E Irinaki kia Iehova!

“E irinaki kia Iehova ma to ngakau katoa ra.”​—MASELI 3:5.

1. Akapeea a Maseli 3:5 te riro anga mai ei mea umere ki tetai mapu tane, e eaa te tupu anga roa?

KUA tata tetai mitinari e: “‘E IRINAKI KI TE ATU MA TO NGAKAU KATOA; E IRINAKI KARE KI TOOU UAORAI KITE.’ Kua riro teia au tuatua mei te Puka Tapu, tei vaiia e te tautau ra i runga i tetai paruru i te kainga taku e atoro ra, ei opu i toku akara anga. No te toenga o te reira ra, kua manakonako au ia ratou. Ka rauka ainei iaku, i ui ei au kiaku uaorai, te irinaki i te Atua ma toku ngakau katoa?” E 21 o teia tangata mataiti i te reira taime. I te 90 mataiti e te tavini akono meitaki ra rai ei tangata pakari i Perth, Otereria, ka rauka iaia i te akara ki muri ki tetai oraanga puapingaia ma te uua o te irinaki anga kia Iehova ma te ngakau katoa kapiti mai te 26 mataiti maroiroi te painiaanga i te au ngai mitinari ou i Ceylon (Tiri Ranaka i teianei), Puma (Maianama i teianei), Mareia, Tairani, Initia, e Pakitana.a

2. Eaa te tu irinaki papu e tau ia Maseli 3:5 kia patu ki roto ia tatou?

² “E irinaki kia Iehova ma to ngakau katoa ra”​—teia au tuatua a Maseli 3:5, mei tei tataia e te New World Translation, e tau ia kia akakeu ia tatou katoatoa kia tamou ua atu i te orongaanga i to tatou oraanga kia Iehova ma te ngakau katoa, te irinaki papu anga e ka rauka iaia i te akaketaketa i to tatou akarongo, pera katoa te autu atu i te au manamanata mamaata ra. (Mataio 17:20) Ka akara matatio ana tatou ia Maseli 3:5 i tona akapapaanga tuatua.

Ikuiku Anga Mei ta te Metua Ra

3. (a) Eaa te akamaroiroi anga te ka kitea i roto i te au pene mua e iva o Maseli? (e) No teaa ra tatou ka akara meitaki ei ia Maseli 3:1, 2?

³ Te kaka maira te nga pene akamataanga e iva o te puka Puka Tapu o Maseli ma te ikuiku anga mei ta te metua ra, e ako anga pakari mei ko mai ia Iehova no te katoatoa tei akara atura ki mua ki te rekarekaanga i te akatamariki angaia i te rangi ra me kore “te rangatira meitaki o te tamariki a te Atua ra” i runga i tetai parataito i te enua nei. (Roma 8:18-21, 23) Teia te ako anga pakari penei te ka taangaangaia e te au metua no te utuutuanga mai i te tamariki tamaroa e te tamariki tamaine. E puapinga te ako a Maseli pene 3, tei akamata ra ki te akamatakite anga: “E taku tamaiti, auraka e akangaropoina i taku nei ture; e kia akono marie toou ngakau i taku nei au akauenga.” I te au ra openga o te ao kino o Satani e neke atura ki tona openga, e tau tatou kia akarongo meitaki ki ta Iehova au akamaaraara anga. Penei e e roa te tuatau, inara ko te taputou ki te katoatoa tei tamou marie ra koia oki “e au rā roa oki, e te au mataiti ora, e te au, ta te reira e kapiti katoa mai kia koe ra”​—te ora mutu kore i roto i ta Iehova akatereanga ou.​—Maseli 3:1, 2.

4, 5. (a) Eaa te piri anga mataora te akatutuia ra ia Ioane 5:19, 20? (e) Akapeea te ako anga ia Deuteronomi 11:18-21 te angaanga anga i to tatou tuatau?

