• Mareka Ainei te Atua i Tetai Ua Atu Tamataora Anga?
    Oraanga Mataora e Tuatau Ua Atu!—Uriurianga Apii Pipiria

    • E tatau ia Ephesia 5:10, e oti uriuri i teia au uianga:

      • Eaa ta tatou ka akapapu me ka akono tatou i te au orote?

      • Eaa te au orote e matauia ana i toou ngai?

      • I toou manako te mareka ra ainei a Iehova i teia au orote?

      Ei akaraanga, i manako ana koe eaa to te Atua manako no te rā anau anga? Kare te Pipiria i taiku ana i tetai tei akamori ia Iehova tei akamaara i tona rā anau anga, mari ra te akakite ra te reira no nga tangata kare i tavini ia Iehova, tei akamaara i to raua rā anau anga. E tatau ia Genese 40:​20-22 e Mataio 14:​6-10. E oti uriuri i teia au uianga:

      • Eaa tei tupu ki te nga rā anau anga tei akamaaraia?

      • Mei teia nga irava Pipiria, i toou manako eaa to Iehova manako no te rā anau anga?

      Penei ka manako koe, ‘Te manata maira ainei a Iehova me akono au i te rā anau anga e tetai ua atu tamataora anga kare i roto i te Pipiria?’ E tatau ia Exodo 32:​1-8. E oti, akatangi i te VITIO e te uriuri i teia au uianga ka aru mai.

      VITIO: Te au Orote e te Tarekareka Tei Akamareka Kore i te Atua (5:07)

      • Eaa tatou ka akapapu ei i tei marekaia e Iehova?

      • Akapeea tatou me rave i teia?

      Akapeea me kite e kare te Atua e mareka ana i tetai orote

      • Kua akatumuia ainei ki runga i te au apiianga kare i roto i te Pipiria? Kia akapapu, e kimi noea mai te reira.

      • Te akaepaepa ra te reira i te tangata, te au akatereanga, e te reva enua? Ka akangateitei ua tatou ia Iehova e te irinaki ka rapakau aia i te au manamanata o teianei ao.

      • Te patoi ra ainei teia au peu e te au akaepaepa anga i te au turanga o te Pipiria? Kia vai mā ua to tatou oraanga i te pae o te tu akono.

  • Iki i te Tamataora Anga ka Mareka a Iehova
    Oraanga Mataora e Tuatau Ua Atu!—Uriurianga Apii Pipiria
    • Apii 53. Ko papa, mama e te tamaine meangiti kai popcorn ratou e akara tivi ra.

      APII 53

      Iki i te Tamataora Anga ka Mareka a Iehova

      E “Atua mataora” a Iehova. (1 Timoteo 1:11, NW) Inangaro aia kia mataora e kia rekareka tatou i te oraanga. Mareka aia me akapae tatou i te tuatau no te akangaroi. I roto i teia apii, ka akara tatou akapeea me taangaanga i to tatou tuatau akangaroi ma te mataora e te merengo ua​—ei akamareka ia Iehova.

      1. Eaa ta tatou ka akamanako me iki i te tamataora anga?

      Eaa taau e rave ana me akangaroi koe? Kua mataora tetai pae i te noonoo ua i te kainga​—tatau puka, akarongo imene, akara teata, e te aere ki runga i te Initaneti. Tetai pae te reka ra i te tamataora ki te au oa​—te piki maunga, te pai tai, e te kanga tipoti. Noatu eaa te tu, ka akapapu tatou i te tamataora anga ei “mea mareka na te Atu.” (Ephesia 5:10) E mea puapinga kia mārama tatou i teia no te mea te akaari maira te maata anga o te au tarekareka anga e te rikarika ra a Iehova i te reira, mei te ta ua, te āinga tau kore, e te purepure. (E tatau ia Salamo 11:5.) Eaa te ka tauturu ia tatou kia iki meitaki i ta tatou tamataora anga?

      Me iki tatou i te au oa tei inangaro ia Iehova, ka meitaki ta tatou ikianga no te tamataora anga. Mei te apii i mua ake nei, “ko tei kapiti katoa i tona aerenga ki to te aronga pakari ra, ka pakari katoa ïa.” Me kapiti putuputu tatou ki te aronga kare e inangaro ana i ta te Atua au turanga, “e mate ïa” no tatou.​—Maseli 13:20.

      2. Eaa i puapinga ai kia matakite tatou i te tuatau e pou ra no te tamataora anga?

      Noatu e te mako ua ra te tamataora anga ta tatou i iki, kia matakite tatou i te tuatau e pou ra no te reira. Te openga, kare e rava te tuatau no te au mea puapinga. Te akamaroiroi maira te Pipiria kia “taporoporo marie i to [tatou] tuatau.”​—E tatau ia Ephesia 5:​15, 16.

