Ka Mataora te Kerititiano Mou i te Tavinianga

“E mea [mataora] i te oronga atu i te rave mai.”​—ANGAANGA 20:35, akaaite ia NW.

1. Eaa tetai tu akono tarevake te tupu nei i teia tuatau, e eaa ra te reira i kino ei?

I NGA rau ngauru mataiti openga o te 1900 ra, e putuputu te rongoia te tuatua “ko au tikai.” Te aiteanga e “ko au tikai,” “ko au na mua” e te akakite maira i tetai tu akono kapiti anga karapii e te noinoi ma tetai ngereanga i te manako no etai ke. Ka papu ia tatou e i te mataiti 2000, kare te manakoanga ko au tikai i mate ake. Eia taime taau akarongo anga i te au uianga, “Eaa ta te reira naku?” me kare “Eaa taku ka rauka mai i te reira?” Kare taua tu akono karapii ra e taki atu ki te mataora. Ko te tuke roa ia no te kaveinga ta Iesu i tuatua maira: “E mea [mataora] i te oronga atu i te rave mai.”​—Angaanga 20:35, akaaite ia NW.

2. Akapeea ra i kiteai e ka apai mai te oronga anga i te mataora anga?

² E tika ainei e e maata atu te mataora ka apaiia mai na te orongaanga i ta te raveanga mai? Ae. E tamanako ana i te Atua ko Iehova. Tei iaia oki “te tumu o te ora.” (Salamo 36:9) Te oronga maira aia i te au apinga ravarai ta tatou e umuumu ra kia akariro ia tatou kia mataora e kia puapinga. E tika, koia te Tumu o “te au mea memeitaki i o maiia ra, e te au mea tika ravarai.” (Iakobo 1:17) Ko Iehova, “te Atua mataora,” te oronga tamou ua maira. (1 Timoteo 1:11, NW) Te aroa ra aia i tana au mea angaia te au tangata, kia ratou te oronga maata atura aia. (Ioane 3:16) E tamanako katoa, i tetai pamiri tangata. Me e metua koe, kua kite koe e eaa te maata o te au atinga, eaa te maata te orongaanga, kia raukai no te utuutu i tetai tamaiti. E no te au mataiti e manganui kare taua tamaiti ra i kite i te au atinga taau i rave. Ka manako kore pouroa aia i taua au apinga ra. Inara, ka mataora koe i te kite anga i taau tamaiti i te tupu ruperupe anga tei tupu mai o taau orongaanga karapii kore. No teaa ra? No toou aroa iaia.

3. Eaa ra ka mareka ei kia tavini ia Iehova e to tatou au oa akarongo?

³ Na roto i tetai tu aiteite, te akakiteia maira te akamorianga mou na te orongaanga tei akatumuia ra ki runga i te aroa. I te mea te inangaro ra tatou ia Iehova e te aroa ra oki i to tatou au oa akarongo, e mareka anga ia kia tavini atu ia ratou, e kia oronga atu ia tatou uaorai kia ratou ra. (Mataio 22:​37-39) Tetai ua atu te akamori ra ma te au akakeu anga karapii ka akaope mai ma te rekareka anga meangiti ua. Mari ra ko te aronga te tavini karapii kore ra, ma te manako anga maata atu i ta ratou ka rauka kia oronga i ta ratou e manakonako ra kia rave mai, ka kite tikai i te mataora. Ka kitea teianei tuatua mou na te akamanakoanga i akapeea te pirianga o etai au tuatua Pipiria ki to tatou akamori anga te taikuia ra ki roto i te au Tuatua Tapu. Ka uriuri manako tatou e toru o teia tuatua mei teianei e te atikara te ka aru mai.

Ta Iesu Tavinianga i te Au Tangata

4. Eaa te tu o te “tavinianga i te au tangata” i roto ia Kerititome ra?

⁴ I te reo Ereni mua ra, ko tetai tuatua puapinga maata no te akamori e lei·tour·giʹa, tei uriia ra e “tavinianga i te au tangata” i te New World Translation. I roto ia Kerititome kua uriia te lei·tour·giʹa e ko te tuatua “liturgy.”a Inara, ko te au peu liturgy a Kerititome kare i tetai tavinianga puapinga tikai no te tavinianga i te au tangata.

