“Ko te Mate, e Akakoreia Ïa”

“E taua enemi openga ra, ko te mate e akakoreia ïa.” ​—1 KORINETIA 15:26.

1, 2. (a) Eaa te manakonakoanga ta te apotetoro ko Paulo i mou atu no te aronga tei mate ra? (e) Eaa te au uianga no te tuakaouanga ta Paulo i akataka ra?

“TE IRINAKI nei au i . . . te tuakaouanga o te kopapa, e te ora mutu kore oki.” Ta te Apiianga a te au Apotetoro i tuatua. Te aiteite ra te Katorika e te Porotetani i te tuatua mou ngakau anga i te reira, ma te kore e kite e e maata atu te aiteite to ratou irinaki anga ki to te apiianga Ereni i to tetai ua atu apinga ta te au apotetoro ra i irinaki ana. Inara, kua kopae ke te apotetoro ko Paulo i te apiianga Ereni e kare i irinaki i tetai meta mate kore ra. Inara, kua irinaki ngaueue kore aia i tetai ora anga i te tuatau ki mua e kua tata i raro ake i te akauru anga: “E taua enemi openga ra, ko te mate, e akakoreia ïa.” (1 Korinetia 15:26) Eaa tikai te aite anga o te reira no te au tangata te mate ua atu nei?

² Ei pauanga, e oki akaou tatou ki ta Paulo ra uriuri anga manako no te tuakaouanga tei tataia ra ia 1 Korinetia pene 15. Ka maara ia koe e i nga irava akamataanga, kua akanoo a Paulo i te tuakaouanga ei tetai tuanga puapinga maata no te apiianga Kerititiano. I teianei kua pau aia i tetai uianga taka meitaki: “Ka riro tetai papaki i te tuatua mai e, E akapeea kia akatu i tei mate ra? e eaa te tu o to ratou kopapa kia tu mai?”​—1 Korinetia 15:35.

Eaa te Tu Kopapa?

3. Eaa ra etai i kopae ei i te tuakaouanga ra?

³ I te akatu maianga i teia uianga, penei kua manako a Paulo kia patoi atu i te mana o ta Plato apiianga ra. Kua apii a Plato e e meta mate kore to te tangata te ka ora atu i te matenga o te kopapa. Ki te aronga tei akatupuia ake ma taua manako ra, e akara anga umuumu koreia te apiianga Kerititiano ra. Me te ora atu ra te meta i te matenga, eaa te tumu i reira no te tuakaouanga? Pera katoa, penei kua akara anga tau kore te tuakaouanga. Me riro atu te kopapa ei one pueu, akapeea i reira e raukaʼi tetai tuakaouanga? Kua tuatua tetai tangata tuatua Pipiria ko Heinrich Meyer e ko te patoi anga a tetai papaki o to Korinetia ra penei kua akatumuia “ki runga i te tumu apiia e ko te akaora anga o te kopapa tikai e mea rauka kore ia.”

4, 5. (a) Eaa ra te au akaapa anga a te aronga akarongo kore ra i tau kore ei? (e) E akataka i ta Paulo akatutu anga i “te ua anake ïa.” (ng) Eaa te tu kopapa ta te Atua e oronga no te aronga akatainuia tei akatuakaouia ra?

⁴ Kua akakite atea maira Paulo i te tau kore o ta ratou manakoanga: “E tera ra tangata manako kore e! taau e ruru ra, kare ïa e ora, kia kore e mate. E taau oki e ruru ra, kare koe e ruru i te rakau e tupu i muri ake, ko te ua anake ïa: mei te sitona ra, e tetai ua ke atu oki: Na te Atua ra i o mai i tona tu, tana i inangaro ra, e taua aronga ua katoa ra, te ua ïa ko tona uaorai tu tikai.” (1 Korinetia 15:36-38) Kare te Atua e akatu mai i te au kopapa o te au tangata ia ratou e ora ra i te enua nei. Mari ra, ka raveia tetai taui anga.

