Metua e te Tangata Pakari—Akatupuanga i Nga Tuanga

“Ko te tangata oki kare i kite i te arataki i tona uaorai ngutuare, eaa e tikaʼi iaia kia tiaki i te ekalesia a te Atua?”​—1 TIMOTEO 3:5.

1, 2. (a) I te anere mataiti mua ra, i akapeea te au akaaere takaua ra e te au akaaere kare a ratou tamariki i raukaʼi kia tavini atu i to ratou au taeake? (e) Akapeea a Akuila raua ko Peresila i tau ei ei akatauanga no te au tokorua akaipoipoia e manganui i teia tuatau nei?

TE AU akaaere i te putuputuanga Kerititiano mua ra kua tika ei au tangata takaua me kare e tangata akaipoipoia e kare e tamariki me kare e au tangata akaipoipoia ma te au tamariki oki. Kare e ekoko anga kua rauka i tetai papaki o taua au Kerititiano i te aru i ta te apotetoro ko Paulo ako anga i oronga ra i tana reta mua ki to Korinetia, i te pene 7 ra, e kua vai rai ei tangata takaua. Kua tuatua a Iesu: “I akaeunuka oki tetai aronga ia ratou uaorai no te basileia o te ao ra.” (Mataio 19:12) Ko taua aronga tangata takaua ra, mei ia Paulo rai e penei ko etai o tona au oa tutaka aere, kua noo tu rangatira ua kia tutaka aere i te tauturu i to ratou au taeake.

² Kare te Pipiria i akakite mai e me a Banaba, a Mareko, a Sila, a Luka, a Timoteo, e Tito e au tangata takaua. Me kua akaipoipoia, i te akara anga kua rava to ratou tu rangatira mei te au apainga ngutuare tangata kia rauka ia ratou te tutaka aere i te ngai maata i te rave i te au angaanga tuke tuke. (Angaanga 13:2; 15:39-41; 2 Korinetia 8:16, 17; 2 Timoteo 4:9-11; Tito 1:5) Penei kua aere kapiti ratou e ta ratou au vaine, mei ia Petero e “tetai papaki aposetolo katoa ra,” tei rave ra i ta ratou vaine i te akara anga, ma ratou katoa i te aereanga mei tetai ngai ki tetai ngai. (1 Korinetia 9:5) Ko Akuila raua ko Peresila tetai akatauanga no tetai nga tokorua akaipoipoia tei mareka ua ra kia aere ki tetai ngai ke, i te aruanga ia Paulo mei Korinetia atu ki Ephesia, e te aereanga ki Roma, e kua oki akaou mai ki Ephesia ra. Kare te Pipiria i akakite mai me e tamariki ta raua. No ta raua tavini anga tau tikai no to raua au taeake kua rauka ia raua te akameitaki anga a “te au ekalesia etene katoa ra.” (Roma 16:3-5; Angaanga 18:2, 18; 2 Timoteo 4:19) I teia tuatau nei, kare e ekoko anga e manganui te au tokorua akaipoipoia tei, aite ra kia Akuila raua ko Peresila, kua tavini atu i etai putuputuanga ke ra, penei na te aereanga ki te ngai e maata atu te anoanoia ra.

E Metua e e Tangata Pakari

3. Eaa te akakite maira e e manganui te aronga pakari i te anere mataiti mua ra e au tangata akaipoipoia e e au tamariki oki ta ratou?

³ I te akara anga e i te anere mataiti mua T.N., ko te maata anga o te aronga pakari Kerititiano e au tangata akaipoipoia ma te au tamariki ra. I ta Paulo akanoo anga i te au tu tau tei umuumuia ra “kia inangaro tetai tangata i te taoonga episekopo ra,” kua akataka mai aia e ko taua Kerititiano ra ka tau “ei arataki meitaki i tona uaorai ngutuare ra, e tana au tamariki i te kauraro marie anga iaia.”​—1 Timoteo 3:1, 4.

