Kia Aaere ei Aronga Pakari
1 I te uianga a Iesu ki te aronga ravakai e a kia riro mai ei au pipi nana, kare ratou i tavarevare ana i ta ratou ikianga mari ra kua ‘akaruke iora ratou e kua aru maira iaia.’ (Mata. 4:18-22) I te tauianga a Saula o Tareso e kua kite akaou mei tona matapo anga, kare rai aia i tavarevare ana, mari ra “kua akakite atura aia i reira i te Mesia i roto i te au sunago.” (Anga. 9:20) Te aere ua nei te ora ki mua; me pati ana te reira, kare e kitea akaouia. No reira oki i puapinga ai no tatou kia ‘aaere ei aronga pakari’ i to tatou taangaanga anga i to tatou taime.—Ephe. 5:15, 16.
2 Tupuanga Kitea Koreia: Te au atianga tei rauka ia tatou i teia tuatau kia tavini ia Iehova, ka ngaro te reira apopo. (Iako. 4:14) E tupu ana te “tupu anga kitea koreia” ki te katoatoa rava. (Kohe. 9:11, NW) Pera katoa, te pakari atura tatou katoatoa, e te “au rā kino” te piri maira ki te ruaine anga e te kotinga ra i te ka rauka ia tatou i te rave i roto i te tavinianga ia Iehova, kare e rauka kia kapeia i roto i teia akatereanga o te au mea nei. (Kohe. 12:1) No reira, kare i te mea meitaki i te tavarevare i te akono i tetai akatapuanga ki te Atua me kore kia tiaki no te au turanga kia meitaki i mua ake ka akamaata atu ei i ta tatou angaanga orometua i te ka rauka maroiroi ia tatou i teianei. (Luka 9:59-62) Kua kite mai a Aberahama i te au e te tinamou i tona pakari anga, i te mateanga i “te ruaine e te mareka ua” no te mea kua taangaanga meitaki aia i tona oraanga, ma te akatapu katoaanga i te reira kia Iehova.—Gene. 25:8.
3 Kua Poto te Tuatau: Ka inangaro katoa tatou kia akapou meitaki i to tatou taime no te mea “te poto nei te tuatau.” (1 Kori. 7:29-31) Kare e roa atu ana, ka ope teia akatereanga o te au mea nei. Te au atianga kia piri atu ki roto i te akaputuanga maata o te aronga mei te tu mamoe rai i te ‘tuatau kokoti anga i te enua nei,’ ka ope te reira. (Apo. 14:15) Kia matakite tatou e auraka rava e tuku i te au apiapi e te au akavare anga o te oraanga kia keia i to tatou taime tei meitaki atu i te akapouia i roto i te angaanga orometua. (Luka 21:34, 35) E merengo anga tikai me oki tatou i te akamanako e kua piri maroiroi tikai tatou ki roto i te kokotianga!
4 Kia matakite ua atu rai kia kore tatou e ngere i te au akameitakianga mataora no te tavinianga te ka rauka ia tatou. Kia tauta pakari tatou kia rave i te ka rauka ia tatou i te tavini ia Iehova ‘koi vai akera teia ra.’ (Ebe. 3:13) Na te raveanga i te reira, te akaari ra tatou e e pakari mou tikai to tatou uaorai, no te mea “ko tei akono ra i to te Atua ra anoano, e tika ïa i te ora anga e tuatau ua atu.”—1 Ioa. 2:17.