E Rekareka i te Manakonako Anga Patireia!

“E rekareka i te manakonako anga. E tamou marie i raro ake i te tumatetenga.”​—ROMA 12:12, NW.

1. Eaa ka kiteaʼi e tatou te rekareka anga i te piri anga ma Iehova, e eaa ta te apotetoro ko Paulo i raurau kia rave te au Kerititiano ra?

“TE ATUA mataora.” (1 Timoteo 1:11, NW) E meitaki tikai teia akataka anga ia Iehova! No teaa ra? No te mea pouroa tana angaanga te akatupu ra i te mataora maata nona. I te mea ko Iehova te Tumu o te au mea memeitaki ravarai e te mataora anga, ka kitea e tana au mea ora kite katoatoa ra te mataora i to ratou piri atu anga kiaia ra. E mea tau ra, kua raurau te apotetoro ko Paulo i te au Kerititiano kia ariki i ta ratou tuanga rekareka i te kiteanga i te Atua ra ia Iehova, e kia akameitaki no Tana au apinga aroa meitaki katoatoa tei angaia maira, e kia rekareka i te aroa takinga meitaki Tana e akaari atu kia ratou ra. Kua tata a Paulo e: “E rekareka i te Atu ra, aua e tivata, e te tuatua akaou atu nei au, Kia rekareka rai kotou”!​—Philipi 4:4; Salamo 104:31.

2. Eaa te manakonako anga te ka apai mai i te rekareka maata, e eaa te apinga tei akamaroiroiia ra te au Kerititiano kia rave no runga i teia manakonako anga?

² Te rave ra ainei te au Kerititiano i te reira akamaroiroi anga ta Paulo i oronga maira? Ae te pera ra ratou! Te rekareka nei te au taeake o Iesu Karaiti i taua manakonako anga kaka ta te Atua i akatuera atura kia ratou. (Roma 8:19-21; Philipi 3:20, 21) Ae, te kite ra ratou e ka o atu ratou i te akatupuanga i taua manakonako anga maata ra no te tuatau ki mua o te tangata nei, te aronga ora e tei mate katoa oki, na to ratou tavinianga ma Karaiti i tona Patireia kavamani i te rangi ra. E tamanako ana eaa te maata to ratou rekareka anga i ta ratou angaanga ei tuanga kapiti, i te tavinianga ei au ariki e ei kautaunga oki! (Apokalupo 20:6) Mei teaa ra to ratou mataora anga ia ratou ka tauturu atu i te au tangata tiratiratu ra kia rauka te tu apa kore ua e kia tauturu katoa i te arataki i te akaora mai anga ia Parataito ki to tatou enua nei! E tika tikai, te tau ra te au tavini katoatoa o te Atua “kia rauka te irinaki i te ora mutu kore, i ta te Atua, ta te kore e tika kia pikikaa, i tuatua oronga mai ou teianei ao.” (Tito 1:2) I te manako anga i te reira irinaki anga meitaki, kua akamaroiroi maira te apotetoro ko Paulo i te au Kerititiano ravarai: “E rekareka i te manakonako anga.”​—Roma 12:12, NW.a

Te Rekareka Mou​—E Tu ia no te Ngakau

3, 4. (a) Eaa te aiteanga o te tuatua “kia rekareka” e eaa te putuputu tau no te rekarekaanga te au Kerititiano ra? (e) Eaa te rekareka anga mou, e tei runga i teaa te reira?

³ “Kia rekareka” tona aiteanga tikai kia manako ngakau e kia akakite i te rekareka; kare tona aiteanga e kia tamou i te tu maata te maroiroi e te ngakau teitei. Ko nga tuatua verepa tei aiteite atu ki nga tuatua Epera e te Ereni tei taikuia ra i te Puka Tapu no te “rekareka,” “mareka” e te “rekarekaanga” te akakite ra i te manakoanga ngakau i roto roa e te akakiteanga mai ki vao i te rekareka ra. Kua akamaroiroiia mai te au Kerititiano kia “tamou i te rekareka,” e “kia rekareka i te au taime katoa.”​—2 Korinetia 13:11, NW; 1 Tesalonia 5:16, NW.

