Ta te Puka Tapu Akaraanga i te Au e te Tinamou

E manganui te au tangata tei ariki i te akara anga ua no te taokotai anga maata atu i teianei ao e te au e te tinamou ta teia ka apai mai. Te manakonako ra ratou e ka arataki atu teia neke anga ki tetai ao meitaki ake. Inara te akakite maira te Puka Tapu e e maata atu tei o mai i te ka kitea uaia atu.

E MEA reka tikaiia te tuatua o te au e te tinamou e te au Kerititiano no te mea no ta te apotetoro ko Paulo i tata ki te putuputuanga Kerititiano i tona akauru angaia i te anere mataiti mua. Kua papaia tana au tuatua i roto i te Puka Tapu ia 1 Tesalonia 5:3 (NW): “Te taime e tuatua ei ratou e: ‘E au e te tinamou!’ e rokoia mai ei ratou e te mate viviki mei te vaine nui ra e rokoiaʼi e te mamae anau ra; e kare rava ratou e ora.” Te taaki maira teia irava i te au uianga puapinga.

Au e te Tinamou​—E Akamata Anga no Teaa?

Me tatau koe i te putunga tuatua o ta Paulo au tuatua tei tataia i runga akenei, ka kite koe e ko te aronga e tuatua ra “e au e te tinamou” kare ratou i te au Kerititiano araara tikai, inara e au tangata ratou tei varea e te moe ra i te au mea tikai e tupu ra. Tei roto ratou i tetai turanga tumatetenga inara kare ratou i kite i te reira no te mea te manako ra ratou e te meitaki ua ra te akaraanga o te au mea. Inara no runga i te au Kerititiano, kua tuatua a Paulo: “I te au atianga e te au tuatau ra, e aku au taeake, kare e anoanoia no te tata atu kia kotou.” (1 Tesalonia 5:1, NW) Ae, kia matakite tatou i ta te Atua papaanga tuatau o te au rave anga. No teaa ra? No te mea kua tuatua a Paulo e te aere maira “mei te keia tikai i te po” tetai tuatau o te mate viviki tei kapikiia ko te “ra o Iehova.”​—1 Tesalonia 5:2, NW.

Eaa te ka o atu i te tuatua akakiteia o te au e te tinamou? Te papu ra, e maata atu tikai ia i te tuatua ua. Kua tuatua ana te au tangata no runga i te au e vaitata rai mei te tuatau o te au tamaki anga. Te tou ra ta Paulo au tuatua ki tetai tuatau me akara anga e te rauka ra i te au pa enua te au e te tinamou na roto i tetai mataara kiteaia. Inara ka riro katoa ua teia ei tutu ua. Tetai akara anga tutu ua o te au e te tinamou te arataki atura ki te mate viviki kare tikai ia i te au tikai e kare katoa i te tinamou tikai.

Kua tuatua katoa a Iesu no runga i teia mate viviki. Kua kapikiia te reira e ko te “tumatetenga maata tei kare rava i tupu ana mei te akamataanga o teianei ao e tae mai ki teianei, e kare, e kare rava e tupu akaou.” E anere ua atu mataiti i mua ake ia Iesu, kua tuatua katoa te peroveta a Daniela no te reira, e kua akatutu aia i te reira e ko “tetai tuatau taitaia tei kare rava i tupu ana mei te tu anga mai o tetai enua e tae rava atu ki te reira tuatau.”​—Mataio 24:21, NW; Daniela 12:1, NW.

Ka kapikiia e ko tetai tumatetenga maata, e kapikiia ko tetai tuatau taitaia​—noatu eaa te tu, i tau ki te au totou, na te reira e takore takiri i tetai ua atu i ta Satani akatereanga i te enua nei. Kare i akaari mai i te mareka anga no te atua mai, ka arataki atu te tuatua o te au e te tinamou ki tetai atu mea ke!​—Akaaiteia atu kia Zephania 3:8.