⁴ Ka riro tetai piri anga mataora i rotopu i te metua tane e te tamaiti ei mea akaperepere maataia. To tatou Anga, ko te Atua ko Iehova, kua akanoo aia no te reira kia akapera. Kua akakite a Iesu Karaiti i tona uaorai piri anga vaitata ma Iehova ra: “Kare e tika ta te Tamaiti kia rave aia anake uaorai, ko tana ra i kite i te Metua i te rave anga; ko te au mea katoa tana e rave ra, koia katoa ta te Tamaiti e rave. E akaperepere rai oki te Metua i te Tamaiti, e akakite mairai oki kiaia i te au mea katoa tana tikai e rave ra.” (Ioane 5:19, 20) Kua akakoro a Iehova e e tau kia tupu tetai piri anga mei teia i rotopu iaia uaorai e tona pamiri katoatoa i te enua nei, e pera katoa i rotopu i te au metua tane tangata e ta ratou tamariki.

⁵ Kua akamaroiroiia tetai piri anga pamiri irinaki ra i roto ia Iseraela taito ra. Kua ako a Iehova i te au metua tane i reira: “E teianei e vaio kotou i taua au tuatua naku nei ki roto i to kotou ngakau, e ki roto i to kotou vaerua, e tākai oki i te reira ki rungao i to kotou rima ei akairo, e kia riro oki mei te tarae ki mua tikai i to kotou na mata. E apii oki kotou i te reira ki ta kotou au tamariki, i te karangaranga anga i te reira kia noo ua koe i roto i to are, e kia aere ua koe na te arataa, e kia akāvai koe, e kia tu oki koe ki runga. E tata oki koe i te reira ki rungao i te au kopa ngutupa are noou ra, e ki rungao i to au ngutupa oire. Kia akamaataia to kotou au rā, e te au rā katoa o ta kotou au tamariki, ki runga i te enua ta Iehova i taputou atu ki to kotou ai metua ra e oronga no ratou ra; mei te au rā o te rangi ki runga i te enua nei.” (Deuteronomi 11:18-21) E tikai ka riro te Tuatua akauruia a to tatou Ikuiku Mekameka ra, ko te Atua ko Iehova, te akapiri vaitata atu iaia ki te au metua e ta ratou tamariki, e pera katoa te katoatoa te tavini ra iaia i roto i te putuputuanga Kerititiano.​—Isaia 30:20, 21.

6. Akapeea tatou te akamareka anga i te Atua e te tangata?

⁶ Te ako anga pakari mei ta te metua ra no te iti tangata o te Atua, te ruaine e te mapu ra, te aere ua atura i roto i te au irava 3 e te 4 o Maseli pene 3: “Auraka rava te aroa e te tuatua-mou e taka ke ia koe ra: e ri piri tikai ki runga i to kaki na; e tata oki i te reira ki runga i te papa o toou ngakau: E kite aroaia mai koe i reira, e te manako meitaki maataia mai, ki mua i te aroaro o te Atua e te tangata katoa nei.” Te meitaki tikai ra te Atua ko Iehova uaorai i roto i te akaarianga i te tu aroa takinga meitaki e te tuatua mou. Mei ta Salamo 25:10 e akakite ra, “te au aerenga katoa o Iehova, ko te [“aroa takinga meitaki,” NW] ïa e te tuatua-mou.” Ei aru ia Iehova, e tau tatou kia akaperepere i teia au tu e to ratou mana paruru, te akapuapinga anga ia ratou mei ta tatou pera anga i tetai ei oko maata e te taraianga ia ratou ki runga i to tatou ngakau ma te kore e tamaia. Ma te aruaru, i reira, ka rauka ia tatou i te pure: “E Iehova e; na to [“aroa takinga meitaki,” NW] e to tuatua-mou e tiaki ua mairai iaku.”​—Salamo 40:11.