⁴ Inara akapeea ka raukaʼi kia kore e tukutuku i te rekareka? Ka rauka rai te reira no te mea ko te rekareka mou e tu ia no te ngakau, e tu no roto roa, e tu vaerua ia. (Deuteronomi 28:47; Maseli 15:13; 17:22) E ua ia no te vaerua o te Atua ra, tei papaia maira e Paulo i muri ake i te aroa. (Galatia 5:22) Ei tu no roto roa, kare ia e na te au apinga o vao ua e tupu ei, kare katoa e na to tatou au taeake ra. Inara na runga i te vaerua tapu o te Atua. Ka rauka mai na te merengo anga oonu no roto mai i te kiteanga e tei ia koe te tuatua mou, koia te manakonako anga no te Patireia ra, e te rave ra koe i tei akamareka ia Iehova ra. No reira, kare te rekareka i te tu tangata ua tei anauia maira ei tu no tatou; e tuanga ia no “te tangata ou,” ra ko te akaputu anga ia o te au tu tei akataka ra ia Iesu Karaiti.​—Ephesia 4:24; Kolosa 3:10.

5. I naea e akapeea te akakite anga a vao ua i te rekareka?

⁵ Noatu rai e ko te rekareka e tu ia no te ngakau, ka tau ra te reira kia akaariia mai ki vao i etai atianga. Eaa teia au atianga, akaari anga mai i te rekareka ki vao ra? Ka tau rai tetai ua atu tu maru ma te au o te mata e tae katoa oki ki te rererere anga tikai no te rekareka. (1 Ariki 1:40; Luka 1:44; Angaanga 3:8; 6:15) Ka riro ainei te aiteanga o te reira e, ko te au tangata kare ra e maata te tuatua e pera katoa kare e katakata tamou ana, kare o ratou rekareka? Kare! Kare te rekareka mou e akakite mai iaia uaorai na te tuatua tamou anga, te katakata, te mata katakata, me kare akaraanga katakata ua. Na te au tu e akatupu i te rekareka kia akakite iaia uaorai na te au mataara tuke tuke. Kare e na te rekareka anake ua e akariro ia tatou kia akaoaoa atu i te Are Uipaanga Patireia ra, mari ra na to tatou inangaro taeake e te aroa katoa oki.

6. Eaa ka rekareka tamou ei te au Kerititiano noatu e te aro atura ratou i te au tu reka koreia?

⁶ Ko te tu taui koreia o te rekareka ko te akatinamou anga ki roto roa ei tuanga no te manako ngakau o te akatangata ou o te Kerititiano ra. Na te reira e raukai kia kore e tukutuku i te rekareka. Inara, i etai tuatau penei ka tupu mai te manamanata kia tatou no tetai apinga, e penei kua aro atu tatou i etai turanga mareka koreia. Inara ka rauka rai kia vai te rekareka ki roto i to tatou ngakau. E tuikaa tetai papaki o te au Kerititiano mua ra, e ngata tikai to ratou au pu no te akamarekaia. Ka rauka ainei kia kore te reira au Kerititiano e tukutuku i te rekareka? Ae, no to ratou manakonako anga i te Patireia e te rekareka i roto i to ratou ngakau ra.​—Ioane 15:11; 16:24; 17:13.

7. (a) Eaa ta Iesu i tuatua no te rekareka i raro ake i te mate? (e) Na teaa e tauturu ia tatou kia tamou marie i raro ake i te tumatetenga, e naai i akanoo mai i te akaraanga no te reira tu?

