Arikianga i “te Meitaki i te Tangata Nei”
“E kite atu kotou i te aronga i rave i te angaanga a te Atu ki roto ia kotou na, . . . e kia maata rava i te akangateitei ia ratou ma te aroa no ta ratou angaanga.”—1 TESALONIA 5:12, 13.
1. Kia tau ki ta Angaanga 20:35, eaa te mana o te oronga anga? E akatutu mai.
“E MEA meitaki i te oronga atu i te rave mai.” (Angaanga 20:35) Te maara ra ainei ia koe te taime openga i kite ei koe i te tika o taua au tuatua a Iesu ra? Penei ko tetai apinga aroa taau i oronga na tetai taau i akaperepere ra. Kua iki matakite koe i te reira, no te mea kua anoano koe kia riro ei tetai apinga te ka akaperepereia e taau tangata i aroa ra. Te akara mareka anga i te mata o taau i akaperepere ra—mei teaa ra te akapumaana anga i toou ngakau! Me akakeu tikaia, ko te orongaanga e akakiteanga aroa ia, e ko te akakite anga aroa e mana tona kia apai mai i te mataora kia tatou.
2, 3. (a) Eaa i tau ei kia tuatuaia e kare tetai i mataora atu mei ia Iehova, e akapeea ka raukai i te oronga anga i te “meitaki te tangata nei” kia akariro iaia kia rekareka? (e) Eaa ta tatou kare e anoano kia rave ma tetai apinga orongaia mai e te Atua?
2 Koai, i reira, te ka mataora atu ia Iehova, Tei o maiia ra “te au mea memeitaki”? (Iakobo 1:17; 1 Timoteo 1:11) Te au mea ravarai tana i oronga maira na te aroa i akakeu. (1 Ioane 4:8) Ko te tika tikai te reira no te apinga orongaia mai ta te Atua i oronga mai ki te putuputuanga na roto ia Karaiti ra—koia “te meitaki i te tangata nei.” (Ephesia 4:8) Ko te oronga anga mai i te aronga pakari kia akono i te anana ko tetai akakite anga i to te Atua ra aroa oonu no tona au tangata. Ko teianei au tangata kua iki matakiteia mai—ka tika ratou kia tau i te au Tuatua Tapu ra. (1 Timoteo 3:1-7; Tito 1:5-9) Kua kite ratou e ka tika ratou kia akono “akaperepere i te anana,” ei reira oki e raukai i te au mamoe ra te tumu kia manako ngakau akameitaki no taua aronga tiaki aroa ra. (Angaanga 20:29; Salamo 100:3) Me kite a Iehova e te ki ra te au ngakau o tana au mamoe ma taua akameitaki anga ra, e mea tika tikai ka rekareka katoa oki tona uaorai ngakau!—Maseli 27:11.
3 Kare tikai tatou e tau kia anoano i te akameangiti mai i te puapinga no tetai apinga orongaia mai e te Atua ra; kare katoa oki tatou e anoano kia ariki kore atu i tana au apinga oronga mai. No reira e rua nga uianga te tu maira ki runga: Akapeea to te aronga pakari manako i ta ratou tuanga i roto i te putuputuanga ra? E akapeea oki ta te toenga atu o te anana ra akaari anga e te ariki ra ratou i te “meitaki i te tangata nei”?
‘E Oa Rave Angaanga oki Matou no Kotou’
4, 5. (a) Kua akaaite atu a Paulo i te putuputuanga ki teaa, e eaa teia i tau ei ei akatutuanga? (e) Eaa ta te akatutuanga a Paulo i akaari mei te tu tau na tatou kia manako e kia akono tetai i tetai ra?
4 Kua oronga a Iehova i “te meitaki i te tangata nei” ma tetai tuanga mana ki roto i te putuputuanga. Inara, kare te aronga pakari ra e anoano kia akono tau kore i to ratou mana, mari ra te kite ra ratou e e mea ngoie ua ei au tangata apa ua kia rave akapera. Akapeea, i reira, te manako tau na ratou ia ratou uaorai i te pae i te toenga atu o te anana? E akamanako i te akatutu anga ta Paulo i taiku maira. I muri ake i te uriurianga i te tumu i orongaia mai ei “te meitaki i te tangata nei,” kua tata a Paulo: “Kia akatika ra tatou i te tuatua-mou ma te aroa, kia tupu te tau iaia, i te upoko, i te Mesia i te au mea katoa nei: Nona oki te tau meitaki o te kopapa katoa e i piri ei oki, no te meitaki o te au pirianga katoa i te pakari mou o te au ngai katoa kia tau, tupu akera te kopapa i te maata anga o tona uaorai meitaki ma te aroa.” (Ephesia 4:15, 16) No reira kua akaaite atura Paulo i te putuputuanga, kapiti katoa te aronga pakari e etai atu au mema, ki tetai kopapa tangata. Eaa teianei i riro ei ei tetai akatutuanga tau?
