“Te Akamori e Tau Ïa ia Kotou”

“Kia tuku atu kotou i to kotou au kopapa ei atinga ora, e te tapu, e tau oki i te Atua, ko te akamori e tau ïa ia kotou.”​—ROMA 12:1.

1, 2. Eaa i aite ei te apiianga i te akono i te kaveinga Puka Tapu ki te kite anga i tetai reo ou?

KUA tamata ana ainei koe i te apii i tetai reo ou? Me koia ia, kare e ekoko anga e ka akatika koe e e angaanga ngata ia. No te mea, e maata atu te kapitiia maira i te apiianga i te au tuatua ou ua ra. Ko te taangaanga karape i tetai reo te umuumu katoaia ra te kite i tona karama. Ka tau koe kia kite e akapeea te piri anga te au tuatua tetai ki tetai e akapeea to ratou kapiti anga ei akataka i te au manako katoatoa.

² Te aite katoa ra ia ki to tatou mou anga i te kite i te Tuatua a te Atua ra. E maata atu te kapitiia maira i to te apii ua anga i te au irava Tuatua Tapu tataki tai ra. Ei akatutu anga, ka tau katoa tatou kia apii i te karama Puka Tapu. Ka tau tatou kia marama eaa te piri anga o te au tuatua tapu tetai ki tetai e akapeea ratou i te rave anga ei au kaveinga te ka rauka kia akonoia i te oraanga i te au ra tataki tai. Ka riro tatou kia “tau tikai i te au angaanga memeitaki katoa ra.”​—2 Timoteo 3:17.

3. No runga i te tavini anga i te Atua ra, eaa te taui anga tei raveia i te 33 T.N.?

³ I raro ake i te akanoonoo nga o te Ture a Mose, ka rauka te tu tiratiratu kia akakiteia, i te maata anga na te akono tika anga i te au ture akataka meitakiia ra. Inara, i te 33 T.N., kua taparaia e Iehova te Ture, “koia i patiti i te reira ki rungao i tona satauro” i tamateia ra tana Tamaiti ki rungao i te reira. (Kolosa 2:13, 14) I muri akera, kare i orongaia ki te au tangata o te Atua ra tetai papaanga maata no te au atinga kia tukuia e te au ture kia aruia. Kareka ra, kua akaueia ratou: “Kia tuku atu kotou i to kotou au kopapa ei atinga ora, e te tapu, e tau oki i te Atua, ko te akamori e tau ïa ia kotou.” (Roma 12:1) Ae, kia oronga te au Kerititiano ia ratou uaorai, ma to ratou ngakau katoa, te meta, te manako, e te ririnui i te angaanga a te Atua ra. (Mareko 12:30; akaaite ia Salamo 110:3.) Inara eaa te aite anga e kia oronga i “te akamori e tau ïa ia kotou”?

4, 5. Eaa te kapitiia ra ki te tavinianga ia Iehova ma tei tau ia tatou?

⁴ Te takiota tuatua “e tau ïa ia kotou” kua uriia mai no te tuatua Ereni lo·gi·kosʹ, tona aiteanga e “tau ïa kia manakoia” me kare “aratakiia e te kite.” Te akaueia ra te au tavini o te Atua kia taangaanga i to ratou akava ngakau tereniia i te Puka Tapu. Kare e kia akatumu i ta ratou au iki anga ki runga i te au ture e manganui tei akanooia maira, ka tau te au Kerititiano kia paunu matakite i te au kaveinga Puka Tapu ra. Ka anoano katoaia ratou kia marama i te “karama” o te Puka Tapu, me kare i akapeea tona au kaveinga tuke tuke i te piri anga ki tetai e tetai. Na reira, e raukaʼi ia ratou i te tuku i te au iki anga tau ma te tau ia ratou ra.

⁵ Te riro nei ainei te aite anga e kare e ture o te au Kerititiano? Kare rava ia. Te tureia maira i te au Tuatua Tapu Ereni Kerititiano te akamori itoro, te ainga tau kore, te ta tangata, te pikikaa, te purepure, te akono tau kore i te toto, e etai atu ara tuke tuke. (Angaanga 15:28, 29; 1 Korinetia 6:9, 10; Apokalupo 21:8) Inara, e maata roa atu i tei umuumuia ra i to Iseraela, ka tika tatou kia taangaanga i tei tau ia tatou kia apii e kia akono e te taangaanga i te au kaveinga Puka Tapu. Mei te kiteanga i tetai reo ou ra, ka pou tetai tuatau e te tauta anga. Akapeea tatou i te tatanuanga i te mea e tau ia tatou?