⁷ I muri ua ake i ta te apotetoro ko Paulo ra tuatua anga: “E rekareka i te manakonako anga,” e kua kapiti atura aia: “e tamou marie i raro ake i te tumatetenga.” (Roma 12:12, NW) Kua tuatua katoa a Iesu i te rekareka i raro ake i te mate i tana tuatua anga ia Mataio 5:11, 12 (NW): “E mataora to kotou me akakinoia mai kotou e me ka takinga kinoia mai kotou e te tangata . . . Kia rekareka e kia rere ua i te rekareka, e maata oki to kotou tutaki i te au rangi ra.” Kare i te rekarekaanga e te rereanga tikai tei taikuia nei i konei ma te akaraia mei vao atu; ko te mea maata ia te merengo anga oonu tei tupu ra ki tetai i tana akamareka anga ia Iehova e Iesu Karaiti i tona turanga ketaketa tikai i raro ake i te timataanga ra. (Angaanga 5:41) Ko te tika ra, e na te rekareka e tauturu ia tatou kia tomou marie i raro ake i te tumatetenga. (1 Tesalonia 1:6) I teia tu, kua akanoo maira a Iesu i te akaraanga meitaki roa. Te akakite maira te au Tuatua Tapu kia tatou: “No te rekareka tei akanooia ra ki mua iaia kua akakoromaki aia i te rakau tamamae anga ra.”​—Ebera 12:2, NW.

Rekarekaanga i te Manakonako Noatu Rai te Au Manamanata

8. Eaa te au manamanata penei ka aroia atu e te au Kerititiano ra, inara eaa ka kore ei e rauka i te au manamanata i te akakore atu i te rekareka o te Kerititiano ra?

⁸ Kare te tavini anga ia Iehova e akakore atu i te au manamanata no tetai. Penei e au manamanata no te ngutuare tangata, e au tu ngata no te pae i te apinga, te apikepike no te maki, me kare te matenga o etai tei akaperepereia ra. Inara noatu e ka akatupu mai te reira au apinga i te mii, kare e rauka ia ratou kia rave ke atu i te tumu no tatou kia rekareka i te manakonako anga i te Patireia, koia to tatou rekareka no roto roa mai i to tatou ngakau.​—1 Tesalonia 4:13.

9. Eaa te au manamanata tei tupu kia Aberahama, e akapeea tatou i kite ei e e rekareka tona i roto i tona ngakau?

⁹ Ei akaraanga, e akamanako ana ia Aberahama. Kare tona oraanga e meitaki roa ana i tetai taime. E au manamanata to tona ngutuare tangata. Kare e au ana tona tavini vaine, koia a Hagara, raua ko tana vaine, koia a Sara. E pekapeka ua raua. (Genese 16:4, 5) Kua aviri a Isemaela ia Isaaka, te takinga kino anga iaia. (Genese 21:8, 9; Galatia 4:29) I te openga, kua mate atu ta Aberahama vaine akaperepere, koia a Sara. (Genese 23:2) Noatu rai te reira au manamanata, kua rekareka aia i te manakonako anga i te Uanga no te Patireia, koia te Uanga o Aberahama, na roto mai iaia e akameitaki ei to te pa enua o te ao nei ia ratou uaorai. (Genese 22:15-18) Ma te rekareka i roto i tona ngakau ra, kua akakoromaki aia i te tavini atu ia Iehova no tetai anere mataiti i muri ake i te akarukeanga i tona oire kainga i Ura ra. E no reira kua tataia nona e: “Te maara ra aia e e rauka te oire tumu mou, ko te akatu e te tutara o taua oire ra, ko te Atua ïa.” No to Aberahama akarongo anga i taua Patireia o te Mesia te aere maira, kua rauka i te Atu ia Iesu i te tuatua, i muri ake i tona akataoonga angaia e te Atua ra ei Ariki: “I rekareka ana oki . . . Aberahama i toku nei tuatau kia kite aia: e kite atura, e mareka atura oki.”​—Ebera 11:10; Ioane 8:56.

10, 11. (a) Eaa te maroanga te vai ra na tatou ei au Kerititiano, e akapeea tatou e oraʼi? (e) Eaa te tauturu mai i to tatou tu apikepike i te tauta anga tau i te maro atu anga i to tatou kopapa ara ua nei?

¹⁰ Ei au tangata apa ua, te vai nei ta tatou maroanga i to tatou kopapa ki nei i te ara, e ko teia tauta anga kia rave i te tika e apinga manamanata tikai. Inara, kare te aiteanga o ta tatou maroanga i to tatou uaorai au tu apikepike e kare o tatou manakonako anga. Kua maromaroa a Paulo i teia maroanga, e kua karanga aia: “Naai au e akaora i teianei kopapa mate? E akameitaki au i te Atua i te mea e ora i to tatou Atu ra ia Iesu Mesia”! (Roma 7:24, 25) E no reira, na roto ia Iesu Karaiti e te oko tana i oronga maira, kua akaoraia tatou nei.​—Roma 5:19-21.

