Te Ingoa o Iehova e Puapinga Kia Iesu

1-2. (a) Eaa ta Iesu i rave i te aiai i mua ake ka tamateia ai aia? (e) I roto i teia atikara, eaa te nga uianga ka uriuri tatou?

E AIAI Paraparau teia ia Nisana 14, 33 T.N., kua rave a Iesu i tetai kaikaianga puapinga e tona au apotetoro. Kua kite aia e ka pikikaa a Iuda iaia, ka tamamaeia aia e ka tamate tona au enemi iaia. No reira, i muri ake i ta ratou kaikaianga aiai, kua akamaroiroi aia i tana au apotetoro. Te vaitata anga ratou i te akaruke, kua rave a Iesu i tetai pure puapinga. Kua tata te apotetoro ko Ioane i teia pure i roto ia Ioane pene 17.

² Eaa ta Iesu pure e akakite maira no runga i tana e manata ra i te reira taime? Eaa te mea puapinga kia Iesu iaia i runga i te enua nei? I roto i teia atikara, ka uriuri tatou i teia nga uianga.

AKAKITE AU I TOOU INGOA KIA RATOU

3. Eaa ta Iesu i akakite no runga i te ingoa o Iehova, e eaa te aiteanga o tana tuatua? (Ioane 17:​6, 26)

³ I roto i tana pure, karanga a Iesu: “Kua akakite atu oki au kia ratou, . . . i toou ingoa.” E puapinga teia kia Iesu no te mea kua taiku aia e rua taime, kia akakiteia te ingoa o Iehova ki tana au pipi. (E tatau ia Ioane 17:​6, 26.) Eaa te aiteanga o tana tuatua? Ka anoanoia ainei aia kia akamārama ki te au pipi e ko Iehova te ingoa o te Atua? E au ngati Iuda te au pipi a Iesu e kua kite takere ratou i tona ingoa, ko Iehova. Kua taikuia tona ingoa e tauatini ua atu taime i roto i te au Irava Ebera. No reira, kare a Iesu e akakite ra i te ingoa ua o te Atua; mari ra te akataka ra aia i te tu tikai o te Atua. Kua tauturu a Iesu i tana au pipi kia kite meitaki ratou ia Iehova, te ō maira to Iehova akakoroanga no te enua e te tangata, eaa tana i rave, eaa tana ka rave e pera tona au tu. Ko Iesu anake rai tei kite meitaki ia Iehova.

4-5. (a) Akapeea te ingoa o tetai tangata i riro ei ei mea puapinga atu kia koe? Oronga mai i tetai akaraanga (e) Akapeea te au pipi a Iesu te kite meitaki anga ia Iehova?

⁴ Ei akaraanga, akamanako ana i tetai tangata pakari i roto i taau putuputuanga, ko David tona ingoa e e taote aia. Kua kite koe iaia no tetai au mataiti. Inara, i tetai rā kua tupu tetai maki kino kia koe e ka anoanoia te tauturu a te taote. Kua apainaia koe ki te are maki e ko teia taeake te taote tei rapakau atu ia koe. Ka riro ainei tona ingoa ei mea puapinga atu kia koe? E mea tika te reira! Kare a David i te tangata pakari ua, mari ra e taote katoa aia tei akaora mai ia koe.

⁵ Mei te reira rai, kua kite takere ta Iesu au pipi i to Iehova ingoa. Inara, kua akaperepere ratou i tona ingoa no te mea kua tauturu a Iesu ia ratou kia kite meitaki ia Iehova. Eaa tatou i tuatua akapera ai? No te mea kua aru a Iesu i te tu o tona Metua i roto i tana tuatua e tana i rave. No reira, te akarongo anga te au pipi i ta Iesu i apii e akapeea aia te akono anga i tetai ke, kua “kite” meitaki ratou ia Iehova.—Ioa. 14:9; 17:3.

