‘Tamou ua Atu Rai kia Akatikatikaia’

“TE PAPU ra ia koe e kare e ngaro ia tatou te reira?” Kua aratakiia te patete i tana uianga ki te opita mua o te pai. I te pai meangiti e neke ra tetai tua ki tetai tua e te peiaia ra ki roto i te mou anga o te Cape rollers rongonui o te tua Tonga o te Ataranatika (Atlantic), te akaraanga kiaia e e manga poto ua no tetai semeio kia tupu no ratou kia taea te topata meangiti i runga i te mapu ta ratou ngai e aere ra.

No reira kua pati mai te opita mua kia aere aia ki roto i te ngai mataro o te pai e kua akamarama i te au angaanga o te au mea akatikatika o te pai​—te au kairo komopate (gyro compass), te rata (radar), te au mea akaoki akairo mei te taterite (satellite signal receivers), e pera katoa te tetetani (sextant) ua nei. Noatu e e aka angaanga iaia i te marama i te au akatakaanga, kua marama mai aia i muri mai i tetai kaveinga tumu o te akatere pai: te akatikatika i te kaveinga. Tauturuia e tana apinga akatere pai, ka rauka i te kapitana i te akatanotano i te au aerenga o te tai e te au ngaru rikiriki e te matangi na te rave putuputu anga i te au akatikatika anga. Ma te kore teia au akatikatika anga, ka ngaro ia ratou to ratou ngai e aere ra mei tetai au maire e manganui te mamao.

Mei te au pai rai te au Kerititiano i roto i te moana tangata. Ta tatou akakoroanga kia “rokoia mai . . . e ia [e Iehova] ma te au, ma te topata kore, e te apa kore.” (2 Petero 3:14) Inara mei te pai rai, te vaira te au ririnui​—i roto ake e to vao ake—​te akakeu ra ia tatou kia neke i vao ake i te kaveinga. Mei teaa te meitaki, i reira, te au tuatua a te apotetoro ko Paulo ki te au Korinetia: “No teia oki e pure nei matou, toou akatikatikaia anga. . . . E tamou ua atu rai . . . kia akatikatikaia.”​—2 Korinetia 13:9, 11, NW.

Eaa te ka o Mai ki Roto i te Akatikatika Anga

Te tuatua Ereni i konei tei uriia “akatikatika” te tuatua ra i te apai anga mai i tetai mea “ki roto i tona ngai akatikatika anga tau.” (Akara i te tuatua i raro ake o te Reference Bible.) I roto i etai au irava Puka Tapu, kua taangaangaia te reira no te akatutu i te akaokianga i tetai mea ki tona turanga tau. Ei akaraanga, ia Mataio 4:21, kua taangaangaia tetai tuatua i reira no te akatutu i te “ripeaanga” i te au kupenga. (Kingdom Interlinear) Eaa i reira, te aiteanga e kia akatikatikaia te au Kerititiano?

I na, e tamanako ana i te au Kerititiano i Korinetia ta Paulo e tata ra. I roto i tana reta kia ratou i mua atu, kua tou a Paulo i tetai au turanga tau kore tei tupu i roto i te putuputuanga: te irinakianga tangata, te tuku ua i te akaturi, te apaianga i te au taeake ki te ture, te akangateitei kore i te Kaikai Oroa a te Atu, e te au uipaanga marikonga kore. (1 Korinetia 1:10-13; 5:1; 6:1; 11:20, 21; 14:26-33) No reira te anoanoia ra te au Korinetia kia “ripea” i to ratou turanga i reira, koia oki, te apai anga mai i te reira “ki roto i tona ngai akatikatika anga tau” ma te au kaveinga atua.

Te rua o ta Paulo reta kia ratou kua akakite e kua rave aia i tei tau. (2 Korinetia 7:11) Inara, kua kite a Paulo e ka tamou ua atu rai te au taomi anga mei to teianei ao, mei ia Satani, e mei to ratou uaorai au inangaro i te pae kopapa, i te opara ia ratou mei runga i te kaveinga i tetai au taime ki tetai au taime. No reira, kua ako aia ia ratou ma te tau te “tamou ua atu rai kia akatikatikaia.’