¹¹ No to tatou tu apikepike i te maro anga kia autu kua riro na te atinga oko o Karaiti e tauturu mai ia tatou. Ka tau kia rekareka tatou i teia oko no te mea na te reira e raukai te akava ngakau ma e te akakore anga i ta tatou ara. Ia Ebera 9:14, kua tuatua a Paulo no “te toto o te Mesia ra” e mana ra to te reira kia “maata atu ïa te mā o to [tatou] akava-ngakau i te angaanga mate.” E no reira, kare e tau kia akateiaaia te akava ngakau o te au Kerititiano i te akaapa anga a te au manako no te ara. Ko teia, kapiti katoa te manakonako anga no tatou nei, te orongaia maira tetai mana ririnui no te mataora anga rekareka. (Salamo 103:8-14; Roma 8:1, 2, 32) I te tapapa atu anga i to tatou manakonako anga, ka akamaroiroiia tatou ravarai kia tamaki atu kia autu tatou.

Tamouia to Tatou Irinaki Anga ki te Manako

12. Eaa te manakonako anga te ka tau te au Kerititiano kia manako atu?

¹² E mea puapinga maata no te toenga o tei akatainuia ra i te vaerua e te au mamoe ke atu kia tamou i to ratou “manakonako no te ora” ki roto i te manako, na te raveanga i te reira ei pare paruru. (1 Tesalonia 5:8, NW) Ka rauka i te au Kerititiano akatainuia ra i te manakonako atu i te tuatau meitaki e raukai ia ratou te tu mate kore i te rangi ra, ma te piri anga ki te Atua ra kia Iehova, ma te rekarekaanga i te piri anga atu ma Iesu Karaiti tei akakakaia ra ma te au apotetoro e etai katoa o te aronga 144,000 ra, tei tamou ra i to ratou tu tiratiratu na roto mai i te au anere mataiti katoa ra. Mei teaa ra te apinganui o te reira pirianga kare ra e rauka kia akatakaia!

13. Akapeea te manako ngakau o tei akatainuia te vai nei i runga i te enua no to ratou manakonako anga?

¹³ Akapeea te manako ngakau o te aronga tokoiti o tei akatainuia ra te vai nei i runga i te enua, no to ratou manakonako anga no te Patireia? Ka rauka teia kia akatakaia na roto i te au tuatua a tetai tei papetitoia i te 1913: “E mea papu to tatou manakonako anga, e ka akatupuia kia oti, tae roa ki te mea openga o te 144,000 au mema o te anana iti ra, ki te tu tere atu i ta tatou i manako ana. Ko tatou o te toenga tei vai maira i te mataiti 1914, ia tatou i manakonako katoatoa atura kia aere atu ki te rangi, kare i kore ana to tatou manako no te puapinga o taua manakonako anga ra. Mari ra kua maroiroi roa atu tatou no te reira i to tatou tu i mua ana, e te maata atura to tatou arikianga i te reira i te roa atu anga to tatou tiaki anga i te reira. E apinga puapinga maata ia no te tiakianga, noatu me i umuumuia kia okotai mirioni mataiti. Te akaperepere maata nei au i to tatou manakonako anga kia tere atu i to mua ana, e kare au e anoano kia kore toku ariki anga no te reira. Te akapapu katoa maira te manakonako anga o te anana iti e kare e kore te tupuanga no to te urupu maata o te mamoe ke atu ra tapapa anga, ka tupu ra ia kia maata atu i ta tatou e manako ana. No reira tatou i mou ngaueue kore ei tae roa mai ki teia ora tikai, e ka mou ngaueue kore ua atu tatou e kia oti i te Atua ra te akapapu anga e kare aia e pikikaa i tana ‘au taputou oko maata e te meitaki rava ra.’”​—2 Petero 1:4, NW; Numero 23:19; Roma 5:5.

