Iehova—E Atua Tei Akakite Tuatua Ngaro Ra

“E Atua ra tei te rangi, ko tei akakite mai ia i te au tuatua ngaro.”​—DANIELA 2:28.

1, 2. (a) Eaa to Iehova tuke mei tona Enemi maata ra? (e) Akapeea te au tangata i te akaata mai anga i teia tuke anga?

KO IEHOVA, te Atua teitei rava e te aroa o te ao katoa e pini ua ake, koia anake Tei Anga maira, e Atua pakari e te tuatua tau. Kare aia e anoano kia uuna i tona tu, i tana au angaanga, me kare tana au akakoroanga. I tona uaorai tuatau e i tona uaorai manako, ka akakite aia iaia uaorai. Na teia tu te tuke ra aia mei tona Enemi, koia Satani te Tiaporo, tei tauta ra kia uuna i tona tu tikai e tona au manako.

² Mei ia Iehova raua ko Satani e tuke ra raua, mei te reira katoa oki te aronga akamori ia raua ra. Ko te aronga te aru ra i ta Satani arataki anga te akakiteia maira na te tu-rua te manako e te tu akavare oki. Te tauta ra ratou kia akakite mai ia ratou uaorai na roto i tetai tu marama meitaki, ia ratou e rave ra i te au angaanga no te poiri. Kua tuatuaia ki te au Kerititiano o Korinetia e auraka ratou e poitirere i teianei tika. “E aposetolo pikikaa oki te reira, e rave angaanga pikikaa ïa, i te akatutu aposetolo anga na te Mesia ia ratou uaorai. Kare oki e vavaria; ko Satani oki tei akatutu angela katoa iaia uaorai no te mārama.” (2 Korinetia 11:13, 14) I tetai pae, ko te au Kerititiano, ka akara atu ia Karaiti ei Arataki no ratou. Iaia i te enua nei kua akaata apa kore mai aia i te tu o tona Metua, o te Atua ko Iehova ra. (Ebera 1:1-3) No reira, na te aru anga ia Karaiti, te aru ra te au Kerititiano ia Iehova, i te Atua o te tuatua mou, i te tu tuera ua, e te marama. Kare katoa oki ratou e umuumu kia uuna i to ratou tu, ta ratou au angaanga, me kare ta ratou au akakoroanga.​—Ephesia 4:17-19; 5:1, 2.

3. Akapeea tatou i te akakore anga i te manako e ko te au tangata tei riro mai ei Au Kite o Iehova kua manonoia kia kapiti atu ki tetai “akonoanga ngaro”?

³ I etai tuatau te kite ra aia e meitaki, ka akakite a Iehova i te au tu no tana au akakoroanga e no te tuatau oki ki mua kare ra i kiteaia e te au tangata i mua ana. I roto i teianei tu koia tetai Atua te akakite ra i te au tuatua ngaro. No reira, i patiiaʼi te aronga tangata tei anoano ra kia tavini atu iaia​—ae te raurauia ra​—kia apii i taua au tuatua akakiteia maira. I tetai kimikimi anga i te 1994 i etai Au Kite e tere atu i te 145,000 i tetai enua i Europa kua akakiteia mai e, no runga i tetai avereti, kua akarakara ratou tataki tai i te au apiianga a te Au Kite o Iehova no te toru mataiti i mua ake i te ikianga kia riro ei tetai Kite. Kua rave ratou i te iki anga kia tau ki to ratou uaorai anoano kare i manonoia. E kua rave tamou ua ratou i muri akera i te anoano ma te angaanga tu rangatira. Ei akatauanga, no te mea kua kore tetai pae e akatika i te au turanga teitei no te akono tau no te au Kerititiano, kua iki teia aronga i muri akera e kare ratou e anoano kia rave ua atu ei Au Kite. Inara, e mea meitaki kia manakoia e i te rima mataiti kua topa akenei, e aka tuanga te au tangata o teia aronga Au Kite i mua ana kua rave akaou i te au takainga kia akamata akaou i to ratou kapiti anga e te rave anga angaanga ei Au Kite.