5 E manganui te au mero o tetai kopapa tangata mari ra e okotai ua upoko. Inara, kare e apinga puapinga kore o te kopapa—kare tetai uaua, kare tetai niuro, kare tetai ara toto—e puapinga kore. E puapinga to te mero takitai e te oronga ra i tetai apinga ki te ora e te manea o te katoa anga. Aiteite katoa oki, te putuputuanga e manganui tona au mema tuke tuke, inara te au mema takitai—me e ou me kare e ruaine, e ora matutu me kare e apikepike—ka rauka kia oronga i tetai apinga ki te katoa anga o te ora pae vaerua e te manea oki o te putuputuanga. (1 Korinetia 12:14-26) Kare tetai e tau kia manako ngakau e e meangiti roa tona puapinga ei meitaki. I tetai atu pae mamao, kare tetai e tau kia manako ngakau akateitei, no te mea ko tatou katoa—te au tiaki e te au mamoe e aiteite—e tuanga no te kopapa, e okotai ua ra upoko, ko Karaiti ia. No reira te peni maira Paulo i tetai tutu pumaana no te aroa, te utuutu, e te ngateitei te ka tau tatou kia manako atu tetai i tetai. Na te kiteanga i teianei e tauturu i te aronga pakari kia manako taakaaka, tau oki no ta ratou tuanga i roto i te putuputuanga.
6. Noatu rai e mana apotetoro tona, akapeea a Paulo i te akakite anga i tetai vaerua taakaaka?
6 Ko teianei “meitaki i te tangata nei” kare e kimi kia akatere i te au oraanga me kare akarongo o to ratou au taeake akamori ra. Ko Paulo, noatu rai e mana apotetoro tona, kua tuatua taakaaka atura ki to Korinetia: “Kare ra mei te mea e ko matou te atu o to kotou akarongo, ei tauturu ra matou i to kotou rekareka: e mou akarongo oki to kotou.” (2 Korinetia 1:24) Kare a Paulo i anoano kia akatere i te akarongo e te oraanga o tona au taeake. Ko te tika, kare aia i kite i te umuumu anga kia rave i te reira, no te mea kua akakite aia i te irinaki anga e e au tangata e te au vaine tiratiratu ratou i roto i ta Iehova ra akaaerenga no te mea te anoano ra ratou kia rave i te mea tika. No reira, i te tuatuaanga nona uaorai e tona oa tutaka aere ko Timoteo, te aiteanga, te tuatua ra Paulo e: ‘Ko teianei ta maua apainga kia rave kapiti atu ma kotou katoa i te tavini i te Atua ra ma te rekareka.’ (2 Korinetia 1:1) Mei teaa ra tetai vaerua taakaaka!
7. Eaa ta te aronga pakari taakaaka e kite ra no ta ratou tuanga i roto i te putuputuanga, e eaa te irinaki anga tei ia ratou i to ratou au oa rave angaanga ra?
7 Ko taua apainga rai ta te “meitaki i te tangata nei” i teia tuatau. E ‘au oa rave angaanga ratou no to tatou rekareka anga.’ Te kite ra te aronga pakari taakaaka e kare na ratou e tuku i te tika e eaa te maata o te angaanga te ka rave etai ke ra i te angaanga atu ki te Atua ra. Kua kite ratou e ia ratou e akamaroiroi atura ia etai ke kia akatotoa me kare kia meitaki mai ta ratou angaanga orometua, ka tau te tavini anga i te Atua kia tupu mai i tetai ngakau inangaro ra. (Akaaite ia 2 Korinetia 9:7.) Te irinaki ra ratou e me te rekareka ra to ratou au oa angaanga, ka rave ratou i te ka rauka katoa ia ratou. No reira ko te reira to ratou anoano mei te ngakau maira kia tauturu i to ratou au taeake kia “akamori ia Iehova ma te pereperekavana.”—Salamo 100:2.