5, 6. (a) Eaa te tavinianga i te au tangata tei raveia ra i roto ia Iseraela, e eaa te au puapinga? (e) Eaa te tavinianga mekameka i te au tangata tei mono ra i tei raveia i Iseraela, e no teaa ra?

⁵ Kua taiku te apotetoro ko Paulo i tetai tuatua Ereni tei piri atura ki te lei·tour·giʹa ma te tuatua anga i te au taunga Iseraela ra. Kua tuatua aia: “E tika rai oki te au taunga ravarai i te tu ua anga i te au rā katoa i te akamori anga [e tu lei·tour·giʹa ia], e te apai putuputuanga i te au atinga okotai rai tu.” (Ebera 10:11) Kua rave te kau taunga ngati Levi i tetai tavinianga puapinga roa i te au tangata i Iseraela ra. Kua apii ratou i te Ture a te Atua e kua oronga i te au atinga, ei tapoki anga i te au ara a te au tangata ra. (2 Paraleipomeno 15:3; Malaki 2:7) Me aru te kau taunga e te au tangata i te Ture a Iehova, e au tumu ia no te iti tangata ra kia rekareka.​—Deuteronomi 16:15.

⁶ Te raveanga i te tavinianga i te au tangata i raro ake i te Ture ra ko tetai taoonga tikai ia no te kau taunga ngati Iseraela ra, inara kua akamutuia te puapinga ta ratou tavinianga i ta Iseraela kopae angaia no te tiratiratu kore. (Mataio 21:43) Kua akanoonoo a Iehova i tetai apinga meitaki maata roa atu​—i te tavinianga i te au tangata ta Iesu i rave ra, koia te Taunga Maata ra. Nona ra, ka tatau tatou: “Kareka aia ra, no te mea e tika i te noo anga e tuatau ua atu, e kare tona taoonga taunga e riro ia etai ke. E teianei e tika meitaki rava atu iaia kia akaora i te aronga e na reira atu iaia ra i te aere ki te Atua ra, e tika oki aia i te ora anga e tuatau ua atu ei pati i ta ratou.”​—Ebera 7:​24, 25.

7. Eaa ra ta Iesu tavinianga i te au tangata i apai mai ei i te au puapinga aite koreia ra?

⁷ Ka akono mutu kore ua atu a Iesu ei taunga, kare te mono anga. No reira, koia anake ka rauka kia akaora takiri i te au tangata. Koia te rave ra i taua tavinianga aite koreia i te au tangata, kare i roto i te iero maaniia e te tangata, mari ra i te iero tikai, ko ta Iehova akanoonoo anga maata no te akamori anga tei akamataia ra te angaanga i te 29 T.N. Te tavini ra a Iesu i teianei i roto i te Ngai Tapu Rava o taua iero ra, i te rangi. Koia te “taunga [lei·tour·gosʹ] no te ngai-tapu, i roto i te puakapa mou, ta te Atu i patia, kare ta te tangata.” (Ebera 8:2; 9:​11, 12) Noatu rai te teitei te turanga o Iesu, te vaira aia ei “taunga.” Te taangaanga ra aia i tona taoonga teitei kia oronga, kare kia rave mai. Te apai maira taua orongaanga ra i te rekareka kiaia. Ko te reira tetai tuanga “i te meitaki i tukuia mai ki mua i tona aroaro” e na te reira i akamaroiroi iaia kia akakoromaki i tona aerenga katoa i te enua nei.​—Ebera 12:2.

8. Akapeea ta Iesu rave anga i tetai tavinianga i te au tangata kia mono atu i te Ture koreromotu?

⁸ Te vaira tetai atu tuanga no ta Iesu ra tavinianga i te au tangata. Kua tata a Paulo: “Kareka i teianei e taoonga meitaki rava tei rauka i to tatou taunga maata, mei iaia katoa i riro ei Arai i te koreromotu meitaki maata ra, ko tei tinamouia i te tuatua meitaki maata i tuatuaia maira.” (Ebera 8:6) Ko Mose te rotopu i te koreromotu ko te reira te tumuanga no te pirianga o Iseraela ma Iehova. (Exodo 19:​4, 5) Ko Iesu te rotopu no te koreromotu ou ra, i raukai kia anauia mai tetai iti tangata ou, koia “te Iseraela o te Atua” ra, ko te au Kerititiano akatainuia i te vaerua mei te au pa enua e manganui ra. (Galatia 6:16; Ebera 8:​8, 13; Apokalupo 5:​9, 10) Mei teaa ra tetai tavinianga meitaki rava i te au tangata i reira! Mei teaa ra to tatou mataora kia matau ia Iesu, e e taunga no te au tangata na roto iaia ka raukai ia tatou te akono i te akamori anga arikiia kia Iehova!​—Ioane 14:6.

