Nooanga ma te Oraora i Roto i te Akarongo!
Te au Akataka Anga a Tito
KUA anoano te au putuputuanga Kerititiano i runga i te motu o te Tai Maata o Kereta, i tetai akara anga i te anoano o te pae vaerua. Koai te ka rauka i te tauturu ia ratou? Ko te taeake angaanga o Paulo ko Tito! E matutu tikai aia, tau meitaki no te apii, maroiroi no te angaanga memeitaki, e te oraora i roto i te akarongo.
Kua atoro a Paulo ia Kereta i rotopu i tona tapekaanga mua e te rua i Roma. Kua akaruke mai aia ia Tito ki runga i te motu no te akatikatika i te au mea e te akataoonga i te aronga pakari o te putuputuanga. Ka kapikiia rai a Tito no te ako i te au puapii pikikaa e te tuku i te akaraanga memeitaki. Kua akakite pouroaia teia i roto i ta Paulo reta kia Tito, penei kua tukuia mai mei Makedonia i rotopu i te 61 e te 64 T.N. Na te taangaanga anga i te ako a te apotetoro ka rauka te reira i te tauturu i te au akaaere o teia tuatau e te au taeake irinaki kia mataku kore, maroiroi e te oraora i te pae vaerua.
Eaa tei Anoanoia i te au Akaaere?
Kua anoanoia kia akataoongaia te au akaaere e te rave atu i etai au manamanata pakari. (Tito 1:1-16) Kia akataoongaia tetai akaaere, e tau tetai tangata kia kore e akaapaia, kia akaari aia uaorai i te akaraanga meitaki pera katoa i tona ngutuare tangata, kia akamanuiri, kia mako e te akaaere iaia uaorai. E tau aia kia apii i tei tika, te akamaroiroi e te ako i te aronga e tuatua ra i te au manako tarevake. Kua anoanoia te tu matutu no te mea te vaira te au tangata akarongo kore te tau ra kia akamutekiia. Te aronga tikai e aru ra i te ravenga peritome no te mea te akapueurikiriki ra ratou i te au ngutuare tangata katoatoa. Te anoanoia ra te ako anga pakari i te mea e kia vai oraora ua te au putuputuanga i te pae vaerua. I teia tuatau, te anoano katoa ra te au akaaere Kerititiano i te tu matutu no te oronga i te ako e te akamaroiroi anga ma te manako o te akamatutu anga i te putuputuanga.
E Taangaanga i te Apiianga Oraora
E tau a Tito kia oronga i te apiianga oraora i te pae vaerua. (2:1-15) E tau te au tane pakari kia meitaki tikai te akaraanga i te pae o te tu tau ua, te angaanga tikai, te papa meitaki o te manako, te akarongo, te aroa, e te akakoromaki. E tau te au vaine pakari kia “tau ta ratou tuatua i te aronga tapu.” “Ei aronga apii atura i te tuatua memeitaki,” ka rauka ia ratou i te tauturu i te au vaine mapu kia rauka te manako tau i ta ratou au angaanga ei au vaine e te au metua vaine. E tau te au tane mapu kia papa meitaki o te manako, te au tavini kia kauraro i to ratou au akaaere i te tu te ka akamanea i te apiianga a te Atua. Kia kopae te au Kerititiano i te tu atua kore e te noo ma te papa meitaki o te manako i roto i teia akatereanga o te au mea nei koi tapapa ei i te akaari anga kaka o te Atua e Iesu Mesia “ko tei oronga iaia uaorai no tatou, kia ora tatou iaia i te au tuatua kikino ravarai e kia tamā aia ia tatou ei tangata tikai nona uaorai, e te maroiroi i te au angaanga memeitaki ra.” Na te taangaanga anga i te ako anga oraora, e riro rai tatou katoa, i te ‘akamanea i te apiianga a te Atua.’
Te akamaata ra rai ta Paulo ako taopenga i te oraanga oraora i te pae vaerua. (3:1-15) Te anoanoia ra kia akaariia te tu kauraro ki te au tutara e te rave i te tu maru. Tei te au Kerititiano te manakonakoanga o te oraanga mutu kore e kia akamaataia ta Paulo au tuatua no te akamaroiroi ia ratou kia tamou i to ratou au manako ki runga i te au angaanga memeitaki. Kia kopaeia te au uiuianga neneva e te au tauetono anga no runga i te Ture, e kia kopaeia tetai tei akakeu maata i tetai akaruke anga mei te akarongo i muri ake i tetai ako anga pakari tataki rua taime. I te aronga pakari e taangaanga ra i teia ako anga i teia tuatau, ka noo oraora ua ratou e to ratou au taeake irinaki i roto i te akarongo.
[Pia/Tutu i te kapi 22]
Kare i Akatuikaaia ki te Uaina: Noatu e kare te au vaine e apii i te au tane i roto i te putuputuanga, ka rauka i te au vaine pakari i te apii i te au vaine mapu i te ngai muna. Inara e meitaki ei teia tu kia aru te au vaine pakari i te au tuatua a Paulo: “Koia katoa te au vaine pakari, kia tau ta ratou tuatua i te aronga tapu, auraka ei tapepe pikikaa, auraka ei inu maata i te wina, ei aronga apii atura i te tuatua memeitaki.” (Tito 2:1-5; 1 Timoteo 2:11-14) No te tu manako atu i te au kino o te inu kava, kia mako te au akaaere, te au tavini orometua, e te au vaine pakari auraka e oronga ia ratou uaorai no te inu maata i te uaina. (1 Timoteo 3:2, 3, 8, 11) Kia kopae te au Kerititiano katoatoa i te kona kava e te anoanoia ra kia kopae mai mei te inuanga i te au tu kava iaia e rave ra i “te angaanga tapu ra” o te tutu aereanga i te tuatua meitaki.—Roma 15:16, NW; Maseli 23:20, 21.