Akakite Ra Ainei Koe i Toou Tu tau Kia Etai Ke?

‘Kare au e kea atu eaa to etai tangata ke manako!’ I tetai atianga no te riri me kare pekapeka, penei kua kite koe ia koe uaorai i te raveanga i teianei tuatua tau kore. Inara me kore atu taua tu manako tau kore ra, penei ka tuku ua koe ki tetai manako ngakau apiapi anga. No teaa ra? No te mea ko te maataanga o tatou te manako tika ra e eaa ta etai ke e manako maira no tatou.

E TIKA, ka tau tatou kia manako atu no te manako ngakau o etai ke ra. Ka tika oki tatou ei au Kerititiano, ei au orometua akataoongaia no te Atua ko Iehova, kia manako tau e akapeea te manako mai o etai ke ra no tatou. No te mea, kua akariroia oki tatou “ei akaraanga na to te ao.” (1 Korinetia 4:9) Ia 2 Korinetia 6:​3, 4, ka kite tatou i te akoanga meitaki a te apotetoro ko Paulo: ‘Kare rava i tuku i te turorianga ki te tangata ravarai, kia kore e akakinoia te taoonga nei; Te akakite ua nei ra tatou ia tatou uaorai e e rave angaanga na te Atua i te au mea katoa nei.’

Inara, eaa te aiteanga e kia akakite ua ia tatou uaorai kia etai ke ra? Ko te aiteanga ainei kia akateitei atu ia tatou uaorai me kare kia ariu mai i te manako kia tatou uaorai e ki to tatou au tu kite? Kare. Mari ra te akakite maira no te akonoanga i nga tuatua a 1 Petero 2:12: “Kia meitaki ta kotou tuatua i rotopu i te au etene . . . kia akara ra ratou i ta kotou tuatua meitaki, kia akameitaki ratou i te Atua.” Te akakite ra te au Kerititiano ia ratou uaorai na te tukuanga na ta ratou tu akono e akakite i te reira! I te openga, na teia i apai mai i te akapaapaa, kare kia tatou, mari ra ki te Atua. Tera ra, na ta tatou akakiteanga ia tatou uaorai kia etai ke ra penei ka riro ei au puapinga katoa no tatou. E akara matatio tatou e toru ngai penei te tika ra teianei noou.

Ei Tokorua no te Akaipoipoia

Ei akatauanga, no runga i te akaipoipo anga. E tuanga ia no ko mai i te Atua ko Iehova ra, “Nona oki te ingoa i tapaia i te kopu-tangata ravarai, to runga i te rangi, e to te ao katoa nei.” (Ephesia 3:15) Penei ko toou inangaro ia kia akaipoipo a tetai tuatau. Me koia ia, eaa te maata o taau akakite anga ia koe uaorai ei tokorua no te akaipoipo anga? Ae, eaa te tu taau i akono noou uaorai ei tangata Kerititiano takaua me kare vaine takaua?

I etai au enua ko tetai apinga manako maataia teia ki te au kopu tangata. Ei akatauanga, i Ghana, me inangaro nga peretana e rua kia akaipoipoia raua, ko tetai ikuiku anga no nga tokorua kia akakite ki to raua nga metua ra. E, i muri ake, ka akakite nga metua ki etai atu mema o te kopu tangata. Ka rave te pamiri o taua tangata ra i reira i te kimianga i te turanga o te vaine ra i te aronga te noo ra i te pae mai. Me ka irinaki nga metua e te tau ra taua vaine ra, ka akakite atu ki te pamiri o taua vaine ra i te manako o ta raua tamaiti kia akaipoipo i ta raua tamaine. I teianei ka kimikimi te pamiri o te vaine ra me e tau te turanga o taua tangata ra i mua ake i te akatikaanga kia akaipoipoia. No reira te tuatua ra te ikuikuanga tika a to Ghana, “E ui atu ki te aronga tei tau kia kite i mua ake ka akatikai i te akaipoipo anga.”