Tauturuanga i te Katoatoa kia Tavini ma te Rekareka
8. Eaa etai au tu e raukai i te aronga pakari kia tauturu i to ratou au taeake kia tavini ia Iehova ma te rekareka?
8 Te aronga pakari, akapeea ka raukai ia kotou kia tauturu atu i to kotou au taeake kia tavini ma te rekareka? Ka rauka ia kotou te akamaroiroi atu ma te akaraanga. (1 Petero 5:3) E tuku na to kotou maroiroi e te rekareka i te angaanga orometua e akakite atu, e penei ka akakeu i te ngakau o etai ke ra kia aru i ta kotou akaraanga. E akameitaki atu ia etai ke ra no ta ratou au tauta anga ma te ngakau katoa ra. (Ephesia 4:29) Ka tauturu te akameitaki pumaana tikai ia etai ke ra kia manako ngakau e te anoanoia maira ratou. Ka akamaroiroi i te au mamoe kia anoano i te meitaki te ka rauka ia ratou kia tavini i te Atua ra. E kopae ke i te au akaaiteite anga tau kore. (Galatia 6:4) Ko taua akaaiteite anga ra penei ka riro ei akamareka kore kare ei akakeu anga ia etai ke ra kia meitaki mai. Pera katoa, te au mamoe a Iehova e aronga takitai—ma te au turanga tuke tuke e te au kite oki. Mei ia Paulo rai e akakite i te irinaki anga i to au taeake. Te “akarongo [te aroa] i te au mea katoa,” no reira ka tau tatou kia irinaki e te inangaro ra to tatou au taeake i te Atua e te anoano ra kia akamareka iaia. (1 Korinetia 13:7) Me ‘akaari kotou i te akangateitei kia etai atu,’ ka kika mai kotou i te meitaki mei roto ia ratou ra. (Roma 12:10) Kia irinaki ra e me akamaroiroiia e te akapumaanaia te au mamoe ra, ka rave te maata anga i tei rauka katoa ia ratou i te tavinianga i te Atua, e ka kite ratou i te rekareka i taua angaanga ra.—Mataio 11:28-30.
9. Eaa te manako o te au oa pakari ra te ka tauturu i te aronga pakari takitai ra kia tavini ma te rekareka?
9 Na te manakoanga ia koe uaorai ei tetai ‘oa rave angaanga’ ka tauturu ia koe kia tavini ma te rekareka e kia ariki oki i te au meitaki o to kotou au oa aronga pakari ra. Tei te aronga pakari takitai ra tana uaorai au tareni e te au tu kite oki te ka rauka iaia kia taangaanga no te puapinga o te putuputuanga. (1 Petero 4:10) Penei ka meitaki tetai i te apiianga. Ko tetai atu penei ei akapapa anga. Inara penei ko tetai ke atu e meitaki no te aravei anga no tona tu pumaana e te aroa. Ko te tika, kare i tetai tangata pakari te apinga meitaki ravarai kia aiteite te tu. Ka riro ainei tetai tu meitaki—mei te meitaki i te apiianga rai—kia akariro i tetai o te aronga pakari ra kia teitei atu i tetai? Kare rava ia! (1 Korinetia 4:7) I tetai pae, kare e umuumuia kia reka kore i te meitaki o tetai ke ra me kare kia manako ngakau tau kore me ka apai mai te tu kite o tetai o te aronga pakari ra i te akameitaki anga iaia mei ko mai ia etai ke ra. Kia maara e, e au tu meitaki ta Iehova e kite maira ia koe. E ka rauka iaia i te tauturu ia koe kia tatanu i taua au meitaki e kia taangaanga ia ratou no te puapinga o toou au taeake ra.—Philipi 4:13.
‘Kia Akarongo e kia Kauraro Oki’
10. Eaa i tau ua ei kia akakite tatou i te ariki anga no te “meitaki i te tangata nei”?
10 Me rauka mai ia tatou tetai meitaki, e mea tau anake ia kia akakite te arikianga. “Kia mareka oki kotou,” te tuatua ra Kolosa 3:15. Akapeea i reira, te “meitaki i te tangata nei,” koia te meitaki okomaata ta Iehova i oronga mai kia tatou nei? E tika, te akameitaki maata ra tatou kia Iehova, koia Tei Oronga Ua Maira i te meitaki. Inara ka akapeea te ‘meitaki i te tangata uaorai nei’? Akapeea tatou me akaari e te ariki nei tatou ia ratou?
11. (a) Akapeea tatou me akakite i to tatou ariki anga no te “meitaki i te tangata nei”? (e) Eaa te puapinga maata no te tuatua anga kia “akarongo” e kia “kauraro” oki?