Tetai Irinaki Anga Tamou

7. Na teea au tu to Iehova akaari anga i tona tu irinaki papu?

⁷ Ko te tu irinaki, tona aite anga i roto i te Webster’s Ninth New Collegiate Dictionary ko te “irinaki anga papu ki runga i te tu, te kite, te maroiroi, me kore te tika no runga i tetai tangata me kore tetai mea.” Kua tutau ngaueue koreia ra to Iehova tu i roto i tona tu aroa takinga meitaki. E ka rauka ia tatou te akapapu anga katoa i roto i tona kite anga i te rave i tana i taputou, no te mea te akataka ra tona ingoa tikai, ko Iehova, iaia ei Akakoro maata ra. (Exodo 3:14; 6:2-8) Ei Anga ra, koia te Pupui Anga o te maroiroi e te ririnui oraora. (Isaia 40:26, 29) Koia te roto tikai o te tuatua mou, no te mea “ko tei kore e tika i te Atua kia pikikaa ra.” (Ebera 6:18) No reira, te akamaroiroiia ra tatou kia tuku i to tatou irinaki katoa kia Iehova, to tatou Atua, te Tumu katoatoa o te tuatua mou, tei iaia oki te mana katoatoa no te paruru i tona aronga irinaki e te apai mai i tana au akakoroanga mekameka katoatoa ki te autu anga kaka ra.​—Salamo 91:1, 2; Isaia 55:8-11.

8, 9. Eaa ra te tu irinaki e ngere ra i teianei ao, e akapeea to Iehova iti tangata te oronga anga mai i te tuke anga?

⁸ I roto i te ao kino takapini ia tatou, ma te maromaroa te ngere ra te tu irinaki. Inara, te kite ra tatou i te noinoi e te pikikaa i te au ngai ravarai. Te kapi mua o te Me 1993 itiu o te makatini World Press Review tei akakakaia ra ma te tuatua: “TE ARURU ANGA PIKIKAA​—Moni Repo i Roto i te Akatere Anga Ao Ou. Te aere atura te angaanga pikikaa mei Paratiri ki Tiamani, mei te Unaite Teite ki Atenetina, mei Paniora ki Peru, mei Itaria ki Meiko, mei te Vatikana ki Rutia.” Mei tera te tu kua akatumuia te reira ki runga i te tu makitakita, te noinoi, e te irinaki kore, kare ta te tangata ra akatere anga ao ou tutu ua e kokoti i tetai mea mari ra te au taitaia anga maata no te tangata nei.

⁹ Ei akatuke anga ki te au pa enua poritiki, te mataora ra te Au Kite o Iehova ei pa “enua ko Iehova to ratou Atua.” Ka rauka anake ia ratou i te tuatua tikai e, “Te irinaki nei matou i te Atua.” Ka rauka takitai ia ratou i te aue ma te rekareka e: “Ei roto au i te Atua ka akapaapaaʼi au i tana tuatua . . . Ka irinaki au i te Atua, kare au e mataku.”​—Salamo 33:12; 56:4, 11.

10. Eaa tei akaketaketa i te au Kerititiano mapu e manganui no te akono i te tu papu?

¹⁰ I roto i tetai enua Asia te ngai e tauatini ua atu Au Kite mapu tei mamae i te au papaanga pakari e te au tapeka anga, kua riro te irinaki kia Iehova ei tauturu i te maata anga no te tamou marie. I tetai po i roto i te are auri, kua manako atu tetai Kite mapu tei na roto ana i te au tamamae anga kikino e kare e rauka akaou iaia i te tamou marie. Inara kua oro viviki mai tetai atu mapu kiaia na roto i te po kiaia. Kua koumuumu atu kiaia e: “Auraka e tuku ua; kua tuku ua au e mei te reira taime mai kare ake rai oku tu au i te manako.” Kua akaou te mapu mua i tona manako no te tu ngaueue kore. Ka rauka ia tatou i te irinaki tikai ia Iehova e ka tauturu aia ia tatou no te autu i tetai ua atu e te au tauta anga ravarai a Satani no te takino i to tatou tu papu.​—Ieremia 7:3-7; 17:1-8; 38:6-13, 15-17.

11. Akapeea tatou i te akamatutu angaia no te irinaki kia Iehova?

¹¹ Te tatau ra tetai tuanga o te akauenga mua e: “E [“aroa,” NW] atu koe i toou Atua ia Iehova ma to ngakau katoa.” (Mareko 12:30) Ia tatou e manakonako ra i te Tuatua na te Atua, te iri oonu ra te au tuatua mou mekameka ki roto i to tatou ngakau i reira e akakeuiaʼi tatou kia akapou i to tatou katoa i roto i te tavini anga i to tatou Atua umere ra, ko te Atu Ngateitei ko Iehova. Ma te ngakau tei ki ra i te tu ariki nona ra​—no te au mea katoatoa tana i apii ra ia tatou, tana i rave no tatou, e ka rave no tatou​—e akamatutuiaʼi tatou no te irinaki tikai ki roto i tana akaora anga.​—Isaia 12:2.