Akapeea ra te au enua Opunga Ra, te ngai matauia ra e te akatikaia na nga tokorua takitai ka akaipoipoia e iki i to raua uaorai tokorua no te akaipoipo. Noatu rai i reira, e pakari no tetai tangata Kerititiano me kare vaine kia kimi i tetai akakite anga tika mei te aronga tei kite meitaki ra i tetai tokorua anoanoia, penei ei nga metua me kore ei au oa kua pakari mai. Kia tau ki ta te puka The Secret of Family Happiness, penei ka ui tetai vaine ou: “‘Eaa te tu akakiteanga a teianei tangata? Koai ma tona au oa? Te akakite ra ainei aia i te akono meitaki? Akapeea tana akono i te aronga ruaine? No roto mai aia i teea tu ngutuare tangata? Akapeea tana rave kapiti anga ma ratou ra? Eaa tona tu akono no te pae i te moni? Te inu tau kore maata ra ainei aia i te au kava akakona? E riri ua ainei aia, e te ta ua? Eaa tana au apainga i te putuputuanga, e akapeea oki tana akono anga i te reira? Ka rauka ainei iaku i te akangateitei oonu iaia?’​—Levitiku 19:32; Maseli 22:29; 31:23; Ephesia 5:​3-5, 33; 1 Timoteo 5:8; 6:10; Tito 2:​6, 7.”a

Pera katoa oki ka anoano tetai tangata kia uiui no tetai vaine Kerititiano tana e manako ra kia akaipoipo. Kia tau ki ta te Pipiria, kua manako inangaro atura Boaza ia Ruta, te vaine tana i akaipoipo i muri iora. I ta Ruta ui anga: “Eaa au nei i kite aroaia mai ei e koe, i kite mai ei koe iaku, e vaine ke oki au nei?” Kua tuatua maira Boaza: “Kua akakite puia mai au i toou takinga.” (Ruta 2:​10-12) Ae, kare e kua akara anake Boaza e tiratiratu e te akatapuia a Ruta, e e vaine angaanga maata mari ra kua rauka katoa iaia te au tuatua akaperepere anga a etai ke.

Mei te reira katoa, e tuanga ta toou tu akono me ka akamanako mai etai ke ra ia koe ei tokorua tau no te akaipoipo. E akapeea tikai taau akakiteanga ia koe uaorai kia etai ke ra no roto i teianei turanga?

Ei Tetai Tangata Angaanga

Ko te ngai angaanga tetai atu ngai e raukai te puapinga noou i te tamou marieanga i te tu akono meitaki. E pakari roa te kimikimi anga i te au angaanga. Ko te aronga angaanga tei matauia ra no te akarongo kore, te tae tureiti putuputu, e te tiratiratu kore e putuputu te akaateaia atu. Pera katoa penei ka akamutuia e etai kamupani i to ratou au tangata kite i te angaanga kia tipu ta ratou moni tutaki. I te kimi anga tetai aronga i te angaanga ou, penei ka kite ratou e ka akara matariki te au kamupani ma ta ratou kamupani i mua akera kia kite i ta ratou au ravenga i te angaanga, te tu akono, e te kite oki. E manganui te au Kerititiano kua puapinga i te akakite anga ia ratou uaorai ki te au pu angaanga na to ratou tu akono ngateitei, te kakau tau, te tu akaraanga marekaia, e te au tu Kerititiano meitaki ra.

Ko te tiratiratu tetai o taua tu ra​—ko tei orongaia te ikianga teitei e te au pu e manganui. Mei te apotetoro ko Paulo rai, ka anoano tatou e ‘ei akono meitaki ta tatou i te au mea katoa nei.’ (Ebera 13:18) I tetai kamupani maina i Ghana, kua ripotiia te au keiaanga putuputu rikiriki ra. Te akaaere i taua ngai angaanga ra, e Kite aia, kua rave tamou marie aia i tana angaanga i te akaatea angaia etai ke ra. Eaa te tumu? Kua kite te aronga manitia ra i tona tiratiratu i te au mataiti katoa i topa. Kua kite meitakiia tana rave angaanga maata e te akangateitei no te aronga mana taoonga ra. Ae, no tona tu akono tau tikai i akatinamou i tana angaanga ra!

Eaa etai atu au apinga ka rauka i tetai Kerititiano kia rave ei akakite iaia uaorai i te makete no te rave angaanga ra? E apii kia karape i taau angaanga i orongaia mai. (Maseli 22:29) E angaanga pakari ma te akara ngakau tae oki. (Maseli 10:4; 13:4) E akono i to pu e te akaaere angaanga ra ma te akangateitei. (Ephesia 6:5) Kia akamata i te ora tika, kia tiratiratu, kia rave meitaki, e te angaanga pakari ko te au tu ia ta te au pu e inangaro maira, e ka tauturu taua au tu ra ia koe kia kitea e angaanga noatu rai te taki tai ua ra.

