Te Vaira te Rekareka no te Aronga Tei Kite i te Tuatua Mou
I ROTO i tona atiki, kua kitea e tetai tangata Vinirani te puka The Divine Plan of the Ages. Kua akamata aia te tatau i te reira, kare i roa ana kua tuatua aia kiaia uaorai, ‘Ko teia te tuatua mou; ko teia te tuatua mou.’ Te aere anga mai ki raro mei te atiki mai, kua akakite aia ki tana vaine, “Kua kitea e au te akonoanga mou.”
E tuke ua ake rai teia kiteanga i te tu kua kitea e teia tangata te tuatua mou, inara e manganui i te Au Kite o Iehova ka rauka i te oronga i tetai ariu anga aiteite ua. Ka rauka ia ratou pouroa te akakite atu kia koe i te rekareka te apai maira no te kite anga i te tuatua mou. Te akakite maira te au kiteanga ka aru mai i teia.
Te Apai Maira te Au Apiianga Tuatua Mou Puka Tapu i te Rekareka
Kua maata mai a Margarita Königer i Munich, i Tiamani, i te tuatau o te Tamaki II o Teianei Ao. E akara anga putuputu te au are ka e te pomuanga. Kua mate tona tuakana i roto i te tamaki. Iaia e aere ra ki te au pure ekaretia Katorika, kua akarongo aia i te au pure e tuatua ia ra no te au vaeau Tiamani e te arataki, ko Hitler. I muri mai i te tamaki, kua rauka iaia tetai apiianga kia aere ki tetai apii teitei i Unaite Teite ei tuanga no tetai porokarama taui anga tamariki apii. Kua kite aia e kua oaoa te tangata kiaia, no reira kua umere aia e eaa te akakeu ra i te au tangata, to ratou anoano anga kia noo au ua, kia irinaki kore e te riri atu i tetai i te tuatau o te tamaki. I Munich, kua aravei aia i te Au Kite o Iehova, na roto i tetai apii anga i te Puka Tapu ma ratou, kua kite aia i te au pauanga ki tana au uianga. Kua tuatua aia e: “Kua akaari ia mai kiaku mei roto mai i te Puka Tapu e te o maira te au vaerua kino . . . Te kapiki ra te Puka Tapu ia ratou e ‘au tutara o teianei ao,’ e, e tika rai, te tuatua ra ia Satani ‘tei pikikaa i to te ao katoatoa nei.’ . . . Te akavaanga i to ratou tu atua kore, au raveanga tiaporo o te pa enua e te au tangata, mei teaa ra te tau e te merengoanga ua i teia au pau anga!”—Ephesia 6:12; Apokalupo 12:9.
Kua tamou ua atu a Margarita: “Kua apai mai kiaku te rekareka anga maata te kite anga i ta te Atua au apinga no te akatikaanga i te au manamanata o te enua. Kare, kare e na etai manako tangata me kore akaaere anga, tei akanoo ia atu e te au tangata apiipii o teianei ao. Mari ra, te akaari maira te Puka Tapu e na tetai kavamani ou i te rangi e akono i te au mea o te enua nei. . . . Kua apii a Iesu Karaiti i tana au pipi kia pure: ‘Kia tae toou basileia.’ . . . Kua akamata au i te kite i teia patireia e e kavamani tika tikai e na te reira anake ua, e raukaʼi te au tikai takapini i teianei ao.” I te vaitata anga i te 30 mataiti, kua tavini ana a Margarita ei mitinari i roto i etai au enua Aperika e rima—te au 19 mataiti i topa kua akapouia te akakite anga i te tuatua mou ki te au tangata akaaka o Ouagadougou, i Pukina Vato.
Kare to Margarita kiteanga i te mea umere rava. E manganui kua ariu papu mai me kite ratou e te pure ra te orometua o Kerititome i nga tua e rua o te ngai tamaki anga ki te Atua no te autu anga. Te kite ra te aronga ngakau tika i te tu tau o te akamarama anga a te Puka Tapu e kare a te Atua apinga i rave ma te au tamaki anga a te tangata inara kua tupu teia no te mea “te vai ua nei rai to te ao ravarai i raro ake i taua vaerua kino ra.” Te apii ra teia aronga kimi kite e ko te au Kerititiano mou “kare ratou i to teianei ao” inara kia vai neutara ua i roto i taua au mea ra. Te kiteanga e kua rave te Au Kite o Iehova i te reira turanga, kua papu tikai i teia aronga inangaro ou e kua kitea e ratou te tuatua mou. Ka tupu teia aronga i te manakonakoanga e te rekareka anga ia ratou e kite maata ra e eaa ra te Atua i akatikaʼi i te kino e akapeea aia kare e roa atu ana ka apai mai i te au turanga tika e te au ki runga i te enua na roto i tona Patireia.—1 Ioane 5:19; Ioane 17:16; Mataio 6:9, 10.