4. Eaa tei umuumuia ra i te aronga pakari akaipoipoia e e tamariki oki ta ratou?

⁴ Mei ta tatou i kite ra, kare tetai akaaere i umuumuia kia anau tamariki, kare katoa oki kia akaipoipoia. Inara me kua akaipoipoia, e tau ei aia ei tetai tangata pakari me kare tetai tavini orometua, ka tau tetai Kerititiano kia akono tika e te aroa i te upoko anga ki rungao i tana vaine e kia akaari iaia uaorai e tau i te akonoanga i tana tamariki ma te kauraro anga tika. (1 Korinetia 11:3; 1 Timoteo 3:12, 13) Ko tetai ua atu tu paruparu kino i te akatereanga i tona ngutuare ka akatau kore ia i tetai taeake no te au angaanga taka ke i roto i te putuputuanga. Eaa ra te tumu? Te akataka maira Paulo: “Ko te tangata oki kare i kite i te arataki i tona uaorai ngutuare, eaa e tikaʼi iaia kia tiaki i te ekalesia a te Atua ra?” (1 Timoteo 3:5) Me ka kore te aronga no tona uaorai kopapa e akatika kia kauraro i tana akaaere anga, eaa ta etai atu ka manako?

“E te Tamariki Akarongo”

5, 6. (a) Eaa te umuumu anga no te tamariki ta Paulo i taiku atura kia Tito? (e) Eaa te manakoia atura i te aronga pakari e tamariki ra ta ratou?

⁵ I te ako anga ia Tito kia akataoonga i te au akaaere i te au putuputuanga i Kereta ra, kua akataka atu a Paulo: “Ko te tangata apa kore, vaine okotai ra, e te tamariki akarongo, kare i tapepeia i te kaimoumou, e te akongata. Ei tangata apa kore te episekopo e tikaʼi, mei te akaaere a te Atua ra.” Eaa tikaʼi te aite anga o te umuumu anga “e te tamariki akarongo”?​—Tito 1:6, 7.

⁶ Te tuatua “tamariki akarongo” te taiku ra i te aronga ou tei akatapuia ra to ratou oraanga kia Iehova e kua papetitoia me kare ko te aronga ou tei tere atu ra ki mua ki te akatapu anga e te papetito anga. Te manakonako maira te au mema o tetai putuputuanga i te au tamariki a te aronga pakari kia meitaki te tu akono e kia akarongo. Ka tau ra kia kiteia e te rave ra tetai tangata pakari i te ka rauka iaia kia akamatutu i te akarongo ki roto i tana tamariki. Kua tata te Ariki ko Solomona: “E apii i te tamaiti i te arataa e tikaʼi iaia kia aere ra; e kia pakari aia ra, kare e akaruke i taua arataa ra.” (Maseli 22:6) Inara ka peea mei tetai mapu tei rauka ra iaia taua tereni anga ra e ka kore e akatika kia tavini aia ia Iehova me kare penei ka rave i tetai tarevake kino roa?

7. (a) Eaa ra i kiteiaʼi e kare a Maseli 22:6 e akakite mai ana i tetai ture ketaketa? (e) Me ka kore te tamaiti a tetai tangata pakari e iki kia tavini atu ia Iehova, eaa ra ka kore ei taua tangata pakari ra e ngere i tona taoonga?

⁷ Te kitea ra e kare te materi i taikuia i runga akenei e akakite mai ana i tetai ture mou tikai. Kare ia e akakore ana i te kaveinga no te anoano tu rangatira ra. (Deuteronomi 30:15, 16, 19) Me ka itae tetai tamaroa me kare tetai tamaine ki te mataiti no te rave apainga, ka tika aia kia rave i tetai iki anga nana uaorai no runga i te akatapu anga e te papetito anga. Me kua oronga tikai tetai tangata pakari i te tauturu anoanoia i te pae vaerua, te arataki anga, e te ako anga, inara kare te mapu ra e iki kia tavini atu ia Iehova, kare te metua ra e manako uaia e tau kore no te tavini anga ei tetai akaaere. I tetai pae, me e maata ta tetai tangata pakari tamariki te noo ra i te kainga tei riro ra kia makiia i te pae vaerua e kua o atu ki roto i tetai manamanata kino, penei kare aia e akamanako akaouia “ei arataki meitaki i tona uaorai ngutuare ra.” (1 Timoteo 3:4) Ko te tumu ko teia, ka tau kia kiteia e te rave ra tetai akaaere i te meitaki te ka rauka iaia kia ‘akarongo tana tamariki, kare i tapepeia i te rave kino, e te akongata.’a