4. Eaa kare e tau kia akapekapeka i te au Kerititiano tiratiratu, e eaa ra ka kore ei?

⁴ Inara, kare te Au Kite katoatoa o mua ana e oki akaou mai, e i roto ia ratou ra ko tetai papaki i o ratou ra e au turanga apainga ta ratou i roto i te putuputuanga Kerititiano ra. Kare ra e tau kia poitirere i te reira, no te mea noatu ko tetai o ta Iesu ra pipi piri vaitata kiaia, koia te apotetoro ko Iuda, kua ariu ke atu ia. (Mataio 26:14-16, 20-25) Inara e tumu ainei teia no te taitaia i te akonoanga Kerititiano uaorai? Te akakore ra ainei teia i te puapinga ta te Au Kite o Iehova e rave ra i ta ratou angaanga apiianga? Kare rava ia, kare katoa oki mei ta te angaanga pikikaa a Iuda Ikariota i kore ra i apai mai kia tapu ta te Atua ra au akakoroanga.

E Mana Katoatoa Inara e Aroa Ia

5. Akapeea tatou i kite ei e te aroa ra a Iehova raua ko Iesu i te au tangata, e i akapeea raua i te akakite anga i teianei aroa?

⁵ E Atua aroa a Iehova. Te utuutu maira aia i te au tangata. (1 Ioane 4:7-11) Noatu rai te teitei o tona turanga, te rekareka ra aia i te akariroanga i te au tangata ei oa nona. No tetai o tona au tavini taito ra, ka tatau tatou: “‘Kua akarongo a Aberahama i te Atua, e i akonoia atura ïa ei tuatua-tika nana:’ e i karangaia maira oki aia e, ‘E oa no te Atua.’” (Iakobo 2:23; 2 Paraleipomeno 20:7; Isaia 41:8) Mei te au oa tangata e uriuri kapiti ra i te au tumu muna, me kare au mea ngaro, te pera katoa ra Iehova ma tona au oa. I teianei tu oki te aru ra a Iesu i tona Metua, no te mea kua akariro aia i tana au pipi ei oa nona e kua akakite atu i te au mea ngaro ra kia ratou. “Kare atura au e karanga kia kotou e, e tavini,” tana i tuatua atu kia ratou, “kare oki te tavini i kite i ta tona pu e rave ra: kua karanga ra au kia kotou e, e oa; kua akakite oki au kia kotou i te au tuatua ravarai taku i kite i taku Metua ra.” (Ioane 15:15) Te tuatua muna, me kare “tuatua ngaro,” te uriuri kapitiia ra e Iehova, e tana Tamaiti, e to raua au oa oki te taokotai ra ia ratou ki roto i tetai tatua no te aroa e te akamori anga kare e akamotuia.​—Kolosa 3:14.

6. Eaa ra i koreʼi e umuumuia kia uuna a Iehova i tona manako akakoroia?

⁶ Te aiteanga o te ingoa ko Iehova, “Nana e Akariro kia Tupu,” te akakite maira i tona mana kia akariro i tana e anoano kia tupu kia raukaʼi te akatupu kia oti tana akakoroanga. Kare mei te au tangata rai, kare o Iehova umuumu anga kia uuna i tona au manako no te matakuanga e penei ka rauka ia etai ke ra i te arai iaia i te akatupuanga i te reira. Kare aia e puapinga kore ua, e no reira te akakite atea ua maira aia i roto i tana Tuatua, i te Pipiria, i te maata anga o tana i akakoro kia rave. Te taputou maira aia: “Koia katoa taku tuatua . . . kare e oki puapinga kore ua mai kiaku nei, e tupu ra tei akakoroia e au ra; e manuia oki te mea i akaue atu ei au ra.”​—Isaia 55:11.

7. (a) Eaa ta Iehova i totou i Edene ra, e i akapeea ta Satani akapapu anga e e tika ta te Atua ra? (e) Akapeea i tika uaʼi te kaveinga ia 2 Korinetia 13:8 ra?

