Te Au Tutaki o te Akangateiteianga i te Au Metua Ruaine

TE AKANGATEITEI ra, te akateitei ra, e te akono ra te aronga akamori tikai i te Atua i to ratou au metua ruaine no te mea te inangaro ra ratou ia ratou. Ko tetai tuanga te reira i ta ratou akamori anga. Te akakite ra te Pipiria: “E apii [te tamariki me kore te au utaro] na mua kia rave i te tu akono Atua i to ratou uaorai ngutuare e e tutaki tamou i tetai tutaki anga tei tau ki to ratou au metua e te au metua ruaine, no te mea e mea tau ia i te aroaro o te Atua.” (1 Timoteo 5:4, NW) Noatu e mapu tatou me kore e ruaine, e mea tau kia oronga tatou i te “tutaki anga tei tau” ki to tatou au metua e te au metua ruaine. Na teia tu te akaari ra tatou e te ariki ra tatou i to ratou aroa, ta ratou angaanga maata, e ta ratou akonoanga ia tatou i te au mataiti i aereia mai. E kaiou maata oki ta tatou i to tatou au metua no to tatou oraanga tikai!

Kia marama e na te tutakianga i te tutaki anga tei tau ki te au metua e te au metua ruaine “e mea tau ia i te aroaro o te Atua.” E piri anga to te reira ki to tatou “tu akono Atua.” No reira, na te rave anga i teia ako anga, ka tutakiia tatou, te kiteanga e te rave ra tatou i tei marekaia e te Atua. Ka apai mai te reira i te rekareka kia tatou.

E rekareka tetai i roto i te orongaanga ki tetai atu, me oronga tikai tatou ki te aronga tei oronga aroa maira kia tatou. (Angaanga 20:35) Mei teaa atura i te tutaki anga, i reira, i te raveanga kia rotai ki te kaveinga Pipiria: “E oronga ki toou metua tane e toou metua vaine i te tumu no te rekareka, e akarekareka i tei anau ra ia koe”!​—Maseli 23:25, The New English Bible.

Akapeea tatou i te oronga anga i te tutaki anga tei tau ki to tatou au metua e te au metua ruaine? Na roto ie toru au mataara: i te pae kopapa, i te pae o te manako ngakau, e te pae vaerua. Ka rauka te au tutaki anga mei teia au apinga tataki tai.

Orongaanga i te Pae Kopapa

Kua kite te aronga tei tavini i te Atua e e apinga puapinga i te oronga i te pae kopapa ki te au mema pamiri piri vaitata. Te ako ra te apotetoro Paulo e: “Ko te tangata oki kare i takinga-meitaki i tona uaorai, e maata ua atu rai i tona uaorai ngutuare, kua akaruke ïa aia i te akarongo, e e maata atu ïa tona kino i to te tangata akarongo kore ra.”​—1 Timoteo 5:8.

E noo ana a Tunji raua ko Joy i Aperika Opunga. Noatu e ngata te turanga i te pae o te moni, kua pati raua i te nga metua ruaine o Joy kia noo ki ko ia raua. E maki to te papa i te openga ra kua mate atu. I maaraʼi ia Tunji: “I to Papa mate anga, kua takave a Mama i taku vaine e kua karanga: ‘Kua rave katoatoa koe i tei rauka ra i tetai tangata i te rave. Auraka rava koe e manako e noou te apa i mate ei a Papa.’ Noatu te mii nei matou ia Papa, kua kite matou e kua rave matou i te vairakau meitaki roa atu nona e kua titau ua rai i te akariro iaia kia manako e te inangaroia ra aia e te anoanoia ra; kua rave matou i tei rauka tikai ia matou i te akono i ta matou apainga mei ko mai i te Atua. Tei ia matou te reira merengo anga.”

E tika, kare te katoatoa i roto i tetai turanga no te tauturu atu i tetai i te pae kopapa. I karangaʼi tetai tangata e noo ra i Naiteria: “Me kare e rauka i tetai tangata i te akono iaia uaorai, akapeea i reira e raukaʼi iaia i te akono i tetai atu tangata?” I te au enua e manganui penei ka kino roa atu te turanga i te au mataiti ka aereia mai. Kia tau ki tetai akakite anga United Nations, kare e roa atu ana ka noo tetai apa o te au tangata i te ngai i te pae i te Sahara i Aperika ki roto i te putaua tikai.

