Te Akonoanga i te Akatapu Anga Kerititiano i te Tu Rangatira

“Tei iaia te Vaerua o te Atu ra, tei reira te rangatira.”​—2 KORINETIA 3:17.

1. Kua akatapuia te Au Kite o Iehova kiaai, e eaa ra ratou i taangaangaʼi i te au rima rave tau i te ture?

TE IRINAKI ra te Au Kite o Iehova e ka vairai ta ratou akonoanga e tuatau ua atu. No reira te manakonako atura ratou kia tavini i te Atua “ma te vaerua e te tuatua-mou” no te tuatau mutu kore katoa ra. (Ioane 4:23, 24) Ei au rima rave akono tau rangatira, kua akono teianei au Kerititiano i tetai akatapu anga kotinga koreia ki te Atua ko Iehova e kua akakoro kia rave tikai i te reira. Ki taua openga ra, te irinaki ra ratou i te Tuatua a te Atua e tona vaerua tapu oki. Ia ratou e aruaru ra i to ratou akatapu anga Kerititiano ma te ngakau katoa i roto i te tu rangatira orongaia mai e te Atua ra, te akaari ra te Au Kite i te akangateitei tau no te tuanga a te “aronga mana taoonga” kavamani e ka taangaanga tika i te au apinga a te ture e te au mea orongaia maira. (Roma 13:1; Iakobo 1:25) Ei akatauanga, te taangaanga ra te Au Kite i te Taiate Punanga Tiaki ei tetai apinga tau i te ture ra​—okotai to te manganui ra i te au enua ke ke​—kia raukaʼi ia ratou kia akatupu i ta ratou angaanga no te tauturu anga i te au taeake tangata nei, e maata oki i te au tu vaerua ra. Inara kua akatapuia te Au Kite ra ki te Atua, kare ki tetai ua atu rima rave o te ture, e ko to ratou ra akatapu anga kia Iehova ka mou ia e tuatau ua atu.

2. Eaa ra te Taiate Punanga Tiaki e etai atu rima rave ture aiteite i ariki maataiaʼi e te Au Kite o Iehova ra?

² Ei au tavini tei akatapuia ki te Atua, kua rave te Au Kite o Iehova i te apai anga kia aru i ta Iesu ra au akao anga kia “akariro i to te pa enua katoa ei pipi; ka bapetizo atu ei ia ratou i te ingoa o te Metua, e no te Tamaiti, e no te Vaerua Tapu; ma te apii atu ia ratou.” (Mataio 28:19, 20) Ka raveia teianei angaanga e tae roa ki te openga o te akatereanga o te au mea nei, no te mea kua tuatua katoa a Iesu: “E tutu aereia te evangelia o te basileia nei, e kako rava ake te ao katoa nei; ei kite no te pa enua ravarai; ko te openga iora ïa i reira ra.” (Mataio 24:3, 14) I te au mataiti tataki tai, te rave ra te au apinga neneiianga a te Taiate Punanga Tiaki e etai atu pupu aiteite no te ture i te rave anga e au mirioni ua atu au Pipiria, au puka, au poroutia, e te au makatini na te Au Kite o Iehova ei taangaanga i ta ratou angaanga tutu aere i te ao katoa nei. No reira e puapinga maata ta teianei au akaaerenga tau i te ture i te tauturuanga i te au tavini akatapuia o te Atua ra kia akono meitaki i to ratou akatapu anga kiaia ra.

