E Tauturu i Etai Atu Kia Tau te Aerenga ia Iehova

“I kore katoaʼi matou i tivata i te pure ia kotou . . . e te pati akatenga anga atu kia . . . tau to kotou aerenga i te Atu i te au mea katoa e mareka mai ei ra, e kia tupu te au angaanga meitaki katoa ia kotou.”​—KOLOSA 1:​9, 10.

1, 2. Eaa tikai te ka riro ei tumu anga no te rekareka e te merengo anga?

“TE NOO nei maua i roto i tetai terera i runga i tetai pama. Na te akariroanga kia mama ua to maua oraanga, kua maata atu to maua tuatau no te itae atu i te au tangata ma te tuatua meitaki. Kua akameitaki maataia maua ma te tuatau no te tauturuanga i te aronga e manganui kia akatapu i to ratou oraanga kia Iehova.”​—E nga tokorua akaipoipoia, e nga orometua tamou i Aperika Apatonga.

² Kare ainei koe e akatika e te tauturuanga i etai ke ra ka apai mai i te rekareka? Te tauta putuputu ra tetai papaki kia tauturu i tei maki, tei ngere oki, me kare tei maromaroa​—ma te merengo anga i te raveanga i te reira. Te papu ra i te au Kerititiano mou e ko ta ratou orongaanga kia etai atu i tetai kite i te Atua ko Iehova raua ko Iesu Karaiti te kapiti ra i tetai tauturu maata rava te ka rauka ia ratou kia rave. Na teia anake e raukai kia taki atu ia etai ke ra kia ariki i te atinga oko o Iesu, te akatupu i tetai pirianga meitaki ma te Atua, e i reira kia tau no te oraanga mutu kore ra.​—Angaanga 3:​19-21; 13:48.

3. Eaa te tu tauturuanga te tau ra no ta tatou akamanakoanga?

³ Inara, ka akapeea te tauturuanga i te aronga kua akamata ke ana i te tavini i te Atua, te aru ra i “Te Tuatua”? (Angaanga 19:9) Kare e ekoko anga e ko toou manako inangaro ia ratou te maata atura, inara penei kare koe e kite e akapeea e raukai ia koe te rave kia maata atu me kare kia akatere atu i te tauturuanga. Me kare ko toou turanga ka akaraanga akakotinga ia koe i te tauturuanga ia ratou, na te reira i kotinga i te merengo anga te ka rauka ia koe. (Angaanga 20:35) No runga i taua tu e rua ra, ka rauka ia tatou te kite mei te puka o Kolosa ra.

4. (a) I raro ake i teea turanga ta Paulo tataanga ki to Kolosa? (e) Akapeea to Epaphera ra o atuanga ki roto?

⁴ I to te apotetoro ko Paulo tata anga ki te au Kerititiano i Kolosa ra, tei Roma aia i raro ake i te are tapekaanga, inara kua akatikaia te au tangata kia aere atu e aravei iaia. Mei taau ka manako atu, kua akono a Paulo i tona tuatau tu rangatira kotingaia ra kia tutu i te Patireia o te Atua ra. (Angaanga 28:​16-31) Kua rauka i te au oa Kerititiano te aravei atu ia Paulo, penei ko tetai papaki kua tapekaia ma ia katoa ra i etai tuatau. (Kolosa 1:​7, 8; 4:10) Tetai ko te tangata tutu totomapu i te evangeria ra ko Epaphera no te oire mai o Kolosa i Pherigia, i te enua paraaraa i te itinga ra o Ephesia i Asia Minora (koia ko Turkey i teia tuatau). Na Epaphera i akapapa i tetai putuputuanga i Kolosa, e kua angaanga aia no nga putuputuanga i Laodikea e i Ierapoli i te pae maira. (Kolosa 4:​12, 13) Eaa ra a Epaphera i aere atu ei i te akara atu ia Paulo i Roma ra, e eaa ta tatou ka kite mei ta Paulo i rave ra?