Me te kite ra koe ia koe uaorai i roto i te putaua i te pae o te puapinga, penei ka akapumaanaia koe mei te tua tika tikai o tetai vaine takaua apinga kore ra. I to Iesu taime i te enua nei, kua kite aia i tetai vaine takaua i te tuku anga i tetai moni meangiti ki roto i te pia moni o te iero. Kua tuku ua aia i “nga lepeta e rua” ki roto. Noatu rai, te kiteanga i tona turanga, kua karanga a Iesu: “E tuatua-mou teia taku e karanga atu kia kotou na, e maata ta te vaine takaua apinga kore nei i tuku ki roto, i ta ratou ravarai. No roto oki i te toenga i to ratou apinga maata ta ratou i tuku maira ki roto i te apinga a te Atua: kareka aia nei, kua ope rava tona apinga rikiriki i te tukuia e ia ki roto.”​—Luka 21:1-4.

Ma te aiteite, me rave tatou i tei rauka tikai ia tatou i te akonoanga i to tatou au metua me kore au metua ruaine i te pae kopapa, noatu eaa te meangiti, te kite maira Iehova e te ariki ra i te reira. Kare aia e tapapa i tei maata atu i tei rauka ia tatou i te rave. Penei ka manako akapera rai to tatou au metua me kore au metua ruaine.

Orongaanga i te Pae o te Manako Ngakau

I te orongaanga ki to tatou au metua e te au metua ruaine e maata atu te ka o mai i te akono ua anga i to ratou au anoano i te pae kopapa. E au anoano pae manako ngakau pouroa to tatou. E anoano to te katoatoa, pera katoa te aronga ruaine, kia aroaia, kia anoanoia e kia inangaroia, e kia manakoia e e mema puapinga aia i roto i te pamiri.

Ko Mary, tei noo i Kenia, i akono ana aia i tona metua vaine ongai e toru mataiti. Te karanga ra a Mary: “I te pae i te oronga anga kiaia i te pae o te au anoano pae kopapa, e tuatua ua ana rai matou kiaia. Kare e rauka ia Mama i te raverave angaanga takapini i te kainga, inara e pukapuka ana maua e kua riro mai ei nga oa piri vaitata. I etai taime ka puka maua no runga i te Atua, i etai taime no runga i te au tangata i te kainga i noo ei matou. Noatu e tere atu aia i te 90 mataiti, e meitaki tikai tona roro. Ka maara iaia e te puka i te oraanga i tona meangiti anga ei tamaine, i te au ra i mua ake i te 1914.”

Kua tuatua katoa a Mary e: “Kare i te mea ngoie ua i te akono i tetai ruaine, inara na tana noo anga ki konei ia matou kua apai mai i te au tutaki anga puapinga. Tei ia matou te au e te rotai anga i roto i te pamiri. Na taku orongaanga kiaia kua akakeu i tetai tu oronga i tetai atu i roto i te pamiri. E maata atu ta taku tane akangateitei anga iaku. E me akarongo a Mama i tetai ua atu i te tuatua kino anga mai kiaku, ka viviki ua aia i te tuatua no te paruru iaku. Kare e rauka i tetai ua atu i te tuatua i tetai tuatua kino kiaku me koia tetai i reira!”

Orongaanga i te Pae Vaerua

Mei te orongaanga i te pae kopapa e te pae o te manako ngakau i apai mai i te au tutaki anga ki tei oronga, pera katoa i te pae vaerua. Kua tata te apotetoro Paulo ki te putuputuanga Kerititiano i Roma: “E anoano maata toku kia kite atu ia kotou, kia tuku au i ta te Vaerua ia kotou, kia akatinamouia kotou. Kia pumaana oki au e kotou katoa i to tatou akarongo, i to kotou e i toku katoa oki.”​—Roma 1:11, 12.

Pera katoa, te orongaanga i te pae vaerua ki te aronga ruaine tei tavini i te Atua, ka tupu te akamaroiroi anga tetai e tetai. Te akakite ra a Osondu, tei noo i Naiteria: “Taku apinga reka roa atu i toku nga metua ruaine ko te tuatau ta raua e oronga mai ana kiaku no te kite i tetai tuanga o te tuatau i topa. Ko toku papa ruaine, ma tona nga mata marama, ka akakite i te ngai tana i angaanga ei orometua tamou i te au mataiti o te 1950 e te 1960. Ka akaaite aia i te akanoo anga putuputuanga o teianei ki tei tupu i tona riro anga mai ei Kite. Kua riro teia au kite anga ei tauturu iaku i taku angaanga ei painia.”

