Kia Kore Tatou e Unui ki Muri e Mate Atu!

“Kare ra tatou i to te aronga i unui ki muri e mate atu.”​—EBERA 10:39.

1. Eaa te au turanga tei taki atu i te apotetoro ia Petero kia tuku ua ki te mataku ra?

E MEA tika kua poitirere te au apotetoro ra i te akakite atu anga to ratou Pu akaperepere kia ratou e ka pueurikiriki ke ratou katoa e ka akaruke mai iaia. Akapeea ra e tupu ei taua mea ra​—i teianei, tona ora e umuumuanga maata rava? Kua manono atura Petero: “Kia maitu te tangata katoa ia koe, kare takiri au nei.” Ko te tika e tangata toa a Petero, e te mataku kore oki. Inara i te pikikaa angaia a Iesu e te tapeka angaia, kua pueurikiriki ke atura te au apotetoro​—kapiti katoa ia Petero. I muri akera, ia Iesu e uiuiia ra i roto i te are o te Taunga Maata ko Kaiapha ra, kua noo apiapi atura Petero ki roto i te paepae. I te roa anga taua po anu ra, penei kua mataku a Petero e ka tamateia a Iesu ma tetai atu te taokotai atura kiaia. I te kite anga tetai papaki o te aronga te tu ra i te pae mai e ko Petero tetai oa piri vaitata o Iesu, kua mataku aia. E toru taime i akakore ei aia i tona pirianga ma Iesu ra. Kua pikikaa a Petero e kare i kite iaia!​—Mareko 14:27-31, 66-72.

2. (a) Eaa ra te aerenga mataku o Petero i te po i to Iesu ra tapekaanga kare i akariro iaia i “to te aronga i unui ki muri” ra? (e) Eaa ta tatou ka tauta i te rave?

² Ko te reira tetai tuanga akaaka roa i to Petero ra oraanga, kare e ekoko anga e ko tetai atianga ia te mii ra aia no te toenga o tona au ra. Inara ka akariro ainei ta Petero raveanga i taua po ra e koia tetai tangata mataku ua? Kua akariro ainei iaia ei tetai i “to te aronga” ta te apotetoro ko Paulo i akataka i muri iora i tana tata anga: “Kare ra tatou i to te aronga i unui ki muri e mate atu.”? (Ebera 10:39) Penei ka akatika te maata anga o tatou e kare ta Paulo au tuatua e piri atu ana kia Petero. No teaa ra? No te mea e poto ua to Petero ra mataku anga, ko tetai tuanga poto ua i roto i tetai oraanga tei akairoia na te mataku kore tikai e te akarongo oki. E aiteite katoa, e manganui o tatou te maaraara ra i etai atianga i to tatou tuatau kua topa i etai tu no te akama, te au atianga i roko poitirere ia mai ei tatou e te mataku e kua arai ia tatou kia kore e tu mataku kore ua no te tuatua mou mei ta tatou i inangaro ra. (Akaaite ia Roma 7:21-23.) Kua papu ia tatou e kare taua au topa anga poto ua ra e akariro ia tatou mei te aronga i unui ki muri e mate atu. Inara, ka tau tatou kia tamanako kia kore e riro mei taua aronga ra. No teaa ra? E akapeea e raukai ia tatou te kopae ke i te riroanga mei taua tu tangata ra?

Eaa te Aiteanga kia Unui ki Muri e Mate Atu

3. Akapeea te nga peroveta ko Elia raua ko Iona tuku anga ki te mataku?

³ I ta Paulo tata anga i “to te aronga i unui ki muri,” kare aia i manako no te aronga penei ka rokoia e tetai topa poto anga te tu mataku kore. Kua kite tikai a Paulo i tei tupu ra kia Petero e tei aiteite ra kiaia. Ko Elia tetai peroveta mataku kore e te tuatua tikatika ua, i tetai tuatau kua rokoia e te mataku e kua oro ke atu no tona oraanga no tetai akakoko mate anga mei ko mai i te Ariki Vaine ko Izebela ra. (1 Ariki 19:1-4) E maata atu ta te peroveta ko Iona ra kukumi anga ma te tu mataku ra. Kua akaue a Iehova iaia kia aere atu ki te oire kino no te ta ua o Nineve ra. Kua kake viviki ua atura Iona i tetai pai te aere ra kia Taresisa​—e 3,500 kiro mita ki tetai ngai ke! (Ioane 1:1-3) Inara, kare tetai o te au peroveta tiratiratu kare katoa i te apotetoro ko Petero kia akatakaia e ko tetai i to te aronga tei unui ra ki muri. Eaa i kore ei?