Rekarekaanga i Teia Nei i te Manakonako Anga Parataito

14. Eaa te manakonako anga te ka tau te urupu maata kia tamou ki to ratou manako?

¹⁴ Te tauru ra te reira tu akakite anga i te akarongo mareka ki roto i te aronga no te urupu maata o te au mamoe ke atu ra i te au tumu meitaki no te rekarekaanga. (Apokalupo 7:15, 16) Ka tau te reira aronga kia tamou ki roto i to ratou manako i te manakonako anga no te ora atu anga ia Aramakito. Ae, kia tapapa atu i te kiteanga i te akatikaanga te Patireia o te Atua i te ngateitei o te Atua ko Iehova e pini ua ake te ao katoa e te akatapu anga i tona ingoa kaka na te apaianga mai i te mate maata, te ka tama atu i te aronga rave kino i te enua nei ko te Tiaporo ra to ratou atua. Mei teaa ra te rekareka anga kia ora atu i taua mate maata ra!​—Daniela 2:44; Apokalupo 7:14.

15. (a) Eaa te angaanga rapakauanga ta Iesu i rave iaia i te enua nei, e no teaa ra? (e) Eaa te ka anoanoia no te ora anga meitaki o te aronga ka ora atu ia Aramakito, e eaa ratou i tuke ei i te aronga te ka akatuia mai mei te mate?

¹⁵ Te tuatua ra a Apokalupo 7:17 (NW), no te urupu maata e: “Na te Punua mamoe . . . e tiaki ia ratou, e ka arataki atu ia ratou ki te au pupui anga o te vai ora. E na te Atua ra e orei atu i te roimata katoa i to ratou mata.” Noatu rai e tupu anga to teia totou i te pae vaerua i teia nei, ka kite ra te aronga te ka ora atu ia Aramakito i tona tupu anga tika tikai. Akapeea ra? A, eaa ta Iesu i rave iaia i te enua nei? Kua rapakau aia i tei kino te kopapa, e kua akariro katoa i te pirikoki kia aaere, kua akaputataia te taringa o te turi ra e kua akapueraia te mata o te aronga matapo, kua akaora i te repera, te paruparu, e “te au maki ravarai, e te au mate katoa o te tangata.” (Mataio 9:35; 15:30, 31) Kare ainei ko te reira te anoanoia ra no te au Kerititiano i teia tuatau nei? Ka apai atura te urupu maata i te au maki e te au tu apikepike o te ao taito nei ki roto i te ao ou ra. Eaa ta tatou te ka manakonako atu kia rave te Punua mamoe ra no te reira tu? E tuke roa te umuumu anga no te aronga ka ora atu ia Aramakito i te ka umuumuia no te aronga ka akatuakaouia mai. Ko te aronga akatuakaouia penei ka anga akaouia mai ma te au kopapa ou katoa, tei meitaki, e te maki kore, noatu rai e kare i te au tangata apa kore ua. No te temeio o te tuakaouanga, kare e tau e ka anoanoia kia rapakauia a muri akera etai ua atu tu maki o muatangana no te rapakauanga temeio ra. I tetai pae, no to ratou ora atu anga takake ia Aramakito ra, ka anoanoia ra kia akaoraia te au maki o te aronga e manganui o te urupu maata ra na te tu temeio e raukai te reira. E mea tau ra, ko te akakoroanga maata no ta Iesu ra au rapakauanga e akatutu anga mai ei akamaroiroi i te urupu maata i te manakonako rekareka kare e ka ora atu anake ratou mari ra ka rapakauia a muri akera.

16. (a) Aea e akamataʼi te rapakauanga temeio i te aronga te ka ora atu ia Aramakito, e eaa te ka tupu mai? (e) Eaa te manakonako anga te ka rekareka tamouia e tatou a te tuatau o te Tauatini Mataiti ra?