Au Angaanga Takake i te Putuputuanga

I teianei e maata atu i to mua ana, te anoanoia ra te au tangata pakari kia rave i te arataki anga i roto i te putuputuanga Kerititiano. Te tumu? Kua totou a Isaia: “E akaatea ana i to turanga puakapa; kia totōia te paruru o to nooanga ki te atea ke.” (Isaia 54:2) I te tupu anga teianei totou, te kite nei te putuputuanga o Iehova i te tupu maataanga i te ao katoa nei.

No reira me ko koe tetai e tangata Kerititiano, ka akapeea koe i te akakite anga ia koe uaorai ei tetai tei tau ra kia tavini i tetai angaanga akataoongaia ra? E akamanako i te akatauanga a te tangata ou ra ko Timoteo. Kua ripoti a Luka e ko Timoteo “e tangata rongo meitaki oki aia i te au taeake i Lusetera e Ikonio.” Ae, no tona tu akono meitaki, kua akakite teianei tangata ou iaia uaorai kia etai ke i roto i aua oire tuke e rua ra. No reira kua pati atu a Paulo ia Timoteo kia kapiti atu kiaia i te angaanga orometua tutaka aere.​—Angaanga 16:​1-4.

Akapeea tetai tangata i teia tuatau ‘e itae ei no tetai taoonga akaaere’ na roto i tetai tu tau i te atua ra? E mea tika e kare na te tuatua aereanga kia akataoongaia aia mari ra na te tatanuanga i te au tu pae vaerua no taua apainga ra. (1 Timoteo 3:​1-10, 12, 13; Tito 1:​5-9) Ka rauka katoa iaia kia akaari e “kua inangaro aia i te angaanga meitaki” na te raveanga ki katoa i te tutuanga e te angaanga akariroanga tangata ei pipi. (Mataio 24:14; 28:​19, 20) Te aronga tei akakite ra ia ratou uaorai ei au tangata no te rave apainga ka rave i te manako ngakau tae i te meitaki no to ratou au taeake pae vaerua. Ka aru ratou i te akoanga a te apotetoro ko Paulo ra: “Ka oronga atu i te apinga i te aronga tapu i to ratou ra ngere anga; ka akamātau rai i te takinga-meitaki i te tangata ke ra.” (Roma 12:13) Na te raveanga i taua au apinga ra, ka rauka i tetai tangata Kerititiano ra i ‘te akakite iaia uaorai e rave angaanga na te Atua.’

I te Au Tuatau Ravarai

Ko te akakiteanga ia tatou uaorai kia etai ke ra kare te aiteanga e e akameamea ua me kare te riroanga mei “te tarekareka tangata.” (Ephesia 6:6) Te openga ra, tona aite anga kia akakite ia tatou uaorai ki Tei Anga mai ia tatou nei, koia Iehova te Atua ra, na te aruanga ngakau tae i tana au ture e te au kaveinga oki. Me ka akatupu koe i toou tu pae vaerua e ka akamaroiroi i to pirianga ma te Atua ko Iehova, ka kite ra etai atu i tetai meitaki anga i te tu o taau akono anga i te au mema o toou ngutuare, to au oa angaanga, e te au oa Kerititiano oki. Ka kite katoa ratou toou ngaueue kore e te tau, toou tu meitaki i te ikianga, toou kite i te rave apainga, e toou tu akaaka. Na teia ka raukai ia koe to ratou inangaro e te akangateitei e, te mea maata atu oki, ka rauka ia koe te mareka anga o te Atua ra ko Iehova no te mea kua akakite koe ia koe uaorai kia etai ke ra!

[Tataanga Rikiriki i Raro]

[Tutu i te kapi 19]

E manganui te au metua te kimikimi pakari ra i te turanga o tetai te inangaro ra ta ratou tamaiti me kare tamaine i te akaipoipo

[Tutu i te kapi 20]

Te akakite ra tetai taeake iaia uaorai no etai tu rave tavini anga na te akamanako atuanga ia etai ke ra