Aratakianga no te Pirianga ‘Au

Akakore i te Ara

“E akakore tetai i ta tetai ara, e tapepeanga ta tetai ki tetai ra.”​—KOLOSA 3:13.

E tarevake ana tatou katoatoa. Penei ka akariri tatou i tetai ke me kore ka akariri mai ratou ia tatou. Noatu te tu, ka anoanoia tatou kia akakore ua i te ara e kia akakoreia mai. Me akakore i te ara, kare tatou e akamoupuku i te tangata tei akariri mai ia tatou. “Auraka te kino e tutakiia atu ki te kino,” no reira kare tatou e taokioki ua i te tarevake me kore te tu paruparu o tetai tangata. (Roma 12:17) Akapeea ra me kua mamae tikai tatou e kare e rauka i te kopae i te reira? E tauta kia tuatua maru atu ki te tangata ko korua anake ua. To tatou akakoroanga, kia akatupu i te ‘au, kare kia taumāro atu.​—Roma 12:18.

Akaari i te tu Akaaka e te Akangateitei

“Ei ngakau akaaka ra, i te manako akameitaki atu tetai ki tetai.”​—PHILIPI 2:3.

Me akaari tatou i te tu akaaka e te akangateitei, ka reka te tangata i te piri mai kia tatou. Ka kite ratou e ka takinga meitaki atu e ka akamanako tatou ia ratou e kare tatou e tamamae akakoro ia ratou. Inara, me manako tatou e meitaki atu tatou i tetai ke, me kore me māro ua i to tatou tikaanga, ka akatupu tatou i te taumāro e te tauetono. Ka kopae te tangata ia tatou e penei ka iti ua to tatou au oa me kore kare o tatou oa.

Kia Papakitai Kore

“Kare te Atua e akono i te tu o te tangata: Ko te mataku ra iaia, e ko te rave i te tuatua-tika, i te pa enua ravarai, ko tei kiteia mai ïa e ia.”​—ANGAANGA 10:34, 35.

Kare Tei Anga mai ia tatou e akateitei atu i tetai iti tangata ki runga ake i tetai no to ratou enua, reo, turanga me kore te kara o te pakiri. “Nana i anga i te tangata i te pa enua katoa nei i te [tangata] okotai ra.” (Angaanga 17:26) Tera te aiteanga, e tungane tuaine te katoatoa. Me akangateitei e me takinga meitaki atu tatou i te katoatoa, ka mataora ratou e tatou katoa e ka mareka katoa Tei Anga mai.

Kia Maru

“E tenana, ka akangakau aroa ua e . . . te maru.”​—KOLOSA 3:12.

Me maru tatou, ka mataora tetai ke i te kapiti mai kia tatou. Ka māmā ua no ratou i te komakoma mai kia tatou pera katoa te ako ia tatou no te mea kua kite ratou e ka noo maru ua tatou. E me riri tetai tangata ia tatou, ka riro to tatou tu maru ei apai ke i to ratou riri. “Ko te tuatua maru ra tei akaanga ke i te riri: kareka te tuatua akakoko ra, ko te riri ïa te tupu” i karanga ai a Maseli 15:1.

Ei Ngakau Oronga e te Akameitaki

“E mea meitaki i te oronga atu i te rave mai.”​—ANGAANGA 20:35.

Te maataanga o te tangata i teia tuatau, e tu noinoi to ratou e te akamanako ua ia ratou uaorai. Inara, ka rauka te mataora mou me oronga tatou. (Luka 6:38) E mataora maata to te aronga oronga ua no te mea e maata atu to ratou inangaro no te tangata i te apinga. Na teia inangaro e akakeu ia ratou kia akaari i te tu akameitaki e te tu rekareka me oronga mai tetai ke kia ratou. (Kolosa 3:15) E ui kia koe uaorai, ‘Koai taku ka inangaro ei oa​—te aronga karapii e te mareka kore me ko te aronga ngakau oronga e te meitaki?’ Eaa te apiianga? Ko taau i inangaro mei ia etai ke, kia akapera katoa koe.​—Mataio 7:12.