Tauturu Meitaki no to Kolosa

5. Eaa ra Paulo i tatai i tana i rave ki to Kolosa ra?

⁵ Kia raukai te uriuri anga manako ma Paulo no te au tu o te putuputuanga i Kolosa ra, kua rave a Epaphera i te aerenga ngata ki Roma. Kua ripoti aia i te akarongo, te aroa, e te au tauta anga tutu evangeria a taua aronga Kerititiano ra. (Kolosa 1:​4-8) Inara, penei kua akakite katoa aia i tona au manako taitaia no te au mana akakokoanga i te pae vaerua o to Kolosa ra. Kua pau atura Paulo ma tetai reta akauruia tei patoi atura i etai o te au manako ta te au orometua pikikaa i akatotoa ra. Kua akamanako maata atu aia ki runga i te tuanga maata ta Iesu Karaiti ka rave.a Kua kotingaia ainei tana tauturuanga ki te akaketaketaanga i te au tuatua mou taviri Pipiria anake ra? Akapeea atu e raukai iaia te tauturu i to Kolosa, e eaa te au apiianga te ka rauka ia tatou no te tauturu anga ia etai ke ra?

6. Eaa ta Paulo i akaketaketa atura i roto i tana reta ki to Kolosa ra?

⁶ I te tuanga mua o tana reta, kua oronga a Paulo i te manako oonu ki roto i tetai tu no te tauturu penei te manako koreia ra e tatou. Ko tetai orongaanga tauturu ia tei raveia atu mei tetai ngai mamao ke atu, ko Paulo raua ko Epaphera e mamao ke mai mei Kolosa ra. Kua akakite a Paulo: “Te akameitaki nei oki matou i te Atua, i te Metua o to tatou Atu ra o Iesu Mesia, e kare e tivata i te pure ia kotou.” Ae, e pureanga taka meitaki teianei no te au Kerititiano i Kolosa. Kua kapiti katoa atu a Paulo: “I kore katoaʼi matou i tivata i te pure ia kotou, mei te rā mairai i kite ei matou, e te pati akatenga anga atu kia akakiia mai kotou i te kite i tona anoano, i te pakari i te au mea ravarai e te kite i te vaerua.”​—Kolosa 1:​3, 9.

7, 8. E putuputu ta tatou uaorai au pure e ta te putuputuanga ra i te kapiti atu i teea tumu?

⁷ Kua kite tatou e ko Iehova “tei akarongo i te pure ra,” no reira ka irinaki tatou e te papa ra aia kia akarongo mai i ta tatou au pure tei orongaia kia rotai ma tona anoano. (Salamo 65:2; 86:6; Maseli 15:​8, 29; 1 Ioane 5:14) Inara, me rave tatou i te pureanga no etai ke ra, mei teaa rai te tu o ta tatou au pure?

⁸ Penei te manako putuputu nei tatou e te pure nei oki ‘no to tatou au taeake katoa i te ao nei.’ (1 Petero 5:9) Me kare penei ka pure tatou kia Iehova no te au Kerititiano e etai atu oki i tetai ngai tei rokoia ra e tetai tumatetenga me kare taitaia. I te akarongo anga te au pipi o te anere mataiti mua o etai ngai ke ra i te onge kai i Iudea, kua oronga ratou i te au pure tini no to ratou au taeake noatu rai i mua ake i te tukuanga i te moni tauturu. (Angaanga 11:​27-30) I to tatou tuatau nei, te au pure no te au taeake anga katoatoa me kare no tetai pupu maata o te au taeake e putuputu te akarongoia i te au uipaanga Kerititiano, te ngai e manganui te umuumuia ra kia kite e kia rauka oki kia tuatua e “Amene.”​—1 Korinetia 14:16.

Kia Taka Meitaki te Pure Anga

9, 10. (a) Eaa te au akatauanga te akaari ra e te tau ra te pureanga no etai aronga taki tai tei akatakaia ra? (e) Akapeea a Paulo i riro ei ei tumu no te pure anga akatakaia ra?

⁹ Inara, te oronga maira te Pipiria kia tatou i etai akatauanga no te pure anga no etai ke tei taka meitaki, e taki tai ra. E akaata ki runga i ta Iesu tuatua tataia ra ia Luka 22:​31, 32. Kua koropiniia aia e tana au apotetoro tiratiratu e 11 ra. Pouroa ratou ka umuumu i ta te Atua ra turu anga i te au tuatau ngata ki mua, e kua pure a Iesu no ratou. (Ioane 17:​9-14) Inara, kua akataka mai a Iesu ia Petero, i te patianga taka ke no taua pipi okotai ra. Ko etai atu akatauanga: Kua pure a Elisaia kia tauturu te Atua i tetai tangata akatakaia ra, ko tona tavini. (2 Ariki 6:​15-17) Kua pure te apotetoro ko Ioane kia maroiroi ua atu a Gaio i te pae kopapa e te vaerua. (3 Ioane 1, 2) E etai atu pure tei raveia no etai pupu kotingaia ra.​—Iobu 42:​7, 8; Luka 6:28; Angaanga 7:60; 1 Timoteo 2:​1, 2.