⁷ I muri poto ake i te meameaau i Edene ra, kua akataka tika mai a Iehova i te tupuanga openga no te patoi anga i rotopu iaia e tona Enemi, koia Satani. Ka akaparuparu mamaeia te Uanga taputouia o te Atua mari ra kare no te mutu kore ua atu, inara ko Satani ka mamae i te akaparuparu anga mutu kore i te openga ra. (Genese 3:15) I te 33 T.N., kua akaparuparu tikai te Tiaporo i te Uanga, koia Iesu Karaiti, na te akatupuanga i tona matenga. Na teia tu, kua akatupu a Satani i te Tuatua Tapu e i te rave anga i te reira kua akapapuia ko Iehova te Atua o te tuatua mou, noatu rai e kare tikai teia i ta Satani i manako. No tona makitakita i te tuatua mou e te tuatua tika, pera katoa oki tona ngakau parau, tu akono tataraara kore, kua taki atu iaia kia rave tikai i ta te Atua i totou ka rave aia. Ae, ki te aronga patoi katoatoa i te tuatua mou, pera katoa kia Satani uaorai, te vaira te kaveinga mou: “Kare rava e mea e tika ia matou ei akakore i te tuatua-mou, kareka ei akatika i te tuatua-mou.”​—2 Korinetia 13:8.

8, 9. (a) Eaa ta Satani e kite ana, inara te tamanata ra ainei teia kite i ta Iehova akatupu anga i tana au akakoroanga? (e) Eaa te akamatakiteanga taka meitaki te manako koreia ra e te aronga patoi ia Iehova, e no teaa ra?

⁸ I te mea e akara koreia te akanoo angaia te Patireia o te Atua ra i te 1914, kua akatupuia a Apokalupo 12:12: “E teianei, kia rekareka, e te au rangi e, e ko kotou katoa oki ko tei noo i reira. E mate ra oki to te enua e to te tai! tei raro atu na oki te diabolo ia kotou na, e riri maata oki tona, no te mea kua kite aia e e manga tuatau poto ua tona e toe nei.” Inara te akariro ra ainei te kite anga e e tuatau poto tona kia taui a Satani i tona aerenga? Ka riro te reira ei akatika anga no ta Satani tuanga e e Atua tuatua mou a Iehova e ei te Tutara Teitei Rava, koia anake ua te tau ra kia akamoriia. Inara, kare te Tiaporo e anoano kia akatika e kua ruti aia, kare noatu e te aro atura i te kite tika.

⁹ Kua akakite atea ua a Iehova i te ka tupu me aere mai a Karaiti i te akavaanga ki runga i ta Satani akatereanga o teianei ao. (Mataio 24:29-31; 25:31-46) No teia tu, te akakite maira tana Tuatua no te au tutara o teianei ao: “E tuatua oki te tangata e, e au, e kare e kino; ei reira ratou e rokoia uaia mai ei e te mate viviki, mei te vaine nui kia rokoia e te mamae ra.” (1 Tesalonia 5:3) Te aronga te ka aru i ta Satani taki anga kare e manako i teianei akamatakiteanga taka meitaki. Kua matapoia ratou no to ratou ngakau kikino, e na teia i arai ia ratou kia kore e tataraara i to ratou aerenga kino e kia kore e taui i ta ratou au parani e te ravenga kikite te tauta ra kia akakore i ta Iehova au akakoroanga.

10. (a) Penei eaa te maata te tupu anga o 1 Tesalonia 5:3, inara eaa te manako anga tau no te au tangata o Iehova? (e) Eaa ra te au tangata akarongo kore ka maata atu ei te maro anga i te tuatau ki mua i te patoianga i te au tangata o te Atua?

¹⁰ E maata oki i te 1986 maira, i te akakite anga a te Taokotaianga Enua i tetai Mataiti Au o te Pa Enua, kua ki te ao i te tuatua anga no te au e te tinamou. Kua raveia te au takainga papu i tetai tauta anga kia rauka te au no te ao nei, i te akara anga e manga autu anga tetai. Ko teia ainei te tupu anga takiri no teia totou, me kare ka tau ainei tatou kia manako atu i tetai akakite anga poitirere a te tuatau ki mua no tetai atu tu? Na Iehova e akataka mai i te reira tumu i tana tuatau tau. I teianei, kia vai ara ua tatou i te pae vaerua, “i te tatari anga, e te rapurapu anga atu, kia tae mai taua rā o te Atua ra.” (2 Petero 3:12) I te aere ua atu anga te tuatau ma te maata atu te tuatua no te au e te tinamou, ko tetai papaki tangata tei kite ra i teia akamatakite anga, mari ra tei iki kia manako kore atu i te reira, penei ka riro kia maata atu te ketaketa i te manako anga e kare a Iehova, me kore kare e rauka te akatupu i tana tuatua. (Akaaite ia Koheleta 8:11-13; 2 Petero 3:3, 4.) Inara te kite ra te au Kerititiano mou e ka rauka ia Iehova kia akatupu i tana i akakoro ra!