Te Anoano no te Akatikatika Anga i Teia Tuatau

Kia tau rai te au Kite o Iehova i teia tuatau kia tamou ua atu rai kia akatikatikaia. Te ‘akapapa tamaki’ nei te Tiaporo ko Satani kia tatou, te angaanga ruketekete anga i te aati i to tatou akarongo tiratiratu. (Apokalupo 12:17; Ephesia 6:12) Pera katoa te takapiniia nei tatou e tetai akatereanga i teianei ao katoa o te au mea te angaanga ra “te ariki mana o te reva ua nei.” Penei to tatou au taeake angaanga pera katoa to tatou au taeake apii e au tangata ‘akono ratou i te au anoano o te kopapa i te akatupu i ta te kopapa i inangaro.’ (Ephesia 2:2, 3) E kukumi anga putuputu rai ta tatou ma to tatou anoano tu ara. (Roma 7:18-25) Ma te kore teia au akatikatika anga putuputu, ka ngoie ua ia tatou i te akatere keia mei te kaveinga.

Te akatutu ra tetai kiteanga o te apotetoro i teia. I muri ake i te kite tika anga ia Iesu e ko “te Mesia . . . te Tamaiti a te Atua ora,” kua akameitakiia a Petero ma teia au tuatua: “E ao toou, e Simona Baraiona; kare te tangata i akakite mai ia koe i te reira, na taku Metua i te ao ra.” (Mataio 16:16, 17) Te papu ra, e tei runga a Petero i te aerenga manako tika. Inara, i roto ua i te au taime tei aereia mai i roto i nga irava e ono, kua tau aia kia akakino pakariia e Iesu! Te kiteanga e “e rai tona rave kino angaia e te . . . tamate ravaia oki,” Kua raurau a Petero ia Iesu: “Kia takinga meitaki koe kia koe uaorai, e te Atu; kare rava teia e peraia kia koe.” (NW) Kua pau viviki mai a Iesu: “Ka aere ke atu koe, e Satani, ki muri iaku, e maitu koe naku; kare koe i tau i ta te Atua ra, ko ta te tangata ra taau i tau.”​—Mataio 16:21-23.

Te manako ra a Petero i te pae manako kopapa. Kua anoanoia e kia akatikatikaia tona au manako e te tu. Kare ainei e tika rai te reira ia tatou pouroa i tetai au taime? Kare ainei e e akara ua ana tatou i te au mea i ta tatou uaorai akaraanga kare i ta Atua? No reira, i tetai au taime te anoanoia ra tatou kia akatikatikaia. Mei tetai pai rai i te moana, penei e e meangiti ua teia au akatikatika anga, vaitata atu rai e kare i te mea puapinga. Mari ra penei te akara anga ko te tuke te reira i rotopu i te taea angaia to tatou ngai aerenga e te mamaeanga i te pai ngaangaa i te pae vaerua. E tikai, penei na tetai akatikatika anga meangiti i teianei e paruru ia koe kia rave i te au akatikatika anga puapinga maata​—penei mamae tikai—​a muri ake.

Au Turanga Tu Atua

Me kare te au apinga akatere o tetai pai i tau tikai i te akatanotanoia, kare te au akatikatika o te kaveinga tau e raveia. Aiteite rai, e ka inangaro tatou i to tatou oraanga kia au ki runga i te kaveinga, ka anoano tatou i te arataki anga tika tikai o te Tuatua na te Atua, ko te Puka Tapu. “Te au tuatua tapu katoa i tataia ra, e mea akauruia mai e te Atua, e e mea meitaki ei apiianga, ei akoanga, ei akakiteanga apa.” (2 Timoteo 3:16) Te tuku ra te Tuatua akauruia i te au turanga a te Atua no te tu akono e te manakoanga. Te tatau putuputuanga i te reira e mea puapinga tikai no te aruanga i “te au ara tuatua-tika.”​—Salamo 23:3.

E maata te au kaveinga e aere maira mei te pupu “tavini akono meitaki e te pakari” o te au Kerititiano akatainuia. Kua tauturuia teia aronga e te vaerua o Iehova kia marama viviki i tona anoano. (Mataio 24:45-47; Maseli 4:18) No reira, me aere mai te au kaveinga mei te akaerenga a Iehova, ka rauka ia tatou i te kauraro pakari i te reira, te kite meitaki anga e na Iehova ua e arataki ia tatou na tetai mataara te ka riro ei puapinga mutu kore no tatou.​—Isaia 48:17.

Inara, i tetai au taime, te anoanoia ra kia tauturu tatou ia tatou uaorai te noo ki runga i te kaveinga. Te akamaroiroi maira a Paulo ia Galatia 6:1: “E te au taeake ra, kia rokoia tetai e te apa ra, ka akaora kotou ko tei akono i ta te Vaerua ra i te reira, ma te ngkakau maru; ma te manako ia koe uaorai, ko te timata katoaia aea koe.” Tei roto te aronga pakari e te au tavini orometua i te aronga tei ia ratou teia au tu tau tikai i te pae vaerua. Te maata anga o te taime ka akakite tika ua mai ratou i etai ngai te anoanoia ra tatou kia rave i te au akatikatika anga.

