“Kia Timata ua Atu Rai me tei Roto Koe i te Akarongo”
Te au Puapinga Mei a Korinetia Rua
KUA manata tikai te apotetoro ko Paulo i te au Kerititiano i Korinetia. Akapeea ra ratou i te akaraanga i te ako tei orongaia i roto i tana reta mua kia ratou? Tei Maketonia aia i tae mai ei a Tito e tetai ripoti mataora e kua maromaroa te au Kerititiano no te reta kia tataraara. Kua rekareka tikai a Paulo i teia.—2 Korinetia 7:8-13.
Kua tata a Paulo ia Korinetia rua mei Maketonia mai, penei i muri ake i te apa mataiti i te 55 T.N. I roto i teia reta, kua uriuri aia i te au takaianga tei raveia kia vai ma te putuputuanga, kia patuia te anoano kia tauturu i te aronga tei irinaki tei ngere i Iudea e kia paruru i tona taoonga apotetoro. Te maata anga i ta Paulo i tuatua ka tauturu te reira ia tatou ‘kia timata ua atu rai me tei roto tatou i te akarongo.’ (13:5, NW) No reira, eaa ta tatou ka rauka i te koi mai mei teia reta?
E Tavini no te Atua o te Akapumaana
Kua akaari te apotetoro e mei te Atua o te akapumaana ia tatou i roto i to tatou tumatetenga, e tau tatou kia akapumaana i etai atu e kia pure no ratou. (1:1–2:11) Noatu oki e tei raro a Paulo e tona au taeake i te taomianga teimaa, kua akaora mai te Atua ia ratou. Inara, ka rauka rai i te au Korinetia Kerititiano i te tauturu kia pure atu no ratou, mei a tatou e pure nei no etai ke atu tei mou atu i te akarongo tika. Ka akapeea i reira te tangata akaturi tei tuatuaia i roto ia 1 Korinetia pene 5? Te tika kua akaateaia aia e kua tataraara ra. Mei teaa atura tona pumaana i to te au Kerititiano i te oora anga atu i te akakoreanga ara e te ariki rekareka anga i tona oki akaou mai anga ki roto ia ratou.
Ka riro ta Paulo au tuatua ei akamaata atu i to tatou rekareka no te angaanga orometua Kerititiano, te akaketaketa anga i to tatou turanga no te akarongo mou. (2:12–6:10) Kua riro tikai te aronga angaanga orometua o te koreromotu ou te mataora kia riro ki roto i te “akaupokotu” ma te Atua katoa i roto i te aratakianga! Ko Paulo e tona au taeake angaanga kua riro mai te angaanga orometua e akaperepere ia no te aroa ua i orongaia kia ratou. Mei a ratou rai, te aronga akatainuia o teia tuatau nei teia ratou te angaanga orometua no te angaakaongi. Oti akera, pouroa te au Kite o Iehova kua akariro i tetai atu kia puapinga na roto i ta ratou angaanga orometua.
Kia Apa Kore e te Tapu e kia Oronga Ua
Kua akaari mai a Paulo kia tatou e ko te Kerititiano angaanga orometua kia apa kore e te tapu i roto i te mataku ia Iehova. (6:11–7:16) E raukai ia tatou i te tu tinamou i roto i te akarongo, kia kopae tatou kia kore e kapiti atu ki te aronga irinaki kore, e ka anoanoia tatou kia tama i te viivii o te kopapa e to te vaerua. Kua rave te au Korinetia i te tamaanga na roto i te akaateaanga i te tangata rave tarevake e te tau kore, e kua rekareka a Paulo e kua riro tana reta mua i te akamaromaroa ia ratou kia tataraara no te ora.
Ka kite katoa tatou e te au orometua tei mataku i te Atua ka akameitakiia ratou no to ratou tu oronga ua. (8:1–9:15) No runga i te au mea tauturu no tei ngere o te “aronga tapu” ra, kua tou a Paulo i te akaraanga meitaki o te au Maketonia ra. Kua oronga tikai oki ratou i runga rava atu i ta ratou ka rauka, e te manakonako nei aia kia kite i te tu oronga ua aiteite mei te tua o te au Korinetia. Ta ratou i oronga—e ta tatou—mei te ngakau mai e tikai, no te mea “ko te tangata oronga ma te rekareka ta te Atua ia e inangaro” e ka akameitaki atu aia i tona iti tangata no te au tu ravenga oronga ua.
Paulo—E Apotetoro Akono
Me oti ia tatou tetai ua atu apinga i te tavini ia Iehova ei aronga orometua, e akapaapaa tatou i roto iaia, auraka i roto ia tatou uaorai. (10:1–12:13) No te mea rai oki e no roto uaorai i te au rakei o te vaerua te “mana ra i te Atua” e raukai te kopae ke i te au manako tarevake. Te “au aposetolo mamaata” pupu vaa i rotopu i te au Korinetia ra kare rava e rauka kia akaaite ia ki to Paulo akapapaanga i tona akakoromaki ei orometua no te Mesia. Inara, kia kore aia e teitei rava kare te Atua i kopae atu i tona “tara i roto [i te] kopapa”—penei te kino o tona mata me kare ko taua au apotetoro pikikaa ra. Kua anoano rai a Paulo kia teitei aia i roto i tona au tu paruparu kia riro “te maroiroi o te Mesia” kia vai mai ki runga iaia mei te puakapa ra. I te mea e tangata aia tei tinamou i roto i te akarongo, kare aia i tuku e tei raro ake aia i te au apotetoro mamaata. Kua kite te au Korinetia i te akairo apotetoro o Paulo tana i oronga i rotopu ia ratou “ma te akakoromaki maata, e te au akairo e te peu tu ke, e te angaanga mana.”
