Ko te Tiaporo Ainei te Akamaki ra ia Tatou?

KA TAU KIA KORE RAVA TE MAKI E VAI UA. Kua anga te Atua ia tatou kia noo e tuatau ua atu ma te oraanga kopapa apa kore. Na tetai vaerua, ko Satani, i akatupu i te maki, te mamae, e te mate kia takinokino i te pamiri tangata i te taki anga aia i to tatou nga metua mua, ko Adamu raua ko Eva, ki roto i te ara.​—GENESE 3:1-5, 17-19; ROMA 5:12.

KO TE aite anga ainei i teia e e tupu anga tikai te au maki pouroa no te akao anga mai te ao vaerua? Mei tei kiteia i te atikara i mua akenei, e manganui te manako akapera ra. Kua manako akapera te mama ruau o Owmadji. Inara kua akatupuia ainei te maki eke o Owmadji​—e maki kino no te au tamariki ou i roto i te ngai maanaana—​e te au vaerua kitea koreia?

Ta Satani Tuanga

Te pau taka meitaki maira te Pipiria i teia uianga. Te mea mua, te akaari maira te reira e kare e rauka i te au vaerua o to tatou ai tupuna i te akakino i tei ora. Me mate te tangata, “kare ra a te aronga i mate ra e tuatua i kitea.” Kare o ratou au vaerua te ka ora ua atu i te matenga. Te moe ra ratou i roto i te vaarua, i reira “kare oki e angaanga, kare e kimianga, kare oki e kite, kare oki e pakari.” (Koheleta 9:5, 10) Kare e rauka i tetai ua atu tu i te mate i te akariro i tei ora ra kia maki!

Inara, te akaari maira te Pipiria e te vaira te au vaerua kino. Ko tei meameaau mua i te ao katoa e pini ua ake ko tetai vaerua te kiteia nei e ko Satani. Kua kapiti atu tetai kiaia e kua tapaia e e au temoni. Ka rauka ainei ia Satani e te au temoni i te akatupu i te maki? Kua tupu ana. Kua o mai ki roto i ta Iesu au temeio rapakau anga te tuaruanga i te au temoni. (Luka 9:37-43; 13:10-16) Inara, ko te maata anga o te au rapakau anga ta Iesu i rave ko te au maki kare i akatupu tikaia e te au temoni. (Mataio 12:15; 14:14; 19:2) Mei te reira rai i teia tuatau, tei matauia, kua tupu mai te au maki mei te au tupu anga natura, kare e mea manamana.

Akapeea te angaanga purepure? Te akapapu maira a Maseli 18:10 kia tatou: “Te ingoa o Iehova ra, e punanga ketaketa ïa: te oro nei te aronga tuatua-tika ki reira, e kua ora iora.” Te tuatua ra a Iakobo 4:7 e: “E patoi atu i te diabolo, e nana e rere ke atu.” Ae, ka rauka i te Atua i te paruru i tona aronga tiratiratu mei te angaanga purepure e tetai atu angaanga manamana. Ko te reira tetai aite anga o ta Iesu au tuatua: “Na te tuatua-mou kotou e akarangatira.”​—Ioane 8:32.

‘Akapeea a Iobu?’ penei ka ui etai. ‘Kare ainei e na tetai vaerua kino i akariro iaia kia maki?’ Ae, te tuatua ra te Pipiria e kua akatupuia to Iobu maki e Satani. Inara e turanga tuke rai to Iobu. Kua roa e kua paruru tu-Atua ia a Iobu mei te au uru anga kino a te temoni. I reira kua akaao atu a Satani ia Iehova kia pa ia Iobu, e no te mea kua o mai te au maro anga maata, kua akakore ua a Iehova i tana paruru anga mei tona tangata akamori i teia atianga okotai.

Inara, kua tuku te Atua i te au kotinga. I te akatika anga aia ia Satani kia takino ia Iobu, ka rauka ia Satani i te akariro ia Iobu kia maki no tetai taime, inara kare e rauka iaia i te tamate iaia. (Iobu 2:5, 6) I te openga ra, kua ope to Iobu tu tamamaeanga, e kua tutaki maata atu a Iehova iaia no tona tu tiratiratu. (Iobu 42:10-17) Te au kaveinga tei akapapuia e to Iobu tu tiratiratu kua roa e kua tataia ki roto i te Pipiria e e kite anga ki te katoatoa. Kare e anoanoia tetai atu timata anga mei teia rai.

Akapeea a Satani me Angaanga?

I te au akatau anga pouroa, ko te kapiti anga i rotopu ia Satani e te maki tangata ko te tika anga e kua timata a Satani i nga tangata mua, e kua inga raua ki roto i te ara. Kare e koia e tana au temoni tei akatupu tikai i te au maki tataki tai ravarai. Inara, kare e tei runga ake a Satani no te tautaanga i te akakeu ia tatou kia akono i te au iki anga pakari kore e kia tuku ua atu i to tatou akarongo, penei ka tupu mai te akakino anga i to tatou oraanga kopapa. Kare aia i akapurepure, tamate, me kare i pa ia Adamu raua ko Eva ki te maki. Kua akakeu aia ia Eva kia akarongo kore i te Atua, e kua aru atu a Adamu i tona aerenga akarongo kore. Ko te maki e te matenga tetai tuanga o te tupu anga.​—Roma 5:19.