⁵ Kua akaaite atu a Paulo i te tuakaouanga ki te tupu anga o tetai ua. Kare te ua rikiriki o te titona ra e akatutu mai i te titona tikai te ka tupu mai i te reira. Te tuatua ra The World Book Encyclopedia: “Me akamata tetai ua i te tupu anga, e maata te vai a te reira ka ngote. Ka akatupu te vai i te au taui anga kemikara e manganui i roto i te ua ra. Ka akariro katoa i te au titiu o roto i te ua ra kia akaea e kia akangaa i te anga o te ua ra.” Ei tupu anga, ka mate te ua ra ei tetai ua e ka riro kia tupu mai ei tetai rakau. “Na te Atua ra i o mai i tona tu” i roto i te reira kua akanoo aia i te au ture taineti ei akatere i te tupu anga o te reira, e ka rauka i te au ua takitai tetai kopapa kia tau ki to te reira tu. (Genese 1:11) Mei te reira katoa, ka mate ei tangata te au Kerititiano akatainuia ra, na mua. Ei reira, i ta te Atua tuatau tau, ka akaoki akaou mai aia ia ratou ki te oraanga i roto i etai kopapa ou takiri ra. Mei ta Paulo i tuatua ki to Philipi ra, na “Iesu Mesia . . . e akatu ke i to tatou kopapa viivii nei, kia okotai rai tu e tona kopapa kakā.” (Philipi 3:20, 21; 2 Korinetia 5:1, 2) Te akatuia ra ratou ki roto i te kopapa vaerua e ka noo ki roto i te ngai vaerua.​—1 Ioane 3:2.

6. Eaa i tau ei kia irinaki e ka rauka i te Atua te oronga i te au kopapa vaerua tau no te aronga akatuakaouia ra?

⁶ E ngata roa ainei teia kia irinakiia? Kare. Kua akamanako maira Paulo e te aere maira te au animara na roto i te au kopapa e manganui te au tu tuke ra. Kapiti katoa, kua akatuke aia i te au angera o te rangi ma te au tangata kopapa e te toto ra, i te na ko anga: “E au kopapa rangi tetai, e e au kopapa enua tetai.” Te vaira te tuke anga maata i roto i te au mea angaia ma te oraanga kore ra. “E tu ke oki to tetai etu i to tetai i te kakā,” ta Paulo i tuatua mai, i mua roa atu i te kitea angaia e te taineti te au pupu etu mei te au etu auika ra, te au etu muramura maatamaata, e te au etu teatea meangiti ra. I te manako anga i teia, kare ainei e tau e ka rauka i te Atua ra kia oronga i te au kopapa vaerua tau no te aronga akatainuia kia akatuakaouia mai?​—1 Korinetia 15:39-41.

7. Eaa te aiteanga o te pe kore? o te mate kore ra?

⁷ Kua tuatua a Paulo i reira: “Koia katoa te tuakaouanga o tei mate ra: i ruruia ei mea pe ua, i akatuia ei mea pe kore.” (1 Korinetia 15:42) Te kopapa tangata, noatu me e apa kore, ka pe ua ia. Ka rauka kia tamateia. Ei akatauanga, kua tuatua a Paulo e ko te Iesu tei akatuakaouia ra “auraka aia e oki akaou ki te vaarua.” (Angaanga 13:34) Kare rava aia e oki akaou mai ki te oraanga i roto i tetai tu pe ua, noatu me e kopapa tangata, apa kore ua. Te au kopapa ta te Atua ra e oronga ki te aronga akatainuia tei akatuakaouia ra e pe kore ia​—kare e mate kare oki e pe. Kua tuatua katoa a Paulo: “I ruruia ma te akaaka, i akatuia ma te kakā: i ruruia ma te paruparu, i akatuia ma te maroiroi: I ruruia ei kopapa tangata, i akatuia ei kopapa vaerua.” (1 Korinetia 15:43, 44) Pera katoa, te tuatua ra Paulo: “E teianei kopapa pe ua, kia riro ei kopapa pe kore e tikaʼi.” Te aite anga o te pe kore e ora anga mutu kore, kare e rauka kia akapouia. (1 Korinetia 15:53; Ebera 7:16) Na roto i teia tu, ka riro katoa ki runga i te aronga akatuakaouia ra “te tu o to te rangi,” koia Iesu, tei akariro ra i to ratou tuakaouanga kia tupu.​—1 Korinetia 15:45-49.

8. (a) Akapeea tatou i kite ei e ko te aronga akatuakaouia ko taua aronga takitai rai tei ora ra ia ratou i te enua nei? (e) Eaa te au totou te akatupuia ra me ka tupu te tuakaouanga ra?

