Ka Rauka ia Koe kia Tere ki Mua i te Pae Vaerua

KA RAUKA kia ngata te kite i te tu tau tikai. Ko te tu te reira ma te au taimana ra. Noatu rai e te kaka ra te taimana akakanapaia, ko tetai taimana kare ra i akamaneaia kare e kaka. Inara, i roto roa i te taimana kare i akamaneaia te vaira te taputou no tetai poe manea tikai.

Te akatutu maira te au Kerititiano i te au taimana kare ra i akamaneaia i te au tu e manganui. Noatu rai e e mamao ke atu tatou i te apa kore, te vaira i roto ia tatou tetai tu tau ta Iehova e manako akaperepere ra. Mei te au taimana rai, pouroa tatou te vaira to tatou uaorai au tu taka ke. E ka rauka ia tatou taki tai kia akatere atu i te tupuanga i te pae vaerua me ko te reira to tatou inangaro ngakau. Ka rauka kia akakanapaia to tatou tu akatangata, kia kanapanapa maataʼi ratou ei akakaka ia Iehova ra.​—1 Korinetia 10:31.

I muri ake i te tipuanga e te akakanapa anga, kua tukuia tetai taimana ki roto i tetai akanooanga te ka akamanea atu i tona au tu akaata anga. Mei te reira katoa, ka rauka ia Iehova te taangaanga ia tatou i te au akanoonoo anga, me kare au angaanga tuke tuke, me “kia akatangata ou oki [tatou] ko tei angaia kia tau i te Atua ra, i te tuatua-tika e te tapu mou.”​—Ephesia 4:20-24.

Penei kare e aere ua mai te tere anga ki mua i te pae vaerua, mei te taimana rai i tona tu natura kare e kanapanapa mei tetai poe ra. Penei ka umuumuia kia takore tatou i etai o to tatou uaorai tu paruparu te vaira, e akatikatika i to tatou tu manako i te au apainga kare ra na tatou, me kare kia akamaroiroi ia tatou uaorai kia aere mai ki vao i tetai vaarua i te pae vaerua. Inara ka rauka ia tatou kia aere ki mua me te anoano tika ra tatou, i te mea ka rauka i te Atua ko Iehova ra te oronga mai kia tatou i “te mana maata meitaki.”​—2 Korinetia 4:7; Philipi 4:13.

Te Akamaroiroi ra Iehova i Tona Au Tavini

I te tipuanga taimana ka anoanoia te irinaki anga te tupu maira no te kite tikai, i te mea i muri ake i te tipu ke atuanga te tuanga kare ra i meitaki o te taimana ra, kua ngaro atu ia. I etai tuatau​—ka riro e 50 patene o te apinga okomaata no te koatu kare ra i tipuia​—te ka tipu keia atu kia raukaʼi te tu anoanoia ra. Ka tau katoa tatou kia irinaki i te tupuanga mei te kite tika maira kia raukaʼi te akatika i to tatou tu tangata e kia aere ki mua i te pae vaerua. E maata oki ka tika tatou kia irinaki e ka akamaroiroi mai a Iehova ia tatou.

Inara, penei ka manako ngakau tatou e e tu ngere to tatou, me kare ka manako e kare e rauka ia tatou te rave kia maata atu. I te tuatau i topa, kua manako te au tavini tiratiratu o te Atua i etai taime na te reira tu. (Exodo 3:11, 12; 1 Ariki 19:1-4) I te akataka angaia e te Atua ra “ei peroveta no te pa enua,” kua karanga a Ieremia: “I na, kare au i kite i te tuatua: e tamaiti ua oki au nei.” (Ieremia 1:5, 6) Inara, noatu tona tu tapupu ua, kua riro a Ieremia ei tetai peroveta mataku kore tei tuatua tika tika atura i te au tuatua ki tetai iti tangata riri ra. I akapeea i raukaʼi te reira? Kua apii aia kia irinaki ia Iehova. I muri iora kua tata a Ieremia: “E ao to te tangata e irinaki kia Iehova, e ko Iehova tona manako anga.”​—Ieremia 17:7; 20:11.