I tetai atianga kua tutakiia tetai peroveta tiratiratu kore ko Balaama tona ingoa e te ariki o Moabi kia taumaa i te iti tangata o Iseraela, tei noo puakapa akamataku ki runga i te au arai anga o Moabi ra. Kua tauta a Balaama i te taumaa ia Iseraela, inara kua autu kore aia no te mea tei raro te iti tangata i ta Iehova paruru anga. I reira kua akanoo atu to Moabi no te akakeu anga i to Iseraela kia rave i te akamori anga itoro e te ainga tau kore. Kua manuia teia ravenga, e kua ngere to Iseraela i ta Iehova paruru anga.​—Numero 22:5, 6, 12, 35; 24:10; 25:1-9; Apokalupo 2:14.

Ka rauka ia tatou i te apii mai i tetai apiianga mei te reira tupu anga taito. Ka oronga te tauturu tu-Atua i te paruru anga ki te aronga akamori tiratiratu o te Atua mei te tamaki a te au vaerua kino. Inara, penei ka tauta a Satani e kia tuku ua atu te au tangata tataki tai i to ratou akarongo. Penei ka tauta aia i te akakeu ia ratou kia rave i te ainga tau kore. Me kare, mei tetai riona ngunguru, penei ka tauta aia i te tamataku ia ratou na te rave angaanga na roto i tetai tu te ngere ra ratou i te paruru anga a te Atua. (1 Petero 5:8) No reira oki te apotetoro ko Paulo i kapiki ei ia Satani e “nona te mate ra.”​—Ebera 2:14.

Kua tauta te mama ruau o Owmadji i te akakeu ia Hawa kia taangaanga i tana au ei kura e te au apinga purepure ei paruru i te maki. Eaa te ka tupu naringa a Hawa i tuku ua atu? Kua akakite aia e kua ngere i te irinaki pu tikai i te Atua ko Iehova, e kare e rauka iaia i te irinaki papu i tana paruru anga.​—Exodo 20:5; Mataio 4:10; 1 Korinetia 10:21.

Kua tauta a Satani i te akakeu anga ki runga ia Iobu. Te keia anga mei iaia i tona pamari, tana apinganui, e tona oraanga kopapa kare i rava ua. Kua ako kino katoa ia a Iobu e tana vaine i te tuatua anga aia e: “Ka akakino atu i te Atua, ka mate atu ei.” (Iobu 2:9) I reira kua atoroia atu aia e te “au oa” e toru tei tauta pakari i te akapapu iaia e kua apa aia no tona maki. (Iobu 19:1-3) Na teia tu kua taangaanga a Satani i to Iobu turanga paruparu kia tauta i te akamaroiroi kore iaia e kia ruru i tona tu irinaki papu i to Iehova tu tuatua tika. Inara, kua irinaki tamou ua atu a Iobu ki runga ia Iehova e ko tona manakonakoanga anake ia.​—Akaaite ia Salamo 55:22.

Me makiia tatou, penei ka taitaia rai tatou. I roto i te reira turanga, ka viviki a Satani i te tauta i te akariro ia tatou kia rave angaanga na etai tu te ka tuku ua atu i to tatou akarongo. No reira, me tupu te maki, e mea puapinga kia akamanako e ko te tumu akatupu anga o to tatou mamae koia oki ko te ara tei akairiia mai kare i tetai akakeu anga manamana. E akamaara ana, kua matapoia a Isaaka tiratiratu e maata te mataiti i mua ake i tona matenga. (Genese 27:1) Te tumu kare ko te au vaerua kino mari ra ko te pakari. Kua mate a Rahela koi anau ra, kare no Satani, inara no te tu paruparu tangata ua. (Genese 35:17-19) I te openga ra, kua mate te aronga tiratiratu taito​—kare no te au purepure me kare te au taumaa inara no te ara i akairiia mai.

Te akamanako anga e te mana ra te au vaerua kitea koreia i te au maki ravarai te ka tupu mai kia tatou e ereere ia. Penei ka akatupu i te mataku vinivini i te au vaerua. I reira, me makiia tatou, penei ka timataia tatou kia tauta kia akamaru i te au temoni kare e akamamao atu mei ia ratou. Me ka rauka ia Satani i te akamataku ia tatou kia uri ki te au raveanga purepure, ka riro te reira ei pikikaa anga ki te Atua mou, ko Iehova. (2 Korinetia 6:15) Kia aratakiia tatou e tetai tu mataku akangateitei i te Atua, kare i te mataku purepure i tona Enemi.​—Apokalupo 14:7.