3. Na roto i teea tu ta te Au Kite o Iehova ra taiku anga i mua ana i te tuatua “te Taiate”?

³ Penei ka taumaro tetai e ko te tu tuatua a te Au Kite no te Taiate Punanga Tiaki​—me kare e putuputu ko “te Taiate” ua​—te akakite ra e te manako ra ratou i te reira e tere atu i tetai apinga ua na te ture ra. Kare ainei ratou i akamanako i te reira ei mana openga no runga i te au tumu no te akamori anga? Te akakite maira te puka Jehovah’s Witnesses​—Proclaimers of God’s Kingdom i teia tumu na te akatakaanga: “I te taiku anga The Watchtower [Tiunu 1,1938] i ‘Te Taiate,’ ko te aite anga o teia, kare ko tetai apinga na te ture ua, mari ra ko te pupu o te au Kerititiano akatainuia ra na ratou ra i akapapa taua pupu akaaere ture ra e kua taangaanga oki i te reira.”a No reira ko taua tuatua ra kua taikuia no te “tavini akono meitaki e te pakari ma tona Pupu Akaaere.” (Mataio 24:45) Tei roto i teia tu ta te Au Kite ra taiku anga matauia no te tuatua “te Taiate” ra. E tika, ko te taokotai anga ture e te “tavini akono meitaki e te pakari” kare ia i te au tuatua taui uaia. E ikiia ana te au akaaere o te Taiate Punanga Tiaki, ko te Au Kite ra ko ratou te ‘tavini akono meitaki’ kua akatainuia e te vaerua tapu o Iehova.

4. (a) Akapeea te Au Kite e manganui i te akataka anga i ta ratou tuatua kia akakore ei i te manako tarevake? (e) Eaa ra tatou i tikaʼi kia akatau i ta tatou tuatua anga ra?

⁴ Ei kopae ke atu i te au manakoanga tarevake, te tauta ra te Au Kite o Iehova kia matakite e akapeea ta ratou uaorai akakite anga ia ratou uaorai. Auraka kia tuatua e, “te apii ra te Taiate” e manganui te Au Kite te inangaro ra i te taiku anga i te au tuatua e, “te tuatua ra te Pipiria” me kore, “kua kite au te apii ra te Pipiria.” Na roto i teianei tu te akaketaketa ra ratou i te iki anga a te Kite taki tai ra i te arikianga i te au apii anga Pipiria e ka kopae katoa oki i te orongaanga i te manako tarevake e i tetai tu te piri atura te Au Kite ki te au apiianga a etai au akonoanga sect ra. Inara, ko te au manako anga no runga i te au tuatua taka ke no etai atu mea kare e tau kia riro ei tetai tumu no te tauetono. Pera katoa oki, ko te tuatua taka ke e puapinga anake ia me ka riro ei akakore atu i te manakoanga tarevake ra. Te umuumuia ra te tu tau no te Kerititiano. Te akamaroiroi maira te Pipiria ia tatou “auraka [tatou] e tauetono i te tuatua rikiriki.” (2 Timoteo 2:14, 15) Te akakite katoa maira te au Tuatua Tapu i teianei kaveinga: “Kia kore to kotou vaa e tuatua i te tuatua kitea uaia ra, eaa iora e kiteaʼi te tuatua i karangaia ra?”​—1 Korinetia 14:9.

Akameangiti Mai te Vaerua o te Atua i te Umuumu Anga no te Au Ture

5. Akapeea te akataka anga tika ia 1 Korinetia 10:23?

⁵ “E tika te au mea katoa iaku, kare ra e tau katoatoa kia rave,” ta te apotetoro ko Paulo i akakite mai. Kua tuatua katoa aia: “E tika te au mea katoa iaku, kare ra te au mea katoa e tamaata i te meitaki.” (1 Korinetia 10:23) I te akara anga kare te aite anga o ta Paulo tuatua e ka tika kia rave i te au apinga te akaapaia maira e te Tuatua a te Atua. Me akaaiteia atu ki etai 600 au ture tei orongaia ki to Iseraela i taito ra, e tokoiti ua te au akauenga akatakaia no te akatikatikaanga i te oraanga Kerititiano. No reira, e manganui te au tumu te akarukeia maira ki te akava ngakau taki tai. Ko te tangata tei rave ra i te akatapu anga kia Iehova te rekareka ra i te tu rangatira te tupu maira no te arataki anga na te vaerua o te Atua ra. I te akariro anga i te tuatua mou nana uaorai, ka aru te Kerititiano i tona akava ngakau tereniia i te Pipiria e te irinaki ra i te arataki anga na te vaerua tapu. Na teia e tauturu i te Kerititiano akatapuia ra kia akataka e eaa te ka “tamaata i te meitaki” e ka ‘tau kia rave’ nona uaorai e etai ke atu oki. Kua kite aia e ko te au iki anga tana ka rave e akatupu anga to te reira ki tona pirianga ma te Atua, tana i akatapu atura iaia.

6. I te au uipaanga Kerititiano ra, akapeea e raukaʼi ia tatou te akakite e kua akariro tatou i te tuatua mou na tatou uaorai?