11 Ka rauka ia tatou kia akakite i to tatou ariki anga no te “meitaki i te tangata nei” na te viviki i te akarongo i ta ratou akoanga e te ikianga akatumuia i te Pipiria. Te apii maira te Pipiria ia tatou: “E akarongo i to kotou au arataki, e kauraro atu kotou: te tiaki ra ratou i to kotou au vaerua, e akakiteia oki ta ratou tuatua ia kotou i te Atua ra; kia akakite ra ratou ma te rekareka, eiaa ma te aue; kare oki e puapingaia ta kotou i te reira.” (Ebera 13:17) E tamanako e ka tika tatou, kare kia “akarongo” anake ua, mari ra kia “kauraro” oki ki te aronga e arataki ra. Te tuatua Ereni no te “kauraro” te aite anga “kia tuku ia koe ki raro io.” I te tuatuaanga no runga i nga tuatua kia “akarongo” e “kauraro,” kua tuatua te tangata apiipiiia i te Pipiria ko R. C. H. Lenski: “Te akarongo ra tetai me akatika aia i tei tuatuaia ra kia rave aia, e kua kite i te tika e te puapinga; kua tuku ua aia me e manako ke tona.” Me ka kite marama tatou e ka akatika oki i te arataki anga a te aronga e arataki ra, penei ka viviki ua te akarongo anga. Mari ra ka akapeea me kare tatou i kite marama i te tumu no tetai iki anga taka ke ra?
12. Eaa tatou i tau ei kia kauraro, me kare kia tuku ua, noatu me kare tatou i kite marama i te tumu no tetai iki anga?
12 I konei penei ka umuumuia tatou kia kauraro, me kare kia tuku ua. No teaa ra? No tetai apinga, ka tau tatou kia irinaki e ko teianei au tangata tau i te pae vaerua te manako meitaki maira to ratou ngakau ia tatou. No te mea, te kite meitaki ra ratou e ka tika ratou kia oronga i tetai tuatua kia Iehova no te au mamoe tei orongaia ra na ratou e utuutu. (Iakobo 3:1) Kapiti katoa oki, ka tau tatou kia maara e penei kare tatou i kite i te au tika katoatoa tei taki atura ia ratou ki tetai iki anga tei akakiteia maira.—Maseli 18:13.
13. Eaa te ka tauturu ia tatou kia kauraro me no etai iki anga akavaanga a te aronga pakari ra?
13 Ka peea oki te kauraro anga me no te au iki anga a te aronga akava ra? E tika ra, penei kare teianei i te mea ngoie ua, e maata atu oki me ka raveia tetai iki anga kia akaateaia tetai ta tatou i akaperepere ra—tetai kopu tangata me kare tetai oa piri vaitata. I konei katoa, e mea meitaki kia tuku ua ki te akava anga a te “meitaki i te tangata nei.” Tei roto ratou i tetai turanga tei meitaki atu i to tatou, e penei e maata atu ta ratou i kite no te au tika ra. E putuputu teianei au taeake i te mamaeia no runga i taua au iki anga ra; ko tetai apainga akamanakoanga tau mai ia kia ‘akava no Iehova.’ (2 Paraleipomeno 19:6) Ka rave ratou i te au tauta anga ravarai kia aroa ua, no te mea te manako ra ratou e ‘kua tika i te [Atua] kia akakore i te ara.’ (Salamo 86:5) Inara ka tika katoa oki ratou kia tamou marie i te tu ma o te putuputuanga, e no reira te akaaere ra te Pipiria e kia akaatea atu ratou i te aronga rave tarevake ma te kore e tataraara. (1 Korinetia 5:11-13) I te au tu e manganui ka ariki tei rave tarevake uaorai i te iki anga. Penei ko te ako ua anga tei umuumuia nona kia rako tangata mai. Me ko tatou, ko tana au akaperepere, e kauraro ua atu i te iki anga ra, penei na te reira te tauturu ra tatou iaia kia puapingaia mai i te ako anga ra.—Ebera 12:11.
“Kia Maata Rava i te Akangateitei ia Ratou”
14, 15. (a) Kia tau kia 1 Tesalonia 5:12, 13, eaa i tau ei ta tatou akamanako anga no te aronga pakari ra? (e) Eaa ra i tuatuaiai e te ‘rave angaanga maata ra te aronga pakari i roto ia tatou’?