Tatanuanga i Tei Tau ia Kotou

6. Eaa te o atura ki te apiianga i te Puka Tapu?

⁶ Te mea mua, ka tau tatou ei aronga inangaro kia apiiia i te Puka Tapu. Te Tuatua akauruia mai e te Atua ra e “mea meitaki ei apiianga, ei akoanga, ei akakiteanga apa, e ei akakite mai i te tuatua-tika ra.” (2 Timoteo 3:16) Kare tatou e tau kia manako ua i te pauanga i tetai manamanata kia akakiteia mai i roto tetai irava okotai ua o te Puka Tapu ra. Mari ra, penei ka akamanako tatou i etai au tuatua tapu e manganui te ka akamarama mai i tetai turanga me kare manamanata. Ka anoanoia tatou kia kimi marie i to te Atua ra manakoanga no runga i taua tumu ra. (Maseli 2:3-5) Ka anoano katoa tatou i te kite, no te mea “e tupu te kite, e rauka te kite tikai i te tangata akono meitaki.” (Maseli 1:5) Ka rauka i te tangata kite i te akatakake i te au tumu tataki tai no tetai tumu tuatua e ei reira e kite ei i to ratou piri anga tetai ki tetai. Mei tetai piri ra, ka tuku aia i te au potonga katoatoa i to ratou ngai kia raukaʼi iaia i te akara i te tutu katoa ra.

7. Akapeea te au metua i te uriuri manako anga i te kaveinga Puka Tapu no runga i te ako?

⁷ Ei akatauanga, e tamanako ana i te tumu no te akono anga ei metua. Te tuatua ra te Maseli 13:24 e ko te metua tei aroa i tana tamaiti “e ako ïa iaia i reira ra.” Me akamanakoia teia irava koia anake ra, penei ka tarevake te rave anga i teia tuatua tapu kia akatika i te akautunga kino, e te ketaketa. Inara, te oronga maira a Kolosa 3:21 i tetai apiianga akatau anga: “E te au metua ra, auraka e akariri atu i ta kotou tamariki, ko te taitaia aea ratou.” Te au metua tei taangaanga i tei tau ia ratou e ka akarotai i teia nga kaveinga kare e rave i te ako papa anga te ka karangaia e “tau kore.” Ka akono ratou i ta ratou tamariki ma te pumaana, te kite, e te tapunui. (Ephesia 6:4) Na reira, i te akono anga ei metua me kare i tetai ua atu tumu te kapiti ra i te au kaveinga Puka Tapu, ka rauka ia tatou i te akatupu i tei tau ia tatou na te paunuanga i te au tumu katoa te piri atura. Na teia mataara, ka rauka ia tatou te kite i te “karama” o te au kaveinga Puka Tapu, i to te Atua ra akakoro anga e akapeea te akatupu anga i te reira.

8. Akapeea tatou i te kopae ke anga i te au manako ketaketa, e te marokiakia no te tamataora anga?

⁸ Ko te rua o te mataara e raukaʼi ia tatou te tatanu i tei tau ia ia tatou na te kopae ke i te akonoanga i te au manako ketaketa, e te taui koreia. Te manako anga kare e rauka kia tauiia ka akakore i te tupu anga o tei tau ia tatou. E akamanako ana i te tumu no te tamataora anga. Te karanga ra te Puka Tapu e: “Te vai ua nei rai to te ao ravarai i raro ake i taua vaerua kino ra.” (Ioane 5:19) Ka riro ainei te aiteanga o teia e ko te au puka ravarai, te au teata, me kare porokarama tivi tei maaniia mai e teianei ao e viivii anake e na Satani katoa? Ko te reira manako penei kare i te tau. Inara, penei ka iki tetai papaki kia atea ke mai i te tivi, te au teata, me kare te au puka a teianei ao. Tei ia ratou te reira tika, e kare e tau kia akaapaia ratou no te reira. Inara kare katoa ratou e tau kia taomi atu ia etai ke ra kia rave katoa i te reira turanga ketaketa. Kua neneiia e te Totaiete te au atikara te akanoo maira i te au kaveinga Puka Tapu te ka tau ei tauturu ia tatou kia iki pakari i ta tatou akaangaroi anga me kare tamataora anga. Te aereanga kia mamao atu i teia au kaveinga e te akapiri atu anga ia tatou uaorai ki te au manakoanga tau kore, te au ta ua, me kare purepure te vaira i roto i te maataanga o te tamataora anga o teianei ao e pakari kore maata te reira. Ko te tika, te iki anga pakari i te tamataora anga te umuumuia ra kia taangaanga tatou i tei tau ia tatou i te akono i te au kaveinga Puka Tapu kia raukaʼi te akava ngakau meitaki ki mua i te Atua e te tangata katoa oki.​—1 Korinetia 10:31-33.