¹⁰ Kua akataka mai ta Paulo au reta i te tumu no te au pure taka meitaki. Kua pati aia kia orongaia te pure nona me kare nona e tona au oa. Te tatau ra a Kolosa 4:​2, 3: “E tamou marie i te pure, e akamaroiroi oki i te reira, ma te akameitaki oki; Ma te pure katoa ia matou, kia kiritiia e te Atua te pa tuatua anga na matou, kia akakite atu matou i te tuatua ngaro a te Mesia ra, i tapekaiaʼi au nei.” E akamanako katoa oki, i teianei au akatauanga ke atu: Roma 15:30; 1 Tesalonia 5:25; 2 Tesalonia 3:1; Ebera 13:18.

11. Iaia i Roma ra, kua pure a Epaphera noai?

¹¹ Ko te tika katoa te reira ma to Paulo oa i Roma ra. “Ko Epaphera, . . . no ko na mai ia kotou na, te aroa atu nei ia kotou, e te tauta marie anga i te pure ia kotou kare e tivata.” (Kolosa 4:12) Te tuatua tei uriia ra ei “tauta marie anga” ka tau katoa ei “tautaanga maroiroi,” mei tetai tangata akamatutu i roto i te au tarekareka anga i taito ra. Te pure akatenga ua ra ainei a Epaphera no te pupu akarongo i te ao katoa me kare no te aronga akamori mou i Asia Minora katoa ra? Kua akakite mai a Paulo e te pure ra a Epaphera no te aronga i Kolosa ra. Kia kite a Epaphera i to ratou turanga. Kare tatou i kite i to ratou au ingoa katoatoa, kare katoa oki tatou i kite i te au manamanata tei aro atura kia ratou, inara e tamanako i etai au tu. Penei ko Lino ou ra te maro atura i te mana o te au apiianga te vaira, e ko Rufo penei kua umuumu i te maroiroi kia arai atu i te kika anga o tana au ravenga mua i te Akonoanga Ngati Iuda. I te mea e tane akarongo kore tana, kua umuumu ainei a Peresi i te akakoromaki e te pakari kia akono i tana tamariki i te Atu ra, kua umuumu ainei a Asunekirito i te akapumaana maata atu i tona maki kino ra? Ae, kua kite a Epaphera i te aronga i roto i tona putuputuanga, e kua pure akatenga aia no ratou no te mea kua anoano raua ko Paulo i taua aronga akatapuia ra kia aaere tau ia Iehova.

12. Penei ka akapeea ta tatou akataka maata anga i roto i ta tatou uaorai pure anga?

¹² Te kite ra ainei koe i te akaraanga no tatou​—tetai aerenga no tatou kia tauturu ia etai ke ra? Mei tei akakiteia maira, te au pure i te au uipaanga Kerititiano e putuputu te atea ke atu, no te manako anga i te aronga tuke tuke. Inara ko ta tatou uaorai pure me kare ta te ngutuare tangata ka rauka kia akataka poto uaia. Penei i etai taime ka pati tatou ki te Atua kia arataki e kia akameitaki i te au akaaere tutaka katoatoa me kare au tiaki pae vaerua, kare ainei e rauka ia tatou i etai tuatau te akataka tikai? Ei akatauanga, eaa i kore ei e pure ma te ingoa o te akaaere kotinga te tutaka ra i toou putuputuanga me kare tei akono i taau Apii Puka Putuputuanga? Te akakite maira Philipi 2:​25-28 e 1 Timoteo 5:23 i te manako anga o Paulo no te oraanga kopapa o nga taeake taki tai ko Timoteo raua ko Epaperodito. Ka rauka katoa ainei ia tatou te akaata i taua tu manako anga i te aronga maki ta tatou e kite ra i te ingoa?