⁸ Noatu rai teia taui anga, ka vairai taua aronga akatuakaouia ra ei taua aronga rai ia ratou i mua ake i to ratou matenga ra. Ka akatuia mai ratou ma taua au manako rai e taua au tu Kerititiano meitaki ra. (Malaki 3:3; Apokalupo 21:10, 18) I teia tu te akatutu ra ratou ia Iesu Karaiti. Kua tauiia aia mei te tu vaerua ki te tu tangata. I reira kua mate aia e kua akatuakaouia ei tetai vaerua. Inara, “okotai rai o Iesu Mesia tu, i nanai, i teianei rā, e tuatau ua atu.” (Ebera 13:8) Mei teaa ra tetai turanga meitaki to te aronga akatainuia ra! Kua tuatua a Paulo: “E kua riro anake teianei kopapa pe ua ei kopapa pe kore, e teianei kopapa mate ua ei kopapa mate kore, kua tupu ïa te tuatua tataia ra i reira, ‘Kua apukuia te mate i te re i riro ra.’ ‘E te mate e, teiea toou tara? E ade e, teiea toou re?’”​—1 Korinetia 15:54, 55; Isaia 25:8; Hosea 13:14.

Tetai Tuakaouanga i te Enua Nei?

9, 10. (a) I roto i te tataanga ia 1 Korinetia 15:24 ra, eaa “te openga” ra, e eaa te au tupu anga te ka tupu tei kapitiia ma te reira ra? (e) Eaa te ka tika kia tupu kia akakoreiaʼi te mate?

⁹ E tuatau ainei ki mua tetai no te au mirioni ua atu kare ra o ratou manakonakoanga no te oraanga vaerua mate kore ki te rangi? E tika te vaira tetai! I muri ake i tana akatakaanga e ka tupu te tuakaouanga i te tuatau o to Karaiti parutia, kua akapapa maira Paulo i te au tupu anga a muri akera, i te na ko anga: “Ko te openga iora ïa, ka tuku atu ei aia i te basileia ki te Atua, ki te Metua ra; kia ope rava te aronga au, e te mana, e te maroiroi, i te akakoreia e ia.”​—1 Korinetia 15:23, 24.

¹⁰ “Te openga” ko te openga ia o te Tutara Tai Tauatani Mataiti o Karaiti, e oronga taakaakaʼi e te tiratiratu a Iesu i te Patireia ki tona Atua, e te Metua oki. (Apokalupo 20:4) Ka akatupuia ta te Atua ra akakoro anga “kia tavaitai aia i te au mea katoatoa i te Mesia ra.” (Ephesia 1:9, 10) Inara, na mua a Karaiti i te akapou i “te aronga au, e te mana, e te maroiroi” te patoi ra i te anoano ngateitei o te Atua ra. Te kapiti ra teia kia tere atu i to te akapouanga tei raveia ia Aramakito ra. (Apokalupo 16:16; 19:11-21) Kua tuatua a Paulo: “E [ia Karaiti] oki te au, e kia ope rava te au enemi katoa i te tukuia e [te Atua] ki raro ake i ona vaevae. E taua enemi openga ra, ko te mate, e akakoreia ïa.” (1 Korinetia 15:25, 26) Ae, te au tupu anga katoatoa o ta Adamu ara e te mate oki ka akakore takiriia ia. Ei mea umuumuia, i reira, kua oti i te Atua te akakore mai i te aronga i roto i te “rua” ra na te apaianga mai i tei mate ra kia ora akaou.​—Ioane 5:28.

11. (a) Akapeea tatou i kite ei e ka rauka i te Atua ra kia anga akaou mai i te au meta i mate ra? (e) Eaa te tu kopapa te ka orongaia no te aronga te ka akatuia mai ki te enua nei?

¹¹ Te aite anga o teia e anga akaou maianga i te au meta tangata. Kare ainei e rauka? Kare, no te mea kua akapapu mai a Salamo 104:29, 30 kia tatou e ka rauka i te Atua te rave i te reira: “Kua rave mai koe i to ratou aʼo, kua mate ratou, e kua oki akaou ki to ratou ra one. Kua tono maira koe i to Vaerua, kua angaia ratou.” Noatu ra e ko te aronga akatuakaouia maira ko taua aronga rai i mua ake i to ratou matenga ra, kare ra ratou e umuumuia kia oki mai ma taua au kopapa mua ra. Mei te aronga oki te ka akatuia ki te rangi ra, na te Atua ra e o mai kia ratou i tetai tu kopapa tana i inangaro ra. Kare e ekoko anga e ka maroiroi meitaki to ratou au kopapa ou ra e ka aiteite tau oki ki to ratou kopapa mua ra no reira ka kiteia ratou e ta ratou au akaperepere ra.

