Mataora i te Tiaki Marie Anga Atu ia Iehova

KUA kai ana rai koe i tetai ua rakau kare i para? Kare e ekoko, kare koe i mareka ana. Ka anoanoia tetai tuatau no te ua rakau kia para, e ka pauna meitaki ia te taime i te tiaki anga i te reira kia tupu. Te vai atura tetai au turanga ke te ka paunaia te taime i te tiaki marie anga. “Meitaki oki kia manakonako atu rai, e kia tiaki marie, i te ora na Iehova,” e karanga ra te Pipiria. (Te Aue o Ieremia 3:26; Tito 2:13) Na roto i teea au mataara ka anoanoia ai te au Kerititiano kia tiaki marie atu ia Iehova? Akapeea tatou e puapingaia ai mei te tiaki marie anga atu iaia?

Tiaki Marie Anga Atu i te Atua​—Eaa te o Maira?

Ei au Kerititiano, ‘te tatari nei tatou, e te rapurapu nei, kia tae mai taua rā o te Atua ra.’ Te tapapa atu nei tatou i te ora e akatupu ei aia i “te mate o te aronga akono kore i te Atua ra.” (2 Petero 3:7, 12) Te anoano maata nei a Iehova i te akaope i te kino, inara te tapu marie ua nei aia kia rauka i te apai mai i te ora no te au Kerititiano na roto i te mataara e akakaka ra i tona ingoa. Te karanga maira te Pipiria: “Eaa oki te Atua, kia anoano i te akakite i tona riri, e kia kitea tona mana, i te akakoromaki anga roa i te au āriki no te riri i akatauia no te mate ra; E kia anoano oki aia i te akakite i te maata anga o tona meitaki, i te au āriki o te aroa.” (Roma 9:22, 23) Mei tana rai i rave i te tuatau ia Noa, kua kite a Iehova i te tuatau tau tikai no te akaora i tona iti tangata i teia tuatau. (1 Petero 3:20) No reira ko te tiaki marie anga i te Atua, ka o mai te tiaki marie anga kia tae tona taime e akatupu ei i tona anoano.

Ia tatou e tiaki marie nei i te ra o Iehova, i tetai taime penei ka manamanata tatou i te akara atu i te au turanga akono kore o teia ao e kino ua atura, takapini ia tatou. I taua au atianga ra, e mea meitaki kia akamanako i te au tuatua a te peroveta o te Atua koia oki a Mika, ko tei tata e: “Kua mate te tangata meitaki i runga i te enua nei, e kare ua e tangata tiratiratu i rotopu i te au tangata nei.” I reira kua kapiti maira aia: “E akara ra au ia Iehova, e tapapa au i te Atua o toku nei ora.” (Mika 7:2, 7) Eaa ra te tu “tapapa” marie ka tau tatou kia tatanu? I te mea e akatupu ana te tiakianga i te mareka kore, akapeea ra e rauka ai ia tatou te rekareka i te tiaki marie anga atu i te Atua?

Mataora i te Tiaki Marie Anga Atu

Ka rauka ia tatou kia kite i te tu tau tikai mei ko mai ia Iehova. Kare rava aia i akamutu ana i te riro ei “Atua mataora.” (1 Timoteo 1:11, NW) Iaia e tiaki ra, te mataora ua ra aia no te mea te angaanga nei rai aia i te akatupu anga i tona akakoroanga kia akangateitei i te aronga e inangaro iaia, ki te turanga apa kore tana i akakoro no te tangata i tona anga mai anga ia ratou. (Roma 5:12; 6:23) Te kite ra aia i te au tupuanga memeitaki mei tana au angaanga​—mirioni ua atu te au tangata e aere maira ki te akamorianga mou. Kua akakite a Iesu e: “Te angaanga ua nei rai toku Metua, ka angaanga katoa oki au.” (Ioane 5:17) Te rave i tetai au mea no etai ke e mea puapinga te reira i te riro anga kia mataora. (Angaanga 20:35) Mei te reira rai te au Kerititiano mou kare ratou e noo aere ua ana kare e angaanga. Mari ra e angaanga ua ana ratou i te tauturu i etai ke kia kite i to te Atua akakoroanga no te tangata.

E mareka ua ana te aronga akarongo mou i te akapaapaa i te Atua ia ratou e tiaki marie ra kia tae tona tuatau i te akatupu i tona akakoroanga. E akamanako ana i te tata taramo ia Davida ei akaraanga. Kua takinga kinoia a Davida e tona ariki, kua pikikaaia e tetai oa piri, e kua orureau tana tamaiti iaia. I roto i teia au turanga ravarai, ka mataora ainei a Davida i te tiaki marie anga atu i te ora kia tae mai i to Iehova tuatau tau? Te akaraanga, na Davida uaorai i tata i te Salamo 71, e te na ko ra: “Ka manako rai au ia koe, kare e tukumoe, kia akameitaki rai au ia koe na rungao na rungao. Na toku vaa e akakite i te tuatua-tika naau, te ora naau, e po ua atu te rā.” (Salamo 71:14, 15) Kare i rapurapu i te tiaki marie anga atu mari ra, kua akakite mai a Davida i tona rekareka no te mea te pou ua ra tona taime i te akapaapaa ia Iehova e te akamaroiroi i etai ke i roto i te akamorianga mou.​—Salamo 71:23.