14 Ka rauka katoa i tatou kia akakite i to tatou akangateitei no te “meitaki i te tangata nei” na te akaarianga akangateitei anga kia ratou. I te tataanga ki te putuputuanga i Tesalonia, kua akamaroiroi atu a Paulo i tona au mema: “E kite atu kotou i te aronga i rave i te angaanga a te Atu ki roto ia kotou na, ko te akakite ki rungao ia kotou i te Atu nei, e te ako atu oki ia kotou; e kia maata rava i te akangateitei ia ratou ma te aroa no ta ratou angaanga.” (1 Tesalonia 5:12, 13) Te ‘rave i te angaanga maata’—kare ainei te reira e akataka i te aronga pakari tei oronga noinoi kore ua ia ratou uaorai no tatou nei? E akamanako poto ua, i te apainga teiaa ta teianei au taeake akaperepere e apai nei.
15 I te au tu e manganui e au tangata e pamiri ta ratou tei tika ra kia rave angaanga kia raukai te angai e te oronga apinga no to ratou ngutuare tangata. (1 Timoteo 5:8) Me e tamariki ta te tangata pakari ra, ka umuumuia te tuatau e te manako anga oki mei to ratou metua tane ra. Penei ka tau aia kia tauturu ia ratou ma ta ratou apii anga, pera katoa te akataka i tetai taime no ratou kia taangaanga i to ratou maroiroi anga mapu i tetai tamataora anga tau. (Koheleta 3:1, 4) Te mea puapinga maata roa, ka akono aia i te au umuumu anga pae vaerua no tana pamiri, na te apiianga putuputu ma tona ngutuare tangata, te angaanga ma ratou i te tutu aereanga, e te raveanga ia ratou ki te au uipaanga Kerititiano. (Deuteronomi 6:4-7; Ephesia 6:4) Auraka e ngaropoina ia tatou e kapiti atu ki teianei au apainga te matauia ra e tatou e manganui, te vaira etai atu au angaanga na te aronga pakari: te teateamamao anga no te au tuanga uipaanga, te rave tiaki anga, te akonoanga no te pae vaerua o te putuputuanga e, me ka anoanoia, te raveanga i te au akavaanga. Te apai ra tetai papaki i etai atu apainga no te au akaputu anga kotinga, te au uruoaanga tapere, te patu anga Are Uipaanga Patireia, e te au Hospital Liaison Committee. E tika tikai, te “angaanga maata ra” teianei au taeake!
16. Akataka mai i te au tu e raukai ia tatou te akaari i te akamanako anga no te aronga pakari ra.
16 Akapeea tatou me akaari i te akamanako anga no ratou? Te tuatua ra tetai materi Pipiria: “Te tuatua ra i tuatuaia i te tuatau e tau ei, e meitaki roa ïa”! (Maseli 15:23; 25:11) No reira te au tuatua ariki anga no te ngakau tae e te akamaroiroi anga oki ka akaari kia ratou e kare tatou e manako kore ua ana i ta ratou angaanga maata. Pera katoa oki, ka tau tatou kia manako tika i ta tatou te ka manakonako atu ia ratou ra. I tetai pae, ka tau tatou kia manako ngoie ua i te aravei ia ratou no te tauturu. Penei e au tuatau etai ‘e mamae roaʼi to tatou ngakau’ e te umuumu ra tatou i te akamaroiroi anga Tuatua Tapu, te aratakianga, me kare te akoanga mei ko mai i te aronga tei “tau kia apii” i te Tuatua a te Atua ra. (Salamo 55:4; 1 Timoteo 3:2) I taua taime rai, ka tau tatou kia maara e te kotingaia ra te taime te ka rauka i tetai o te aronga pakari ra kia oronga mai kia tatou, no te mea kare e rauka iaia kia manako kore i te au umuumu anga no tona uaorai ngutuare tangata me kare no etai atu oki i te putuputuanga ra. I “te aroa katoa anga” no teianei au taeake rave angaanga maata, kare tatou e anoano kia rave i te au patianga tau kore ki runga ia ratou. (1 Petero 3:8) Kareka ra, kia ariki tatou no te tuatau e te manako anga tei rauka ra ia ratou kia oronga tau mai kia tatou.—Philipi 4:5.
17, 18. Eaa te au atinga te akonoia ra e te au vaine e manganui e aronga pakari ra ta ratou tane, e akapeea tatou me akaari e kare tatou e manako kore ua ana i teia au tuaine tiratiratu?