⁶ Ka akaari tetai Kite e kua akariro aia i te tuatua mou nana uaorai na te paupau anga i te au uipaanga Kerititiano ra. I te akamata anga, penei ka tatau ua mai aia i tei tataia ki roto i te puka tei apiiia ra. Inara, a muri akera, ka tupu aia ki te tu tau no te akakiteanga i te au apiianga Pipiria i roto i tana uaorai au tuatua. E na reira tana orongaanga i te akapapu anga e te akatupu ra aia i tona kite manakoanga, kare e taiku akaou i ta etai ke au tuatua ra. Na te akatutuanga au manako i roto i tona uaorai au tuatua e te taikuanga i te au tuatua tika no te tuatua mou na roto i te tu i tae ki te ngakau ka apai mai i te mareka anga kiaia e ka akaari e te irinaki ra aia i roto i tona uaorai manako.​—Koheleta 12:10; akaaite ia Roma 14:5e.

7. Eaa te au iki anga tei rave uaia e te au tavini o Iehova?

⁷ Te akakeuia ra te Au Kite o Iehova na to ratou aroa i te Atua e to ratou au oa tangata oki. (Mataio 22:36-40) E tika, te akapiri vaitataia ra ratou na te tatua o te aroa mei to Karaiti rai ei tetai taokotai anga au taeake i te ao katoa nei. (Kolosa 3:14; 1 Petero 5:9) Inara ei rima rave akono tau rangatira ra, kua iki ratou taki tai kia akakite aere i te tuatua meitaki o te Patireia o te Atua ra, kia vai takake i te au poritiki, e kia kore e rave i te toto, e kia kopae ke i etai tu tamataora anga, e kia akono i te au turanga Pipiria ra. Kare teianei au tu i te au iki anga tei oparaia ki runga ia ratou ra. E au iki anga te reira tei topa maira ei tuanga ki roto i te tu oraanga tei iki rangatiraia ra e te aronga tei tau ei Kite i mua ake i ta ratou rave anga i te takaianga no te akatapu anga Kerititiano ra.

Kia Kauraro ki Tetai Pupu Akaaere?

8. Eaa te uianga te umuumuia ra kia akatakaia?

⁸ Te akaari taka meitaki maira te Pipiria e kare te au Kerititiano mou e tavini i te Atua ra na raro ake i te opara angaia. Te tuatua ra ïa: “Ko [Iehova] taua Vaerua ra, e tei iaia te Vaerua o [Iehova] ra, tei reira te rangatira.” (2 Korinetia 3:17, akaaite ia NW.) Inara akapeea e raukaʼi teianei tika kia akarotaiia ma te manako anga no tetai “tavini akono meitaki e te pakari” ma tona Pupu Akaaere oki?​—Mataio 24:45-47.

9, 10. (a) Akapeea ra te akono i te kaveinga upoko anga i roto i te putuputuanga Kerititiano? (e) Eaa tei umuumuia ra i te aruanga i te kaveinga no te upoko anga i roto i te putuputuanga Kerititiano i te anere mataiti mua ra?

⁹ Ei pau i teianei uianga, ka tika tatou kia tamou ki roto i to tatou manako i te kaveinga Tuatua Tapu no te upoko anga. (1 Korinetia 11:3) Ia Ephesia 5:21-24, kua akatakaia a Karaiti ei “upoko ïa i te ekalesia,” koia ta ratou “e kauraro.” Kua kite te Au Kite o Iehova e ko te tavini akono meitaki e te pakari ko ratou te au taeake vaerua o Iesu. (Ebera 2:10-13) Kua akataoongaia teianei pupu tavini akono meitaki kia tua ki te au tangata o te Atua ra i te “kai [vaerua] na ratou i te ora mou ra.” I teianei tuatau o te openga nei, kua akataoonga a Karaiti i teia tavini ei “akaaere i tona ngutuare.” No reira te tau ra tona turanga kia akangateiteiia e tetai ua atu te karanga ra e e Kerititiano aia.