13. Eaa te au turanga te tau ra ei au tumu na tatou kia kapiti atu ki roto i ta tatou uaorai au pure?

¹³ E tika, ka tau tatou kia kopae ke i te au tumu muna o etai ke ra, inara te tika ra no ta tatou au pure kia akakite manako tikai i te aronga ta tatou i matau e te manako atura oki. (1 Timoteo 5:13; 1 Petero 4:15) Penei kua kore te angaanga a tetai taeake, e kare e rauka ia tatou te oronga atu i tetai. Inara, ka rauka ua ia tatou te taiku i tona ingoa e kia akakite oki i tona tu ngata i roto i ta tatou uaorai au pure. (Salamo 37:25; Maseli 10:3) Te kite ra ainei tatou i tetai tuaine takaua kua manga ruaine mai kare ana tane e te tamariki no te mea te tamanako ra aia kia akaipoipo i tetai tei “tau ra i te Atu”? (1 Korinetia 7:39) I taau au pure ko koe anake ra, eaa koe i kore ei e pati ia Iehova kia akameitaki atu iaia e kia tauturu atu iaia kia vai tiratiratu i tana tavinianga? Tetai atu akaraanga, e rua nga taeake pakari penei kua ako atu i tetai taeake tei apa ra. Eaa raua takitai i kore ei e taiku iaia ma tona ingoa i ta raua pure anga taki tai ra mei tetai tuatau ki tetai tuatau?

14. Akapeea te pirianga o te au pure akatakaia i te tauturu anga ia etai ke ra?

¹⁴ Te vaira te au tuatau noou kia kapiti atu i roto i taau uaorai au pure i te aronga taki tai taau i kite ra tei umuumu ra i ta Iehova turu anga, akapumaana, te pakari, e te vaerua tapu, me kare tetai ua atu o te au ua ka tupu maira. Penei no te mamao me kare no etai atu turanga, ka manako kotingaia koe i te apinga me kare i te tauturu tikai te ka rauka ia koe te oronga. Inara auraka e ngaropoina i te pure no toou au taeake e te au tuaine. Kua kite koe e te anoano ra ratou kia aaere ma te tau ia Iehova, inara penei te umuumu tika ra ratou i te tauturu kia rave mutu kore ua atu i te reira. Ko te taviri no te tauturuanga i te reira ko taau au pure.​—Salamo 18:2; 20:​1, 2; 34:15; 46:1; 121:​1-3.

E Rave kia Akamaroiroi ia Etai ke Atu

15. Eaa tatou i tau ei kia akamanako meitaki i te tuanga openga o Kolosa ra?

¹⁵ Inara, ko te pure ngakau tae, e te taka meitaki kare ia i te aerenga anake no te tauturu ia etai atu, e maata oki i te aronga vaitata mai e te akaperepereia e koe. Te akataka meitaki maira te puka o Kolosa i te reira. E manganui te aronga apiiia tei mou ra e i muri ake i ta Paulo oronga anga i te arataki anga apiianga e te ako tau, kua kapiti katoa mai aia i te “au akangateitei anga” me kare au turouanga. (Kolosa 4:​7-18) Ei tukeanga, kua kite ke ana tatou e ko teia tuanga openga o te puka te vaira te akoanga tau, e e maata atu te vaira kia apiiia mei teia tuanga mai.

16, 17. Eaa ta tatou ka tuatua no te au taeake tei taikuia ra ia Kolosa 4:​10, 11?

¹⁶ Kua tata a Paulo: “Te aroa atu nei a Arisetareko i tapeka katoaia maua nei ia kotou, e te tamaiti a te tuaine o Banaba ra, ko Mareko, (tei poroakiia atu ia kotou na; e kia tae atu aia kia kotou na, e kite meitaki mai kotou iaia,) Ko Iesu oki, ko tei karangaia ia Iuseto ra, no te peritome ratou: Ko ratou anake tei rave katoa mai i te angaanga i te basileia o te Atua ra, ko ratou tei tauturu akamaroiroi mai iaku nei.”​—Kolosa 4:​10, 11, akaaite ia NW.

