 5:8; Tito 2:14; 1 Ioane 4:9, 10) No reira, kua akamatakite a Paulo: “E teianei, ko te kai i teianei manga, e ko te inu i te kapu a te Atu, ma te tau kore ra, e ara ïa i te kopapa e te toto o te Atu.”​—1 Korinetia 11:27.

Ma te Tau​—Mei Teaa te Tu?

E tikai, kare te Atua e mareka mai me akatapu kore tatou i te akamaara anga na te o anga ki roto i te au rave anga tau kore me kore na te akonoanga i te au peu peikani. (Iakobo 1:27; 4:3, 4) I teia ka kopaeia te au peu matauia o te tuatau Easter. I te aruanga i ta Iesu ikuiku anga “e akapera kotou ei manako anga [iaia],” ka inangaro tatou i te akono i te Akamaaraanga mei tana i akatumu ra kia tupu te reira. (Luka 22:19; 1 Korinetia 11:24, 25) I teia ka kopaeia te au akaariari anga tei tapiriia atu ki te akamaara anga a te au akonoanga Kerititome. Te akatika ra te New Catholic Encyclopedia i “te Pure Tutia o teia tuatau e tuke maata mei te oroa ngoie tikai tei aruia e Karaiti e Tana au Apotetoro.” E na te akono putuputu anga i te Pure Tutia, noatu i te au ra, kua aere ke a Kerititome mei tei inangaroia e Iesu e kua akariro i te reira ei tupu anga matauia.

Kua tata a Paulo ki te au Kerititiano Korinetia no runga i te piri anga ki roto i te kai tau kore ua anga no te mea kua tupu mai tetai manamanata i roto i te putuputuanga no runga i te Kaikaianga Aiai a te Atu. Kare etai pae i akangateitei ana i te tu tapu o te reira. Kua apai mai ratou i ta ratou kai aiai e kua kai i te reira i mua ake me kore i te tuatau o te uipaanga. I te maata anga o te taime kua kai ratou e kua inu maata. Na teia i varea moe ei ratou e kua takino i to ratou au manako. Na te kore anga e vai ara ua i te pae o te manako e te pae vaerua, “kare [ratou] i akara i te kopapa” e no reira “e ara ïa i te kopapa e te toto o te Atu.” I taua taime rai, te aronga kare i kaikai ana kua matepongi e kua manako ke katoaia. Vaitata rai kare okotai ia ratou i tau no te piri ki roto i te kai anga i te au oroa i te ariki anga e te kite pu anga i te pakari anga tikai o te atianga​—e i raveia te akamaara anga ei akamaara i te matenga o te Atu. Kua tupu atu teia ei akava anga ia ratou, no te mea kua akangateitei kore ratou, pera katoa kua akavaavaa, i te reira.​—1 Korinetia 11:27-34.

Anoanoia te Kite ma te Marama

Kua piri ana etai pae ki roto i te kai anga i te au oroa Akamaaraanga, inara, i muri akera, kua kite mai ratou e kare ratou e tau kia kai. Te aronga tei tau tikai i te kai i te au oroa Akamaaraanga kua ikiia e te Atua e kua rauka te akakite anga tika o te vaerua o te Atua no te reira. (Roma 8:15-17; 2 Korinetia 1:21, 22) Kare na ta ratou tuku anga tuatua uaorai me kore tauta anga e akariro ia ratou kia tau. Kua akakotinga te Atua i te numero o te aronga te ka tutara ma Karaiti i te au rangi ki te 144,000, e numero meangiti ua me akaaiteia ki te aronga katoatoa te ka puapinga mei te oko o Karaiti. (Apokalupo 14:1, 3) Kua akamata te iki anga i to Iesu tuatau, e tae mai ki teia tuatau e meangiti ua te ka kai. Ia etai ia ratou e rokoia ra e te mate, ka meangiti mai te reira numero.

Eaa ra tetai ka kai tarevake ei i te au oroa? Penei no te au manako akonoanga i mua ana​—e ka aere te aronga akarongo katoatoa ki te rangi. Me kore ra penei no te anoano taoonga me kore noinoi​—te manako anga e tau meitaki ake tetai i tetai atu—​e te anoano kia rongoia. Penei e tupu anga te reira o te au manako ngakau pakari te tupu maira mei te au manamanata pakari me kore tetai tumatetenga tei akariro i tetai kia kore e inangaro i te ora i te enua nei. Penei katoa no tetai pirianga vaitata ma tetai atu e kapiki anga tona no te rangi. Te anoano pouroaia ra tatou kia akamaara i te tuku anga e na te Atua tikai te reira, kare na tatou. (Roma 9:16) No reira i muri ake i te ‘kimi matatio anga te tangata iaia uaorai,’ e kua kite mai e kare tikai aia e tau kia kai i te au oroa, te anoanoia ra aia i teianei kia akamutu.​—1 Korinetia 11:28.

Te manakonakoanga ta te Atua i tuku ki mua i te maata anga o te tangata nei e oraanga mutu kore te reira i roto i te enua parataito. E akameitakianga maata te reira no te akara atu ki mua, ko te mea ka rauka ngoie ua ia tatou i te marama. (Genese 1:28; Salamo 37:9, 11) I te enua nei oki e taokotai akaou ei te aronga akarongo ma te aronga tei akaperepereia e ratou e ka aravei i te aronga tuatua tika i taito ra, mei ia Aberahama, Sara, Mose, Rahaba, Davida, e Ioane Papetito​—pouroa anake tei mate i mua ake ka akatueraʼi a Iesu i te ara no te oraanga i te rangi.​—Mataio 11:11; akaaite ia 1 Korinetia 15:20-23.

Te aronga ma te au manakonakoanga no te enua ka akono ratou ma te tau i te Kaikaianga Aiai a te Atu na te tae anga atu e te akarongo ngaiteitei anga, noatu e kare ratou e piri atu ki roto i te kai anga i te varaoa e te uaina. Ka puapinga katoa ratou mei te atinga o Karaiti, e raukaʼi ia ratou tetai turanga marekaia i mua i te Atua. (Apokalupo 7:14, 15) Ia ratou e akarongo ra ki te tuatua e orongaia maira, ka akaketaketaia to ratou tu ariki no te au mea tapu, e ka tupu ua atu to ratou anoano no te vai taokotai ua ma te iti tangata o te Atua i te au ngai ravarai.

I teia mataiti, i muri ake i te opu anga o te ra a te Ruirua, Aperira 2, ka akonoia te Akamaaraanga i roto i te 78,000 au putuputuanga katoatoa e tere atu a te Au Kite o Iehova i te au enua katoa. Ka tae atu ainei koe?

[Tataanga Rikiriki i Raro]

[Tutu i te kapi 8]

E akono ana te Au Kite o Iehova i te Akamaaraanga okotai taime i te mataiti