Akaipoipoia ki Tetai “Vaine Akarongo Kore”

8. Eaa te rave anga tau na tetai tangata pakari ki tana vaine akarongo kore ra?

⁸ No runga i te au tangata Kerititiano tei akaipoipoia ki te aronga akarongo kore, kua tata a Paulo: “E vaine akarongo kore ta tetai taeake, e i tika i taua vaine ra kia noo rai kiaia, auraka aia e tuku ke atu iaia . . . kua tapu te vaine akarongo kore i te tane: naringa kare ra, kua noa ta kotou tamariki; i teianei ra, kua tapu ia. Eaa oki koe e kite ei, . . . e tama e, kare taau vaine e ora ia koe?” (1 Korinetia 7:12-14, 16) Kare te tuatua “akarongo kore” i konei e taiku ana i tetai vaine kare ra ona akarongo akonoanga mari ra ki tetai kare ra i akatapuia kia Iehova. Penei e ngati Iuda aia, me kare e irinaki tona i te au atua peikani ra. I teianei tuatau, penei kua akaipoipoia tetai tangata pakari ki tetai vaine tei rave ra i tetai akonoanga tuke, e kite kore i te Atua, me kare penei e Atua kore. Me ka tika ua iaia kia noo ma ia ra, kare aia e tau kia akaruke iaia no te tuke ua anga te akarongo. Ka tau aia ‘kia noo iaia ra ma te kite, i te akangateitei anga i te vaine, i te āriki paruparu ra,’ ma te manakonako anga kia akaora iaia ra.​—1 Petero 3:7; Kolosa 3:19.

9. I te au enua te oronga ra te ture i te tika ki te tane e te vaine oki kia apii i ta raua tamariki ki to raua nga akarongo akonoanga takitai, eaa te rave anga tau na tetai tangata pakari ra, e eaa ta teia ka akatupu ki tona taoonga ra?

⁹ Me e tamariki ta tetai akaaere, ka akono aia i te taoonga upoko anga tika na te tane e te metua oki i te akonoanga ia ratou ma te “apii ra ia ratou kia pakari ma te ako a te Atu ra.” (Ephesia 6:4) I te au enua e manganui te oronga ra te ture i te tika ki nga tokorua ra kia rave i te apiianga akonoanga no ta raua tamariki. I teia turanga penei ka maro te vaine kia akono aia i te tika kia tuku i te tamariki ki tona au irinaki anga akonoanga e te au ravenga, penei ka kapiti katoa i te apaianga ia ratou ki tana pure.b E tikai, ka tau te tamariki kia aru i to ratou akava ngakau tereniia i te Pipiria no runga i te kore anga e rave i te au peu akonoanga pikikaa. Ei upoko ngutuare tangata, ka akono te metua i tona uaorai tika kia apii ma tana tamariki e kia apai ia ratou ki te uipaanga i te Are Uipaanga Patireia me te tau ra. Me itae ratou ki te mataiti e tau ei ratou kia rave i ta ratou uaorai iki anga, ka iki ratou na ratou uaorai e ko teea te mataara ta ratou ka anoano kia aere. (Iosua 24:15) Me ka kite tona au taeake aronga pakari e te au mema oki o te putuputuanga e te rave ra aia i te ka akatika katoaia e te ture nana kia rave i te apii anga tika i tana tamariki i te mataara o te tuatua mou, kare aia e akakoreia ei tetai akaaere.

