Au Uianga a te Aronga Tatau

Ia Philipi 2:9, kua tuatua a Paulo no runga ia Iesu: “I akateitei rava atu ei te Atua iaia, e kua oronga mai i te ingoa i maata ua atu i te teitei i te au ingoa ravarai nei nona.” Eaa teia ingoa ou? E mei te mea e meangiti ake a Iesu kia Iehova, akapeea to Iesu ingoa i maata ua atu i te teitei i te au ingoa ravarai?

Te tatau ra a Philipi 2:8, 9 e: “E koia [Iesu] i kitea mei te tangata nei te tu, kua taakaaka iaia uaorai i te akonoanga e tae ua atu ki te mate, ki te mate satauro ra. I akateitei rava atu ei te Atua iaia, e kua oronga mai i te ingoa i maata ua atu i te teitei i te au ingoa ravarai nei nona.”

Kare te aiteanga o teia tuanga tuatua e i te mea e ko to Iehova ingoa anake ua i maata ua atu i te teitei i te au ingoa ravarai, penei ko Iesu rai teia peretana ko Iehova. Mei ta te akapapa anga i roto ia Philipi pene 2 e akaari maira, kua rauka ia Iesu i tona ingoa teitei i muri ake i tona tuakaou anga. I mua ake i te reira, kare i rauka ana iaia i te reira. I tetai tua, i teitei ua ana a Iehova, e kare rava tona turanga e taui ana. I te mea e kua rauka ia Iesu i tetai ingoa teitei atu i tona ingoa i mua ake i tana angaanga i te enua nei te akapapu maira e kare aia i aiteite kia Iehova. I to Paulo tuatua anga e kua orongaia kia Iesu i te ingoa i maata ua atu i te teitei i te au ingoa ravarai, kua manako aia e i teianei e ingoa teitei rava atu to Iesu i te au mea ora pouroa na te Atua.

Eaa to Iesu ingoa teitei? Ka tauturu mai a Isaia 9:5 ia tatou kia pau. I te totouanga no runga i to te Mesia aereanga mai, ia Iesu, kua tuatua te reira irava e: “Ei runga i tona ra pakuivi te au vai ei: e tapaia tona ingoa ia Umere, Tumu korero, te Atua Mana, te Metua no te tuatau mutu kore, te Ariki no te au.” I konei te piri atura to Iesu “ingoa” ma tona taoonga teitei e te mana, koi pera katoa ei kia marama tatou “i te ingoa i maata ua atu i te teitei i te au ingoa ravarai” tei taikuia ia Philipi 2:9. I akaueia kia tuku te au turi katoa kia Iesu i te kite anga i te taoonga teitei o te mana ta Iehova i oronga kiaia​—e taoonga mana tei teitei rava atu i tei orongaia ki etai ua atu au mea ora. Te tuatua “ua atu” i roto i teia urianga kare i komono tikaia i roto i te tataanga Ereni, inara te akakiteia ra te aiteanga o te irava. Kare to Iesu “ingoa” i maata ua atu i tona uaorai ingoa mari ra e maata ua atu te teitei o te ingoa i te au mea ora ra.

Mei teaa ra to tatou mataora kia piri atu ki te au angera e te au tangata tiratiratu i te tukuanga i te turi i te kite anga i to Iesu ingoa! Te rave nei tatou i teia na te kauraroanga ia tatou uaorai kia Iesu i te taoonga teitei e te ririnui tei orongaia kiaia e Iehova​—“kia kakā te Atua Metua ra.”​—Philipi 2:11; Mataio 28:18.