Anoanoia te Tauta

Kare i te mea ngoie ua rai i te rave i te au tauianga tei anoanoia i to tatou oraanga. E tamanako akaou ana ia Petero. Kua anauia ei ngati Iuda, kua maata mai a Petero te manako anga i te tu papu kore o te au tangata enua ke. Mei tana i akakite ki te Etene ra ko Korenelia: “Kua kite oki kotou e, kare e tau i te tangata ngati Iuda kia kapiti atu, e kare oki e tomo i te are o te tangata o te enua ke ra.” Inara, te kiteanga e e anoano no te Atua e kia akakite aia i te tuatua mou Kerititiano ki teia tangata e tona ngutuare tangata, kua taopenga a Petero: “Kua kite mou atura au e, kare te Atua e akono i te tu o te tangata: Ko te mataku ra iaia, e ko te rave i te tuatua-tika, i te pa enua ravarai, ko tei kiteia mai ïa e ia.”​—Angaanga 10:28, 34, 35.

Kua rave a Petero i tetai au taui anga viviki ki tona au manako e te tu no te au tangata enua ke! Inara kua anoanoia aia kia tamou ua atu rai i te akatikatika iaia i teia tu, no etai au mataiti i muri mai kua ariu akaou atu a Petero ki tetai taomianga no roto mai e kua akamata i te kopae i te au taeake Etene irinaki. Kua anoanoia te apotetoro ko Paulo kia ako iaia, te taangaanga anga i te au tuatua pakari tikai no te tauturu iaia kia akatikatika maata akaou i tona au manako!​—Galatia 2:11-14.

Aiteite rai i teia tuatau, penei kua maata mai tetai Kerititiano te patoi i tetai tupuanga kopae i te au tangata enua ke. I muri ake i te aere anga mai ki roto i te tuatua mou, penei i tona manako kua akatika aia e kare te Atua i te Atua pae ke inara te piri atura rai ki te au manako pae ke i te au tangata enua ke. Noatu e kare aia e kino ana ki teia aronga enua ke, penei ka manako viviki aia e tei ia ratou te au tu kino no to ratou ngai i aere mai ei. Penei ka tauta aia i to ratou tu akakoromaki ma te au tuatua kangakanga me kore te au tuatua te ka taiku ua rai i to ratou tu tangata, me kore te au iti tangata tukeke. Penei ka patoi i te akamaroiroi anga i te pae vaerua no ko mai i tetai taeake Kerititiano no tei kare i rauka ana tetai apiianga meitaki me kore kare e maata te apinganui, kua poka aia i te akaari iaia uaorai na tetai tu akono anga ke. E tikai, te anoanoia ra tetai tauta anga no teia kia akatikatika i tona manako kia rotai ki to Iehova!a

Inara noatu e te maroanga ko te iriiri i te au tangata i te enua ke, me kore te anoano i te apinganui, te au angaanga i te apii e te ngai angaanga, me kore te anoano no te putuputu ki te au uipaanga Kerititiano, kia ariu atu tatou ki te kaveinga tei orongaia mai na roto i te Tuatua na te Atua e tana akaaerenga. Auraka rava tatou e manako e kare te ako Tuatua Tapu tei tau e angaanga ki runga ia tatou e te kopae atu i te reira. E akamaara ana e kua tuatua te au ngati Iseraela tiratiratu kore e: “Kare te ara o Iehova i akatikatikaia kia tau.” Kare ainei e ko tatou tei tau kia akatikatika ki te au ara o Iehova?​—Ezekiela 18:25, NW.

Te rekareka nei tatou e te akaari ra a Iehova i te tu maana e te inangaro i te ara ta tatou e aaere ra i mua i tona aroaro, te oronga putuputu anga mai i te akatikatika anga no tona iti tangata. Mei ta Isaia rai i totou: “E na to kotou taringa e akarongo i tetai manga tuatua i muri mai ia kotou, i te na ko anga, Teia te ara, e na reira te aere; kia anga kotou i te pae katau, e kia anga kotou i te pae kaui.” Kia matakite ua rai tatou i reira, i ta tatou tuanga, ki teia kaveinga aroa mei ko mai ia Iehova e kia “vai papa no te akarongo.” (Isaia 30:21; Iakobo 3:17, NW) Ae, kia tamou ua atu rai tatou kia akatikatikaia kia arataki to tatou kaveinga ia tatou ki te akakoroanga mutu kore ma to te Atua mareka anga!

[Au Tataanga Rikiriki i Raro]