17 Akapeea oki te au vaine a te aronga pakari ra? Kare ainei ratou e tau no ta tatou akamanako anga? I te mea, te oronga katoa maira ratou i ta ratou au tane kia akono i te putuputuanga. E putuputu te anoanoia te au atinga no ta ratou tuanga. I etai atianga, ka tika te aronga pakari kia akapou i etai ora i te aiai i te akonoanga no te au apinga a te putuputuanga, penei ake ka rauka ra ia ratou kia akapou taime ma ta ratou au pamiri. I te au putuputuanga e manganui te oronga mareka ua ra te au vaine Kerititiano tiratiratu i taua au atinga ra kia raukai i ta ratou au tane te utuutu no te au mamoe a Iehova ra.—Akaaite ia 2 Korinetia 12:15.
18 Akapeea e raukai ia tatou te akaari e kare tatou e manako kore ua ana i teianei au tuaine Kerititiano tiratiratu nei? E mea papu e kare na te patianga tau kore i ta ratou au tane ra. Inara auraka e ngaropoina ia tatou te mana o te au tuatua akameitaki anga. Te tuatua ra Maseli 16:24: “E tau te tuatua meitaki ki te topatapata meli ra, e vene i te vaerua nei, e ora oki to te ivi.” E akamanako i tetai tupuanga. I muri ake i tetai uipaanga Kerititiano, kua aravei atu nga tokorua akaipoipoia i tetai tangata pakari e kua pati atu kia tuatua kiaia no ta raua tamaroa mapu. I te tuatua anga te tangata pakari ra ki aua tokorua ra, kua tatari akakoromaki atu tana vaine. I muri akera, kua aravei atu te metua vaine i te vaine a te tangata pakari ra e kua tuatua atu: “Te anoano nei au kia akameitaki ia koe no te taime i pou i taau tane kia tauturu mai i taku pamiri.” Kua akatukia atu taua au tuatua mama e te vene ra no te arikianga tikai i te ngakau o te vaine a te tangata pakari ra.
19. (a) Ei tetai pupu, eaa ta te aronga pakari au akakoro anga e akatupu tiratiratu ra? (e) Eaa ta tatou katoa ka tau kia rave?
19 Te oronga anga i te aronga pakari kia akono i te au mamoe ra ko tetai ia o ta Iehova ra ‘apinga aroa meitaki.’ (Iakobo 1:17) Kare, kare teianei au tangata i te apa kore ua; mei ia tatou katoa nei rai, te rave tarevake ra ratou. (1 Ariki 8:46) Inara ei tetai pupu, te akatupu tiratiratu ra te aronga pakari i te au putuputuanga i te ao katoa nei i te au akakoro anga ta Iehova i manako ra no ratou—koia oki kia akatau, kia patu atu, kia taokotai, e kia paruru i te anana. Kia manako papu te aronga pakari takitai ra kia rave ua atu i te au mamoe a Iehova ma te maru, ei akapapuanga iaia uaorai ei tetai apinga meitaki, mei te akameitaki anga, ki tona au taeake. E kia tamanako tikai tatou ravarai kia akaari i to tatou ariki anga no te “meitaki i te tangata nei” na te akarongo anga e te kauraro oki kia ratou e te akaarianga kia ratou i te akamanako anga no ta ratou rave angaanga maata. Mei teaa ra to tatou akameitaki anga e kua oronga aroa mai a Iehova i te au tangata tei, aite ra te tuatua ki tana au mamoe e: ‘Ko ta matou angaanga ia kia tauturu ia kotou kia tavini i te Atua ma te rekareka’!
Akapeea Koe me Pau?
◻ Eaa i tau ei te putuputuanga kia akaaiteia ki tetai kopapa?
◻ Akapeea te aronga pakari me tauturu i to ratou au taeake kia tavini ia Iehova ma te rekareka?
◻ Eaa ra i tau ei tatou kare kia akarongo ua mari ra kia kauraro katoa oki ki te aronga te arataki ra?
◻ Na roto i teea au tu e raukai ia tatou te akaari i te akamanako anga no te aronga pakari ra?
[Tutu i te kapi 16]
Te akameitaki ra te aronga pakari ia etai ke no ta ratou au tauta anga ma te ngakau katoa
[Tutu i te kapi 17]
Na ta ratou akaraanga totomapu i te angaanga orometua, te tauturu ra te aronga pakari i te au mema pamiri e etai atu oki kia tavini ma te rekareka
[Au Tutu i te kapi 18]
Te ariki nei matou i to matou aronga pakari rave angaanga maata!