Ka Apai Mai te Au Kaveinga Puka Tapu Mou i te Rekareka
Kua manako a Daniel Rosero o Ekuatoa e mea puapinga kore te oraanga; no reira kua akamata aia i te inu maata i te kava. Kua apii te akonoanga tana e aere ana kiaia e okotai apinga ka rauka iaia i te akara atu koia oki ko te mate e te ai era. Kua pau mai aia, “Ka tutungiia au, no reira e akatika mai kia inu au!” E pamiri tona e varu kare aia e akono ana, e ta ua ana aia ma tana vaine, ko Delia. Kua tupu tetai take puapinga i tetai popongi Tapati i te araveiia anga ratou e te Au Kite o Iehova e kua akamata i te apii i te Puka Tapu. Te taime mua teia i aere ei a Daniel ki te akaputuputuanga kotinga a te Au Kite o Iehova, kua kite aia e kua kitea eia te tuatua mou. Kua tuatua aia e: “Kua va ua te akaaerenga iaku. Kua piri atu tetai tangata ki tetai, te maata anga ia ratou, ma te kapipiti. Ka kite koe i te aroa i roto i te urupu tangata. Kare e tangata kai avaava. Kare e tuatua viivii. . . . Te maara nei iaku na te manako anga, e ‘Ko teia te tuatua mou!’ Kare oki e no te mataku o te mate me kore te mataku anga i te openga o te ao tei akakeu mai iaku. Mari ra no te tu ma o te akaaerenga.”
Kua riro mai te katoa anga o te pamiri Rosero ei Au Kite o Iehova. Kua mako mai to ratou oraanga pamiri e to ratou turanga i te pae vaerua ia ratou e taangaanga ra i te au kaveinga a te Puka Tapu. Kua tuatua a Delia Rosero e: “Kite koe ka oronga pouroa au i te reira ki te tuatua mou o te Puka Tapu. Koai te ka kite e teiea ngai taku tamariki ma te kore te Tuatua a te Atua? Pouroa ia ratou e itu kua papetitoia e te maroiroi ra. Kua riro te tuatua mou ei oraanga ou, ei mataora anga ou, noku.”
Kare i te mea tau rava te kite anga o te pamiri Rosero. E manganui i roto i to tatou tuatau te tamanamanata ia ra e te au manamanata. Ko tetai tumu kare e akangateiteiia ana te au turanga akono meitaki tei orongaia i roto i te Puka Tapu, mei tei raveia e te uki o mua ana. Kua aru te maata anga o te au akonoanga i teia peu, na roto i te ingoa o te akakoromaki anga me kore te manako ra ratou i te au tauianga o te tuatau e apinga taito te au tu akono meitaki. No reira, mei tetai ke, kua akarukeia te Rosero kia manako ua ma te kore te arataki anga a te Puka Tapu. Inara, me marama mai taua au tangata akaaka i to te Atua manako no runga i te au tu akono e te oraanga pamiri, ka taangaanga ratou ma te kore e taroaroa i ta ratou i apii. Mei ta ratou au tua ka rauka ia tatou te kite i te au tupu anga meitaki no te akapera anga.
Kia Tatanuia te Rekareka
Inara, kare teia e te aite ra, e tei roto te Kerititiano i te au taime ravarai i te tu rekareka. E tikai, te au tu ngata ta te tangata e atoro ra, mei te kore e angaanga, te maki, e te mate anga, ka tupu katoa ki te au Kerititiano. Ka tamou katoa te au Kerititiano i te ta i to ratou uaorai tu apa ua e te tu paruparu. Te tuatua ra te akakite anga Puka Tapu ia Lota “tei mamae i te tuatua viivii a te aronga kino ra” i roto i te oire o Sodoma. Kare e rauka i te au Kerititiano tiratiratu i te kopae i te reira au manako me kite atu i te au turanga kino e vai ra.—2 Petero 2:7, 8.
Inara, ko te aronga tei kite i te tuatua mou e meitaki ia. Ei akaraanga, ko tetai tangata irinaki te aue ra no runga i tetai tei mate kare e ka manako “taitaia, mei tetai papaki kare o ratou tiakianga ra.” Kare e maata roa tona mamaeanga. Te tika ra teia no tetai atu au manamanata. Ko te tangata tei kite i te tuatua mou kua kite i te tu ngata e mea poto ua. Na te manakonako anga e akariro kia ngoie ua i te autu i raro ake i te au tu ngata. Ka tauturu katoa tetai i te oraanga tau.—1 Tesalonia 4:13.
Kua oronga a Paulo ki te au Kerititiano i teia akamaroiroi anga: “E rekareka i te Atu ra, aua e tivata, e te tuatua akaou atu nei au, Kia rekareka rai kotou.” (Philipi 4:4) Te akaari maira teia e ka rauka ia tatou pouroa teia rekareka, ka rauka katoa kia akakoreia te reira. Ka riro te au taitaia o teia akatere anga taito o te au mea ei arairai anga. Kapiti mai, te akakite maira te Puka Tapu kia tatou e kia tatanu tatou i te rekareka, ko tetai ia o te ua o to te Atua vaerua. (Galatia 5:22) Me tamou ua atu koe i te apii i te tuatua mou e te akamaara anga iakoe uaorai i te au akameitaki anga pae vaerua tei apai mai e ka apai mai, kare toou rekareka e kore. Ka ketaketa te reira ia tatou e aro atura i te tuatau me ‘orei [te Atua] i te roi mata katoatoa’ mei te au mata o te tangata e kore rava “te aue, e te mii; e te mamae.”—Apokalupo 21:4.
[Au Tutu i te kapi 8]
E manganui kua umere i te rekareka e te meitaki i te akaaerenga i ko i te au akaputuputuanga a te Au Kite o Iehova