12. Aea e tupu ei te tuakaouanga ki te enua nei?

¹² Aea e tupu ei te tuakaouanga i te enua nei? Kua tuatua a Mareta no tona tungane i mate ra, koia Lazaro: “Kua kite au e, ka tu akaou maira aia i te tuakaouanga i te rā openga ra.” (Ioane 11:24) Akapeea aia i kite ei i te reira? Ko te tuakaouanga tetai tumu no te maroanga i tona tuatau ra, i te mea kua irinaki te au Pharisea i te reira inara kare te au Sadukea ra i irinaki. (Angaanga 23:8) Inara, e mea tika kua kite a Mareta i te au kite o mua ake i te au Kerititiano ra tei manakonako oki i te tuakaouanga ra. (Ebera 11:35) Pera katoa, penei kua kite aia mei ta Daniela 12:13 maira e ka tupu te tuakaouanga i te openga o te au ra ra. Penei kua kite aia i teia mei ko mai ia Iesu uaorai. (Ioane 6:39) Te tau ra taua “rā openga” ra ma te Tauatani Mataiti Tutara Anga o ­Karaiti. (Apokalupo 20:6) E tamanako ana i te tu mareka anga i taua tuatau o taua “rā” ra me akamata mai teianei tupu anga meitaki!​—Akaaite ia Luka 24:41.

Koai ma te ka Oki Akaou Mai?

13. Eaa te orama no te tuakaouanga tei tataia ra ia Apokalupo 20:12-14?

¹³ Ia Apokalupo 20:12-14 kua tataia ta Ioane orama no te tuakaouanga ki te enua nei: “E kite atura oki au i tei mate ra, ko te tangata rikiriki e te aronga mamaata, i te tu anga ki mua i te Atua, e eeuia iora nga buka ra, e eeuia iora oki tetai buka ke, koia te buka ora ra: e akavaia iora taua aronga i mate ra i te au tuatua i tataia ki roto i taua nga buka ra, i ta ratou au angaanga. E kua tuku maira te tai i te aronga i mate i roto iaia ra; e kua tuku maira te vaarua e ko ade i te aronga i mate i roto ia raua ra: e akavaia iora ratou ravarai i ta ratou au angaanga. E uriia atura te mate e ko ade ki roto i te roto ai. Ko te rua teia o te mate.”

14. Koai ma te ka o atu ki roto i te aronga akatu akaouia?

¹⁴ Ka koropini te tuakaouanga i “te tangata rikiriki e te aronga mamaata,” te aronga matauia e te aronga tangata kare i matau uaia tei ora ra e kua mate atu. Eaa oki, noatu ko te au tamariki varevare ko roto ratou i taua numero ra! (Ieremia 31:15, 16) Ia Angaanga 24:15, te akakiteia maira tetai atu apinga puapinga maata: “E tuakaouanga to tei mate, te aronga tuatua-tika e te aronga tuatua-tika kore.” Tei matauia i roto i te “aronga tuatua-tika” ko te au tangata e te au vaine taito ra, mei ia Abela, ia Enoka, ia Noa, ia Aberahama, ia Sara, e Rahaba oki. (Ebera 11:1-40) E tamanako ana i te rauka anga kia tuatua kapiti ma taua aronga ra e kia rauka te au tumu tei kite mataia o tei tupu ra kua roa i te Pipiria! Ka kapiti katoa te “aronga tuatua-tika” i te au tauatini ua atu o te aronga tei mataku ra ia Iehova e kua mate i te au tuatau kare i roa akenei e kare o ratou manakonakoanga no te rangi. E mema ainei to toou pamiri me kare ko tetai akaperepereia penei ka o mai ki roto i teia aronga? Mei teaa ra te akapumaanaanga kia kite e ka akara akaou koe ia ratou! Inara, koai ma te “aronga tuatua tika kore” te ka oki akaou mai? E au mirioni ua atu ta ratou te ka kapiti mai, penei e au pirioni ua atu, tei mate ra e kare i rauka tetai tuatau kia kite e kia akono oki i te tuatua mou o te Pipiria.