¹⁷ Kua akataka a Paulo i reira i etai taeake tei tau ra no te manako anga taka ke. Kua tuatua aia e no roto ratou i te aronga peritomeia, e ngati Iuda. E manganui te aronga ngati Iuda peritomeia i Roma, e i teianei ko tetai papaki kua riro ei au Kerititiano. Inara, ko te aronga ta Paulo i taiku maira kua tauturu mai iaia. Penei kare ratou i ekoko i te taokotai atu ma te au Kerititiano e Kenitara to ratou tumuanga mai, e kua mataora ua ratou i te angaanga kapiti anga ma Paulo i te tutuanga ki te au Kenitara ra.​—Roma 11:13; Galatia 1:16; 2:​11-14.

18. Akapeea ta Paulo tuatua akameitaki anga i tetai papaki o te aronga tei kapiti atura kiaia?

¹⁸ E akamanako i ta Paulo tuatua: “Ko ratou tei tauturu akamaroiroi mai iaku nei.” Kua taiku aia i tetai tuatua Ereni tei mama maira e okotai ua taime i roto i te Pipiria. E manganui te aronga uri reo tei uri i te reira e “akapumaana.” Inara, te vaira tetai atu tuatua Ereni (pa·ra·ka·leʼo) kua matau maataia te uriia ra e “akapumaana.” Kua taiku a Paulo i te reira i etai atu ngai i teianei reta tikai inara kare ia Kolosa 4:11.​—Mataio 5:4; Angaanga 4:36; 9:31; 2 Korinetia 1:4; Kolosa 2:2; 4:8.

19, 20. (a) Eaa te aite anga o te tuatua ta Paulo i tuatua ra no te au taeake tei tauturu ra iaia i Roma? (e) Penei na teea au tu ta taua au taeake ra tauturu anga ia Paulo?

¹⁹ Te aronga ta Paulo i taiku ra i to ratou ingoa e tika kua rave kia maata atu i te tuatua akapumaana ua. Te tuatua Ereni tei uriia ra e “tauturu akamaroiroi” ia Kolosa 4:11 kua taikuia i etai taime i roto i te au tataanga no te vairakau ei rapakau mamae. Te tatauia ra i te New Life Version e: “Mei teaa ra ta ratou tauturu anga iaku!” Te taiku ra te Today’s English Version i te takiota tuatua: “Kua riro ratou ei tauturu maata kiaku.” Penei eaa ta taua au taeake Kerititiano i te pae ia Paulo ra ka rave ei tauturu iaia?

²⁰ Kua akatikaia te aronga aere atu kia atoro ia Paulo, inara e manganui te au apinga kare e rauka iaia kia rave, mei te oko ra i te au apinga anoanoia​—te kai e te kakau no te tuatau anu. Akapeea e raukai iaia te au puka no te apii me kare te oko i te au pepa tataanga? (2 Timoteo 4:13) Kare ainei e rauka ia koe kia tamanako i taua au taeake ra i te tauturuanga ia Paulo ma taua au apinga tei umuumuia ra e ia, te raveanga i te au apinga tumuanga mei te okoanga apinga me kare te raveanga ei karere nana? Penei ka anoano aia kia atoro e kia akamaroiroi atu i tetai putuputuanga. I te mea te tapekaia ra, kare i rauka iaia, no reira penei kua aere atu taua au taeake ra ei au rave tuatua no Paulo, e te akaoki ripoti maira oki. Mei teaa ra te akamaroiroianga!

21, 22. (a) Eaa ra i tau ei kia akamanako tatou i te au tuatua ia Kolosa 4:11 ra? (e) Eaa etai au tu te ka rauka ia tatou kia akataka i te akatauanga a te aronga ma Paulo ra?

²¹ Ko ta Paulo i tata no te riroanga e ko tetai tei “tauturu akamaroiroi” te oronga maira i te kite oonu e akapeea tatou i te tauturuanga ia etai ke atu. Penei te aaere tau ra ratou ia Iehova i tana au turanga akono tau, te aereanga ki te au uipaanga Kerititiano, e te raveanga i te angaanga tutuanga. No te reira te tau ra ratou no ta tatou au tuatua arikianga. Inara, ka rauka ainei ia tatou, te rave kia maata atu, ei ‘au tauturu akamaroiroi’ mei taua aronga i te pae ia Paulo ra?