Te Oronga Katoa ra te Au Kerititiano i te Tavinianga i te Au Tangata

9, 10. Eaa etai au tu tavinianga i te au tangata tei raveia e te au Kerititiano?

⁹ Kare e tangata i rave i tetai tavinianga au tangata kia teitei mei ta Iesu rai. Inara, me rauka to ratou tutaki i te rangi i te au Kerititiano akatainuia ra, ka rave ratou i to ratou ngai i te pae ia Iesu e ka akono i tana tavinianga i te au tangata i te rangi ra e ei ui ariki e te kau taunga oki. (Apokalupo 20:6; 22:​1-5) Tera ra, te akono ra te au Kerititiano i runga i te enua nei i te tavinianga i te au tangata, e te kite ra ratou i te rekareka maata i te raveanga i te reira. Ei akatauanga, i te tupu anga te onge kai i Paretaina, kua apai atu te apotetoro ko Paulo i te au tauturu mei te au taeake i Europa ra e tauturu kia kore taua tu taitaia o te au Kerititiano ngati Iuda i Iudea ra. E tavinianga i te au tangata te reira. (Roma 15:27; 2 Korinetia 9:12) I teia tuatau nei, te mataora ra te au Kerititiano kia akono i te tavinianga aiteite, i te oronga viviki anga i te tauturu me rokoia to ratou au taeake e te mamae tumatetenga, te au kino natura ra, me kare etai atu tu taitaia.​—Maseli 14:21.

¹⁰ Kua taiku a Paulo i tetai atu tavinianga i te au tangata i tana tata anga: “E kia maringi atu toku toto ki rungao i te atinga apai akakiteia ra o to kotou akarongo, e rekareka ïa reira.” (Philipi 2:17) Ko ta Paulo angaanga maata no te aronga i Philipi ra kua riro ei tavinianga i te au tangata te raveia ra ma te aroa e te ngakau tae oki. Te raveia ra tetai tavinianga i te au tangata ma te aiteite i teia tuatau, e maata oki na te au Kerititiano akatainuia ra, tei tavini ra ei “tavini akono meitaki e te pakari,” i te orongaanga i te kai vaerua i te tuatau tau ra. (Mataio 24:​45-47) Pera katoa, ei pupu, e “kau taunga tapu” teianei aronga, tei ungaia kia “apai i te atinga vaerua, e tau i te Atua ia Iesu Mesia” e “kia akakite ua [ratou] i tona meitaki, to tei kapiki ia [ratou] i to roto i te poiri, kia tae ki tona mārama umereia ra.” (1 Petero 2:​5, 9) Mei ia Paulo rai, ka rekareka ratou i taua au angaanga ra noatu ia ratou ‘e riringi ra ia ratou uaorai’ i te akatupuanga i ta ratou au apainga. E kua kapiti atura to ratou au oa “mamoe ke atu” kia ratou e kua turu atu ia ratou i te angaanga akakiteanga ki te au tangata ia Iehova e tana au akakoroanga.b (Ioane 10:16; Mataio 24:14) Mei teaa ra te tavinianga i te au tangata ma te meitaki e te rekareka ra te reira!​—Salamo 107:​21, 22.