‘Aratakianga Meitaki i Tona Ngutuare’

10. Me e tangata pakari tetai tangata e tamariki ra tana, ko teea tana apainga mua ra?

¹⁰ Noatu rai no tetai tangata pakari e metua ra aia e ko tana vaine e Kerititiano katoa ia, kare i te angaanga ngoie ua kia akataka tika i tona taime e te manako anga i rotopu i tana vaine, i te tamariki, e te au apainga o te putuputuanga oki. Te taka meitaki ra te au Tuatua Tapu e ko ta te metua Kerititiano apainga kia akono i tana vaine e te tamariki. Kua tata a Paulo: “Ko te tangata oki kare i takinga-meitaki i tona uaorai, e maata ua atu rai i tona uaorai ngutuare, kua akaruke ïa aia i te akarongo, e e maata atu ïa tona kino i to te tangata akarongo kore ra.” (1 Timoteo 5:8) I roto i taua reta rai, kua akakite a Paulo e ko te au tangata akaipoipoia anake tei akaari ra ia ratou uaorai ei au tane meitaki e ei au metua meitaki ka tau kia akatikaia kia tavini ei au akaaere.​—1 Timoteo 3:1-5.

11. (a) Na teea au mataara ta tetai tangata pakari rave anga tau i te “takinga-meitaki i tona uaorai”? (e) Akapeea teia i te tauturu anga i tetai tangata pakari kia rave i tana apainga i te putuputuanga ra?

¹¹ Ka tau tetai tangata pakari kia “takinga-meitaki” no tona uaorai ngutuare kare i te pae kopapa anake mari katoa ra i te pae vaerua e te manako ngakau oki. Kua tata te Ariki pakari ko Solomona: “E akateateamamao i taau ra angaanga ki vao, ka akatau marie ei kia tau taau ki te kainga; ka [akamaroiroi] ei i toou [ngutuare] i muri ake.” (Maseli 24:27, akaaite ia NW.) No reira i te raveanga takinga meitaki no te umuumuanga no te pae kopapa, te manako ngakau, e te au mea anoanoia no te tamataora anga o tana vaine e te tamariki, ka tau katoa tetai akaaere kia patu ia ratou i te pae vaerua. Ka akapou taime teia​—te taime kare ra e rauka iaia kia akono i te au angaanga o te putuputuanga. Inara e tuatau ia te ka tutaki maata mai i te mataora anga o te ngutuare e te pae vaerua oki. I te tuatau roa i muri maira, me kua maroiroi tona ngutuare i te pae vaerua, penei ka meangiti mai te tuatau anoanoia e te tangata pakari ra kia akapouia i te akonoanga i te au manamanata o te ngutuare tangata ra. Na teia e akaruke mai kia kore tona manako e apiapi kia rauka iaia i te akono te au angaanga o te putuputuanga ra. Ka riro tana akatauanga ei tetai tane meitaki e te metua meitaki e puapinga i te pae vaerua ki te putuputuanga ra.​—1 Petero 5:1-3.

12. No teea tumu o te ngutuare tangata te ka tau te au metua no te aronga pakari ra kia akanoo i tetai akara anga meitaki?

¹² Te kapiti ra te aratakianga meitaki i te ngutuare i te akatakaanga taime kia arataki i te apiianga a te ngutuare tangata ra. E mea puapinga tikai ia e kia akanoo te aronga pakari i tetai akatauanga meitaki i teianei turanga, no te mea ka akariro te au ngutuare tangata maroiroi kia rauka te au putuputuanga maroiroi ra. Kare e tau to tetai akaaere tuatau kia akapou putuputuia ki etai atu au angaanga tavini anga e kia kore ona tuatau no te apii kapiti ma tana vaine e te tamariki oki. Me ko teia te tu, ka tau aia kia akara matatio akaou i tana papaanga. Penei ka tika aia kia akapapa akaou me kare kia akameangiti mai i tona taime akapouia ki etai atu au apinga, e kia akakore atu oki i etai au angaanga ke ra i etai atianga.

Akaaere Anga Akatauia

13, 14. Eaa te ako anga ta “te tavini akono meitaki e te pakari” i oronga atu ki te aronga pakari e ngutuare tangata to ratou?