12. I te au mataiti i aereia mai, akapeea te manganui o te au Kerititiano i te akaari anga i to ratou tu irinaki kia Iehova?

¹² Ka rauka teia irinaki anga i te tatanuia i te au mataiti ka aereia mai. Kua tata tetai Kite akaaka o Iehova tei tavini akono meitaki ra e tere atu i te 50 mataiti i ko i te Totaiete Punanga Tiaki o te au opati maata o Brooklyn, te akamataanga i roto ia Aperira 1927, e: “I te openga o te reira marama kua rauka tetai moni tauturu mei te $5.00 tei tukunaia ki roto i tetai tikiro ma tetai kati te akakiteanga i te irava Puka Tapu ia Maseli 3:5, 6 . . . Kua vai te au tumu ravarai no te irinaki kia Iehova, no te mea i te opati maata kare i roa kua ariki mai au e e ‘tavini akono meitaki e te pakari’ to Iehova te akono ra ma te akarongo i te au inangaro katoatoa o te Patireia i te enua nei.​—Mataio 24:45-47.”b Kua tinamou te ngakau o teia Kerititiano, kare ki runga i te inangaro moni, mari ra ki runga i te raukaanga te “apinga kare e pou ki runga i te rangi” ra. Ma te aiteite ra i teia au ra, te rave ra te tauatini ua atu e tavini ra i te au kainga Betela o te Totaiete Punanga Tiaki takapini i te enua i raro ake i tetai tu koreromotu anga manaia o te putaua. Te irinaki ra ratou kia Iehova i te oronga mai i tei anoanoia e ratou ra i te au ra takitai.​—Luka 12:29-31, 33, 34.

E Irinaki ki Rungao ia Iehova

13, 14. (a) Iea ngai anake ua e kiteaʼi te ako anga pakari? (e) Eaa te ka tau i te kopaeia e raukaʼi te ora atu i te takinokino anga?

¹³ Te manono maira to tatou Metua i te rangi ia tatou e: “Auraka ra e irinaki ki toou uaorai kite.” (Maseli 3:5) Kare rava te aronga ako e te au taote manako o teianei ao e manakonako atu no te akara i te tu pakari e te kite ta Iehova e akaari ra. “Tona kite, e mea kitea koreia kia kimi.” (Salamo 147:5) I te mea e ka irinaki ki runga i te pakari o te au tangata rongonui o teianei ao me kore ki runga i to tatou uaorai au manako ngakau akakite koreia, ka akara ana tatou kia Iehova, tana Tuatua, e te aronga pakari i roto i te putuputuanga Kerititiano no te ako pakari.​—Salamo 55:22; 1 Korinetia 2:5.

¹⁴ Te tu pakari o te tangata me kore te parau o te turanga kare te reira e puapinga i roto i te ra timata anga pakari te aere viviki maira. (Isaia 29:14; 1 Korinetia 2:14) I Tiapani i te tuatau o te Tamaki II o Teianei Ao, kua iki tetai tiaki parau ma te tau ra o te iti tangata o te Atua i te irinaki ki rungao i tona uaorai kite. I raro ake i te taomi anga kua riro mai aia ei tangata akaruke i te akarongo, e akaruke katoa atura te maata anga o te anana i raro ake i te takinokino anga. Kua tuatua, tetai tuaine Tiapani, ma te tu mataku kore tei ora mai i te akono anga kikino i roto i te au pia are auri viivii ra e: “Ko te aronga tei toe mai ma te akarongo ra kare o ratou tu kite takake e kare ratou i kiteia. Te papu ra e te irinaki ua ra tatou katoatoa kia Iehova ma to tatou ngakau katoa.”c