4, 5. (a) Akapeea ta te tataanga tauturu ia tatou kia akataka e eaa te aite anga o ta Paulo tuatua “mate atu” ia Ebera 10:39? (e) Eaa te aite anga o ta Paulo i tuatua: “Kare ra tatou i to te aronga i unui ki muri e mate atu”?

⁴ E akamanako ana i te takiota tuatua katoa ra a Paulo i taiku ra: “Kare ra tatou i to te aronga i unui ki muri e mate atu.” Eaa te aite anga o tana tuatua e “mate atu”? Te tuatua Ereni tana i taiku ra i etai tuatau te tuatua ra no te mate mutu kore. Te tau ra teianei akataka anga no taua tumu ra. Koi oti ua akera ta Paulo akamatakite anga: “Kua rauka na ia tatou te kite i te tuatua-mou ka rave inangaro mou atu ei i te ara, kare ua atu e tarangaara toe, kareka e ngarangara anga rikarika i te tutaki, i te riri viviki maata rava mei te ai ra, e pou takiri atu ei te au enemi ra.”​—Ebera 10:26, 27.

⁵ No reira i ta Paulo tuatua anga ki tona au oa akarongo e: “Kare tatou i to te aronga i unui ki muri e mate atu,” tera tana aiteanga e koia e tona au oa tatau ei Kerititiano tiratiratu kua tamanako ratou e auraka e taruri ke mai mei ia Iehova e ka akamutu ei te tavinianga iaia. Ka taki atu anake te reira ki te mate mutu kore. Ko Iuda Ikariota tetai tei unui ra ki muri ki taua mate ra, mei etai atu enemi o te tuatua mou tei rave akakoro ra kia patoi i te vaerua o Iehova. (Ioane 17:12; 2 Tesalonia 2:3) Ko taua aronga ra tei roto i “te aronga mataku ua” tei mamae i te mate mutu kore i te roto ai akatutuia ra. (Apokalupo 21:8) Kare, kare rava tatou e anoano kia riro e ko tetai o te reira aronga!

6. Eaa te ravenga ta Satani te Tiaporo e anoano ra ia tatou kia rave?

⁶ Te anoano ra a Satani te Tiaporo kia unui tatou ki muri kia mate atu. Ei tetai pu no te “au ravenga kikite,” kua kite aia e ko taua aerenga akakino ra e putuputu te akamataia na roto i te au ravenga rikiriki. (Ephesia 6:11) Me ka puapinga kore te takinga kinoanga i te akatupu i tana akakoroanga, ka kimi aia kia akakino atu i te akarongo o te au Kerititiano mou na roto i etai ravenga kikite atura. Te anoano ra aia kia kite i te Au Kite o Iehova, mataku kore ra e te totomapu i te riroanga kia muteki ua. E akara tatou eaa tana au ravenga i taangaanga ki te au Kerititiano Epera ta Paulo i tata atura.

Akapeea te Taomi Anga te Au Kerititiano kia Unui ki Muri

7. (a) Eaa te tuatua enua o te putuputuanga i Ierusalema ra? (e) Eaa te au turanga pae vaerua tei vaira i te tu o etai aronga tei tatau ra i ta Paulo i tata?