²² Me te kite ra koe i tetai tuaine tei mou pakari ra kia 1 Korinetia 7:37 inara te ngere ra i teianei i tetai pamiri tei piri vaitata ra kiaia, ka rauka ainei ia koe te kapiti atu iaia ki roto i etai au angaanga a te pamiri, penei te patianga iaia kia kapiti mai i te kaikaianga me kare kia aere atu ki tetai akaputuanga meangiti ua ma te au oa me kare au kopu tangata? Ka peea oki te patianga iaia kia aere ma toou ngutuare tangata ki tetai uruoaanga me kare ki te orote? Me kare e pati atu iaia kia kapiti atu kia koe i tetai tuatau tau ia koe e aere ra e oko kai. Mei te reira katoa oki te au vaine takaua e te au tane takaua, me kare penei e aronga kare e rauka te akaoro motoka. Ka kitea e koe te meitaki i te akarongo anga i te au tupuanga ta ratou i kite me kare kia rauka mai to ratou kite no te au apinga matauia mei te ikianga i te au ua rakau ra me kare te ikianga i te au kakau tamariki. (Levitiku 19:32; Maseli 16:31) Tetai tupu anga natura penei ka akamaata atu i te pirianga oa. No reira penei ka manako ngakau ngoie ua ratou kia pati atu i taau tauturu anga me te anoano ra ratou i etai vairakau no te toa vairakau maira, me kare i tetai apinga mei te reira. Te au taeake ma Paulo i Roma penei kua oronga i te tauturu akamaroiroi tau, mei taau katoa rai. I reira e i teianei ko tetai atu akameitakianga kapitiia mai koia oki te akaketaketaia ra te tapekaanga o te aroa, e te akakoro ngaueue kore ra tatou no te tavini kapipitiia Iehova ma te tiratiratu.

23. Ka meitaki ra no tatou taki tai kia akapou taime i te raveanga i teaa?

²³ Ka rauka ia tatou tataki tai i te akaata ki runga i te au turanga i taikuia ra i roto i teia atikara. E au akatauanga ua ratou, inara ka rauka i te reira kia akamaara mai ia tatou i te au turanga tikai e raukai ia tatou kia riro kia maata atu ei “tauturu akamaroiroi” i to tatou au taeake e te au tuaine. Kare te tumu e kia akatupu tatou i te tu akono a te au tangata. Kare te reira i te akakoroanga o te au taeake tei taikuia ra ia Kolosa 4:​10, 11. Ia ratou ra, ‘e au oa angaanga no te basileia o te Atua ra.’ Te tupu anga akamaroiroi te piri tika atura ki te reira. Kia riro te reira kia aiteite i to tatou turanga.

24. Eaa te tumu maata no ta tatou pureanga e te kimianga oki kia akamaroiroi atu ia etai ke ra?

²⁴ Ka taiku tatou i etai atu na to ratou ingoa i ta tatou uaorai pureanga e ka tauta kia akamaroiroi ia ratou no teianei: Te irinaki nei tatou e ko to tatou au taeake e te au tuaine te anoano ra kia ‘tau to ratou aerenga [ia Iehova] i te au mea katoa e mareka mai ei aia ra.’ (Kolosa 1:10) Te kapitiia atura taua tika ra ki tetai atu apinga ta Paulo i taiku ra i tana tataanga i te au pure a Epaphera no to Kolosa, e ‘kia mou apa kore rai ratou ma te ki i te kite i te au anoano katoa o te Atua ra.’ (Kolosa 4:12) Akapeea e raukai ia tatou uaorai te akatupu i te reira? Ka akara ana tatou.

[Tataanga Rikiriki i Raro]

Kua Kite Ainei Koe?

• Penei akapeea tatou e riro ei kia maata atu te tauturu anga i roto i ta tatou uaorai au pure anga?

• I roto i teea tu i riro ei etai Kerititiano ei ‘au tauturu akamaroiroi’ kia Paulo?

• Na roto i teea au turanga e raukai kia riro tatou ei ‘au tauturu akamaroiroi’?

• Eaa te akakoroanga no ta tatou pureanga e no te kimianga kia akamaroiroi atu i to tatou au taeake e te au tuaine?

[Tutu i te kapi 18]

Ka rauka ainei ia koe te kapiti mai i tetai atu Kerititiano ki roto i te au aerenga ki vao a toou pamiri?

[Akameitakianga]

Courtesy of Green Chimney’s Farm