Rave Anga i te Tavinianga Tapu

11. Akapeea ta te peroveta vaine ko Ana ra oronga anga i tetai akatauanga meitaki no te au Kerititiano ravarai?

¹¹ Tetai atu tuatua Ereni te kapiti atura ma ta tatou akamori anga ko la·treiʹa, tei uriia e “tavinianga tapu” i te New World Translation. Te tavinianga tapu te tuatua ra no te au angaanga akamorianga. Ei akatauanga, te vaine peroveta takaua ko Ana e 84 mataiti ra kua akatakaia e “kare rava aia i akaruke i te iero, e tika ra i te akamori anga i te Atua [ko tetai tuatua Ereni piri atura ki te la·treiʹa] ma te pure e te akakoreanga kai i te po e te ao.” (Luka 2:​36, 37) E akamorianga tamou marie ta Ana ia Iehova ra. Koia tetai akatauanga meitaki na tatou katoatoa​—te aronga ou e te ruaine, te tane e te vaine. Mei ta Ana pure anga akatenga kia Iehova ra e te akamorianga putuputu kiaia i te iero ra, te kapiti ra ta tatou tavinianga tapu i te pure e te aerenga ki te au uipaanga.​—Roma 12:12; Ebera 10:​24, 25.

12. Eaa tetai tuanga maata no ta tatou tavinianga tapu ra, e akapeea oki teia i riro ei ei tavinianga i te au tangata?

¹² Kua taiku maira te apotetoro ko Paulo i tetai tuanga maata no ta tatou tavinianga tapu i tana tataanga: “Ko te Atua oki taku e akamori ma taku vaerua katoa i te evangelia o tana Tamaiti, ko toku ïa kite e, kare ua au i vata i te taiku ia kotou.” (Roma 1:9) Ae, kare te tutuanga i te tuatua i te tuatua meitaki i tetai tavinianga i te au tangata anake ua tei akarongo mari ra ko tetai rave akamorianga ki te Atua ko Iehova ra. Noatu rai me ka kitea e tatou tetai taringa akarongo mai e me kare ua, ko te angaanga tutuanga e tavinianga tapu ia kia Iehova. Ko ta tatou tauta anga kia tuatua atu kia etai ke ra no te au tu meitaki e te au akakoroanga puapinga a to tatou Metua akaperepere i te rangi ra ka tika kia apai mai i te rekarekaanga maata kia tatou.​—Salamo 71:23.

Kiea Tatou e Akono ei i te Tavinianga Tapu?

13. Eaa te manakonakoanga no te aronga tei rave ra i te tavinianga tapu i te paepae i roto o te iero vaerua o Iehova, e koai ma ka rekareka katoa ma ratou?

¹³ Kua tata atura Paulo ki te au Kerititiano akatainuia ra: “E teianei kua rauka ia tatou te basileia ngaueue kore, e tāpu marie rai tatou i taua aroa ua ra, kia akamori tatou i te Atua ma te kiteaia mai, ma te akaaka e te mataku.” (Ebera 12:28) Ma te tapapa irinaki anga i te tu angaanga i te Patireia ra, kua ngaueue kore te akarongo o te aronga akatainuia ra ia ratou e akamori ra i Tei Teitei Rava. Ko ratou anake te ka rauka kia akono i te tavinianga tapu kiaia i te ngai Tapu e te paepae i roto i te iero vaerua o Iehova ra, e te tapapa maira ratou ma te rapurapu anga kia tavini ma Iesu i roto i te Ngai Tapu Rava, i te rangi ra. Ko to ratou au oa, te pupu mamoe ke atu, ka rekareka ma ratou katoa ra i to ratou manakonakoanga umere.​—Ebera 6:​19, 20; 10:​19-22.

14. Akapeea te urupu maata ra i puapingaiai mei ta Iesu ra tavinianga i te au tangata?

¹⁴ Inara, ka akapeea te aronga o te mamoe ke atu? Mei ta te apotetoro ko Ioane i kite maira i tetai urupu maata o ratou tei mama maira i teia tuatau openga nei, “kua orei i to ratou kakau, e kua akateatea i te toto o te Punua-mamoe ra.” (Apokalupo 7:14) Te aiteanga o teia e, mei to ratou au oa akamori akatainuia ra, te akono ra ratou i te akarongo i ta Iesu tavinianga i te au tangata, i tana orongaanga i tona oraanga tangata apa kore ua no te au tangata nei. Ka puapinga katoa te mamoe ke atu mei te tavinianga a Iesu i te au tangata ra i te mea kua “tāpu piri i [ta Iehova] koreromotu.” (Isaia 56:6) Kare, kare ratou i te tuanga no taua koreromotu ou ra, mari ra kua mou ratou i te reira i te mea te akarongo ra ratou i te au ture te piri atura ki te reira e te taokotai atura ma te au akanoonoo anga tei raveia ra na roto i te reira. Ka taokotai ratou ma te Iseraela o te Atua, te kaikaianga i taua kaingakai vaerua rai e te rave angaanga kapitianga ma tona au mema oki, i te akapaapaaanga i te Atua i te ngai tangata e te orongaanga i te au atinga vaerua te akamareka ra iaia.​—Ebera 13:15.

