‘I Roto i Tetai Akaupokotu Anga’

E TAREKAREKA anga manea tikai te akaupokotu anga o te autu anga i runga ake i tetai enemi. Tetai akangateitei anga teitei rava atu ta te Tenate o Roma i tuku ki runga i tetai rangatira tei autu ra kia tuku iaia kia tarekareka i tona autu anga ma teia akaupokotu anga tikai e te aka moni. Kua taiku te apotetoro ko Paulo i teia akaupokotu anga e rua taime i roto i tana au tataanga. Inara, i mua ake ka tamanako ei tatou i tana au tuatua, e tamata ana i te akatutu i teia aerenga. E tamanako ana i te au urupu e tupati ra i te pae mataara i reira e aere marie ra pati ia Via Triumphalis e tae atu ki runga i te akoko aere atu ki te iero o Jupiter i runga i te Puku Maunga o Roma ko Capitoline.

“Mei te au mea akareka e tutungiia ra kua akatotoaia te au aunga kakara na roto i te iero e i te pae mataara, te akaki anga i te matangi ki to ratou kakara,” i tataʼi te tangata apiipii ko James M. Freeman. “I roto i te akaupokotu anga ko te tenate e te aronga mana o te enua, e na roto i to ratou taenga mai kua akangateiteiia tei autu. Te au mea apinganui o te tamaki, mei te auro, te ario, te au apinga tamaki tukeke, te au mea akamanea, te au angaanga mako kare e kite putuputuia ana, e te au mea pouroa tei manakoia e e puapinga ki tei autu ra me kore ki tei rave mai, kua apainaia i te ngai atea tei ki i te urupu tangata o te oire. Kua taumaroia rai te au mouauri o te tamaki kia mati i roto i teia aerenga. Kua na runga te rangatira, nona te ngateitei i raveiaʼi te akaupokotu anga, i tetai kariota e akara anga tuke rai, tei uutiia e te au oroenua e a. Kua tuituiia tona pereue ki te auro, e tona rakei ki te tiare. I tona rima katau ko tetai atava rakau tiare, e i tona kaui ko tana tepeta; i runga ake i tona katu te vaira tetai ei tiare Delphi. I roto i te au avaava anga a te au vaeau e te matakitaki anga a te au tangata kua apainaia atu tei autu ra na runga i te mataara ki te iero o Jupiter, te ngai e orongaia ana te au atinga, i muri ake i reira tetai kaikai anga maata na te katoatoa i roto i te iero.”

Kua taangaanga a Paulo i te akaupokotu anga na tetai akatutu anga i tona tata anga i te rua o tana reta ki te au Kerititiano i Korinetia i te mataiti 55 o to tatou Tuatau Noa Nei. Kua tuatua aia: “Kia akameitakiia ra te Atua, ko tei akaupokotu mai ia matou i te Mesia kare e tivata, ko tei akakite aere oki i te aunga i te kite iaia ia matou nei, e kare e ngai toe. Kua riro oki matou i te Atua ei aunga kakara no te Mesia, i te aronga akaoraia e te aronga e mate: I tetai pae ra, e aunga mate matou e tae ua atu ki te mate; kareka i tetai pae, e aunga ora ïa matou e tae ua atu ki te ora.”​—2 Korinetia 2:14-16.

I konei te akatutuia ra a Paulo e tetai au Kerititiano akatainuia ei aronga akono i te Atua, ei au ‘tavaitai i te Mesia.’ Kua akatutuia ratou ei tamariki tamaroa, ei au rangatira, e te au vaeau e aru ra i to Iehova pupu aerenga e kua aratakiia e ia ra na roto i tetai akaupokotu anga i tetai aerenga kakara. (Akara i Te Punanga Tiaki, Tiurai 15, 1990, au kapi 10-15.) Teia taangaanga anga tei akatutuia e teia aerenga te akakite katoa maira e te aronga tei kopae i te nuti meitaki o to te Atua Patireia e manakonakoanga ua to ratou no te mate. Inara mei teaa te tuke ki to Iesu aronga akatainuia tei aru iaia! Tei ia ratou te manakonakoanga o te ora ki te oraanga mate kore i te rangi ma te Mesia. E akapeea to ratou au taeake akaaka e te meitaki, tei akatapu katoaia ki te Atua? Tei ia ratou te manakonakoanga rekareka i roto i tetai enua parataito, te ngai na te Atua e “orei i te roi-mata katoatoa; e e kore rava te mate, e te aue, e te mii; e te mamae oki.” (Apokalupo 21:1-4; Luka 23:43) Ko koe ainei tetai tuanga o teia pupu mataora?

E tuke rai te tutu i orongaia ia Kolosa 2:15, te ngai i tataʼi a Paulo: “Kua pou iaia te aronga au e te aronga mana ra, kua akariro atura ia ratou ei matakitaki anga i te ngai atea, ma te autu i rungao ia ratou.” I konei kua akatutuia te au kavamani o te enemi e te aronga mana i raro ake i te Tiaporo ko Satani, ei au tuikaa e te au mouauri i roto i tetai akaupokotu anga. Kua kiriti a Iehova Tei Autu ra ia ratou kia taaka ua e te akaari ia ratou ki te katoatoa ei aronga autu kore. Kua autuia ratou ‘i tau i te reira,’ koia oki to Iesu ‘rakau tamamae anga.’ Kua oronga mai tona matenga ki runga i te rakau i te tango no te akakoreanga i “te ture i tataia” (te Ture koreromotu) e kua maani i te reira kia rauka i te au Kerititiano kia matara mai mei te tuikaa anga ki te au mana o satani o te poiri. (Kolosa 2:13, 14) Mei teaa i reira kia ariki tatou i teia tu matara anga ei Kerititiano!