Akaariia Mai te Au Tuatau Tika

E akatupu anga ainei te akamatakite anga totouia a Paulo no te akara anga o te au neke anga ki tetai taokotai anga maata atu i teianei ao e te au manakonakoanga no te au e te tinamou? Mei ta teia makatini i tuatua putuputu, mei te 1914 mai kua akakitekite ana tatou i te akatupu anga o te au totou Puka Tapu e manganui tei piri atu ki to Iesu turanga i te rangi ma tona ririnui na roto i te Patireia. (Mataio, nga pene 24, 25; 2 Timoteo 3:1-5; Apokalupo 6:1-8) Kua akakite a Iesu e i te ra o Iehova, ka tae mai te mate viviki ki te aronga kino, ka tae mai koi oraʼi te au mema o te uki tangata tei kite i te akamataanga o teia tuatau.​—Luka 21:29-33.

Kua oronga katoa mai te apotetoro ko Paulo i tetai tika. Kua tuatua aia: “Koi tuatuaʼi ratou i te tuatua no te au e te tinamou, ma te okotai ravarai ka tupu te tumatetenga ki runga ia ratou.” Te akaari maira teia tuatua o ta Paulo au tuatua i roto i The New English Bible e ka tupu te tumatetenga maata “koi tuatua ei ratou.” Mei te keia rai i te po​—ma te kitea koreia—​ka tupu te mate i te tuatau manako koreia, me tuku tikai te maata o te au tangata i to ratou akarongo ki runga i ta ratou au e te tinamou tei manakonakoia. No reira, kare e rauka ia tatou i te tuatua i teianei ma te ope anga e te akatupuia ra te au tuatua a Paulo no te turanga au e te tinamou i teia nei​—me kare mei teaa te maata te tuatua no te au e te tinamou te ka tupu—​i te mea e te rongoia nei teia tu tuatua i teia nei mei tetai mea kare e tupu akaou te akamatakite ra ia i te au Kerititiano i te anoano kia vai araara ua i te au taime ravarai.

‘Oparaanga’ i Rotopu i te Au Mana Ririnui

Te tuatua anga aia i te tuatua taitaia, kua oronga katoa mai te peroveta a Daniela i tetai tika. Kua akaari mai aia e ka tupu te tuatau taitaia i te openga o tetai taumaro anga roa i rotopu i nga mana ririnui, ko tetai tei kapikiia ko te “ariki i apatokerau” e tetai ko te “ariki i apatonga.” (Daniela 11:5-43) Mei te ope anga o te Tamaki II o Teianei Ao, kua komonoia ana teia nga mana ririnui e te “ariki [kapitara] i apatonga” e tetai ko te “ariki [totiara] i apatokerau.”

Kua akakite a Daniela e ko te pekapeka anga maata i rotopu i teia nga mana ririnui, mei tei kitea i te 45 mataiti i topa akenei, ka riro ia ei ‘tetai oparaanga,’ mei tetai nga tangata kukumi rai te tauta pakari ra kia re. I nanai ua akenei, kua ngarongaro aere te oparaanga. No reira i roto ia Me i te mataiti i topa akenei, kua akakite te minita Toviete e kua akamutu te Tamaki Anu. Ia Tiunu, kua tuatua te makatini Time no tetai uipaanga i rotopu i te Unaite Teite e te Toviete Unioni e: “I tetai au mataiti i topa ua akenei te akara anga e kua riro etai au koreromotu no runga i te akaaere anga i te au apinga tamaki e te tamatamata anga nukiria ei tupu anga mako. Me tamanakoia i teianei, e akara anga puapinga kore.”

Noatu e no teianei ua teia rotai anga akatutu ua i rotopu i nga mana ririnui e me no tetai tuatau roa, na te tuatau ia e akakite mai. Inara okotai ra mea e papu ra. Te aere nei te tuatau ki mua ta Iesu i taikuia ra. Te akakite maira te au mea i teianei ao e te vaitata ra tatou ki te au rave anga tei akakiteia e te apotetoro ko Paulo e te peroveta a Daniela. Noatu e no te mana o te au ekaretia o Kerititome i tupu ei te au tutupu anga poritiki, kare ratou e arataki atu ki te au ope kore. Ko tika anga tikai e ka arataki ratou i tetai mea ke no te au pa enua o teianei ao.

[Au Tutu i te kapi 6]

Na te tuatau e akakite mai e eaa te roa o teia rotai anga i rotopu i nga mana ririnui e rua

[Akameitakianga]

USSR Mission to the UN