Akangateitei Tika no te Rima Rave ta Iehova e Taangaanga Ra

11. Eaa ta Daniela raua ko Iosepha i kite no runga ia Iehova?

¹¹ I te moe anga te Ariki ko Nebukanesa, tutara o te Patireia o te Babulonia ou ra, e akatupu anga taitaia taua moemoea ra e kare ra i maara iaia eaa, kua pati aia i te tauturu. Kare i rauka i tona kau taunga, te au akara etu, e te au purepure i te akakite kiaia eaa tana moemoea e kare katoa i rauka kia akataka i tona aiteanga. Inara, kua rauka i te tavini o te Atua ra ia Daniela te rave i te reira, noatu rai e kua viviki aia i te akatika anga e te akakiteanga i te moe ra e tona aiteanga kare i tetai tupu anga no tona uaorai pakari. Kua karanga a Daniela: “E Atua ra tei te rangi, ko tei akakite mai ia i te au tuatua ngaro, ko tei akakite mai ïa ki te ariki ra kia Nebukanesa, i te ka tupu i te au rā openga ra.” (Daniela 2:1-30) I etai anere mataiti i mua akera, ko Iosepha, tetai atu peroveta a te Atua ra, kua tupu kiaia tetai tu aiteite e kua akatika ko Iehova Tei Akakite i te au tuatua ngaro.​—Genese 40:8-22; Amosa 3:7, 8.

12, 13. (a) Koai to te Atua ra peroveta maata rava, e eaa koe i pau ei mei tera? (e) Koai i teia tuatau te tavini ra ei “akaaere no te tuatua ngaro a te Atua ra,” e eaa te manako tau no tatou ia ratou ra?

¹² Ko Iesu ta Iehova peroveta maata rava tei tavini ki runga i te enua nei. (Angaanga 3:19-24) Kua akataka mai a Paulo: “Ko te Atua, ko tei tuatua rikiriki mai i muatangana, e manganui te tu o te tuatua anga mai, ki te ui tupuna i te au peroveta; Ko tei tuatua mai ïa kia tatou i teianei tuatau openga i tana Tamaiti, ko tei akariroia e ia ei Atu no te au mea ravarai, e kua anga oki i nga ao katoa nei iaia.”​—Ebera 1:1, 2.

¹³ Kua tuatua a Iehova ki te au Kerititiano mua ra na roto i tana Tamaiti, ia Iesu, tei akakite ra i te au tuatua ngaro tu-Atua kia ratou. Kua tuatua a Iesu kia ratou: “Kua orongaia mai te kite ia kotou i te tuatua ngaro o te basileia o te Atua.” (Luka 8:10) I muri akera kua tuatua a Paulo no te au Kerititiano akatainuia ra ei “tavini anake no te Mesia, e e akaaere no te tuatua ngaro a te Atua ra.” (1 Korinetia 4:1) I teia tuatau nei, kua tavini ua atu te au Kerititiano akatainuia mei tera, i te akakianga i te pupu tavini akono meitaki e te pakari e na roto i tona Pupu Akaaere te oronga ra i te kai vaerua i te tuatau tau. (Mataio 24:45-47) Me te akangateitei maata ra tatou i te au peroveta akauruia a te Atua o te tuatau kua topa ra, e maata oki i te Tamaiti a te Atua, ka tau katoa ainei tatou kia akangateitei i te rima rave e tangata nei ta Iehova e taangaanga nei i teia tuatau kia akakite i te tuatua no te Pipiria tei umuumuia ra no tona iti tangata i teia tuatau kino maata?​—2 Timoteo 3:1-5, 13.

Te Tuera Atea Ua me Kare te Tu Ngaro?

14. Ko teea te tuatau e rave ei te au Kerititiano i te au angaanga i roto i te tu ngaro, na reira te aruanga i taai akatauanga?