15. Teiea te ngai e rave ra te urupu maata i ta ratou tavinianga tapu, e eaa te akatupuanga a teia akameitakianga kia ratou ra?

¹⁵ No reira, akaraia atura te urupu maata “i te tu ua anga ki mua i te terono, e ki mua i te Punua-mamoe, ma te kakau teatea i te kakau anga.” Pera katoa oki, “i noo ei ratou ki mua i te terono o te Atua ra, e i akamori ei ratou iaia i te po e te ao i tona nao: e na tei noo ki runga i te terono ra e noo ki rotopu ia ratou.” (Apokalupo 7:​9, 15) I Iseraela, kua akamori te au poroteraita i roto i te paepae i vao ake i te iero o Solomona ra. I roto i tetai tu aiteite, te akamori ra te urupu maata ia Iseraela i te paepae i vao ake i tona iero vaerua ra. Kua rekareka ratou i te tavinianga i reira. (Salamo 122:1) Noatu a muri ake i te rauka anga i te tuanga openga o to ratou au oa akatainuia ra tona tuanga i te rangi ra, ka rave ua atu ratou i te tavinianga tapu kia Iehova ra ei au tangata nona.​—Apokalupo 21:3.

Tavinianga Tapu Kare ra e Arikiia

16. Eaa te au akamatakiteanga te orongaia maira no runga i te tavinianga tapu ra?

¹⁶ I te tuatau o Iseraela i taito ra, kua raveia te tavinianga tapu kia rotai ma te au ture a Iehova ra. (Exodo 30:9; Levitiku 10:​1, 2) Mei te reira katoa i teia tuatau, te vaira te au umuumuanga kia akono me kia arikiia mai ta tatou tavinianga tapu kia Iehova. No reira a Paulo i tata ei ki to Kolosa: “I kore katoaʼi matou i tivata i te pure ia kotou, . . . e te pati akatenga anga atu kia akakiia mai kotou i te kite i tona anoano, i te pakari i te au mea ravarai e te kite i te vaerua; Kia tau to kotou aerenga i te Atu i te au mea katoa e mareka mai ei ra, e kia tupu te au angaanga meitaki katoa ia kotou, e kia maata oki to kotou kite i te Atua.” (Kolosa 1:​9, 10) Kare e tei runga ia tatou te tamanako anga i te aerenga tika no te akamori anga i te Atua ra. Te kite tika i te Tuatua Tapu, te marama meitaki i te pae vaerua, e te pakari tau i te Atua e puapinga maata ia. Me kare ra, ka rauka kia tarevake kino te au apinga ra.

17. (a) Akapeea te tarurike anga i te tavinianga tapu i te tuatau ia Mose ra? (e) Akapeea ka raukai kia tarurike ia te tavinianga tapu i teia tuatau nei?

¹⁷ Kia maara i to Iseraela i te au tuatau o Mose ra. Ka tatau tatou: “Ariu ke atura te Atua, akaruke mai nei ia ratou kia akamori ua na i te nuku o te rangi.” (Angaanga 7:42) Kua kite to Iseraela ra i ta Iehova au angera ririnui no ratou ra. Inara, kua ariu ke ratou ki etai Atua ke i to ratou manako anga e ka riro teia ei puapinga kia ratou. Kare ratou i rave tiratiratu, e ko te tiratiratu e mea tika ia e mea kia mareka mai te Atua i ta tatou tavinianga tapu. (Salamo 18:25) E tika, e tokoiti ua i teia tuatau ka uri ke mei ia Iehova kia akamori i te au etu me kare te au punua puakatoro auro, inara te vaira etai atu tu akamori itoro. Kua akamatakite mai a Iesu i te tavinianga i te “Mamona,” e kua kapiki a Paulo i te noinoi apinga e akamori itoro. (Mataio 6:24; Kolosa 3:5) Te akateitei maira Satani iaia uaorai ei atua. (2 Korinetia 4:4) Te tupu maata ra taua tu akamori itoro ra e e ereere oki ia. Ei akatauanga, e tamanako ana, i tetai tangata tei karanga ra e te aru ra aia ia Iesu inara ko tana akakoroanga tikai i te oraanga kia riro ei apinganui me kare ko tona irinaki anga tikai tei roto iaia uaorai e i tona uaorai au manako. Koai tikai tana e tavini ra? Eaa tona tuke anga mei to te au ngati Iuda o to Isaia tuatau ra tei tia ra i te ingoa o Iehova ra inara kua tuku ia te akameitaki anga i tana au angaanga maata ra ki te au itoro viivii?​—Isaia 48:​1, 5.