¹³ Kare i te mea ou te ako anga kia akatau i te au apainga ngutuare tangata e to te putuputuanga. No etai mataiti kua oronga mai “te tavini akono meitaki e te pakari” i te ako anga ki te aronga pakari no teia au tu. (Mataio 24:45) No te tere atu i te 37 mataiti kua topa, kua apiiia mai The Watchtower o Tepetema 15, 1959, kapi 553 e te 554, e: “Kare ainei i te mea tika tikaʼi e ko tetai tumu no te akatauanga i te au umuumuanga katoa i to tatou taime? Ka tau koe kia tuku i te akaketaketa anga tau ki te au apinga no toou uaorai ngutuare tangata. E mea papu e kare te Atua ko Iehova e manako mai i tetai tangata kia taangaanga i tona taime katoa i te angaanga putuputuanga, i te tauturuanga i tona au taeake e te aronga i te pae mai kia rauka te ora, inara kare e akono i te ora o tona uaorai ngutuare. Ko te vaine e te tamariki a tetai tangata ko tana apainga maata ia.”

¹⁴ Kua akoia mai e The Watchtower o Noema 1, 1986, kapi 22: “Na te raveanga kapiti i te angaanga tutu aere ei tetai ngutuare tangata ka akapiri vaitata ia kotou na, inara ko te au umuumu anga taka ke no te tamariki ko te oronga anga i toou uaorai tuatau akatakaia e te ririnui o te manako ngakau ra. No reira, te anoanoia ra te tu tau kia tamanako eaa te maata o te taime taau ka taangaanga no te . . . au angaanga putuputuanga ia koe katoa e akono ra i ‘te aronga o toou uaorai ngutuare’ i te pae vaerua, te manako ngakau, e te pae kopapa oki. Ka tika [tetai Kerititiano] ‘kia apii i te tu akono tau i te Atua ra i [tona] uaorai ngutuare ra.’ (1 Timoteo 5:4, 8)”

15. Eaa ra i tau ei kia umuumuia tetai tangata pakari e vaine e te tamariki tana kia pakari aia e kia kite oki?

¹⁵ Te akakite maira tetai materi Tuatua Tapu: “E patuia te are i te pakari; e e akatinamouia i te kite.” (Maseli 24:3) Ae, no tetai akaaere kia akatupu i tana au angaanga teokaratiki e i taua taime katoa ra kia patu i tona ra ngutuare tangata, ka tau tikai aia kia umuumu i te pakari e te kite. Kia tau i te Tuatua Tapu, e tere atu i te okotai ana ngai no te akaaere anga. Ko tona ngutuare tangata e tana au apainga i te putuputuanga te kapitiia ra. Ka umuumu aia i te kite kia akatinamou i tetai tu tau i rotopu i eia ngai. (Philipi 1:9, 10) Ka umuumu katoa aia i te pakari kia akanoo i tana ka rave. (Maseli 2:10, 11) Noatu te maata tona manako kia akono i tana angaanga no te putuputuanga, ka tau aia kia kite e ei tetai tane e ei metua oki, ko tana apainga maata tei orongaia maira e te Atua ko te akono anga e te ora oki no tona ngutuare tangata.

Au Metua Meitaki e te Aronga Pakari Meitaki

16. Eaa te tu meitaki o tetai tangata pakari me e metua tamariki katoa oki aia ra?

¹⁶ Ko te tangata pakari e tamariki akono meitaki tana ka rauka kia riro ei tetai mea meitaki tikai. Me kua apii aia kia akono meitaki i tona ngutuare tangata, ka tau tona turanga kia tauturu atu i te au ngutuare tangata ke ra i roto i te putuputuanga. Kua kite meitaki aia i to ratou au manamanata e ka rauka iaia i te oronga akoanga te ka akaata i tona uaorai kite. E mea mataora ra, e au tauatini ua atu aronga pakari takapini i teianei ao te rave angaanga meitaki nei ei au tane, au metua, e ei aronga akaaere oki.