15. Eaa te aite anga e ko te aronga te ka oki mai “e akavaia . . . i te au tuatua i tataia ki roto i taua nga buka ra”?

¹⁵ Akapeea e raukaʼi te aronga te ka oki akaou mai kia “akavaia iora taua aronga i mate ra i te au tuatua i tataia ki roto i taua nga puka ra, i ta ratou au angaanga”? Ko te reira nga puka ra kare i te tataanga no ta ratou au angaanga i topa; i to ratou mate anga kua akamataraia ratou i te au ara ta ratou i rave ia ratou i ora ra. (Roma 6:7, 23) Inara, ka vairai te aronga akatuia mairai i raro ake i te ara a Adamu ra. Ka tika ra, i reira, e ka akanoo mai te reira nga puka ra i te au apiianga tu-Atua ta te katoatoa ka tika kia aru kia puapinga tikaia mei te atinga o Iesu Karaiti ra. Kia akakoreia te tuanga openga o te ara a Adamu ra, ‘ei reira te mate e akakore takiriiaʼi.’ Kia tae ki te openga o te tauatini mataiti ra, ka riro ko te Atua “i rungao i te au mea katoa i te au ngai ravarai.” (1 Korinetia 15:28) Kare te tangata e umuumu akaou i te tauturu a tetai Taunga Maata me kare tetai Tei Oko. Ka akaoraia te au tangata katoatoa kia aite ki te tu apa kore ua ta Adamu i rekareka i te akamata anga ra.

Tetai Tuakaouanga Tau Tikai

16. (a) Eaa ra i tau ei kia irinakiia e ka riro te tuakaou ei rave anga papa meitaki? (e) Koai ma penei ka kapitiia ki roto i te aronga mua e oki mai mei te mate?

¹⁶ I te mea e tau tikai te tuakaouanga i te rangi, “e akonoia ra te tangata ravarai i tona uaorai pupu,” i te akara anga e kare te tuakaouanga i te enua nei e akatupu i tetai tupu anga viviki oripu ua ra. (1 Korinetia 15:23) Te kite puia ra e ka tau kia akonoia te aronga akatu ouia maira. (Akaaite ia Luka 8:55.) Ka anoanoia te akamatutu anga i te pae kopapa e​—maata atu oki​—te tauturu i te pae vaerua kia rauka te kite i te Atua ko Iehova e Iesu Karaiti ra kia rauka te ora anga. (Ioane 17:3) Me ka oki mai te katoatoa kia ora i te tuatau okotai ra, kare e rauka te akono meitaki ia ratou. E mea tau ra kia manakoia e ka rave marieia te tuakaouanga. Te au Kerititiano tiratiratu tei taka ke ra i mua poto ake i te openga o te akatereanga a Satani papu ko ratou tetai i te aronga mua te ka akatuia mai. Ka rauka katoa ia tatou kia manako atu i tetai tuakaouanga mua no te au tangata taito tiratiratu ra te ka tavini ei “au ariki.”​—Salamo 45:16.

17. Eaa etai tumu no runga i te tuakaouanga te muteki ua ra te Pipiria, e eaa i tau ei te au Kerititiano kia kore e manako maata no taua au tumu ra?

¹⁷ Tera ra, kare tatou e tau kia akakite papu i taua au tumu ra. No te au tumu e manganui te muteki ua ra te Pipiria. Kare te reira e akakite atea mai i te au tika e akapeea, e aea me kare i teea ngai e tupu ei te tuakaouanga o te aronga takitai ra. Kare te reira i akakite mai kia tatou e akapeea te oronga anga are, te angai anga, e te kakau anga i te aronga te ka oki mai ra. Kare katoa oki e rauka ia tatou kia akakite papu e akapeea ta Iehova ra akapapa anga i te au tumu no te akonoanga e te utuutu anga i te au tamariki akatuakaouia mai me kare e akapeea tana akono i etai turanga penei ka o atu to tatou au oa e te aronga akaperepere ra. E tika ra, e mea matauia kia kimi manako no taua au apinga ra; inara e pakari kore kia akapou taime i te pauanga te au uianga kare ra i kitea ake te au pauanga i teianei. Ka tika to tatou manako kia tukua ki runga i te tavinianga tiratiratu ia Iehova e kia rauka te ora mutu kore. Ka tuku te au Kerititiano akatainuia i to ratou manakonakoanga ki roto i tetai tuakaouanga kaka i te rangi ra. (2 Petero 1:10, 11) Te manakonako ra te “au mamoe ke atu” i tetai tuanga mutu kore ki roto i te ngai o te Patireia o te rangi i te enua nei. (Ioane 10:16; Mataio 25:33, 34) E no te au tumu e manganui no runga i te tuakaouanga kare ra i kitea ake, te irinaki ua ra tatou ia Iehova. Te meitaki ra to tatou mataora anga no te tuatau ki mua ki roto i nga rima o Tei rauka ra iaia ‘kia akamerengo i te kaki o te au mea ora katoa nei.’​—Salamo 145:16; Ieremia 17:7.