      KIMI OONU

      Apii kia kite akapeea koe me iki meitaki i taau tamataora anga.

      3. Kopae i te tamataora anga kino

      Eaa tatou ka matakite ei me iki i ta tatou tamataora anga? Akatangi i te VITIO, e oti uriuri i te au uianga ka aru mai.

      VITIO: Eaa te Tu Tamataora Taku ka Iki? (4:39)

      • Akapeea te tarekareka anga tā tangata o Roma i taito, i aiteite ei ki te tamataora anga o teia tuatau?

      • I roto i te vitio, eaa ta Danny i kite mai no runga i te au tamataora anga?

      E tatau ia Roma 12:9, e oti uriuri i teia uianga:

      • Akapeea teia irava me tauturu i taau ikianga no te tamataora anga?

      Eaa tetai au mea te rikarika ra a Iehova? E tatau ia Maseli 6:​16, 17 e Galatia 5:​19-21. I muri ake i te tatau anga i teia irava, e uriuri i teia uianga:

      • Eaa te au peu i roto i teia au irava tei roto i te au tarekareka anga o teia tuatau?

      Akapeea me iki meitaki i taau tamataora anga

      E ui kia koe uaorai:

      • Eaa? Te ō maira ainei te au mea te rikarika ra a Iehova?

      • Aea? Te tamanata ra ainei i te au angaanga puapinga?

      • Koai? Te akapiri ra ainei iaku ki te aronga kare e akaperepere ana ia Iehova?

      E meitaki i te akaatea mamao mei te kino. E kia akaatea mamao mei tetai ua atu tamataora anga kua kite tatou kare e meitaki ana

      Te motoka i te tapa o te mataara i te maunga. Kua aere a muri i te motoka ki te ngai tariva.

      4. Taangaanga meitaki i toou taime

      Akatangi i te VITIO, e oti uriuri i te uianga ka aru mai.

      VITIO: Eaa te Akatere ra i Toou Taime? (2:45)

      • Noatu kare te taeake i roto i te vitio e akara ana i te au mea tau kore, eaa i reira tona manamanata?

      E tatau ia Philipi 1:10, e oti uriuri i teia uianga:

      • Akapeea teia irava me tauturu ia tatou kia taangaanga meitaki i to tatou taime no te tarekareka?

      5. Iki i te tamataora anga tau

      Noatu kare a Iehova e mareka ana i tetai au tamataora anga, te mareka ra aia i tetai. E tatau ia Koheleta 8:15 e Philipi 4:8, e oti uriuri i teia uianga:

      • Eaa tetai au tamataora anga tau e reka ana koe?

      Tutu: Mataora te au tangata tukeke te mataiti i te au tamataora anga e te tarekareka anga tau. 1. Te akarongo ra tetai tamaine i te imene iaia e toroā ra. 2. Kanga basketball te nga tane tokotoru. 3. Akaoro patikara takatakai te nga tamaroa. 4. Te maani ra tetai tamaiti i te motoka rakau. 5. Te rutu ra te tane i tana pau. 6. Kanga vitio kapiti te tamaiti e tona papa. 7. Te nenei tutu ra tetai vaine.

      Ka mataora koe i te au tamataora anga e te tarekareka anga tau

      KARANGA TE TANGATA: “Kare e kino te tamataora anga tā tangata, āinga viivii e te purepure, kare au e rave ana i te reira.”

      • Eaa taau pauanga?

      APIIANGA

      Inangaro a Iehova ia tatou kia iki e kia rekareka i te tamataora anga tau.

      Uriurianga

      • Eaa te tamataora anga kia kopae te au Kerititiano?

      • Eaa tatou ka matakite ei i te tuatau ka akapou tatou no te tamataora anga?

      • Eaa koe ka iki ei i te au tamataora anga tei akamareka ia Iehova?

      Akakoroanga

      KIMI KIMI

      Akamanako e naai e iki i ta tatou tamataora anga.

      “E Patoi Ana Ainei te Au Kite o Iehova i Tetai au Teata, au Puka, me Kore au Imene?” (Web atikara)

      Akara akapeea koe me iki i te au ikianga meitaki no te au angaanga tamataora e te akangaroi.

      “Puapinga Ainei Taau Tamataoraanga?” (Te Punanga Tiaki, Okotopa 15, 2011)

      I roto i te tua “Kua Takore Katoa Au i Toku tu Akavaavaa i te Tangata,” akara i te tumu i taui ei tetai tangata i tana tamataora anga.

      “Taui te Pipiria i te Oraanga” (Te Punanga Tiaki, Tiurai 1, 2010)

      Akara akapeea tetai metua vaine te iki anga kia kore e akara i te au teata vaerua kino.

      Kopae i te Purepure i Roto i ta Tatou ka Akarakara (2:02)