KO TOOU INGOA, TAAU I ORONGA MAI NOKU

6. Eaa te aiteanga o ta Iesu tuatua e kua orongaia mai te ingoa o te Atua kiaia? (Ioane 17:​11, 12)

⁶ I roto i tana pure, kua pati a Iesu kia Iehova no tana au pipi: Kia “tiaki koe ia ratou i taau i o mai noku i toou ingoa.” (E tatau ia Ioane 17:​11, 12.) Ko te aiteanga ainei e ka kapikiia a Iesu e ko Iehova? Kare. Te tuatua anga a Iesu no runga i te ingoa o Iehova, kua karanga aia “toou ingoa.” No reira, kare i tauiia te ingoa o Iesu kia Iehova. Eaa te aiteanga o ta Iesu tuatua e kua orongaia mai te ingoa o te Atua kiaia? Te mea mua, kua tono mai a Iehova ia Iesu ei vaa tuatua Nona. Kua aere mai aia e kua rave i te au angaanga umere ma te ingoa o tona Metua. (Ioa. 5:43; 10:25) Te rua, te aiteanga o te ingoa o Iesu koia oki “Ko Iehova oki te Ora.” No reira, ka ō mai rai te ingoa o Iehova ki to Iesu ingoa.

7. Eaa a Iesu i riro ei ei vaa tuatua no Iehova? Oronga mai i te akaraanga.

⁷ Kia mārama eaa a Iesu i riro ei ei vaa tuatua no Iehova, akamanako i teia akaraanga. Ka tono tetai tutara i tetai tangata ei vaa tuatua nona. No reira me tuatua te reira tangata, aite rai tona taoonga ki to te aronga tutara. Mei te reira katoa, e mana to Iesu i te tuatua no Iehova no te mea na Iehova i tono mai iaia.—Mata. 21:9; Luka 13:35.

8. Eaa a Iehova i karanga ai e tei ia Iesu tona ingoa i mua ake ka aere mai ei a Iesu ki te enua? (Exodo 23:​20, 21)

⁸ Kua kapiki te Pipiria ia Iesu e ko “te Logo,” no te mea kua taangaanga a Iehova iaia kia tuatua ki te au angera e te au tangata no Tana ka inangaro ia ratou kia kite e kia rave. (Ioa. 1:​1-3) Ko Iesu katoa te angera ta Iehova i tono kia akono i te iti tangata Iseraela i te metepara. Akakite aia ki to Iseraela kia akarongo ki te angera, karanga a Iehova: “No te mea, tei iaia toku nei ingoa.”a (E tatau ia Exodo 23:​20, 21.) No reira, e vaa tuatua a Iesu Nona e koia te ka akakite i te au mea tika pouroa e e Atua tapu a Iehova.

“E TAKU METUA, E AKAKAKĀ I TOOU INGOA”

9. Eaa i puapinga ai te ingoa o Iehova kia Iesu? Akamārama mai.

⁹ Mei ta tatou i uriuri i mua ake ka aere mai ei a Iesu ki te enua, e puapinga maata te ingoa o Iehova kiaia. Iaia i te enua, kua akaari katoa aia na roto i tana au mea pouroa i rave e te puapinga o te ingoa o Iehova kiaia! Kia vaitata ki te openga o tana tavinianga, kua pati a Iesu kia Iehova: “E taku Metua, e akakakā i toou ingoa.” Kua pau viviki atu tona Metua, na roto i te reo maata: “Kua akakakā au, e ka akakakā akaou atu rai au.”—Ioa. 12:28.

10-11. (a) Akapeea a Iesu te akakakā anga i te ingoa o Iehova? (Akara katoa i te tutu.) (e) Eaa to Iehova ingoa ka anoanoia ai kia akatapu e kia akatikaia?

¹⁰ Kua akakakā a Iesu i te ingoa o tona Metua. Akapeea ra? Kua akakite aia ki tetai ke i to Iehova au tu manea e te au mea umere ta Iehova ka rave. Inara, e maata katoa atu tana ka rave. Akapapu maira a Iesu e kua rave pouroa a Iehova i te au mea ma te tika e e tapu tona ingoa.b Akaari a Iesu i te puapinga o teia, te apii anga aia i tana au pipi kia pure: “E to matou Metua i te ao ra, Kia tapu toou ingoa.”—Mata. 6:9.