Ei orometua e ei apotetoro, to Paulo inangaro ngakau no te pae vaerua ia o te au taeake akarongo mei ia tatou nei rai kia pera. (12:14–13:14) Kua ‘tika rava iaia i te akaope i tona nei ririnui no to ratou au meta.’ Kua matakuia ra a Paulo e me tae aia ki Korinetia, ka kite aia i tetai papaki kare i tataraara mei te angaanga a te kopapa. No reira, kua akakite ki te katoatoa rava kia kimi matatio me tei roto ia ratou te akorongo e kia pure kia kore ratou “e rave i te kino.” I te akaotianga, kua raurau aia ia ratou kia rekareka, kia tika rava, kia pumaana, kia okotai i te akatikaanga, e kia noo ma te au. E ako meitaki tikai teia no tatou!
E Timata Ua Atu Rai!
Te rua o ta Paulo reta ki te au Kerititiano i Korinetia kua oronga mai te reira i te au mataara kia kimi matatio me tei roto rai tatou i te akarongo. Ka riro katoa tana au tuatua i te opara ia tatou kia akapumaana i tetai atu, mei te Atua ra i akapumaana mai ia tatou nei i roto i to tatou mate maata katoa. Ta te apotetoro i tuatua no runga i te angaanga orometua a te Kerititiano ka akakeu te reira ia tatou kia apa kore ra e te tapu i te mataku ia Iehova.
Me taangaanga ia te ako a Paulo ka tauturu te reira ia tatou kia oronga ua atu i te tauturu. Pera katoa, ka akakeu tana tuatua ia tatou kia akapaapaa i roto ia Iehova, auraka ia tatou uaorai. Ka taki teitei te reira i to tatou tu aroa no to tatou taeake irinaki. Mea papu oki ko teia e tetai atu au tika ke i roto ia Korinetia Rua ka tauturu ia tatou ‘kia timata ua atu rai me tei roto tatou i te akarongo.’
[Pia/Tutu i te kapi 26]
AKAATA I TO IEHOVA KAKA: I to Mose aere anga mai mei runga i te Maunga i Sinai e nga papa toka o te Ture, kua mura tona kiri mata no te mea kua tuatua mai ana te Atua ki aia. (Exodo 34:29, 30) Kua akakite mai a Paulo i teia e kua tuatua e: “Te akara katoa nei tatou i te kaka o te Atu[a] ma te mata arai kore ra, mei te mea e tei roto i te io ra, te akatu keia nei tatou ei tutu okotai, mei te kakā oki e tae ua atu ki te kakā i te Vaerua o te Atu[a] ra.” (2 Korinetia 3:7-18) Te au io akaata taito kua maaniia te reira mei te au auri veo me kare poronite (bronze) e kua tamaia kia kanapa meitaki kia rauka i reira te paraa ei akaataanga. Mei te io rai, kua aite te aronga akatainuia i te oronga i to te Atua kaka tei marama mai kia ratou mei ia Iesu Mesia i te ‘akatu keanga ia ratou ki roto i te tutu’ tei orongaia na roto i te akaata anga kaka o te Tamaiti a Iehova. (2 Korinetia 4:6; Ephesia 5:1) Na roto i te vaerua tapu e te Puka Tapu, kua angaanga i reira te Atua i roto ia ratou i te “aka tangata ou,” te akaataanga i tona uaorai au tu. (Ephesia 4:24; Kolosa 3:10) Noatu oki eaa to tatou manakonakoanga, no te rangi me kare no te enua, kia akaari tatou i teia tu tangata e kia akaperepere i teia tikaanga i te akakaka i te Atua i roto i ta tatou angaanga orometua.
[Pia/Tutu i te kapi 27]
“TE AU RAKEI O TE TUATUA TIKA”: Tetai mataara ta Paulo e tona au taeake i anoano ia ratou uaorai ei au orometua no te Atua koia oki “i te au rakei o te tuatua tika i te rima katau e ki te kaui.” (2 Korinetia 6:3-7, NW) Na te rima katau oki e mou ana te koke, e ko te kaui kia mou i te arai. Noatu e kua ta ua aia mei te au tua ravarai, kua rauka rai ia Paulo e tona au taeake angaanga tei rakei ia kia tomo ki te tamaki o te pae vaerua. Kua tomo atu kia patoi i te au puapii pikikaa e te “au aposetolo mamaata” kia kore oki te putuputuanga i Korinetia e taki keia mei te pirianga ki te Mesia. Kare oki a Paulo i rave i te au rakei a te kopapa ara nei—kikite, akavare, me kare te tapikikaa. (2 Korinetia 10:8-10; 11:3, 12-14; 12:11, 16) Mari ra, te “au rakei” tei taangaangaia e tuatua tika ia, me kare e tika, te ravenga ia i te akatotoa i te akakoroanga o te akamori tika i te patoi atu i te au tamanamanata. E rave ana te au Kite o Iehova i teia “au rakei o te tuatua tika” no teia akakoroanga aiteite.