Ka riro katoa tetai pae i roto i te putuputuanga Kerititiano ei tauturu i te orongaanga ki te aronga ruaine. Ko Tunji, tei taikuia i te akamata anga, kua akataka i tei tupu i roto i tana putuputuanga: “Kua apai mai tetai taeake painia mapu nana te tuatua papuriki i te papaanga tuatua kia Papa kia akapapa kapiti raua i te reira. Kua aere mai tei rave i te Apii Punanga Tiaki e kua karanga kia Papa: ‘E karape tikai koe. Eaa taau ka akakite mai kiaku ei tauturu iaku kia meitaki atu.’ Kua rauka ia Papa i te oronga ki te reira tangata pakari te ako anga tau. Kua taiku te au taeake i to Papa ingoa i roto i te pure a te putuputuanga e maata ua atu te taime. Kua riro teia au mea katoatoa ei akariro iaia kia inangaroia.”

Ka Riro te Tu Meitaki ei Arataki i te Tangata ki te Atua

I etai taime, ia tatou e akangateitei ra e e aroa ra i to tatou au metua e te au metua ruaine, te arataki ra tatou i te au tangata ki te Atua. Kua tata te apotetoro Petero e: “Kia meitaki ta kotou tuatua i rotopu i te au etene: ta ratou oki i akakino mai ia kotou, mei te mea e aronga rave tuatua kino, kia akara ra ratou i ta kotou tuatua meitaki, kia akameitaki ratou i te Atua.”​—1 Petero 2:12.

Ko Andrew, e tangata pakari Kerititiano i Aperika Opunga, kua aere aia e 95 kiromita e rua taime i te epetoma no te akono i tona papa maki, kare i te taeake irinaki. Kua akakite aia: “I toku riro anga mai ei Au Kite o Iehova kua patoi pakari tikai toku papa. Inara i tona akara anga i taku akono anga iaia i tona maki anga, kua raurau ua aia i toku au teina e te au tuaine, ‘Ka tau kotou kia piri ki roto i te akonoanga a to kotou tuakana!’ Kua akakeu te reira ia ratou, e i teianei e Au Kite o Iehova pouroa ta toku papa iva tamariki.”

Ka riro te akangateiteianga e te akonoanga i to tatou au metua ruaine ei akaaoanga, i te au tuatau ngata tikai i te pae o te puapinga. Inara i te au Kerititiano e tauta ra i te rave i teia, ka kokoti ratou i te au tutaki anga e manganui. Tei maata roa atu, ka kite ratou i te rekareka o te orongaanga, ma te merengo i te kiteanga e te akamareka ra ratou i te Atua ko Iehova, koia uaorai oki te ‘Metua no te tangata katoatoa.’​—Ephesia 4:6.

[Pia i te kapi 6]

Ako Anga Tu Atua no te Aronga te Akonoia ra e no te Aronga Akono

Kia Akamaroiroi: “E akarekareka tatou katoa nei i tetai ke, kia meitaki aia, kia maroiroi.”​—Roma 15:2.

Kia Ngaueue Kore: “Auraka tatou e roiroi i te takinga-meitaki, ei te tuatau tikai oki tatou e kokoti ei, kia kore tatou e akaparuparu.”​—Galatia 6:9.

Kia Akaaka: “Auraka takiri e mea e raveia ma te taumāro, e te akanengonengo puapinga kore; ei ngakau akaaka ra, i te manako akameitaki atu tetai ki tetai, auraka iaia uaorai.”​—Philipi 2:3.

Kia Rave i te Meitaki: “Auraka rava e tangata e kimi i tona uaorai meitaki, e kimi ra te tangata ravarai i to etai ke ra.”​—1 Korinetia 10:24.

Kia Maru ma te Tau: “Kia kitea meitakiia oki to kotou maru i te tangata katoa.”​—Philipi 4:5.

Kia Akaaroa: “Kia takinga-meitaki kotou ia kotou uaorai, ma te ngakau maru aroa ua ra, ma te akakore oki i te ara tetai e tetai.”​—Ephesia 4:32.

[Tutu i te kapi 7]

Ka puapinga te aronga pakari mapu mei te tu karape o te aronga pakari ruaine