¹⁰ Ko te akakoro anga no te upoko anga kia akatinamou i te taokotai anga e kia akapapu e “e rave ra te au mea ravarai ma te tika e te manea.” (1 Korinetia 14:40) Kia akatupu i teia i te anere mataiti mua ra, kua ikiia tetai numero o te au Kerititiano akatainuia ra no roto mai i te pupu tavini akono meitaki e te pakari kia komono i taua pupu katoatoa ra. Mei ta te au tupu anga i akapapu maira, kua rauka to Iehova mareka anga e te akameitakianga i taua akaaere anga akonoia ra e teia pupu akaaere i te anere mataiti mua. Kua ariki mataora ua te au Kerititiano o te anere mataiti mua ra i taua akanoonoo anga ra. Ae, kua turou tikai ratou e kua akameitaki no te au tupu anga meitaki ta te reira i akatupu mai.​—Angaanga 15:1-32.

11. Akapeea te manako anga tau i te Pupu Akaaere i teia tuatau?

¹¹ Te vai nei ra te puapinga o taua akanoo noo anga ra. I teianei, ko te Pupu Akaaere o te Au Kite o Iehova e tai ngauru au Kerititiano akatainuia ra, pouroa ratou e au raungauru ua atu mataiti to ratou kite Kerititiano kua topa. Te oronga ra ratou i te aratakianga pae vaerua ki te Au Kite o Iehova, mei ta te pupu akaaere i te anere mataiti mua ra. (Angaanga 16:4) Mei te au Kerititiano mua ra, te akara mataora atura te Au Kite i te au taeake pakari o te Pupu Akaaere ra no te arataki anga e te paruru anga akatumuia i te Pipiria no te au tumu o te akamori anga. Noatu rai e ko te au mema o te Pupu Akaaere e au tavini no Iehova e no Karaiti, mei to ratou au taeake Kerititiano katoa ra, te apii maira te Pipiria ia tatou: “E akarongo i to kotou au arataki, e kauraro atu kotou: te tiaki ra ratou i to kotou au vaerua, e akakiteia oki ta ratou tuatua ia kotou i te Atua ra; kia akakite ra ratou ma te rekareka, eiaa ma te aue; kare oki e puapingaia ta kotou i te reira.”​—Ebera 13:17.

12. Ka tika te Kerititiano taki tai ra kia oronga i te tuatua kiaai?

¹² Te riro ra ainei te aite anga o te turanga akaaere ta te au Tuatua Tapu e oronga ra ki te Pupu Akaaere e ka tika te Au Kite taki tai o Iehova ra kia oronga ki te reira i tetai tuatua anga no tana angaanga? Kare me kia tau ki ta Paulo au tuatua ki te au Kerititiano i Roma ra: “Eaa ra oki koe i akaapaʼi i to taeake? e eaa oki koe i akavaavaa atu ei i to taeake? ka tu katoatoa tatou ki mua i te akavaanga a te [“Atua,” NW] ra . . . Ka ope takiri rava tatou i te aaki i te tuatua iaia uaorai i te Atua ra.”​—Roma 14:10-12.

13. Eaa te Au Kite o Iehova ka ripoti ei i ta ratou angaanga tutu aere?

¹³ Inara, kare ainei i te tika e te manakonakoia maira te Au Kite taki tai kia ripoti i ta ratou angaanga tutu aereanga? Ae, inara ko te akakoro anga o teia te akataka meitakiia maira i roto i tetai puka na te Kite, te na ko ra: “Kua manako inangaro te au pipi mua a Iesu Karaiti ra i te au ripoti i te tupu anga o te angaanga tutu aereanga ra. (Mareko 6:30) I te tupu anga meitaki te angaanga ra, kua akapapa tikaia te au ripoti ra ma te au akakite anga i te au tupu anga memeitaki ra o te aronga tei rave tuanga ra i te tutuanga i te tuatua meitaki. . . . (Angaanga 2:5-11, 41, 47; 6:7; 1:15; 4:4) . . . Mei teaa ra te akamaroiroianga te reira no taua aronga angaanga Kerititiano tiratiratu ra kia akarongo atu i te au ripoti o te au mea tei raveia ra! . . . Mei te reira katoa te tu, te tauta ra ta Iehova akaaerenga i teia tuatau nei kia akapapa i te au tataanga tano no te angaanga tei raveia i te akatupu anga ia Mataio 24:14 ra.”