17. (a) Eaa te apinga kare e tau kia akangaropoinaia e tetai tangata pakari e e metua tamariki katoa ra oki aia? (e) Akapeea etai atu au mema o te putuputuanga ra i te akaari anga i te manako tau ra?

¹⁷ No tetai tangata e ngutuare tangata tona kia riro ei tetai tangata pakari, ka tika aia ei tetai Kerititiano pakari ko tei, akono i tana vaine e te tamariki, e ka rauka te akapapa i tana au angaanga kia rauka katoa iaia te akataka i tetai tuatau e te manako anga ia etai ke i te putuputuanga ra. Kare e tau kia ngaropoina iaia te akamata atura tana angaanga ei tiaki i tona kainga. I te kiteanga e ko te aronga pakari ma te vaine e te tamariki e rua tuanga ta ratou apainga i to ratou ngutuare e ta ratou au angaanga putuputuanga, ka tauta te au mema o te putuputuanga kia kore e akapou tau kore i to ratou taime. Ei akatauanga, ko tetai tangata pakari e tamariki tana te ka aere ki te apii i tetai popongi mai penei kare e rauka kia noo no tetai tuatau i muri ake i te uipaanga aiai. Ka tau etai atu au mema o te putuputuanga kia kite i teia e kia akaari i te aroa taeake.​—Philipi 4:5.

Ka Tau kia Akaperepere Tatou i to Tatou Aronga Pakari

18, 19. (a) Eaa tei rauka ia tatou kia kite no ta tatou akara matatio anga ia 1 Korinetia pene 7 ra? (e) Akapeea te akamanako anga tau na tatou i taua au tangata Kerititiano ra?

¹⁸ No ta tatou akara matatio anga i te pene 7 o ta Paulo reta mua ki to Korinetia kua kite tatou e, no te aruanga i ta Paulo ako anga, e manganui te au tangata noo ua ra tei taangaanga ra i to ratou tu rangatira kia tavini atu i te au apinga no te Patireia. E au tauatini ua atu oki te au taeake akaipoipoia kare a ratou tamariki tei, oronga ra i te manako anga tau ki ta ratou vaine, te tavini ra ei au akaaere meitaki i te tapere, te au kotinga, te au putuputuanga, e te au opati manga no te Punanga Tiaki katoa oki, ma te taokotai anga meitaki a ta ratou vaine. Pera katoa oki, i roto i te au putuputuanga e vaitata i te 80,000 o te au tangata o Iehova ra, e manganui roa atu te au metua kare e te utuutu aroa anake ra i ta ratou vaine e te tamariki mari ra te akataka tuatau katoa ra kia tavini atu i to ratou au taeake ei au tiaki utuutu atura.​—Angaanga 20:28.

¹⁹ Kua tata te apotetoro ko Paulo: “Ko te au aronga orometua i arataki meitaki ra, kia maata atu ïa i te akateitei atu, kia maata atura i tei angaanga i te ako e te apii ra.” (1 Timoteo 5:17) Ae, ko te aronga pakari tei arataki ra na roto i te tu meitaki i to ratou au ngutuare e i roto oki i te putuputuanga te tau ra kia aroa e kia akangateitei atu tatou. Ka tau tikai, te aronga “mei iaia ra te tu, kia manako meitakiia e kotou.”​—Philipi 2:29.

[Au Tataanga Rikiriki i Raro]

Na te Tu Akamanako Akaouia

◻ Akapeea tatou i kite ei e e manganui te aronga pakari i te anere mataiti mua T.N. e au tangata e tamariki ta ratou ra?

◻ Eaa te umuumuia ra i te aronga pakari akaipoipoia e tamariki ra ta ratou, e no teaa ra?

◻ Eaa te aite anga o te metua e “tamariki akarongo” tana, inara ka peea me kare te tamaiti a tetai tangata pakari e iki kia tavini atu ia Iehova?

◻ I teea au tu e tau ei tetai tangata pakari kia rave “takinga-meitaki i tona uaorai ngutuare”?

[Tutu i te kapi 23]

Ka riro te au ngutuare tangata maroiroi ei au putuputuanga maroiroi