9. Eaa te aite anga o te “utoa o te manako”?

⁹ Te maata anga o te tamataora anga i teia tuatau te taka meitaki ra e kare i tau no te au Kerititiano.a No reira, ka tau tatou kia tereni i to tatou ngakau “kia rikarika i te kino ra” kia kore tatou e riro mei tetai papaki i te anere mataiti mua ra “te kite kore i te akama.” (Salamo 97:10; Ephesia 4:17-19) Te akamanako anga i taua au tumu ra, ka umuumu tatou “kia maata atu rai te kite, e te utoa o te [“manako,” NW].” (Philipi 1:9) Ko te tuatua Ereni tei uriia ra e “utoa o te manako” te akataka maira i te “kite manako tau.” Te taiku maira taua tuatua ra i te kite tangata tikai, mei te akara rai. No te tamataora anga me kare tetai ua atu tumu te umuumuia ra tetai iki anga, ka tika to tatou kite tau kia akara atu kia rauka tikai ia tatou te kite kare i te au mea taka meitaki, te au maroanga kerekere e te teatea mari katoa ra te au kara reureu. I te reira katoa oki, ka tau tatou kia kopae i te akapiri atu anga i te au kaveinga Puka Tapu ki tetai manako anga tau kore rava e te raurauanga e kia rave to tatou au taeake ravarai i te reira.​—Philipi 4:5.

10. Akapeea e raukaʼi ia tatou kia kite i to Iehova tu tei akaataia maira ia Salamo 15?

¹⁰ Te toru o te mataara no te tatanu i tei Tau ia tatou ko te matakite i to Iehova ra manakoanga e kia tanu oonu i te reira ki roto i to tatou ngakau. I roto i tana Tuatua, te akakite maira a Iehova i tona tu e te au turanga. Ei akatauanga, ia Salamo 15, ka tatau tatou i te tu o te tangata ta Iehova i pati ei manuiri ki tona puakapa. Ka rave taua tangata ra i te tuatua tika, ka tuatua i te tuatua mou ki tona ngakau, e kia tiratiratu ki tana au taputou, e kare e morimori i ta etai ke ra. I te tatauanga i teia taramo, e ui kia koe uaorai, ‘Te akataka nei ainei teia au tu iaku? Ka pati mai ainei a Iehova iaku ei manuiri ki roto i tona puakapa?’ Ka akamaroiroiia to tatou au mana kite ia tatou e akariro ra kia rotai atu i to Iehova ra au arataa e te manako anga.​—Maseli 3:5, 6; Ebera 5:14.

11. Akapeea te au Pharisea i “te kopae ua nei oki i te tuatua-tau e te anoano i te Atua”?

¹¹ I roto i teia tu tikai te topa anga kino o te au Pharisea. Kua kite te au Pharisea i te papaanga o te Ture ra mari ra kare i kite tikai i tona “karama.” Kua kite ratou i te tuatua e manotini ua atu tumu rikiriki o te Ture, mari ra kare ratou i kite i te Tu o tei turu ra i te reira. Kua tuatua atu a Iesu kia ratou: “Te oronga na kotou i te ngauru o te minete, e te pegano, e te au rakau rikiriki ravarai, e te kopae ua nei oki i te tuatua-tau e te anoano i te Atua!” (Luka 11:42) Ma to ratou manako ketaketa e te au ngakau marokiakia, kare i rauka i te au Pharisea te taangaanga i tei tau ia ratou. Kua kitea to ratou manakoanga tau kore i to ratou akaapa anga i te au pipi a Iesu no te uuti anga titona e te kai anga i te reira i te Tapati; inara, i muri mai i taua ra rai, kare ratou i kite i tetai manako i to ratou akava ngakau i ta ratou kimi anga tuatua e ta ia Iesu!​—Mataio 12:1, 2, 14.

12. Akapeea tatou e riro ei kia rotai atu kia Iehova ra ei Peretana?

¹² Ka anoano ia tatou kia tuke mei te au Pharisea ra. Ka tau to tatou kite i te Tuatua a te Atua ra kia tauturu ia tatou kia rotai atu kia Iehova ra ei Peretana. Akapeea e raukaʼi ia tatou te rave i teia? I muri ake i te tatauanga i etai tuanga o te Puka Tapu me kare i te au puka akatumuia i te Puka Tapu ra, kua tauturuia tetai papaki na te tamanako anga i te au uianga mei teianei, ‘Eaa ta teia akakite anga e apii mai nei iaku no Iehova e tona au tu? Akapeea au i te akakite anga i to Iehova au tu i taku akono anga ma etai ke ra?’ Na te akamanakoanga i teia tu uianga ka akatupu i tei tau ia tatou e ka tauturu ia tatou kia riro ei aronga “aru [tatou] i te Atua.”​—Ephesia 5:1.