¹⁴ Te riro ra ainei te aite anga o to Iehova ra tu tuera atea ua i te akakiteanga i te au mea ra, e ka tau ua te au Kerititiano i raro ake i te au tu ravarai kia akakite i te au mea katoa ta ratou e kite ra? E mea tika, ka aru te au Kerititiano i ta Iesu akoanga ki tana au apotetoro ra e: “kia pakari [ratou] mei te ovi, e te apa kore mei te kukupa ra.” (Mataio 10:16) Me akakiteia atu e kare ratou e tika kia akamori i te Atua kia tau ki ta to ratou akava ngakau i akaue, “ko te Atua ta [te au Kerititiano] e akarongo,” no te mea te kite ra ratou e kare e tika o te rima rave tangata nei kia arai i te akamori ia Iehova ra. (Angaanga 5:29) Na Iesu uaorai i akakite mai i te tika o teianei. Ka tatau tatou: “E muri akera, kare aturā Iesu i aaere i Iudea, aaere ua iora aia na Galilea; no te mea te tapapa ra te ngati Iuda iaia e ta. Te vaitata ra te oroa patia puakapa a te ngati Iuda. Kua karanga atura Iesu kia ratou [ki tona au taeake kopapa akarongo kore ra], . . . Ka aere kotou ki taua oroa ra; kare au e aere vave atu ki taua oroa ra; kare akerai i tae ki toku ora tikai. E oti akera taua tuatua ra, noo ua iora aia i Galilea. Kia riro ra tona ai taeake ra, kua aere katoa atura aia ki taua oroa ra, kare ra i aere akakite, i aere poiri ua.”​—Ioane 7:1, 2, 6, 8-10.

Kia Akakite me Kare Auraka kia Akakite?

15. I akapeea ta Iosepha akakite anga e ko te akono anga i tetai mea ei mea ngaro i etai tuatau ko te apinga aroa ia kia raveia?

¹⁵ E etai au turanga, ko te tamouanga i tetai tumu ei mea ngaro kare i te pakari anake mari ra e aroa katoa oki. Ei akatauanga, i akapeea a Iosepha, koia te metua angai o Iesu, i tona kite anga e ko tana vaine momokia, ko Maria, kua nui? Ka tatau tatou: “E tangata tuatua-tika tana tane ko Iosepha, kare oki aia i inangaro i te akakite ua iaia, manako iora e akaruke poiri ua iaia.” (Mataio 1:18, 19) Mei teaa ra te aroa kore me i akakite ua iaia ra!

16. Eaa te apainga a te aronga pakari, e etai atu au mema katoa oki o te putuputuanga, no runga i te au tumu muna ra?

¹⁶ Te au tumu muna te ka akatupu i te akama anga me kare mamae anga kare e tau kia akakiteia ki te au tangata kore ra e mana akatikaia. E mea tau kia tamou te aronga pakari Kerititiano i teia ki roto i to ratou manako me ka oronga ratou i te akoanga me kare akapumaana ki te au taeake Kerititiano ra me kare penei i te ako anga ia ratou no te araanga kino kia Iehova ra. Te umuumuia ra te akonoanga i teianei au tumu na roto i te tu tau i te Tuatua Tapu; ko te akakiteanga i te au mea muna ki te aronga kare ra i piri atu e mea umuumu koreia te reira e te aroa kore oki. E mea tika, kare te au mema o te putuputuanga Kerititiano e tauta kia akakiteia te au apinga muna e te aronga pakari kia ratou mari ra ka akangateitei i te apainga a te aronga pakari kia akono i te au mea muna ra ei mea ngaro ia. Te akakite maira Maseli 25:9 e: “E akataka marie ua atu koe i taau tuatua ki to tangata tupu ra, auraka koe e aaki i tana ra tuatua muna ki tetai ke.”

17. Eaa ra te au Kerititiano i akono ei i te au mea muna ei mea ngaro i te maata anga o te au tu ra, inara eaa ratou ka kore ei e tika kia rave ua i te reira?