Kare te tiaki marie anga atu ia Iehova mei te tiaki anga tu ngata rai i tetai pati taroa roa. Kua aite rai te reira ki te tiaki rekareka marie anga o nga metua i ta raua tamaiti e tupu maira ei tangata mamaata te ka riro ei ngakau parau anga no raua. Ka pou ua te au mataiti i te angaanga​—te tereni anga, te apii anga, e te ako anga​—tei akakoro pouroaia kia tupu tei umuumuia. Mei te reira rai tatou te aronga e tiaki marie atu nei ia Iehova, te kite nei i te rekareka i te tauturu anga i etai ke kia akapiri vaitata atu ki te Atua. Ka inangaro katoa tatou kia arikiia mai e te Atua e, i te openga iora, kia rauka mai te ora.

Kare e Tuku i te Au

Ko te tiaki marie anga ia Iehova, te akaari maira te reira e ka anoanoia kia aroa ua atu rai ma te kore e tuku i te au i te tavini anga iaia ma te manakonakoanga mou. Ka riro teia ei akaaoanga maata. Manganui te au tavini o te Atua i teia tuatau e noo ra i roto i te au taiate e aviri ana te tangata, i tetai ua atu e noo ra i te oraanga akatumuia ki runga i te akarongo i roto i te au taputou a te Atua. Inara ka akamanako ana i te akaraanga o te ngati Iseraela akarongo mou, tei mou ngaueue kore i to ratou manakonakoanga i te 70 mataiti e tuikaa ra i Babulonia. Eaa tei tauturu ia ratou kia pera? Kare e ekoko, na te au taramo ta ratou i tatau i akaketaketa ia ratou. Te na ko ra tetai taramo akamaroiroi penei no taua taime ra i tataia ai e: “Te irinaki nei au ki tana tuatua: Te tapapa nei toku vaerua i te Atu, e iti to te au tiaki e tapapa i te popongi ra: koia rai ïa, e iti to te au tiaki e tapapa i te popongi ra. Kia irinaki [me kore kia tiaki marie] Iseraela ia Iehova.”​—Salamo 130:5-7.

Te au ngati Iuda tei mou ngaueue kore ki to ratou manakonakoanga na te tatau anga e te akakite aere anga i te reira, kua tutakiia ratou i te inga anga to Babulonia ki te aronga noni. Tauatini ua atu te au ngati Iuda akarongo mou tei aere viviki atu ki Ierusalema. No runga i taua taime ra, kua tataia e: “I te akakore angaia e Iehova te tuikaaanga o Ziona, . . . Ki akera to tatou vaa i te kata i reira.” (Salamo 126:1, 2) Kare taua au ngati Iuda ra i tuku ana i te au, mari ra kua akaketaketa atu rai ratou i to ratou akarongo. E kare rava ratou i akamutu ana i te imene akapaapaa ia Iehova.

Te akapera nei rai te au Kerititiano mou e tiaki marie ra i te Atua i “te openga o teianei ao,” i te mou ngaueue kore anga ki to ratou akarongo. Te apii ra ratou i te Tuatua a te Atua, te akamaroiroi ra i tetai e tetai, e te akapaapaa ra ia Iehova na te tutu aere anga i te tuatua meitaki o tona Patireia.​—Mataio 24:3, 14.

Tiaki Marie Anga Atu kia Puapingaia mei te Ako

Kua tata te peroveta o te Atua ko Ieremia e: “Meitaki oki kia manakonako atu rai, e kia tiaki marie, i te ora na Iehova.” (Te Aue o Ieremia 3:26) Te aiteanga i ta Ieremia tuatua koia oki, e mea meitaki no te iti tangata o te Atua auraka e akaapa i te mataara e ako ra a Iehova ia ratou i te akatika anga aia kia takoreia a Ierusalema. Mari ra, na te akamanako marie anga i to ratou akarongo kore e te anoano maata no ratou kia akatuke i to ratou tu, ka puapingaia ratou mei te reira.​—Te Aue o Ieremia 3:40, 42.