¹⁶ E mea tau e ko te reira rapakauanga temeio ka tupu i rotopu i te aronga ora atu ia Aramakito a muri poto ake ia Aramakito e i mua roa ake oki i te akamata anga te tuakaouanga ra. (Isaia 33:24; 35:5, 6; Apokalupo 21:4; akaaiteia atu kia Mareko 5:25-29.) Ei reira ka titiri te au tangata i to ratou mata titia te tokotoko, e nga tokotoko, te pereo, te nio maani, te au tauturu kia rongo, e te vai atura. Mei teaa ra te tumu no te rekarekaanga! Ka meitaki tikai te reira akaora anga vave na Iesu kia tau no te tuanga o te aronga te ka ora atu ia Aramakito ei akatumu anga no te enua ou! Ka akaateaia atu te au maki kia raukai i teia aronga te ka ora atu i te aere atu ki mua ma te maroiroi, e te akaraanga ma te ngakau katoa i te angaanga umere no te Tauatini Mataiti ki mua ia ratou ra, kare e kikaia ki raro e teia nei ao taito i akatupu kia ratou ra. Ae, noatu rai a muri ake ia Aramakito, ka rekareka ua atu te urupu maata i teia manakonako anga meitaki no te itaeanga ki te tu oraanga tangata apa kore ua i te openga o te tauatini mataiti ra. I roto katoa i taua Tauatini Mataiti ra ka rekareka rai ratou i te manakonako anga kia itaeia taua akakoroanga mataora ra.

17. Eaa te au rekareka anga te ka tupu i te raveanga i te angaanga akaora ia Parataito?

¹⁷ Me ko te reira toou manakonako anga, e tamanako katoa oki i te rekareka no te akaouanga ia Parataito ki runga i te enua nei. (Luka 23:42, 43) Kare e ekoko anga e ka tauturu te aronga te ka ora atu ia Aramakito i te tama i te enua nei e kia rauka te au ngai meitaki e akatuia mai ei tei mate ra. Ka monoia te au tuatau tanumanga ki te au tuatau turouanga i te aronga te ka akatuia mai i te tuakaouanga ra, kapiti katoa ta tatou uaorai i akaperepere ra tei topa ra ki te mate. E tamanako katoa oki i te kapitianga puapinga maata ma te au tane e te au vaine tiratiratu no te au anere mataiti kua topa ra. Koai tikai taau ka inangaro kia tuatua atu? Ko Abela ainei, Enoka, Noa, Iobu, Aberahama, Sara, Isaaka, Iakoba, Iosepha, Mose, Iosua, Rahaba, Debora, Samasona, Davida, Elia, Elisaia, Ieremia, Ezekiela, Daniela, e Ioane Papetito ra? Ko teia tupu anga mataora e tuanga katoa ia no toou manakonako anga. Ka rauka ia koe i te tuatua kapipiti ma ratou katoa ra, e apii mei ia ratou maira, e angaanga kapipiti ma ratou katoa i te akariroanga i te enua katoa nei ei parataito.

18. Eaa etai atu rekareka anga ka tau tatou kia tamanako atu?

¹⁸ E tamanako katoa oki, i te au manga meitaki, te vai ma, te reva ma, e to tatou enua nei i te akaora angaia kia tae ki tona tu tau tikai, te tu ta Iehova i anga maira kia pera ia. Ka riro te oraanga, kare ei rekareka anga noonoo ua no te tu apa kore, mari ra ei rave anga angaanga puapinga i te au angaanga rekarekaia ra. E tamanako ana i tetai totaiete tangata i te ao katoa nei kare e rave kino, kare e taemoemo, e vareae, kare e taumaro anga​—e taeakeanga anake ua e ngai e tatanuiaʼi e akatupuiaʼi te au ua o te vaerua ra e te katoatoa. Mei teaa ra te rekarekaanga!​—Galatia 5:22, 23.

Manakonako Anga te Akariro ra Kia Puapinga te Ora Anga

19. (a) Aea te rekarekaanga tei taikuia maira ia Roma 12:12 e tupu ei? (e) Eaa i tau ei tatou kia manako papu auraka e tuku i te au apainga teiaa o te oraanga nei kia opara ke atu i to tatou manakonako anga?