Au Tavini no te Atua e Karaiti, Kare no te Tangata

13. Akapeea te au Pharisea i te rave anga, mei te aronga akatere i te mea tau ra?

¹³ Ka tau te aronga pakari kia tuku i te aronga i raro ake i ta ratou utuutu anga kia taangaanga i tei tau ia ratou ra. Kare te au mema o te putuputuanga i te au tavini no te au tangata nei. “E te akono nei au i te mea e marekaʼi te tangata,” ta Paulo i tata, “kare ïa au i te tavini o te Mesia i reira.” (Galatia 1:10; Kolosa 3:23, 24) Ei tuke anga, kua anoano te au Pharisea kia irinaki te au tangata e e maata atu te puapinga kia rauka te marekaanga o te au tangata kare to te Atua ra. (Mataio 23:2-7; Ioane 12:42, 43) Kua akataoonga te au Pharisea ia ratou uaorai kia riro ei aronga akatere i te mea tau tei akapapa ra i ta ratou uaorai au ture e kua akava ia etai ke ra i ta ratou rave anga i te reira. Te aronga tei aru i te au Pharisea ra kua paruparu mai to ratou akava ngakau tereniia i te Puka Tapu kia taangaangaia, ko te tika kua riro ratou ei au tavini no te au tangata.

14, 15. (a) Akapeea te aronga pakari i te akaari anga ia ratou uaorai ei au oa angaanga ma te anana ra? (e) Akapeea te aronga pakari i te akono anga i te au tumu no te akava ngakau ra?

¹⁴ Te kite nei te aronga pakari Kerititiano i teia tuatau e kare te anana i akanooia kia kauraro tikai ia ratou. Ei runga i te au Kerititiano tataki tai tana uaorai apainga. (Roma 14:4; 2 Korinetia 1:24; Galatia 6:5) Ko teia te mea tika. Ae, me e au tavini no te au tangata te au mema o te anana, eaa ta ratou ka rave me kare taua au tangata ra i reira? E tumu tikai to Paulo no te rekareka anga i to Philipi ra: “Kare akenei kotou i tivata i te akono, kare ra iaku anake i noo ki o kotou na, kua maata ra iaku i taka ke io nei, e rave akaoti ua i to kotou uaorai ora ma te mataku e te rutetetete.” E tavini tika tikai ratou no Karaiti, e kare no Paulo.​—Philipi 2:12.

¹⁵ No reira, i te au tumu no te akava ngakau, kare na te aronga pakari e tuku te au tika no te aronga i raro ake i ta ratou utuutu anga. Ka akataka atu ratou i te au kaveinga Puka Tapu te o atura ki tetai tumu e ka tuku atu na te aronga tataki tai ra e taangaanga i ta ratou uaorai i tau ia kia tuku i te tika. E apainga maata teia, inara ko teia tetai te tau ra nana uaorai e rave.

16. Eaa te akatere anga i Iseraela ra no te akonoanga i te au manamanata ra?

¹⁶ E akamanako ana i te tuatau i taangaanga ra a Iehova i te au akava ei arataki i to Iseraela. Te akakite maira te Puka Tapu kia tatou: “Kare o Iseraela ariki i te reira au rā: rave atura te tangata katoa i tei tau i tona uaorai mata.” (Akava 21:25) Inara kua oronga mai a Iehova i tetai ravenga no tona iti tangata kia rauka te arataki anga. E aronga pakari to te au oire ravarai tei rauka ra ia ratou te oronga i te tauturu pakari i te au uianga e te au manamanata. Kapiti katoa, kua rave te kau taunga Levi i tetai mana no te meitaki na te apiianga i te au tangata i te au ture a te Atua. Me tu mai etai tumu ngata, kua tuatua atu te taunga maata ki te Atua na te Urima e te Tumima. Te tuatua ra te Insight on the Scriptures: “Te tangata tei akono ra iaia uaorai i teia au apinga, tei rauka ra iaia te kite i te ture a te Atua e kua akono i te reira, e arataki meitaki tana no tona akava ngakau. Tana raveanga ‘i tei tau ra i tona uaorai mata’ i taua tu ra kare e riro ei kino. Kua tuku a Iehova i te au tangata ra kia akaari i te tu manako e te mataara puareinga me kare puareinga kore.”​—Voriumu 2, kapi 162-3.b

17. Akapeea te aronga pakari i te akaari anga e te ako ra ratou kia tau ki ta te Atua ra au turanga kare i ta ratou uaorai?

