“E Aere Mai Kotou Kiaku Nei, . . . Naku e Akaanga i To Kotou Roi”

Au Uipaanga Akamaroiroi kia Maata te Aroa e te Au Angaanga Memeitaki

MEI Toronto ki Tokyo, mei Moscow ki Montevideo​—e maata te taime i te epetoma tataki tai, te aere atura te au mirioni Au Kite o Iehova e to ratou au taeake ki to ratou ngai akamori anga. Te kapiti maira i roto i teia aronga tataki tai te au tane pamiri angaanga pakari, tei roiroi i muri mai i tetai ra roa i te angaanga; te au vaine angaanga maroiroi e te au metua vaine kapitiia mai e ta ratou tamariki rikiriki; te au mapu maoraora tei akapou i te ra i te apii; te aronga ruaine tei tapotoia to ratou takainga e te taitaia e te mamae; te au vaine takaua mataku kore e te au matiroeroe, e te aronga taitaia te umuumu ra i te akapumaana anga.

Te taangaanga ra teia Au Kite no Iehova i te au mataara tuke tuke e manganui​—mei te au rerue tere viviki ki te au atini, mei te au motoka rerue i raro ki te au toroka. Kua tikoti atu etai i te au kauvai kiia e te araketa, koi akakoromaki ua atu ei etai i te piripiri o te au motoka o te au oire mamaata. Eaa ra teia aronga i aruaru maata ei?

Te tumu maata no te mea te aereanga e te pirianga atu ki roto i te au uipaanga Kerititiano e mataara puapinga ia no te oronga i te akamori anga ki te Atua ko Iehova. (Ebera 13:15) Kua taiku katoa mai te apotetoro ko Paulo i tetai atu tumu i tona tata anga: “E akono marie rai tatou tetai ki tetai, ka akamaroiroi atu ei kia maata te aroa, e i te angaanga memeitaki ra: Auraka e akaruke i to tatou akaputuputu anga . . . ka akamaroiroi ra, e kia maata atu rai te maroiroi, no te mea te akara na kotou i taua rā ra i te vaitata anga mai.” (Ebera 10:​24, 25) I konei te akakite ra a Paulo i te manako ngakau o te tata taramo ko Davida, tei imene: “Mareka rava akera au e te aronga i tuatua mai kiaku e, Taki aere tatou ki te are o Iehova.”​—Salamo 122:1.

Eaa te au Kerititiano i rekareka ei i te taeanga atu ki ta ratou au uipaanga? No te mea ko te aronga i aere atu kare ua i te aronga akara ua. Mari ra, te akono maira te au uipaanga i tetai tuatau kia kite ratou i tetai e tetai. Koia tikai te oronga mai nei teia au akaputuputuanga i te au atianga no te oronga, kare kia rauka ua mai, e kia akamaroiroi i tetai e tetai kia akaari i te aroa e kia rave atu i te au angaanga memeitaki ra. Te tauturu nei teia i te akariro i te au uipaanga ei au atianga akapumaana. Pera katoa, ko te au uipaanga Kerititiano tetai o te au mataara i roto i reira te akatupu ra a Iesu i tana au taputou: “E aere mai kotou kiaku nei, . . . naku e akaanga i to kotou roi.”​—Mataio 11:28.

Ei Ngai Akapumaana Anga e te Manakonako Anga

E au tumu meitaki to te Au Kite o Iehova no te akara atu i ta ratou au uipaanga ei mea akaangaroi anga. Ko tetai tumu, i te au uipaanga te orongaia maira te au kai pae vaerua i te tuatau tau e te “tavini akono meitaki e te pakari.” (Mataio 24:45) Te akono katoa ra te au uipaanga i tetai tuanga puapinga i te akariro anga i te au tavini o Iehova ei au puapii kite karape e te maroiroi o te Tuatua a te Atua. Pera katoa, i te Are Uipaanga Patireia, ka kite atu tetai i tetai pupu aroa ua, manakonako ua, e te au taeake akono ua te papa ra e te puareinga ra i te tauturu e te akapumaana i tetai atu i te au taime taitaia.​—2 Korinetia 7:​5-7.