¹¹ Eaa to Iehova ingoa i anoanoia ai kia akatapu e kia akatikaia? No te mea i roto i te aua o Edene, kua pikikaa a Satani no runga i te Atua ko Iehova. Akakite a Satani e ko Iehova te pikikaa e te tāpu ra Aia i te meitaki mei ia Adamu e Eva. (Gene. 3:​1-5) Karanga katoa a Satani e kare a Iehova e rave ana i te au mea ma te tu tika. No te pikikaa a Satani, kua manako te tangata e Atua kino a Iehova. I te tuatau o Iobu, akakite a Satani e ko te aronga e tavini ra ia Iehova, te rave ua ra ratou i te reira kia tutakiia mai ratou e Iehova. Karanga katoa tera atu pikikaa e ka akamutu te tangata i te tavini ia Iehova me tupu te tumatetenga, no te mea kare ratou e inangaro ana Iaia. (Iobu 1:​9-11; 2:4) No reira, kua anoanoia tetai tuatau ei akapapu e koai te pikikaa, ko Iehova me ko Satani.

ORONGA AU I TOKU ORA

12. Eaa ta Iesu i rave no tona akaperepere i te ingoa o Iehova?

¹² No tona akaperepere ia Iehova, kua inangaro a Iesu i te akatapu e te akakakā i te ingoa o Iehova. Karanga a Iesu: “Ko au i oronga i toku ora.” (Ioa. 10:​17, 18) Ae, kua akaatinga aia i tona oraanga kia mate no to Iehova ingoa.c Kua akarongo kore te nga tangata mua, ko Adamu e Eva ia Iehova e kua aru ia Satani. Inara, kua aere mai a Iesu ki te enua e kua akapapu i tona inangaro ia Iehova. Kua rave aia i teia na te akarongo anga kia Iehova e pera tana i rave e i tuatua. (Ebe. 4:15; 5:​7-10) Kua vai tiratiratu aia i roto i tona oraanga e tae ua atu ki tona mateanga. (Ebe. 12:2) Na teia mataara, te akapapu ra aia i tona akaperepere ia Iehova e Tona ingoa.

13. Eaa a Iesu i tau ei kia akapapu, e pikikaa a Satani? (Akara katoa i te tutu.)

¹³ I roto i tona oraanga, kua akapapu a Iesu e ko Satani te pikikaa e kare ko Iehova! (Ioa. 8:44) Kua kite meitaki a Iesu ia Iehova i tetai ua atu tangata. Naringa e tika ta Satani au tuatua no runga ia Iehova, ka kite a Iesu i te reira. Inara, kua paruru ua atu rai a Iesu i to Iehova ingoa. Noatu te akaraanga kua akaruke a Iehova iaia, kua akaatinga a Iesu i tona oraanga kia mate, kia vai tiratiratu ki tona Metua.—Mata. 27:46.d

“KUA OTI IAKU TE ANGAANGA TAAU I O MAI NAKU”

14. Akapeea a Iehova te tutaki anga i to Iesu tu tiratiratu?

¹⁴ I te po openga ka mate ei a Iesu, kua pure aia: “Kua oti iaku te angaanga taau i o mai naku.” Kua irinaki aia e ka tutaki a Iehova i tona tu tiratiratu. (Ioa. 17:​4, 5) E kua tau rai a Iesu i te irinaki i tona Metua. Kare a Iehova i vaoo ua iaia ki roto i te vaarua. (Anga. 2:​23, 24) Kua akatu mai aia ia Iesu e kua oronga i te taoonga teitei nona i te rangi. (Phili. 2:​8, 9) Tei tupu, kua tutara a Iesu ei Ariki no te Patireia o te Atua. Eaa ta te reira Patireia ka akatupu? I te tuanga rua o ta Iesu pure, karanga aia: “Kia tae toou basileia. Kia akonoia [to Iehova] anoano i te enua nei, mei tei te ao katoa na.”—Mata. 6:10.