⁷ Te akakite maira te tupuanga e kua tata a Paulo i tana reta ki to Epera e vaitata i te 61 T. N. E tuatua enua riririri to te putuputuanga i Ierusalema ra. I muri mai i te matenga o Iesu, kua tupu mai tetai ngaru no te takinga kinoanga ketaketa, kua oparaia te au Kerititiano e manganui i te oire ra kia pueurikiriki ke atu. Inara, kua aru mai tetai tuatau no te au, te akatikaanga i te numero o te au Kerititiano kia tupu maata. (Angaanga 8:4; 9:31) Kua roa te au mataiti i topa, kua tupu mai etai takinga kino e te au tu ngata e kua kore atu. I te akaraanga e kia tae ki te tuatau i tata ei a Paulo i te reta ki to Epera, kua rekareka akaou te putuputuanga i tetai tuatau no te tu au. Inara, te vaira te au taomianga. E vaitata i te toru raungauru mataiti tei topa mei ta Iesu ra totou anga i te akapouanga ia Ierusalema. Penei kua manako ngakau tetai papaki e kua taroaroa tau kore ua te openga ra e penei kare e tae mai i to ratou tuatau ra. Ko etai, e e maata oki to te aronga ou i akarongo ra, kare i timataia ake na te takinga kinoanga ketaketa e e meangiti ua to ratou kite i te umuumuanga no te akakoromaki i raro ake i te timataanga. (Ebera 12:4) Kua kimi tikai a Satani kia rave i taua au turanga ra ei puapinga kiaia. Eaa te “au ravenga kikite” tana i rave?

8. Eaa te tu manako o te au ngati Iuda e manganui ki te putuputuanga ou o te Kerititiano ra?

⁸ Kua manako te aronga ngati Iuda i Ierusalema ra e Iudea oki i taua putuputuanga Kerititiano ra ma te ngateitei kore. I te manakoanga mei te au apinga o te reta a Paulo ra, ka kite tatou i etai au manako no te au akakino anga ta te au arataki akonoanga ngati Iuda akatietie e ta ratou au pipi ra i tuku atu ki te au Kerititiano ra. Penei, kua tuatua ratou: ‘Tei ia matou te iero maata i Ierusalema, te tu ra no etai anere mataiti! Tei ia matou te taunga maata ngateitei te akono ra i reira, ma tana kau taunga oki. Te orongaia ra te au atinga i te au ra takitai. Tei ia matou te Ture, tei orongaia maira e te au angera kia Mose e kua akanooia ma te au akairo maata ki runga ia Maunga Sinai. Ko teianei akonoanga ou, o te au Kerititiano, kare ia ratou teianei au mea!’ I rauka ainei i taua akakinoanga ra tana akakoro anga? Kua tupu te taitaia ki tetai au papaki Kerititiano Epera ra na taua au tuatua anga akakino ra. Kua aere mai ta Paulo reta kia ratou ei tauturu i te tuatau tau tikai ra.

Eaa Ratou i Kore ei e Tau kia Unui ki Muri e Mate Atu

9. (a) Eaa te tumu te akaki ra i te reta ki to te au Epera? (e) I teea tu ta te Kerititiano tavini anga i te iero meitaki atu i to Ierusalema?

⁹ E akara matatio tatou e rua tumu ta Paulo i oronga ki tona au taeake e te au tuaine i reira i Iudea no te kore e unuianga ki muri e mate atu. Te mea mua​—ko te teitei atu o te akatereanga akamori o te Kerititiano​—te ki ra te reta ki te au Epera. I roto katoa i tana reta, kua akatupu a Paulo i taua tumu ra. Ko te iero i Ierusalema ra e tutu ua no tetai mea maata tika tikai,koia te iero vaerua o Iehova, ko tetai are “kare i angaia e te rima ra.” (Ebera 9:11) Kua rauka i taua aronga Kerititiano te tika no te tavinianga ki roto i taua akanoonoo anga vaerua no te akamori mou. Kua tavini ratou i raro ake i tetai koreromotu meitaki atu, koia te koreromotu ou tei roa ra te taputou angaia, e Rotopu teitei atu tona ia Mose, koia Iesu Karaiti ra.​—Ieremia 31:31-34.

10, 11. (a) Eaa to Iesu akapapa tupuna i kore ei e akatau kore iaia no te tavinianga ei Taunga Maata i te iero vaerua ra? (e) I teea au tu a Iesu e Taunga Maata tei teitei atu i tei tavini ra i te iero i Ierusalema?