18. (a) Eaa te re ta Paulo i tuatua akateitei maira? (e) Eaa tatou ka irinaki papu ei i te manakonakoanga tuakaouanga ra?

¹⁸ Kua akaope atura Paulo i tana taumaro anga na te tuatuaanga: “Kia akameitakiia te Atua, ko tei oronga mai i te re no tatou, no to tatou Atu ra, no Iesu Mesia.” (1 Korinetia 15:57) Ae, ka rauka ia tatou te re na roto i te atinga oko o Iesu Karaiti ki rungao i te mate mei ia Adamu maira, e ko te aronga akatainuia e te “au mamoe ke atu” oki ka o atu i taua re anga ra. Inara, ko te “au mamoe ke atu” te ora nei i teianei tuatau e manakonako takake to ratou i teia uki nei. Ei tuanga no tetai “aronga maata rava” te tupu ua atura, ka ora atu ratou i te “mate maata” te aere maira e kare e kite i te matenga kopapa ra! (Apokalupo 7:9, 14) Inara, noatu ko te aronga te ka mate no te “tuatau ra, e te manuia ua” me kare na te au rima o ta Satani au rima rave ra ka rauka kia tuku i to ratou irinaki anga ki roto i te manakonako tuakaouanga ra.​—Koheleta 9:11.

19. Eaa te akamaroiroi anga te ka tika te au Kerititiano kia akarongo i teia tuatau nei?

¹⁹ No reira, ka tatari marie tatou i taua ra kaka ra e takoreiaʼi te mate. Na to tatou irinaki anga ngaueue kore i ta Iehova ra taputou no te tuakaouanga ka oronga mai kia tatou i tetai manako anga tikai no te au tumu tau. Noatu eaa te ka tupu kia tatou i teianei oraanga​—noatu rai me ka mate tatou​—kare e apinga te ka rauka kia akangere ia tatou i te tutaki ta Iehova i taputou maira. E no reira, ko ta Paulo akamaroiroi anga openga ki to Korinetia te tau ra i teia tuatau nei mei tona tu rai i te rua tauatini mataiti kua topa ra: “E teianei, e aku au taeake akaperepere e, kia maroiroi kotou, auraka e ngaueue, kia maata nei te rave anga i te angaanga a te Atu, auraka e tivata, kua kite oki kotou e, kare te mea puapinga kore te angaanga a te Atu, ta kotou e rave na.”​—1 Korinetia 15:58.

Ka Rauka Ainei ia Koe te Akataka?

◻ Akapeea ta Paulo pau anga i te uianga e eaa te au tu kopapa no te aronga akatainuia ra me ka akatuakaouia mai?

◻ Akapeea e naea oki te mate e akakore takiriiaʼi?

◻ Koai ma te ka kapitiia ki roto i te tuakaouanga i te enua nei?

◻ Eaa te tu manako tau no tatou no runga i te au tumu ta te Pipiria e muteki ua ra?

[Tutu i te kapi 20]

Ka “mate” tetai ua na te aereanga na roto i tetai taui anga maata

[Au Tutu i te kapi 23]

Te au tangata e te au vaine tiratiratu i taito ra, mei ia Abela, ia Enoka, ia Noa, ia Aberahama, ia Sara, e ia Rahaba, ko ratou tetai i te aronga ka akatuakaouia

[Tutu i te kapi 24]

Te tuakaouanga ka riro ei tetai tuatau rekareka anga maata!