I teia tuatau nei, te akamaroiroi katoa ra Iehova i te aronga tei tuku ra i te irinaki anga kiaia. Ko Edward,a tetai metua e a ana tamariki tei akaroaroa ra i te akatupu kia tere ki mua i te pae vaerua, kua kite aia i te tika o te reira. Kua akataka mai aia: “Kua riro au ei tetai o te Au Kite o Iehova no te iva mataiti, inara te akara anga te tu ua ra au i te pae vaerua. Ko te manamanata koia oki e meangiti ua toku akakeu anga e kare e irinaki anga. I muri ake i toku aereanga ki Paniora, kua kite au iaku uaorai i roto i tetai putuputuanga meangiti e okotai ua tangata pakari e okotai oki tavini orometua. I te manakoanga no te umuumu anga, kua pati mai te tangata pakari ra kiaku kia rave i etai au tuanga tuatua e manganui. Kua ruketekete au iaku e rave ra i taku au tuatua mua e te au tuanga no te uipaanga. Inara, kua apiiia au kia irinaki ki runga ia Iehova. Kua akapaapaa mai te tangata pakari ra iaku e kua oronga mai i te au manako tau tikai no te tereanga ki mua.

“I taua tuatau rai, kua akamaata atu i taku angaanga tutu aere e kua rave i te arataki anga meitaki atu i te pae vaerua i toku ngutuare tangata. Ei tetai tupu anga, kua maata atu te puapinga no te pamiri katoa, e kua manako ngakau maata atu toku merengo anga. I teianei kua riro au ei tetai tavini orometua, e te rave pakari nei au kia akatupu i te au tu tau no tetai akaaere Kerititiano.”

“Kopae Oki Kotou i te Tangata Taito Ra”

Mei ta Edward i kite ra, te umuumuia ra te irinaki anga ia Iehova no te aerenga ki mua i te pae vaerua. E mea puapinga maata katoa oki te akatupuanga i te “akatangata ou” mei to Karaiti rai. Akapeea te rave anga i teia? Te takainga mua kia “kopae” i taua au ravenga e tuanga no te tangata taito ra. (Kolosa 3:9, 10) Mei te au tu apa ua ra, mei te au minera ke ra, ka tau kia akataka keia atu i te taimana karukaru ra kia akariro i te reira ei tetai poe kanapanapa, no reira ka tau te au tu manako “o teianei ao” kia akaatea keia kia raukaʼi i to tatou tu tangata ou kia kaka mai.​—Galatia 4:3.

Ko tetai o taua tu manako ra ko te kore e inangaro kia ariki i te apainga no te mataku e ka maata roa te ka umuumuia mai ia tatou. E tika, te aiteanga o te apainga e angaanga ia, inara ko tetai angaanga akamerengo anga ia. (Akaaite ia Angaanga 20:35.) Kua akatika a Paulo e ko te akamori tu-Atua te umuumuia ra tatou “ia angaanga pakari e kia uapou tatou uaorai.” Ka rave mataora tatou, tana i tuatua, “no te mea kua tuku tatou i to tatou manakonakoanga ki runga i tetai Atua ora,” tetai kare ra e akangaropoina i te angaanga ta tatou i rave no to tatou au oa Kerititiano e etai ke katoa oki.​—1 Timoteo 4:9, 10, NW; Ebera 6:10.

Te kino ra etai taimana no te “tu paruparu etai ngai” tei tupu i te anga maianga e ka umuumuia ki matakite te akono anga. Inara, ma te tauturu a tetai apinga te tapaia ra e polariscope, ka rauka i te tangata akakanapa ra kia kite i te ngai paruparu e ka rauka kia meitaki te akono anga i taua koatu ra. Penei te mamae ra tatou no tetai tu paruparu i roto ra, me kare e tu apikepike, no to tatou akatupu anga mai me kare na tetai tupu anga tumatetenga. Eaa ta tatou ka rave? Te mea mua, ka tau tatou kia akatika kia tatou uaorai i taua manamanata ra e kia akakoro kia autu atu i te reira ki te tu te ka rauka. Ka tau tikai tatou kia akakore atu i taua apainga teiaa ra ia tatou ki mua ia Iehova na te pure, penei katoa na te kimianga i te tauturu pae vaerua mei ko mai i tetai o te aronga pakari Kerititiano ra.​—Salamo 55:22; Iakobo 5:14, 15.