¹⁷ Mei te au akava e te kau taunga i Iseraela ra, ka oronga te aronga pakari o te putuputuanga i te tauturu pakari no te au manamanata e ka oronga i te ako puapinga. I etai taime, ka rave ratou i te “akakite ua i te apa, e ako atu, e akamaroiroi atu, ma te akakoromaki maata e te apii marie anga atu.” (2 Timoteo 4:2) Ka rave ratou i te reira kia tau ki ta te Atua ra au turanga, kare i ta ratou uaorai. Mei teaa ra te meitaki o teia me akanoo te aronga pakari i tetai akaraanga e te tauta anga kia itae i te au ngakau ra!

18. Eaa ra i meitaki ei no te aronga pakari kia itae atu i te au ngakau ra?

¹⁸ Ko te ngakau te “matini” o ta tatou angaanga Kerititiano. No reira te tuatua ra te Puka Tapu: “Ko te tumu oki te reira o te ora.” (Maseli 4:23) Te aronga pakari tei akaoraora ra i te au ngakau ka kite e te akakeuia ra te aronga i roto i te putuputuanga kia rave i tei rauka katoa ia ratou i te angaanga a te Atua ra. Ka riro ratou na ratou uaorai e akamata, kare e na etai ke ra e akakeu. Kare a Iehova e anoano i te akarongo oparaia ra. Te kimi ra aia i te akarongo no roto mai i te ngakau ki te aroa. Ka rauka i te aronga pakari i te akamaroiroi i taua angaanga no te ngakau akakeuia ra na te tauturuanga i te aronga o te anana ra kia akatupu i tei tau ia ratou.

Tatanuanga “i te Manako o Karaiti”

19, 20. Eaa ra i puapinga maataʼi no tatou kia tatanu i te manako o Karaiti ra?

¹⁹ Mei te akakiteia ra, kare e rava te kite ua i te au ture a te Atua ra. “E apii mai koe iaku,” ta te tata taramo i pati, “kia akono au i taau ture, ka akono rai au i te reira ma te ngakau katoa ra.” (Salamo 119:34) Kua akakite mai a Iehova i roto i tana Tuatua “i te manako o Karaiti.” (1 Korinetia 2:16, NW) Ei tetai tei tavini ia Iehova ra ma tei tau ia iaia, kua akaruke mai a Iesu i tetai akaraanga apa kore ua no tatou. Kua marama aia i te au ture e te au kaveinga a te Atua, e kua akono aia i te reira ma te kore i apa. Na te apiianga i tana akatauanga, ka rauka “kia kite [tatou] . . . i te tipoto, e te tiroa, e te oonu, e te teitei, Kia kite [tatou] i te aroa o te Mesia, ko te kore e taea e te kite tangata nei.” (Ephesia 3:17-19) Ae, ta tatou i apii mei te Puka Tapu maira no Iesu te mamao roa atura i te kite upoko apiiia ra; te oronga maira te reira kia tatou i tetai tutu marama i to Iehova uaorai tu.​—Ioane 14:9, 10.

²⁰ No reira, ia tatou e apii ra i te Tuatua a te Atua, ka kite tatou i to Iehova manakoanga no te au tumu e ka itae i te au iki anga tau ra. Ka anoanoia te tauta anga no teia. Ka tau tatou kia riro ei aronga apii pakari i te Tuatua a te Atua ra, ma te akariroanga ia tatou uaorai kia manako i to Iehova tu e tona au turanga. Te apii nei tatou i tetai karama ou e tona aite anga. Inara, te aronga te ka rave i te reira ka aru i ta Paulo akamaroiroi anga “kia tuku atu i to [ratou] au kopapa ei atinga ora, e te tapu, e tau oki i te Atua, ko te akamori e tau ïa ia [ratou].”​—Roma 12:1.

[Au Tataanga Rikiriki i Raro]

Eaa Taau i Kite?

◻ Eaa te taui anga no runga i te angaanga ki te Atua tei akamataia i te 33 T.N.?

◻ Akapeea tatou i te tatanu anga i tei tau ia tatou?

◻ Akapeea te aronga pakari i te tauturu anga i te aronga o te anana kia riro ei tavini no te Atua raua ko Karaiti ra?

◻ Eaa tatou i tau ei kia tatanu i “te manako o Karaiti” ra?

[Tutu i te kapi 23]

Te aronga pakari e tauturu atu ia etai ke ra kia taangaanga i tei tau ia ratou