14, 15. (a) Eaa te akapiri anga ia 2 Korinetia 1:24 ki te Pupu Akaaere ra? (e) No runga i teea tumu anga ka tika te au Kerititiano taki tai kia rave i te au iki anga nana uaorai, i te kite anga i teea tika ra?

¹⁴ Ko tetai oronga anga aroa te Pupu Akaaere ra e tetai akatauanga no te akarongo tei tau ra no te aru anga. (Philipi 3:17; Ebera 13:7) Na to ratou akarongoanga e te aruanga ia Karaiti ei tetai akaraanga, ka rauka ia ratou kia karangaranga i te au tuatua a Paulo ra: “Kare ra mei te mea e ko matou te atu o to kotou akarongo, ei tauturu ra matou i to kotou rekareka: e mou akarongo oki to kotou.” (2 Korinetia 1:24) Na te akaraanga i te au tupu anga, te akaariu maira te Pupu Akaaere i te manako ki te au puapinga no te akarongoanga i te ako anga Pipiria, te oronga ra i te au manako no te akonoanga i te au ture e te au kaveinga Pipiria, te akamatakite maira i te au kino uunaia, e te oronga maira i te akamaroiroi anga umuumuia no te au “tauturu ra.” No reira te rave ra ia i tana tuati anga Kerititiano, te tauturu ra ia ratou kia tamou marie i to ratou rekareka anga, e te tamaata atura i to ratou akarongo kia raukaʼi ia ratou te turanga mou.​—1 Korinetia 4:1, 2; Tito 1:7-9.

¹⁵ Me ka akanoo tetai kite i te au iki anga no runga i te tumu anga akoanga Pipiria tei orongaia e te Pupu Akaaere ra, te rave ra aia i te reira no runga i tana uaorai tuku anga tika no te mea kua irinaki aia no tana uaorai apii anga i te Pipiria e ko teianei te rave anga tika. Te riro ra kia mana te Tuatua a te Atua uaorai ki runga i te Kite taki tai kia akono i te akoanga meitaki no te Tuatua Tapu tei orongaia maira e te Pupu Akaaere, ma te kite anga tikai e ko tana au iki anga te ka rave ka akariro i tetai tupu anga ki tona uaorai pirianga ma te Atua ra, tana i akatapu atura iaia uaorai.​—1 Tesalonia 2:13.

Aronga Apiiia e te Au Toa Tamaki

16. Noatu rai e na tetai uaorai te au iki anga no te tu akono, eaa ra etai i akaateaiaʼi?

¹⁶ Inara mei te mea e na tetai uaorai te au iki anga no te tu akono, eaa ra etai Au Kite o Iehova i akaateaia? Kare e na tetai ua e akataka i tetai taangaanga o tetai ua atu ara ka umuumuia te akaateaanga. Mari ra, te umuumuia ra e te Tuatua Tapu i teia rave anga me ka rave akakoro ma te tataraara kore tetai mema o te putuputuanga i te ara kino, mei tera i akapapaia i te pene  5 o Tai Korinetia. No reira, koi akaateaiaʼi tetai Kerititiano no te rave anga i te poneia, ka tupu ua teia me patoi tetai no te ariki i te tauturu pae vaerua a te au tiaki aroa ra. Kare ko te Au Kite o Iehova anake te aru ra i teianei ravenga Kerititiano. Te akakite ra The Encyclopedia of Religion: “Te akono ra tetai ua atu pupu i te tika kia paruru iaia uaorai i te au mema kare ra e akono mai kia tau ki tana e penei tei riro ra kia tamataku mai i te meitaki no te katoa ra. I roto i te akanoo anga akonoanga e putuputu teianei tika i te akaketaketaia na te irinaki anga e ko taua aati anga i te ture ra [o te akaateaanga ki vao] ka akakino i te turanga o tetai ki mua i te Atua ra.”

17, 18. Penei e akapeea te akatutu anga i te tu tika no te akaatea anga na (a) tetai akatereanga apii? (e) na tetai akaaerenga vaeau?