¹⁷ Te tika katoa ra teia kaveinga ki roto i te tuanga ngutuare tangata me kare ki roto i te au oa piri vaitata. Ko te akono tamouanga i etai au tumu tuatua muna e mea puapinga maata ia no te kopae anga i te au tu pekapeka e te au pirianga taitaia. “Mei te matangi ra e akarua, e topaʼi te ua ra, koia katoa te arero koumuumu ra, e tupu ei te mata riri ra.” (Maseli 25:23) Inara, ko te tiratiratu kia Iehova e tana au kaveinga tuatua tika, pera katoa te aroa no te aronga tataki tai tei apa ra, penei ka tau i etai atianga kia akakiteia ki te au metua, ki te aronga pakari Kerititiano, me kare ki etai atu aronga mana ra noatu me e au tuatua muna.a Inara i te maataanga o te au tu, ka mou rai te au Kerititiano i te au tuatua ngaro a etai ke ra i roto i te tu muna, ma te paruruanga i te reira mei ta ratou paruru oki i ta ratou uaorai.

18. Eaa nga tu Kerititiano tau te ka tauturu ia tatou kia akataka e eaa ta tatou ka tau kia akakite e eaa kare tatou e tau kia akakite?

¹⁸ Ei akaotianga, ka aru te Kerititiano ia Iehova na te akavai muna ua i etai au tumu me te umuumuia ra, e te akakiteanga anake me te tau ra. I te ikianga eaa tana ka tau e eaa kare e tau kia akakite, ka riro na te taakaaka, te akarongo, e te aroa e arataki iaia. Na te taakaaka e arai iaia kia kore e tuatua akamaata i tona uaorai puapinga, na te tautaanga kia manakoia mai e etai ke ra na te akakiteanga kia ratou i tana uaorai au mea katoatoa i kite me kare na te akatiaeaeanga ia ratou ma te au tuatua muna kare ra e tau aia kia tuatua. Na te akarongo i te Tuatua a Iehova e te putuputuanga Kerititiano ra e akakeu iaia kia tutu i te akakite anga Pipiria i orongaia maira na te tu-Atua ma te matakite oki kia kopae i te tuatuaanga te au apinga penei ka akariri ia etai ke ra i te akamata anga. Ae, ka akakeu te aroa iaia kia akakite atea ua i te au apinga te ka akakaka i te Atua e te anoanoia ra kia kite te au tangata kia raukaʼi te ora anga. I tetai pae, ko te au tumu muna no etai ke ra, ka paruru aia, ma te kite anga e i te maata anga o te au tu na te akakiteanga i te reira ka akaari i te ngere i te aroa.

19. Eaa te tu angaanga te ka tauturu i te akataka anga i te Kerititiano mou, e eaa te tupu anga no te reira?

¹⁹ Na teia tamata anga tau e tauturu kia akataka i te au Kerititiano mou. Kare ratou e uuna i to te Atua ra akataka anga ki muri i tetai arai no te ingoa kore me kare ki muri i tetai mea ngaro, mei te apiianga Toru Tai kare ra e rauka kia akatakaia. Te kiteia ra te tu o te au atua kitea koreia no te akonoanga pikikaa, kare no te akonoanga mou. (E akara ia Angaanga 17:22, 23.) Te ariki tika tikai ra te Au Kite akatainuia o Iehova i ta ratou angaanga ei “akaaere no te tuatua ngaro a te Atua ra.” Na te akakiteanga tuera atea ua i teianei au tuatua ngaro kia etai ke ra, te tauturu ra ratou kia akavaitata mai i te aronga ngakau tiratiratu kia kimi i te pirianga oa ma Iehova ra.​—1 Korinetia 4:1; 14:22-25; Zekaria 8:23; Malaki 3:18.

[Tataanga Rikiriki i Raro]

Akapeea Koe me Pau?

◻ Eaa ra i kore ei e umuumuia kia uuna a Iehova i tana akakoro anga i manako?

◻ Te akakite ra a Iehova i tana au mea ngaro kiaai ma?

◻ Eaa ta te au Kerititiano apainga no runga i te au tumu muna?

◻ Eaa nga tu tau te ka tauturu i te au Kerititiano kia kite eaa ta ratou ka akakite e eaa ta ratou kare e akakite?

[Au Tutu i te kapi 8, 9]

Te akakite maira Iehova i te au mea ngaro na tana Tuatua