Kia Kite i te Atua​—Akapeea?

Penei te ekoko ra etai e te inangaro tikai ra te atua i te akakite iaia uaorai ki te tangata. Me te inangaro ra aia, akapeea aia i te rave anga i te reira?

KUA taopenga mai te Tangata Taui Porotetani o te 16 anere mataiti ko John Calvin e kare te tangata uaorai i kite i te Atua mari ra na te akakite anga mai aia iaia uaorai ki te tangata ravarai. Inara, penei te manako ra tetai papaki e me te inangaro tikai ra te Atua i te akakite mai iaia uaorai ki te tangata. E me te inangaro ra aia, akapeea aia i te rave anga i te reira?

E tumu anga ta Iehova, ko “Tei anga,” no te au mea ravarai tana i rave. Pera katoa, ei “Atua Mana katoatoa,” ka rauka iaia i te rave tikai i tona au akakoroanga. (Koheleta 12:1; Exodo 6:3) Papu ia tatou e kua akakite puareinga mai aia i tona au akakoroanga ki te tangata, no te mea kua akauruia tana peroveta ko Amosa kia tata e: “Kare a te Atu ra a Iehova mea i rave, mari ra kia akakite i tana tuatua ngaro ki tona ra au tavini ki te au peroveta.” E akara ana e, te karangaia ra e kua akakite te Atua i tona au akakoroanga ki tona au tavini anake ua, ki te aronga tei inangaro tikai iaia. E mea tau ainei te reira? E akakite ana koe kiaai taau au mea muna? Ki tetai ua atu tangata me ki toou au oa piri vaitata?​—Amosa 3:7; Isaia 40:13, 25, 26.

Te akaki nei te pakari e te kite i te Atua i te aronga akaaka ma te umere, e e mea tau teia. Inara, e maata atu te anoanoia ra i te umere ua me ka puapingaia tatou mei te pakari e te kite o te Atua. Te akakite pakari maira te Pipiria e kia kite i to te Atua ra manako, kia ngakau akaaka tatou: ‘Kia vaio marie i taku au akauenga ia koe. Kia ariu mai koe i to taringa ki te pakari. Kia kimi marie to ngakau i te kite. Kia kapiki nui koe i te kite, e kia akateitei i to reo kia rauka te kite. Kia kimi pu tikai koe iaia mei te ario ra.’​—Maseli 2:1-4.

Ka rauka i tetai tangata akaaka tei tuku pakari tikai i teia tu tauta anga i te kite i te Atua. Te akakite maira taua irava i roto i te puka o Maseli e: “Ko Iehova oki tei oronga mai i te pakari: no roto i tona vaa te kite e te karape.” Ae, ka rauka i te aronga tei kimi ngakau tae i te tuatua mou “e kite ei i te tuatua-tika e te tuatua-tau, e te tiratiratu; te au mataara memeitaki katoa ra.”​—Maseli 2:6-9.

Te Kimi Anga i te Tuatua Mou

Te akakite maira The Encyclopedia of Religion e: “Kua akatakaia mai te oraanga o te tangata na te akataka anga mai e eaa te mea tika e te mea tika kore, te ririnui e te ririnui kore, te tika tikai e te akavare, te mea ma e te mea iroia, te areare e te oripu, e pera katoa te turanga mei tetai tua ki tetai tua.” E akono ei i teia anoano, kua roa te tuatau i te kimi anga te tangata i te tuatua mou. Na te arataki maata anga i ta ratou kimi anga kia Iehova, ta te tata taramo i kapiki ra “te Atua tuatua-mou,” te tere nei ratou ki mua i te kimi anga i te reira.​—Salamo 31:5.

Te aiteanga tikai o te ingoa Iehova “Ka Akariro Aia kia Tupu.” (Genese 2:4, NW, tataanga i raro ake) No reira, te aiteanga tikai o te ingoa o te Atua te arataki ra i te manako ki tona Taoonga ei Anga e ki tona akakoroanga. Te tikaanga, te kite anga e te taangaanga anga i te ingoa o Iehova e akataka anga ia i te tu o te akonoanga mou. Kua kite meitaki a Iesu i taua tikaanga ra. I te taiku anga ki tana au pipi, kua tuatua aia ki te Atua na roto i te pure e: “Kua akakite atu oki au kia ratou, e e akakite atu rai au, i toou ingoa: e ei roto ia ratou te akaperepere taau i akaperepere mai iaku ra, e ei roto au ia ratou.”​—Ioane 17:26.

Te irinaki anga ki runga i tona pirianga oa ma te Atua, kua tuatua tetai tangata Epera i taito ra ko Iosepha te ingoa ma te irinaki tikai, i tona aro atu anga i te angaanga no te akakite anga i te aiteanga o te moemoea e: “Kare ainei no ko mai i te Atua ra te au aiteanga moe?”​—Genese 40:8; 41:15, 16.

Vaitata rai e e 1,100 mataiti i muri mai, e moemoea ta te Ariki ko Nebukanesa o Babulonia kare i rauka ana i tona aronga pakari i te uri. Kua tuatua atura te peroveta ko Daniela ki te ariki: “E Atua ra tei te rangi, ko tei akakite mai ïa i te au tuatua ngaro, ko tei akakite mai ïa ki te ariki ra kia Nebukanesa, i te ka tupu i te au rā openga ra.”​—Daniela 2:28.