15. Eaa atu ta Iesu ka rave?

¹⁵ Te vaitata mai nei te tuatau, ka tamaki atu a Iesu i te au enemi o te Atua e ka takore i te aronga kino ia Aramagido. (Apo. 16:​14, 16; 19:​11-16) I muri ake i tera, ka uri a Iesu ia Satani ki raro “i te vaarua takere kore,” e kare ana angaanga akaou ka rave. (Apo. 20:​1-3) Ka tutara i reira a Iesu no tetai tauatini mataiti, ka akatupu aia i te ’au ki te enua e ka tauturu i te tangata kia apa kore. Ka akatu mai aia i te aronga mate. E ka akariro i te enua ei parataito. No reira, ka akatupuia to Iehova akakoroanga!—Apo. 21:​1-4.

16. Eaa ta tatou ka tapapa atu i te openga o te Tutaraanga Tauatini Mataiti?

¹⁶ Eaa ta tatou ka tapapa atu i te openga o te Tutaraanga Tauatini Mataiti? Ka kore te ara e te tu apa ua o te tangata. Kare te tangata e anoano akaou i te 144,000 ei taunga no ratou e ia Iesu ei Taunga Maata, e rauka ai tetai pirianga vaitata kia Iehova.“E taua enemi openga ra, ko te mate, ka akakoreia.” No reira, ka akatuakaouia mai te aronga tei mate. Ka apa kore te tangata katoatoa i runga i te enua.—1 Kori. 15:​25, 26.

17-18. (a) Eaa te ka tupu i te openga o te Tutaraanga Tauatini Mataiti? (e) Eaa ta Iesu ka rave me akaoti tana tutara anga? (1 Korinetia 15:​24, 28) (Akara katoa i te tutu.)

¹⁷ Eaa atu tetai ka tupu i te openga o te Tutaraanga Tauatini Mataiti? I te reira atianga, ka tupu tetai mea umere tikai. Kare takiri e tangata e ekoko ia Iehova, ei Atua tapu e te tika. Eaa te tumu? I roto i te aua o Etene, akakite a Satani e pikikaa a Iehova e kare ona aroa e tutara nei Aia i te tangata. Mei te reira taime mai, te akatapuia nei rai tona ingoa e te aronga e akapaapaa ra iaia. No reira, me tae ki te openga o te Tutaraanga Tauatini Mataiti, ka akangateiteiia to Iehova tu tika. Ka akapapu i reira Aia e e Metua aroa aia i te rangi.

¹⁸ I muri ake i te openga o te Tutaraanga Tauatini Mataiti, ka kite te katoatoa i te au pikikaa a Satani no runga ia Iehova. Eaa ta Iesu ka rave me akaoti tana tutara anga? Ka aru ainei aia i te akaraanga o Satani tei patoi atu ia Iehova? Kare rava! (E tatau ia 1 Korinetia 15:​24, 28.) Ka akaoki a Iesu i te Patireia ki tona Metua. Ka kauraro aia ki ta Iehova au ture. Ae, kare aia i aite mei ia Satani, ka oronga a Iesu i tona mana taoonga no tona akaperepere maata ia Iehova.

19. Eaa te aiteanga o to Iehova ingoa kia Iesu?

¹⁹ No reira rai a Iehova i oronga ai i Tona ingoa kia Iesu! Kua akaari meitaki a Iesu i te tu tikai o tona Metua. Inara, eaa te aiteanga o to Iehova ingoa kia Iesu? E puapinga maata atu te reira kia Iesu i tetai ua atu apinga. Kua akaatinga aia i tona oraanga kia mate no to Iehova ingoa, e ka akaoki aia i te au mea pouroa kia Iehova me ope te Tutaraanga Tauatini Mataiti. Akapeea tatou me aru i to Iesu akaraanga? Ka uriuri tatou i te pauanga i te atikara ka aru mai.