¹⁰ E Taunga Maata meitaki atu oki to taua aronga Kerititiano ra, ko Iesu Karaiti. Kare, kare aia i anauia mai ia Aarona. Mari ra, e taunga maata aia “mei ia Melekizedeka te tu.” (Salamo 110:4) Ko Melekizedeka, kare ra tona papaanga tupuna i tataia, e ariki ia no Salema i taito ra e pera katoa koia te taunga maata. No reira kua riro aia ei tetai tutu totou tau no Iesu, kare ra tona taunga anga i irinaki, ki runga i tetai akapapa anga tupuna tangata apa ua, mari ra ki runga i tetai apinga maata roa atu​—ta te Atua ko Iehova uaorai tia anga. Mei ia Melekizedeka rai, te tavini ra a Iesu kare ei Taunga Maata anake mari ra ei Ariki katoa oki, ko tetai te ka kore roa atu e mate.​—Ebera 7:11-21.

¹¹ Pera katoa oki, kare mei te taunga maata i te iero i Ierusalema ra, kare a Iesu i oronga i te au atinga i tera mataiti e tera mataiti. Ko tana atinga ko tona uaorai oraanga apa kore ua ra, koia tana i oronga e okotai rava ana tuku anga i te reira e oti atu ei. (Ebera 7:27) Pouroa tana au atinga i tukuia i te iero ra e ata anake ia, e akatutuanga no ta Iesu i oronga ra. Kua oronga tana atinga apa kore ua ra i te tataraara tikai no te au ara katoatoa a tei akono ra i te akarongo. E akapumaanaanga ngakau oki, ta Paulo au tuatua akaarianga e ko teianei Taunga Maata ko Iesu taui koreia ra koia Iesu ta te au Kerititiano i Ierusalema i kite ra. E akaaka aia, e takinga meitaki, e ko tetai oki kare “e kore e tika kia aroa mai ia tatou i to tatou au paruparu nei.” (Ebera 4:15; 13:8) I taua aronga akatainuia ra te manakonako anga kia tavini ei kau taunga na Karaiti! Akapeea e raukai ia ratou kia manako ua i te unuianga ki muri “ki taua apiianga mua rikiriki tika kore” ra te au apinga a te akonoanga ngati Iuda viivii ra?​—Galatia 4:9.

12, 13. (a) Eaa te tumu tuarua e kia kore e unui ki muri ta Paulo i oronga maira? (e) Eaa ka riro ei to ratou tu akono akakoromaki kia akamaroiroi i te au Kerititiano Epera kia kore e unui ki muri e mate atu?

¹² Me kare te reira i rava, kua oronga atu a Paulo ki to Epera i te rua o te tumu kia kore e unui ki muri e mate atu ei​—ko ta ratou uaorai akakoromaki anga. Kua tata aia: “Ka akamanako ana ra i tei muatangana ra tuatau, ka akamāramaiaʼi kotou na, i akakoromaki ei i te au tamaki mamae maata ra.” Kua akamaaraara atura Paulo ia ratou e kua ‘akariroiaʼi ei matakitaki anga ra’ ma te akakinoia e te au mate oki. Kua mamae tetai papaki i te tapekaanga; ko etai kua aroa atu e kua turu atu i te aronga tapekaia ra. Ae, kua akaari ratou i te akarongo meitaki e te akakoromaki oki. (Ebera 10:32-34) Inara, eaa a Paulo i pati atu ei ia ratou ‘kia akamanako ana’ i taua au tupuanga mamae ra? Kare ainei te reira e riro ei akaparuparu anga?

¹³ I tetai pae, ‘ko te akamanako anga i te au mea o muatangana ra’ ka akamaaraara te au Epera ra i ta Iehova akamatutu anga ia ratou i raro ake i te timata anga ra. Ma tana tauturu, kua rauka ke ana ia ratou i te arai atu i ta Satani au timata anga e manganui. Kua tata a Paulo: “Kare te Atua i te Atua tuatua-tika kore, ka akangaro atu ei aia i ta kotou angaanga i rave, e to kotou anoano, i tona ingoa.” (Ebera 6:10) Ae, kua maara ia Iehova ta ratou au angaanga tiratiratu katoatoa, ma te akaputuanga ia ratou ki roto i tona manako kotinga koreia. Te akamaaraia maira tatou i ta Iesu akamaroiroi anga kia akaputu i te apinga na tatou ki runga i te rangi. Te ngai kare e rauka i te keia kia keikeiaia i taua au apinga ra; kare te uu e te pe e akapou ia ratou. (Mataio 6:19-21) Ko te tika, ko teianei au apinga ka akapouia anake me ka unui tetai Kerititiano ki muri e mate atu. Na te reira e kaimoumou ei etai ua atu apinga ana i akaputu ra ki te rangi. Mei teaa ra tetai tumu ririnui ta Paulo i oronga ki te au Kerititiano Epera ra kia kore e aruaru i taua aerenga ra! Eaa ka kaimoumou ei i to ratou au mataiti tavini anga tiratiratu ra? Ka tika ia e ka meitaki rava oki kia tamou marie i te akakoromaki anga.