Te akaari maira nga akaraanga o Iosepha raua ko Daniela e ka rauka te pakari e te kite o te Atua i te aronga te tavini anake ra i te Atua ko Iehova. E tika, te rauka anga mai ia tatou to te Atua ra mareka anga penei te umuumuia ra kia akarukenaia te au manako tei irinakiia i mua ana. Kua akapera rai te au ngati Iuda o te anere mataiti mua tei riro mai ei au Kerititiano. Kua utuutuia kia akangateitei e kia akarongo ki te au ture tei akanooia i raro ake i te akatereanga o te au mea ngati Iuda, te anoanoia ra ratou i te tuatau kia ariki ia Iesu ei Mesia. Kua aere mai aia ei akatupu i te Ture a Mose, tei riro ei “ata anake te ture no te au mea memeitaki a muri atu.” (Ebera 10:1; Mataio 5:17; Luka 24:44, 45) Kua monoia te reira e “te ture a te Mesia,” e teitei rava atu te reira i te Ture a Mose.​—Galatia 6:2; Roma 13:10; Iakobo 2:8.

Pouroa tatou kua anauia mai ki roto i tetai ao tei takake mai mei te Atua. No te ara tei akatuangaia mai mei nga tokorua mua, kua anauia mai tatou ei enemi no te Atua, te ngere anga i te kite tika tikai no tana au akakoroanga. E ngakau pikikaa katoa to tatou. (Ieremia 17:9; Ephesia 2:12; 4:18; Kolosa 1:21) Kia rauka mai te pirianga oa ma te Atua, e mea tau kia apii tatou i te tuku i to tatou manako kia aru i te tu manako o te Atua. Te rave anga i te reira kare i te mea mama ua.

Penei e mea ngata i te akaatea mai i te au manako me kore i te au ravenga a te akonoanga pikikaa, me kua apiiia mai taua au manako ra kia tatou mei te tamariki anga mai. Inara e aerenga meitaki ainei i te aru ua atu i te mataara tarevake? Kare rava! E meitaki ake tikai kia taui i to tetai tu manako e e rauka mai ei i reira to te Atua mareka anga.

Akataka Anga i te Mataara Ikuikuanga a te Atua

I teea ngai ka kite ei tatou i te tauturu kia marama i te Tuatua no te tuatua mou e oti te aru tau anga i te reira? I Iseraela i taito ra, kua oronga te Atua ki te au tangata irinakiia e te tiratiratu i te au taoonga no te apainga kia arataki i te iti tangata. Pera katoa te arataki ra te Upoko o te putuputuanga Kerititiano o teia tuatau, ko Karaiti, i te aronga tei kimi ngakau tae i te tuatua mou. Te rave nei aia i teia na roto i tana au pipi irinakiia e te tiratiratu, ko ratou te mataara tau no te arataki anga e te paruruanga i te aronga te kimi ngakau tae ra i te tuatua mou. (Mataio 24:45-47; Kolosa 1:18) Inara ka akapeea tetai i te akataka anga i te mataara ikuikuanga a te Atua?

Te tauta ra te au pipi mou a Iesu Karaiti i te akaata i taua au tu ta Iesu i akaari mai ei tangata. I roto i tetai ao te maata maira te kino, no to ratou tu takake i te akaari anga mai i taua au tu i te pae vaerua ra e mea mama ua i te akataka anga i teia au pipi nei. (E akara i te pia i te kapi 6.) Te akaataia ra ainei teia au tu i roto i te akonoanga taau e aere ana me kare i roto i te au akonoanga o toou tangata tupu ra? E puapinga maata tikai kia akarakara koe i teia tumu nei ma te tauturu anga a te Pipiria.

Te pati atu nei matou ia koe, te aronga tatau, kia rave i te reira na roto i tetai ravenga apiianga i te Pipiria. I te mataiti i topa akenei, i roto i te avereti, kua taangaanga te au tangata tei tere atu ki te 6,000,000 me kore te au ngutuare tangata ra i roto i te 235 enua i teia akanoonooanga kia apii i te Pipiria ma te Au Kite o Iehova. E angaanga tere ki mua, e angaanga reka, e e angaanga puapingaia te rauka anga mai te pakari e te kite i te Atua. Eaa ka kore ei e akamata i tetai takainga kia rauka mai te pakari e te kite i te Atua? Kare rava koe e tataraapa i te rave anga i teia takainga. Ae, ka kite tikai tatou i te Atua!

[Pia i te kapi 6]

TE ARONGA TE ANGAANGA ROTAI RA KI TE ATUA . . .

te akono tamou ra i te tu neutara i roto i te au taumaroanga poritiki.​—Isaia 2:4.

te akatupu ra i te ua meitaki na te rave anga i te anoano o te Atua.​—Mataio 7:13-23.

te akaari ra i te aroa mou i rotopu ia ratou uaorai.​—Ioane 13:35; 1 Ioane 4:20.

te tuatua okotai ra i te au ngai ravarai.​—Mika 2:12.

kare e aru i te au manako tarevake e te tu o teianei ao takapini ia ratou.​—Ioane 17:16.

te akakite ra i te tuatua mou e te akariro ra i te tangata ei pipi.​—Mataio 24:14; 28:19, 20.

te rekareka ra i te uipa putuputu no te akamaroiroi anga.​—Ebera 10:25.

te akapaapaa ra i te Atua ei pupu tangata i te pa enua katoa.​—Apokalupo 7:9, 10.

[Au Tutu i te kapi 7]

Ka rauka te kite i te Atua na runga i te turanga o te tangata tataki tai, te pamiri, e te putuputuanga