Penei ka rauka kia akaaiteia te mataara e puapingaia ana tatou mei te ako no ko ia Iehova, ki te mataara e pakari ana te ua rakau. No runga i te ako no ko i te Atua te na ko maira te Pipiria: “Ko te meitaki ra ïa, koia rai te tuatua-tika te tupu i taua ako ra, i te aronga i akamātauia i te reira.” (Ebera 12:11) Mei te ua rakau e anoanoia ra tetai tuatau kia para, ka anoanoia rai te tuatau no tatou kia akatuke i to tatou au tu i te ariu anga atu ki te terenianga ta te Atua e oronga maira. Ei akaraanga, me ka riro to tatou tarevake ei akangere ia tatou i tetai akameitakianga i roto i te putuputuanga, ka riro to tatou tu puareinga ua i te tiaki marie anga atu i te Atua ei paruru ia tatou kia kore e taitaia e kia kore e tuku i te au. I roto i taua au turanga ra, ka riro te au tuatua akauruia a Davida ei akamaroiroianga: “Mei te kamoanga mata nei [to te Atua] riri i te poto; ka vai ra tona akaperepere ra e mutu ua atu te aʼo; kia tapae ua mai te aue i te aiai, ka riro ra i te rekareka kia popongi.” (Salamo 30:5) Me tatanu tatou i te tu tiaki marie e te akono i te ako e rauka maira ia tatou mei te Tuatua a te Atua e tona akaaerenga, ka tae mai to tatou taime no te “rekareka.”

Tupu Anga kia Pakari ka Anoanoia Tetai Tuatau

Me e mapu ua koe me kore koi papetito uaia akera, penei te inangaro ua ra koe kia rauka tetai au apainga i roto i te putuputuanga Kerititiano. Inara ka anoanoia te tuatau no te akatupu i te tu pakari i te pae vaerua tei anoanoia kia rauka i te apai i taua au apainga ra. No reira, e taangaanga i toou au mataiti mua kia tupu ei tangata tu pae vaerua. Ei akaraanga, e tuatau tau te mapuanga no te tatau i te Pipiria katoa, i te akatupu i te au tu Kerititiano, e te akatupu i te kite i te akariro i te tangata ei pipi. (Koheleta 12:1) Me akaari akaaka koe i te tu tiaki marie, ka tae mai to Iehova tuatau tau noou kia rauka te au apainga maata.

Ka umuumu katoaia te tu akakoromaki i roto i te angaanga akariro anga i te tangata ei pipi. Mei te tangata tanutanu e anoanoia ra kia pipi ua rai i te ua e tae ua atu ki te taime e akatupu ei te Atua i te reira, mei te reira katoa rai te angaanga o te akariro anga i te tangata ei pipi. (1 Korinetia 3:7; Iakobo 5:7) Kia rauka i te tatanu i te akarongo e te ariki rekareka ia Iehova ki roto i te ngakau o etai ke, ka pou me eia au marama pera katoa te au mataiti, i te apii marie anga i te Pipiria. I te tiaki marie anga ia Iehova ka o mai te tauta ua atu rai, noatu i te akamataanga e, kare te aronga apiipii e ariu mai ana ki ta ratou e apii ra. Me te akaari maira ra ratou i tetai manga arikianga ua, penei e akairo tera e te ariu ra ratou ki te vaerua o Iehova. Ma te akakoromaki, penei ka rauka ia koe te rekareka, i te kite anga ia Iehova e akatupu ra i taau tangata apiipii kia riro ei pipi na Karaiti.​—Mataio 28:20.

Akaari Anga i te Aroa na te Tiaki Marie Anga Atu

Ei akaraanga e peea te tiaki marie anga i te riro anga ei akaarianga no te aroa e te irinakianga, ka akamanako ana i te turanga o tetai Kite e vaine pakarikari e noo ana i te ngai metepara i te Andes, i Marike Apatonga. Ko raua anake ua ko tetai tuaine te nga Kite o Iehova i roto i to raua oire. Ka rauka ainei ia koe i te akamanako mei teaa to raua rekareka i te tiaki marie anga atu kia atoro mai tetai taeake Kerititiano? Te aere anga tetai akaaere tutaka i te atoro ia raua no te taime mua tikai, kua ngaro iaia te mataara. Kua oki akaou aia na taua mataara rai e kua roa roa atu me eia ora. Kua pati ke ana te tuaero i te po i kite mamao atu ei aia i te oire. I te mea kare e uira i taua ngai ra, kua poitirere tikai aia i te kite anga atu i tetai mori e ka ua ra. Kare e aiteia tona mataora i te tae anga atu aia ki te ngutupa o te oire e i te kite anga e no ko mai te marama i tetai mori inu e takiia ra ki runga e te tuaine pakarikari! Kua papu tikai i te tuaine e ka aere mai aia, no reira kua tiaki marie atu rai aia.

Ma te tu akakoromaki mei te reira, te mataora nei tatou i te tiaki marie anga atu ia Iehova. Kua papu ia tatou e ka akatupu aia i tana au taputou. E mei tera akaaere tutaka ra, te rekareka nei tatou i te aronga tei tiaki marie mai ia tatou ma te akaperepere. No reira kare i te mea poitirere e, te rekareka maira te Atua i te aronga e tiaki marie atura iaia. Te na ko maira te Pipiria: “E tau rā Iehova . . . ki te aronga e irinaki [tiaki marie] ki tona aroa.”​—Salamo 147:11.

[Tutu i te kapi 18]

Te aronga e angaanga pakari ra i te akapaapaa i te Atua te rekareka ra i te tiaki marie anga atu ia Iehova