Eaa Tatou ka Tau ei kia Kore e Unui ki Muri

14. Eaa te au akaaoanga ta tatou e aro atu nei te aiteite ra ki tei aroia e te au Kerititiano o te anere mataiti mua ra?

¹⁴ E aiteite te au tumu ririnui a te au Kerititiano mou i teianei tuatau no te koreanga e unui ki muri. Te mea mua, kia maara tatou i tetai akameitakianga tei ia tatou i te tu ma o te akamori anga ta Iehova ra i oronga mai kia tatou. Mei te au Kerititiano o te anere mataiti mua ra, te noo nei tatou i tetai tuatau te akakino maira e te akavaavaa maira to te au akonoanga marekaia ia tatou, te tou akaparau maira ki to ratou au are pure e te taito oki ta ratou au ikuiku anga. Inara, te akapapu maira Iehova kia tatou, e te mareka ra aia i to tatou tu akamori anga. Ko te tika, te rekareka nei tatou i te au akameitakianga i teianei tuatau kare ra to te au Kerititiano o te anere mataiti mua ra. Penei ka manako koe, ‘Akapeea i tikai te reira?’ I ora ana ratou i te tuatau i akamatai te iero vaerua ra i te angaanga. Kua riro a Karaiti ei Taunga Maata i tona papetito angaia i te 29 T. N. Kua kite tetai papaki o ratou i te Tamaiti rave temeio a te Atua ra. Noatu rai i muri ake i tona matenga, kua tupu etai atu au temeio. Inara, mei tei totouia maira, i muri ake kua akamutuia taua au apinga ra.​—1 Korinetia 13:8.

15. Te noo nei te au Kerititiano i te tuatau tupu anga o teea totou, e eaa te aite anga o te reira no tatou?

¹⁵ Inara, te ora nei tatou i tetai tuatau meitaki te akatupu anga no te totou maata no teia iero ia Ezekiela nga pene 40-48.a No reira, kua kite tatou i te akaora angaia te akanoonoo anga a te Atua no te akamori ma. Kua tamaia taua iero vaerua ra i te au tu ravarai o te au akonoanga viivii e te akamori itoro oki. (Ezekiela 43:9; Malaki 3;1-5) E tamanako ana i te au puapinga ta taua tamaanga ra i oronga mai no tatou.

16. Eaa te tupu anga akaparuparuanga ta te au Kerititiano o te anere mataiti mua ra i aro atu?

¹⁶ I te tuatau o te anere mataiti mua ra, kua akara anga poiri te tuatau ma no te akaare anga putuputuanga Kerititiano ra. Kua totou mai a Iesu e ka riro ia mei te mea rai ko tetai kainga ou te tanu anga i te sitona e kua ruruia atu te au zizania ki roto ra, kua akariro kia kore e rauka te akataka i te sitona mei te zizania. (Mataio 24:30) Ko te tu te reira. Kia tae ki te openga o te anere mataiti mua ra, ia Ioane apotetoro kua ruaine ra i rave ana ei arai openga i te tu viivii ra, kua tupu ruperupe ke te akonoanga apoteiti ra. (2 Tesalonia 2:6; 1 Ioane 2:18) Kare i roaia i muri mai i te matenga o te au apotetoro ra, kua tu mai tetai pupu orometua taka ke, i te takinga kinoanga i te anana e te kakauanga i te kakau tuke. Kua totoa te apoteiti mei te maki kakai ra. Mei teaa ra te akakore anga maroiroi no te au Kerititiano tiratiratu ra! Kua kite ratou i te mono angaia te akanoonoo anga ou ra no te akamori anga ma i te autuia e tetai tu viivii. Kua tupu teia i raro ake i te anere mataiti i muri mai i ta Karaiti ra akanoo anga i te putuputuanga.