15. Eaa te tu atua te anoanoia ra i te mea e kia akamareka tatou ia Iehova?

¹⁵ Te o maira te tu akaaka, i roto i te irinakianga kia Iehova, i te mea e i to tatou uaorai kite. Mei teaa atura te puapinga i teia tu no te katoatoa tei inangaro ra i te akamareka ia Iehova! I na, to tatou Atua, noatu koia te Atu Ngateitei o te ao katoatoa e pini ua ake, te akaari ra aia i te tu akaaka i roto i tana au raveanga ma tana au mea anga kite ra. Ka akameitaki tikai tatou no te reira. “Te tuku akaaka nei ra aia iaia uaorai i te akara anga mai ki raro, ki runga i te au rangi, e ki runga i te enua.” (Salamo 113:6, 7) No tona tu akaroa maata, te akakore ra aia ia tatou i to tatou tu apikepike na runga i te tumu o tana mea aroa maata rava atu ki te tangata nei, te atinga tutaki puapinga o tana Tamaiti akaperepereia, ko Iesu Karaiti. Mei teaa atura to tatou tu akameitaki no teia tu takinga meitaki oronga uaia!

16. Akapeea te au taeake tungane te itae anga i te au akameitaki anga i roto i te putuputuanga?

¹⁶ Te akamaara maira a Iesu uaorai ia tatou e: “Te akateitei iaia uaorai, e akamoraroia ïa; e te akamoraro iaia uaorai, e akateiteiia ïa.” (Mataio 23:12) Na roto i te tu akaaka, e tau te au taeake kia itae atu i te au apainga i roto i te putuputuanga Kerititiano. Inara, e tau te au akaaere kia manako i to ratou akataoonga anga, kare ei akara anga turanga, mari ra ei tuatau no te rave i tetai angaanga, ma te tu akaaka, te tu ariki, te tu aruaru, mei ta Iesu i rave ra, tei karanga e: “Te angaanga ua nei rai toku Metua, ka angaanga katoa oki au.”​—Ioane 5:17; 1 Petero 5:2, 3.

17. Eaa te tau ra ia tatou katoatoa kia ariki, te aratakianga atu ki teea angaanga?

¹⁷ Kia akaaka ua rai tatou e te pure ma te ariki e e one ua tatou i ta Iehova akaraanga. Mei teaa atura to tatou rekareka, i reira, te [“aroa takinga meitaki,” NW] o Iehova, mei tupua roa mai ïa, e ka tu e rimua ki te aronga i mataku iaia ra, e tana ra tuatua-tika ki te tamariki a te au tamariki”! (Salamo 103:14, 17) E tau tatou katoatoa i reira ei aronga apiipii ma te aruaru i te Tuatua na te Atua. Te taime tei akapouia i roto i te apii naau uaorai e ta te pamiri, e i roto i te au uipaanga putuputuanga, e tau te reira i rotopu i to tatou au ora puapinga rava atu i te epetoma takitai. Na teia tu te patu ra tatou i “te kite i [“Tei,” NW] tapu ra.” Koia oki “ko te kite ïa.”​—Maseli 9:10.

“I Toou Katoa ra Au Aerenga . . .”

18, 19. Akapeea tatou i te taangaanga anga ia Maseli 3:6 i roto i to tatou oraanga, e eaa te tupu anga?

¹⁸ Te akatereanga ia tatou kia Iehova, te Tumu tu-atua o te kite, te akakite ra a Maseli 3:6 a muri akera e: “Auraka e akangaropoina iaia i toou katoa ra au aerenga; e nana e akakite kia koe i toou ra au arataa.” Te akamanakoanga ia Iehova te o maira te piri vaitata anga kiaia na roto i te pure. Noatu e teiea tatou noatu eaa te turanga ka tupu mai, te rauka viviki ra ia tatou i te aere kiaia na roto i te pure. Ia tatou e rave ra i ta tatou au angaanga i te au ra, ia tatou e akapapa ra no te angaanga tutu aere, ia tatou e aere ra mei tera are i tera are te akakitekiteanga i tona Patireia, ta tatou pure putuputu koia kia akameitaki aia i ta tatou angaanga. No reira, ka rauka ia tatou te akameitakianga maata tikai e te rekareka o te ‘aaere anga ma te Atua,’ te papu anga ‘e nana e akakite kia kotou i to kotou ra au arataa,’ mei tana i rave no tei mataku ra i te Atua koia a Enoka, Noa, e te au Iseraela akarongo ra, mei ia Iosua e Daniela.​—Genese 5:22; 6:9; Deuteronomi 8:6; Iosua 22:5; Daniela 6:23; akara katoa ia Iakobo 4:8, 10.