18. Akapeea te rave anga tarevake i te tavinianga tapu i te tuatau kua topa e i teia tuatau oki?

¹⁸ Kua akamatakite katoa Iesu: “Kua vaitata oki te ora, e manako ei te tangata e ta ia kotou na e, kua akamori i te Atua.” (Ioane 16:2) Ko Saula, tei riro e ko te apotetoro ko Paulo, kua manako kare e ekoko anga e te tavini ra aia i te Atua i tana ‘akatika anga kia taia a Setephano’ e kua ‘tuatua akamataku e te ta oki i te au pipi a te Atu ra.’ (Angaanga 8:1; 9:1) I teia tuatau, te akakite katoa ra tetai aronga rave kino o te tamaanga eteniki e te takore takirianga i tetai pa enua e te akamori ra i te Atua. E manganui te tangata te karanga ra e te akamori ra i te Atua, inara ko ta ratou akamorianga te akatikaia atura ki te au atua pa enua, au kopu, apinganui, kia ratou uaorai, me kare no etai atu au atua ke ra.

19. (a) Akapeea to tatou manako anga no ta tatou tavinianga tapu? (e) Eaa te tu tavinianga tapu te ka apai mai i te rekareka anga kia tatou nei?

¹⁹ Kua tuatua Iesu: “Ko toou Atua ra ko Iehova taau e akamori, e koia anake rai taau e akarongo.” (Mataio 4:10) Te tuatua atura aia kia Satani, inara mei teaa te puapinga te reira e kia akarongo tatou katoatoa i tana au tuatua! Te rave tavinianga tapu ki te Atu Ngateitei o te ao katoa e pini ua ake ko tetai tika teitei ia, e te akauruanga mataku oki. E eaa ka rauka kia tuatuaia no te rave tavinianga i te au tangata tei kapitiia ra ki ta tatou akamorianga? Ko te raveanga i teianei no to tatou oa tangata nei ko tetai angaanga rekareka ia te ka apai mai i te mataora maata. (Salamo 41:​1, 2; 59:16) Inara, ka apai mai anake taua tavinianga ra i te mataora tika me ka orongaia te reira ma te ngakau katoa e na roto i te tu tika. Koai ma te akamori tika ra i te Atua? Ko taai tavinianga tapu ta Iehova ra ka ariki? Ka rauka ia tatou te pauanga i taua au uianga ra me ka akamanako tatou i te toru o te tuatua Pipiria te kapiti atura ki ta tatou akamorianga. Ka rave tatou i teia i te atikara te aru mai nei.

[Au Tataanga Rikiriki i Raro]

Akapeea Koe me Pau?

• Eaa te tavinianga mekameka i te au tangata ra ta Iesu i rave?

• Eaa te tavinianga i te au tangata ta te au Kerititiano e rave ra?

• Eaa te tavinianga tapu a te Kerititiano, e e raveia ra kiea?

• Eaa ta tatou ka tika kia rauka mai me kia akamareka ta tatou tavinianga tapu i te Atua ra?

[Tutu i te kapi 10]

Ka kite te au metua i te rekareka maata i te orongaanga

[Au Tutu i te kapi 12, 13]

Te oronga ra te au Kerititiano i te tavinianga i te au tangata ia ratou e tauturu ra i etai ke e ia ratou e akakite ra i te tuatua meitaki

[Tutu i te kapi 14]

Ka umuumu tatou i te kite tika e te maramaanga e papu ei e te arikiia maira ta tatou tavinianga tapu e te Atua