Ko teia te tupuanga o Phillis, e vaine takaua tei takake atu tana tane i te rima e te varu mataiti o tana nga tamariki. Te akatakaanga mai i te tupu anga akaangaroi anga tei akatupuia e te au uipaanga Kerititiano ki rungao iaia e tana nga tamariki rikiriki, kua tuatua aia: “E pumaana tikai i te aere atu ki te Are Uipaanga Patireia no te mea kua akaari ua mai te au taeake irinaki i to ratou aroa e te manako anga na roto i te takave anga, tetai manako Tuatua Tapu, me kare te roromi anga i nga rima. E ngai ia kua inangaro ua au i te tae atu.”​—1 Tesalonia 5:14.

I muri mai i te raveanga ia te vai anga maata kia Marie, kua tuatua atu tona taote penei e ka pou e ono epetoma e meitaki mai ei aia. I nga epetoma mua o tona akaangaroi anga, kare e rauka ia Marie te aere atu ki te au uipaanga. Kua kite atu tona taote kare aia e kangakanga roa ana mei to mua ana. I tona kite anga kare aia e aere ana ki te au uipaanga, kua akamaroiroi atu aia iaia kia pera. Kua pau atu a Marie kare tana tane, kare i piri mai ki roto i tona akarongo, e puareinga ana i te tuku atu iaia kia aere ki te au uipaanga no tona oraanga kopapa ra. No reira kua tata atu te taote i tetai pepa akataka anga te “ota anga” ia Marie kia aere atu ki te Are Uipaanga Patireia no te taokotai anga akamaroiroi e te akamatutu anga. Kua taopenga a Marie: “I muri mai i te aere anga atu ki tetai uipaanga, kua meitaki akaou au. Kua akamata au i te kaikai, kua moe meitaki au i te po katoa, kare au i kai putuputu ana i te ua vairakau, e kua katakata akaou au!”​—Maseli 16:24.

Te reva aroa ua i te au uipaanga Kerititiano kua kitea uaia e te aronga i vao. Kua iki tetai tamaine kaoreti i te akara meitaki atu i te Au Kite o Iehova e raukai i te tata i tetai pepa no tona pupu apii i te apiianga i te pae peu. No runga i te reva i te au uipaanga, kua tata aia i roto i tana pepa: “Te turou anga pumaana tei rauka iaku . . . [e] mea akakeu ia. . . . Te tu oaoa o te Au Kite o Iehova e tu maata ia e kua manako au e ko te tuanga puapinga ia o taua akanoonooanga.”​—1 Korinetia 14:25.

I roto i teia ao manamanata, te putuputuanga Kerititiano e ngai pae vaerua ia. E ngai ponuiaau e te aroa ua. Na te tae ua anga ki te au uipaanga, ka kite koe noou uaorai i te tika tikai o te au tuatua a te tata taramo: “I na oki, te meitaki e te mataora, kia noo katoa te au taeake ma te tau tikai!”​—Salamo 133:1.

[Pia/Tutu i te kapi 25]

AKAMERENGOANGA I TETAI UMUUMU ANGA TAKAKE

Akapeea te aronga turi i te puapinga anga mei te au uipaanga Kerititiano? Takapini i te ao, te akanoo ra te Au Kite o Iehova i te au putuputuanga reo akairo. I te 13 mataiti i topa ake nei, kua akanooia e 27 putuputuanga reo akairo e 43 pupu reo akairo i Marike. I roto i tetai 40 enua, te vaira i teianei e 140 putuputuanga reo akairo. Kua akapapaia te au puka Kerititiano ki runga i te vitio i roto i te 13 reo akairo.

Te oronga maira te putuputuanga Kerititiano ki te aronga turi i te tuatau kia akapaapaa ia Iehova. Ko Odile, e Katorika i mua ana i Varani tei mamae mei te taitaia kino pakari e te au manako tamate uaorai, te ariki oonu nei i te apii anga Pipiria tei rauka iaia i te au uipaanga Kerititiano. “Kua rauka iaku toku tu oraanga kopapa e te tu rekareka i te ora anga,” i nana ei. “Inara tei maata atu, kua kitea e au te tuatua mou. E akakoroanga toku i teianei no te oraanga.”