Ko taua tu paruparu i roto ra tei tupu kia Nicholas. “E kona kava toku metua, e kua akatupu aia i te mamaeanga maata kia maua ko toku tuaine,” tana i akataka mai. “I toku akaruke anga i te apii, kua kapiti atu au ki te vaeau, inara kare i roaia kua o atu au ki roto i te taitaia. Kua tapekaia au e te aronga mana taoonga o te vaeau no te okooko au apinga akakona, e i tetai atu atianga kua oro ke au. I te openga ra, kua akaruke au i te vaeau, inara te vaira au i roto i te taitaia. Noatu rai kua ki toku oraanga i te kino no te akono kino i te apinga akakona, e te inuanga maata i te kava, e inangaro toku i te Pipiria e kua anoano i tetai akakoro anga i te oraanga ra. I te openga ra, kua aravei atu au i te Au Kite o Iehova, kua taui i toku tu ora anga, e kua takave atu i te tuatua mou.

“Inara, e maata te au mataiti i topa, i mua ake i toku ariki anga e te akono anga oki i tetai tarevake i roto i toku tu tangata. E reka kore oonu toku no te mana taoonga e kua riri me orongaia mai tetai ako anga kiaku. Noatu rai e i anoano au kia taangaanga puia e Iehova, kua tapupu teianei tu paruparu iaku. I te openga, ma te tauturu anga a nga tangata pakari e rua ra, kua akatika au i toku manamanata e kua akamata i te akono i ta raua ako anga Tuatua Tapu aroa ra. Noatu ra e te mura maira tetai riri meangiti i etai atianga, kua rauka iaku i teianei kia akatere i toku tu meameaau. Te akameitaki maata nei au no to Iehova tu akakoromaki i te akonoanga mai iaku e no te tauturu aroa oki o te aronga pakari ra. No toku tupu anga i te pae vaerua, kua akataoongaia au ei tetai tavini orometua kare i roa akenei.”

Mei ta Nicholas i kite, kare i te mea ngoie ua te taui anga i te au tu manako oonu te akanooia ra. Penei ka aro atu tatou i tetai akaaoanga aiteite ra. Penei te maata ra to tatou tu taitaia ua. Penei te utuutu ra tatou i tetai mamae ngakau, me kare te tuku maata ra i te akaketaketa anga ki runga i te tu taka keanga. No reira, penei te kotingaia ra to tatou tupu anga ei Kerititiano. Te kite ra te aronga akakanapa taimana i tetai apinga aiteite ma te au koatu ta ratou e tapa ra e naats. Ko teia e rua koatu tei tavaiia kia riro ei okotai i te tuatau tupuanga o te taimana ra. Ei tetai tupu anga, e rua nga tu tupu anga tuke tuke te naats te ka akariro i te tipuanga kia tau ki te aerenga ra ei mea ngata roa. I to tatou turanga, ka kite tatou i te “tu” o te vaerua mareka te patoi ra i te “tu” o te kopapa apa ua nei. (Mataio 26:41; Galatia 5:17) I etai taime, penei ka manako tatou kia akakore ua i taua tauta anga ra, na te akameangiti ua anga i taua au tu apa ra i roto i to tatou tu tangata e kare i te mea puapinga maata. Penei ka tuatua tatou e, ‘kare e kino ana te vai maira te aroa o toku pamiri e toku au oa noku nei.’

Inara, me kia tavini tatou i to tatou au taeake e kia akakaka oki i to tatou Metua i te rangi ra, ka tau tatou kia ‘akaouia i to tatou vaerua ra i te ngakau’ na te akatangata ouanga. E puapinga maata to taua tauta anga ra, mei ta Nicholas e etai atu i akakite. Te kite ra tetai tangata akakanapa taimana e okotai ua iro ka akakino ia i te taimana katoa ra. Mei te reira katoa, na te akono koreanga i tetai tuanga o to tatou tu akatangata, ka rauka ia tatou kia akakino i to tatou akara anga i te pae vaerua ra. E kino rava oki, ka rauka i tetai tu paruparu kino kia taki atu ia tatou ki tetai topa anga i te pae vaerua.​—Maseli 8:33.