¹⁷ E aronga apiipiiia te Au Kite o Iehova i te Pipiria ra. (Iosua 1:8; Salamo 1:2; Angaanga 17:11) Ko te porokarama kite apiianga a te Pupu Akaaere ra penei ka tau kia akaaiteia atu ki tetai akapapa anga apii tei akapapaia ra e tetai pupu akaaere o te apii. Noatu rai e kare te pupu akaaere ra i te tumu no te apinga tei apiiia ra, nana ra e akanoo te akapapa anga, e akataka te ravenga no te apiianga, e oronga katoa oki te au arataki anga umuumuia ra. Me ka kore takiri tetai ua atura e akono kia tau ki te au umuumu anga o taua apii ra, e ka akatupu te au tu ngata no te aronga apiiia ra, me kare ka apai mai i te tu viivii ki runga i te apii, ka rauka kia akaateaia aia. E tika anga ta te au mana apii no te rave angaanga no te puapinga o te aronga katoa te apiiia ra.

¹⁸ I te pae atu i te riroanga ei aronga apiiia, e aronga toa tamaki te Au Kite o Iehova no Iesu Karaiti, tei apiiia ra kia “kukumi ua ïa i te kukumianga meitaki ra i te akarongo.” (1 Timoteo 6:12; 2 Timoteo 2:3) E mea matauia ra, ko te tu akono tau kore tamou ei tetai toa tamaki Kerititiano penei ka akatupu i te tu mareka kore tu-Atua. Ei tetai tei orongaia ra te iki anga rangatira, ka rauka i tetai toa vaeau kia iki i tana i anoano, inara ka tika aia kia apai i te au tupu anga no tana iki anga. Te manako ra Paulo e: “Kare rava te tangata e aere ki te tamaki ra e taii iaia uaorai i te peu rikiriki no teianei ao, kia akarekareka i tei iki iaia ei toa ra. E te tangata oki kia kukumi ra, kia kore aia e kukumi ma te akono i te ture ra, kare ïa e akakoronaia.” (2 Timoteo 2:4, 5) Te au Kerititiano pakari, kapiti katoa ma te Pupu Akaaere ra, te vai katoa ra i raro ake i te mana akaaere o to ratou Arataki, koia Iesu Karaiti, ma te akono “i te ture ra” kia raukaʼi ia ratou te tutaki no te oraanga mutu kore.​—Ioane 17:3; Apokalupo 2:10.

19. I te akara matatio anga i te au tika no te akatapu anga Kerititiano ra, eaa te papu ra ia tatou?

¹⁹ Kare ainei te au tika ra i akataka meitaki mai e e au tavini te Au Kite o Iehova ra no te Atua, e kare i te au tuikaa no te au tangata nei? Ei au Kerititiano akatapuia te rekareka ra i te rangatira ta Karaiti i akarangatira mai ia ratou ra, ka tuku ratou na te vaerua o te Atua e tana Tuatua oki e akatere i to ratou oraanga ia ratou e tavini taokotai ra ma to ratou au taeake i roto i te putuputuanga o te Atua ra. (Salamo 133:1) Ka tau katoa i te au akapapu anga o teia kia akakore atu i tetai ua atu akaekoko anga no te tumu o to ratou maroiroi. Ka rauka ia ratou kia imene, ma te tata taramo katoa ra: “Ko Iehova toku maroiroi e toku paruru, te irinaki nei toku ngakau iaia, e kua turuia mai au: i maataʼi te rekareka o toku nei ngakau; e akameitaki oki au iaia i taku imene.”​—Salamo 28:7.

[Tataanga Rikiriki i Raro]

Akapeea Koe me Pau?

◻ Akapeea te Taiate Punanga Tiaki e etai atu rima rave ture aiteite i te tauturu anga i te Au Kite o Iehova ra?

◻ Akapeea te au Kerititiano i puapingaiaʼi i te tuanga a te Pupu Akaaere o te Au Kite o Iehova ra?

◻ Eaa te au tangata o Iehova ka ripoti ei i ta ratou angaanga tutuanga?

◻ I raro ake i teea au turanga i tau ei te akaatea anga no tetai Kerititiano akatapuia ra?

[Tutu i te kapi 19]

Kua akono maira te pupu akaaere o te anere mataiti mua ra i te taokotai anga o te apiianga

[Tutu i te kapi 23]

Takapini i te ao, te rekareka ra te Au Kite o Iehova i te tu rangatira ta Karaiti i akarangatira ia ratou