¹⁹ Kia tupu tei tiakiia ra kare ia i te manakonako anga i reira, e no reira ko te rekarekaanga ta Paulo i akamaroiroi maira ia Roma 12:12 ka kiteaia i teia nei. (Roma 8:24) Ko te manako ua anga i te au akameitakianga o te tuatau ki mua ra te ka apaiia mai e te Patireia o te Atua ra e tumu ia no tatou kia rekareka i te reira manakonako anga i teia nei. No reira e akapapu i te manako kia kore e tuku ua na te au apainga o te oraanga i teia nei ao viivii e opara i to tatou manakonako anga kaka ki te pae ke ra. Auraka e akaroiroi e ka akamutu uaʼi, ma te akakore anga i te manakonako anga no te tuatau ki mua. (Ebera 12:3) Kare e kore atu toou au manamanata na te akaruke anga i te mataara Kerititiano. Kia maara, me ka akamutu tetai i te tavinianga i te Atua no te maata te au apainga teiaa o teia nei oraanga, te vai rai taua au apainga teiaa ra ki runga iaia, inara ka ngere aia i te manakonako anga e ka ngere katoa aia i te rekarekaanga i te au apinga umere te vai maira i te tuatau ki mua.

20. Eaa te tupuanga no te manakonako anga Patireia ki runga i te aronga takave atura i te reira, e no teaa ra?

²⁰ Tei te au tangata o Iehova te au tumu ravarai no te oraanga mataora. Te akariro ra to ratou manakonako anga kaka kia puapinga to ratou oraanga. E kare ratou e karapii i te reira manakonako anga rekareka no ratou uaorai. Kare, ka tua maroiroi ratou i te reira kia etai katoa ra. (2 Korinetia 3:12) E no reira ko te aronga te ka ariki mai i te manakonako no te Patireia e au tangata irinaki papu ratou, e ka kimi ratou kia akamaroiroi atu ia etai ke ra na te tuatuaanga kia ratou i te tuatua meitaki mei ko mai i te Atua ra. Na teia e akaki i te oraanga o te aronga te ka ariki i te tuatua ma te manakonako anga maata roa te meitaki tei orongaia ana ki te au tangata katoa nei​—koia te manakonako anga no te Patireia te ka akaora mai ia Parataito ki te enua nei. Me kare te au tangata e ariki mai i te reira, ka rekareka ua atu rai tatou no te mea tei ia tatou taua manakonako anga ra. Ko te aronga tei ariu ke e te taringa turi ko ratou te ka ruti; kare ko tatou.​—2 Korinetia 4:3, 4.

21. Eaa te vaitata maira, e akapeea te manako anga tau na tatou no to tatou manakonako anga?

²¹ Ko ta te Atua taputou e: “I na, te akariro nei au i te au mea ravarai ei mea ou.” (Apokalupo 21:5) Kua vaitata mai te ao ou ma tona au akameitakianga umere katoa e te mutu kore. To tatou manakonako anga​—no te oraanga ki te rangi me kare ki runga i te enua parataito—​e apinga oko maata; e mou i te reira. I teia tuatau openga kino maata nei, kia tere roa atu i to mua ana, e akamanako i te reira “ei tutau no to tatou meta, e mea kare e mauti e kia mou meitaki.” I te tutau angaia to tatou manakonako anga kia Iehova, “ei mato no te tuatau mutu kore​—te Mato no te au tuatau ua atu,” e tumu ketaketa tikai to tatou e te mataora i teianei tikai kia “rekareka i te manakonako anga” tei akanooia maira ki mua ia tatou.​—Ebera 6:19; Isaia 26:4, The Amplified Bible.

[Au Tataanga Rikiriki i Raro]

Au Uianga no te Akamanako Akaou

◻ Eaa te manakonako anga maata no te tangata?

◻ Eaa te rekareka anga mou?

◻ Penei aea ka tupu ei te rapakauanga temeio i te aronga te ka ora atu ia Aramakito?

◻ Eaa i tau ei kia kore tatou e tuku i te au apainga teiaa o te oraanga nei kia opara ke atu i to tatou manakonako anga ki te pae ke?

◻ Eaa te au rekareka anga ta tatou e tapapa atu nei i roto i te ao ou?

[Tutu i te kapi 9]

Kare aina e ka akakiia toou ngakau i te rekareka i te kite anga i te tu rapakauanga ta Iesu i rave ra?

[Tutu i te kapi 10]

Te aronga te rekareka ra i te Patireia ka akamaroiroi atu ia etai ke ra na te tua atu anga i to ratou manakonako anga