Mei Tetai “Ai” rai i Roto ia Tatou

Te kimi ra tetai tangata akakanapa taimana kia akavai mai i te kaka i roto i te taimana ra. Te akonoia ra teia na te akanoonooanga i te au tuanga kia akatupu ratou ia ratou i tei karangaia ra e tupu anga anuanua. I roto i te taimana ra ka akaata mai e ka akaata atu oki te kaka maata te au karakara ra, te ka akatupu i te kaka te akariro ra i te au taimana kia kanapanapa. Mei te reira katoa oki, ka rauka i te vaerua o te Atua ra kia riro mei te “ai” rai i roto ia tatou nei.​—1 Tesalonia 5:19; Angaanga 18:25; Roma 12:11.

Inara ka peea me ka kite tatou i te umuumu anga kia akakeuia i te pae vaerua? Akapeea e raukaʼi te rave i teia? Ka tau tatou ‘kia manako i to tatou au aerenga.’ (Salamo 119:59, 60) Ka kapiti teia i te akatakaanga i taua au apinga te tapupu ra ia tatou i te pae vaerua ei reira ka tamanako ei ko teea te au angaanga teokaratiki te tau ra tatou kia maata atu te aruaru anga. Ka rauka kia akaoonu atu tatou i te ariki anga pae vaerua na te apiianga putuputu e te pure anga oki tatou. (Salamo 119:18, 32; 143:1, 5, 8, 10) Pera katoa oki, na te kapitianga ma te aronga te rave angaanga pakari ra i te akarongo, ka tere atu ta tatou akakoro anga kia tavini totomapu atu ia Iehova ra.​—Tito 2:14.

Kua akatika tetai vaine Kerititiano ou ko Louise e: “Kua akamanako au i te painia i te au tuatau ravarai no etai rua mataiti i mua ake i toku tata anga ei tetai painia, me kare akakitekite Patireia i te au tuatau ravarai. Kare e apinga te tapupu mai ra iaku, inara i roto au i tetai vaarua pumaana, e kare ua au i tauta kia aere mai au ki vao i te reira. Kua mate viviki ua toku metua i reira. Kua kite au e akapeea te paruparu o te oraanga e kare au e taangaanga meitaki ana i toku ra. No reira kua taui au i toku akakoro anga i te pae vaerua, kua akatere atu i toku tavini anga, e kua riro au ei tetai painia putuputu. No tetai tauturu taka ke i teia tu ko toku au taeake e te au tuaine i te pae vaerua tei turu tamou maira i te au akanoonoo anga no te tutu aere anga e tei putuputu ra te kapiti anga mai iaku i te angaanga orometua. Kua kite au e me no te meitaki me kare no te kino, ka rave kapiti tatou i te au puapinga e te au akakoro anga o to tatou au oa angaanga ra.”

Akakinaia mei te Mea Rai e na te Auri

Ko te au taimana te au apinga ketaketa natura i runga i te enua nei. No reira, ka riro na tetai atu taimana e tipu i tetai atura. Penei ka akamaara teia i te aronga apiiia ra i te Pipiria i te materi te tuatua ra: “Na te auri i akakina i te auri; e na te tangata e akakina i te mata o tona taunga.” (Maseli 27:17) Akapeea te “akakina” anga i te mata o tetai tangata ra? Penei ka autu tetai i te akakinaanga i te tu kite e te pae vaerua oki o tetai ke ra, mei tetai potonga auri te ka rauka kia taangaangaia ei akakina i tetai auri tei maaniia no taua auri rai. Ei akatauanga, me ka riro tatou kia maromaroaia no tetai mareka koreanga ka rauka i te akamaroiroi anga a tetai ke ra kia taaki iaia ki runga. Ka tauiia to tatou mata mii ra kia meitaki mai, e ka akaoraoraia mai tatou no te angaanga totomapu akaouia ra. (Maseli 13:12) E maata oki te ka rauka i te aronga pakari o te putuputuanga ra kia tauturu ia tatou kia akakinaia na te orongaanga i te akamaroiroi anga Tuatua Tapu e te ako anga no te akameitakianga mai. Ka aru ratou i te kaveinga tuatuaia maira e Solomona: “E apii atu i te tangata pakari, e e tupu tona pakari: e apii i te tangata tuatua-tika; e e tup[u] tona kite.”​—Maseli 9:9.