17. I roto i teea tu te vai roa atu anga te putuputuanga Kerititiano o teianei tuatau i to te anere mataiti mua ra?

¹⁷ I teianei, e akamanako ana i tetai tuke anga. I teianei tuatau, kua roa atu te vai maianga o te akamori ma e i te tuatau i mate ei te au apotetoro. Mei te taime mai o te nenei anga o te itiu mua o teia makatini i te 1879, kua akameitaki mai a Iehova ia tatou ma te tupu anga kia maata te akamorianga tamaia. Kua tomo atu a Iehova raua ko Karaiti i te iero vaerua ra i te 1918 no te akakoroanga no te tamaanga i te reira. (Malaki 3:1-5) Mei te 1919 mairai, kua tama tamou marieia te akanoonoo anga no te akamorianga i te Atua ko Iehova. To tatou kiteanga i te au totou Pipiria e te au kaveinga kua taka meitaki mai. (Maseli 4:18) Ka aere atu kiaai te akameitakianga? Kare ki te au tangata apa ua nei. Kia Iehova anake, ma tana Tamaiti ei Upoko no te putuputuanga, ka rauka kia paruru i Tona au tangata mei te tu viivii i teianei au tuatau viivii nei. I reira, auraka rava tatou e akakore i te akameitaki ia Iehova no tana akatikaanga ia tatou kia rave i tetai tuanga i te akamori ma i teia tuatau. E kia akatika ngaueue kore tatou e auraka e unui ki muri e mate atu ei!

18. Eaa ta tatou tumu no te kore e unui ki muri e mate atu?

¹⁸ Mei taua au Kerititiano Epera ra, e tumu tuarua ta tatou no te kopaeanga i tetai aerenga unui anga no te mataku ua​—no ta tatou uaorai rave akakoromaki anga. Me no nga mataiti ua akenei tatou i akamatai i te tavini ia Iehova me kare kua rave tiratiratu tatou no nga raungauru mataiti, kua patu tatou i tetai rave anga te au angaanga Kerititiano. E manganui o tatou kua mamae i te takinga kino, e e tapekaanga, e arai anga, e ta anga, me kare kua ngere i te apinga. E manganui tei aro atu i te patoianga ngutuare tangata, te aviri, te akaapa, e te manako koreia mai. Pouroa tatou kua akakoromaki, i te rave tamou marieanga i ta tatou angaanga tiratiratu kia Iehova noatu rai te au akaaoanga e te au timata anga o te oraanga nei. Na te raveanga i te reira, kua patu tatou i tetai akakite anga akakoromakianga kare e ngaropoinaia e Iehova, koia tetai vairanga te au apinga i te rangi ra. E mea tika, i reira, kare teianei i te tuatau kia unui ki muri ki te akatereanga ao viivii taito ta tatou i akaruke ki muri! Eaa ka akariro ei i ta tatou angaanga pakari katoa kia puapinga koreia? E maata atu oki te tika o teianei i teia tuatau, no te mea e “roa poto ake oki” te tuatau te toe nei i mua ake i te openga.​—Ebera 10:37.

19. Eaa te ka uriuri manakoia i ta tatou atikara te ka aru mai?

¹⁹ Ae, kia akapapu tatou e “kare ra tatou i to te aronga i unui ki muri e mate atu”! Mari ra, kia riro tatou “no te aronga ra i rauka te akarongo.” (Ebera 10:39) Akapeea ka papu ei ia tatou e te tau ra tatou no taua akataka anga ra, e akapeea ka raukai ia tatou te tauturu atu i te au oa Kerititiano ra kia rave i te reira? Na ta tatou atikara te aru mai nei e akamanako mai i teianei tumu.

[Tataanga Rikiriki i Raro]

Maara Ainei ia Koe?

◻ Eaa te aite anga e kia unui ki muri e mate atu?

◻ Eaa te au taomianga tei akateiaa ra ki runga i te au Kerititiano Epera ta Paulo i tata atura?

◻ Eaa te au tumu no te kore e unuianga ki muri e mate atu ta Paulo i oronga ki te au Epera ra?

◻ Eaa ta tatou au tumu no te kore anga e unui ki muri e mate atu?

[Au Tutu i te kapi 15]

Kare to Petero topa anga ki roto i te tu mataku i akariro iaia kia aite ki “te aronga i unui ki muri e mate atu”