¹⁹ Me akakite tatou i ta tatou pati anga kia Iehova, te papu ra ia tatou e ‘na te au o te Atua, ko tei maata ua atu i te kite tangata, e akamaroiroi mai i to tatou ngakau e to tatou manako i te Mesia nei ia Iesu.’ (Philipi 4:7) Teia au o te Atua, tei akaataia i roto i tetai tupu anga rekareka, ka riro teia ei akakite i ta tatou tuatua ki te au tangata o te ngutuare ta tatou ka aravei i te tuatau angaanga tutu aere. (Kolosa 4:5, 6) Ka riro katoa te reira ei akamaroiroi i te aronga tei paia e te au tu apiapi me kore te au tika kore tei matauia i to teianei ao, mei ta te papaanga te ka aru mai e akaari maira.d

20, 21. (a) I te tuatau Nati kino ra, akapeea te tu papu o te Au Kite o Iehova i te akamaroiroi anga i tetai pae atu? (e) Eaa te tuatua papu e tau i te reo o Iehova i te akaaraara i roto ia tatou?

²⁰ Ko Max Liebster, e Iuda noa ua nei tei ora mai i te Akapou Anga Ai na roto i tetai akara anga temeio, kua akatutu aia i tona tere ki roto i tetai puakapa Nati tamate anga na roto i teia au tuatua: “Kua rokaia matou ki roto i te au pia tere tei tauiia ei au pia rikiriki e manganui no te rua tangata. Ma te tueia ki roto i tetai ia ratou ra, kua kite atu au i tetai mouauri ma te nga mata tei akaata ra i te tu ponuiaau. Tei reira aia no te mea no tona tu akangateitei i te ture a te Atua, te ikianga i te are tapeka anga e penei te mate i te mea e ka akamaringi i te toto o tetai atu au tangata. Koia tetai o te Au Kite o Iehova. Kua apainaia tana tamariki mei iaia ra, e kua tamateia tana vaine. Te tapapa ra aia no te piri atu ki tona aerenga. Kua apai mai te tere e 14 ra i tetai pau anga ki taku au pure, no te mea i te tuatau tikai o teia tere ki te mate i kite ei au i te manakonakoanga o te ora mutu kore.”

²¹ I muri ake i te kiteanga i te Auschwitz “te aua o te au riona,” tei kapikiia e ia ra, e i muri ake i te papetito angaia, kua akaipoipo teia tungane i tetai o te Au Kite o Iehova tei tapekaia rai e tei mamae ra tona metua tane i roto i te puakapa tamamae anga i Dachau. I tona metua tane e vaira i reira, kua akarongo aia e kua tapeka katoaia tana vaine e te tamaine mapu ra. Kua akatutu aia i tona tu: “Kua manamanata tikai au. I reira i tetai ra iaku e tu ra i roto i te raini no te pai, kua akarongo au i tetai reo te taikuanga ia Maseli 3:5, 6 . . . Kua tangi te reira mei tetai reo ra no te rangi mai. Ko te reira tikai taku i anoano no te akaoki mai i toku tu tau.” E tikai ra, teia reo no tetai mouauri ke atu te taiku ra i teia irava, inara te akakite tikai maira te tupu anga e mei teaa atura te ririnui o te Tuatua na te Atua te rauka anga i te akakeu ia tatou. (Ebera 4:12) E tika i to Iehova reo kia tuatua ririnui mai kia tatou i teia ra na roto i te au tuatua i ta tatou irava mataiti no te 1994: “E irinaki kia Iehova ma to ngakau katoa ra”!

[Au Tataanga Rikiriki i Raro]

I te Tapoto Anga

◻ Eaa te tu o te ako te orongaia ra i roto ia Maseli?

◻ Akapeea tatou te puapinga anga mei te irinaki anga kia Iehova?

◻ Eaa te o atura ki roto i te irinakianga ki rungao ia Iehova?

◻ Eaa ra tatou ka manako atu ei ia Iehova i to tatou au aerenga katoatoa?

◻ Akapeea a Iehova i te akatikatika anga i to tatou au arataa?

[Au Tutu i te kapi 15]

Te reka ra te au tangata ngakau tika i te tuatua Patireia rekareka ra