Inara, ka pou te taime i te terenianga i te pae vaerua. No te tere atu i te tai ngauru mataiti, kua tua atu a Paulo i tona kite e te au ravenga apiianga kia Timoteo. (1 Korinetia 4:17; 1 Timoteo 4:6, 16) Te terenianga roa ta Mose i oronga kia Iosua no te tere atu i te 40 mataiti kua akapuapinga i te iti tangata o Iseraela no tetai tuatau roa. (Iosua 1:1, 2; 24:29, 31) Kua kapiti atu a Elisaia ma te peroveta ko Elia penei no etai 6 mataiti, i te raukaanga tetai akanooanga meitaki no tana uaorai angaanga tei vaira no etai 60 mataiti. (1 Ariki 19:21; 2 Ariki 3:11) Na te akakoromaki anga i te orongaanga i te terenianga rave roaia, kua aru te aronga pakari i te akatauanga a Paulo, a Mose e Elia ra.

Te oronga anga i te akapaapaa anga ko tetai tuanga puapinga maata ia no te terenianga. Te au akakite anga ngakau tae no te ariki anga no te au angaanga tei rave meitakiia me kare te au angaanga tau kia akapaapaaia penei ka akakeu i etai ke ra kia anoano kia ki atu te tavini anga i te Atua. Ka patu te akapaapaa anga i te irinaki anga te ka oronga mai i te anoano kia tauta kia akakore atu i te au tu paruparu. (Akaaite ia 1 Korinetia 11:2.) Te akamaroiroi anga kia tere ki mua i roto i te tuatua mou te aere katoa maira no te rave anga maata i te angaanga tutuanga Patireia e etai atu angaanga o te putuputuanga. (Angaanga 18:5) Me oronga atu te aronga pakari i te apainga na te au taeake kia tau ki to ratou tere anga ki mua i te pae vaerua, ka oronga teia ki teia au tangata i te kite puapinga e penei ka akamaroiroi i to ratou anoano kia tere ua atu ki mua i te pae vaerua ra.​—Philipi 1:8, 9.

Tumu Meitaki no te Raveanga kia Tere Ki Mua i te Pae Vaerua

Kua manakoia e apinga okomaata te au taimana. Ko te tika katoa te reira no te aronga te riro ra i teianei kia taokotaiia mai ma te pamiri akamori ia Iehova i te ao katoa nei. Ko te tika, kua tapa te Atua uaorai ia ratou ko tei “inangaroia,” e te au enua katoa ra. (Hagai 2:7) I te mataiti kua topa, e 375,923 tei riro mai ei Au Kite papetitoia no Iehova. Kia akono i teia tupu anga, e umuumu anga tetai kia ‘akaatea i te turanga puakapa.’ Na te tere anga ki mua i te pae vaerua​—e na te inangaroanga no te au taoonga angaanga​—ka rauka kia rave i tetai tuanga i te akonoanga no teianei akatotoa anga.​—Isaia 54:2; 60:22.

Kare mei te au taimana okomaata e manganui te tukuia ra ki roto i te au pia rokaia i te pangika ra e vaitata kare e akaraia, ko to tatou tu tau i te pae vaerua ra ka kaka mai ia. E ia tatou e akakanapanapa putuputu ra e te akakite anga i to tatou au tu Kerititiano, ka akakaka tatou i te Atua ia Iehova. Kua akamaroiroi atu a Iesu i tana au pipi: “To kotou mārama, kia kakā ïa ki mua i te aroaro o te tangata nei, kia akara ratou i ta kotou angaanga meitaki, e kia akameitaki ratou i to kotou Metua i te ao ra.” (Mataio 5:16) E tika tikai, te oronga maira te reira i te tumu meitaki no tatou kia tere ki mua i te pae vaerua.

[Tataanga Rikiriki i Raro]