Kua rauka ke ana ia Owmadji meangiti te paruru anga meitaki roa atu te patoi anga i te au vaerua kino. Kia tau ki te apotetoro ko Paulo, kua manako te Atua iaia e kua “tapu” no te mea e metua vaine irinaki tona, e ka rauka i tona metua vaine i te pure ki te Atua kia kapiti mai ki tana tamaine na roto i te vaerua tapu. (1 Korinetia 7:14) Kua akameitakiia ma taua kite tika tikai, kua rauka ia Hawa i te kimi i te rapakau anga meitaki no Owmadji kare i irinaki ki runga i te au ei kura.

Au Tupuanga Tukeke o te Maki

Kare te maata anga o te tangata e irinaki ana i te au vaerua. Me tuia ratou e te maki, ka aere ratou ki te taote​—me ka peke ia ratou. E tikai, ka rauka i tetai tangata maki i te aere ki tetai taote e kare rai e rapakauia mai. Kare e rauka i te au taote i te rave i te au temeio. Inara ko te manganui o te aronga manako purepure te ka rauka i te rapakauia kua aere ki tetai taote vairakau me tureti. Ka tauta ratou i te au ravenga rapakau anga purepure na mua, me kare teia e manuia ka aere ratou ki tetai taote e ko te ravenga openga. E manganui tei mate kare i anoanoia.

Kua aro atu tetai i te matenga kare i manakoia no te kamakura. Kare ratou i kite i te au akairo e kare i kite i te au takainga tau no te kopae i te maki. Ka tauturu te kite i te arai i te au mamaeanga kare i anoanoia. E mea puapinga kua ngere i te au metua vaine kite i te tatau e te apii e tokoiti ua tamariki ki te maki i te aronga kare i kite i te tatau e te apii. Ae, ka riro te kamakura ei mea kino.

Ko te mako kore tetai tupu anga no te maki. Ei akaraanga, e manganui tei makiia no te mea kua tuku ratou i te au manumanu kia totoro aere na runga i te kai i mua ake ka kai ei i te reira me kore ra kare te aronga tei akapapa i te kai i orei ana i to ratou au rima i mua ake. Te moe anga ma te kore e arai anga namu i te au ngai tuia i te mariri e kino katoa te reira.a I te pae kopapa, e putuputu te taime kua tika e “ko tetai auniti arai anga e puapinga atu ia i tetai paunu rapakau anga.”

Kua akatupu katoa te tu oraanga tau kore i te au mirioni kia makiia e kia mate vave. Kua takino katoa te kona kava, te ainga tau kore, te taangaanga kore i te au apinga akakona, e te taangaanga i te avaava i te oraanga kopapa o te manganui. Me piri atu tetai tangata ki roto i te au kino e ka makiia, ko te tumu ainei e kua purepureia aia me kare kua tamaki tetai vaerua iaia? Kare. Kua apa aia no tona maki. Te akaapa anga i te au vaerua e patoi anga no te ariki i te apainga no tetai tu oraanga tau kore.

E tikai, kare e rauka ia tatou i te akaaere i etai au apinga. Ei akaraanga, ka tuia tatou i te maki akatupu i te au microbe me kare te taero anga. Ko teia tei tupu kia Owmadji. Kare tona mama i kite e eaa te akatupu ra i te maki eke. Kare tana tamariki e maki putuputu ana mei tetai atu tamariki no te mea kua akono aia i tona kainga e te aua kia ma katoa e kua orei i tona nga rima i mua ake ka akapapa ei i te kai. Inara ka maki ua te tamariki i tetai taime. Ka rauka i etai 25 au tu anga organic tukeke i te akatupu i te maki eke. Penei, kare tetai e kite e ko teea tei akatupu i te manamanata kia Owmadji.

Te Pau Anga Roa

Kare e no te Atua te apa i te maki. “Kare rava te Atua e vavare i te kino, kare rava oki aia e pikikaa i te tangata.” (Iakobo 1:13) Me makiia tetai o tona aronga akamori, ka akameitaki a Iehova iaia i te pae vaerua. (Salamo 41:3) “Na Iehova e akamaroiroi mai iaia i tona roi maki ra; e naau e eeu i tona roi katoa i te maki angaia ra.” (Salamo 41:3) Ae, e tu tangi aroa to te Atua. Te inangaro ra aia i te tauturu ia tatou, kare e kia tamamae ia tatou.

E tikai, e pau anga roa ta Iehova no te maki​—to Iesu matenga e te tuakaouanga. Na roto i te atinga oko o Iesu, te akaoraia ra te aronga ngakau tika mei te turanga ara ua e i te openga ra ka rauka te oraanga kopapa apa kore e te ora mutu kore i roto i tetai enua parataito. (Mataio 5:5; Ioane 3:16) E akaari anga ta Iesu temeio i te rapakau anga mou te ka apai mai te Patireia o te Atua. Ka akaatea katoa te Atua ia Satani e tana au temoni. (Roma 16:20) E tikai, e manea te au mea ta Iehova e akanoo ra no te aronga tei akono i te akarongo ki roto iaia. Kia tamou marie e kia akakoromaki ua tatou.

I teia taime ra, te oronga maira te Atua i te pakari tau e te arataki anga i te pae vaerua na roto i te Pipiria e te aronga akamori tiratiratu o te taeake i te ao katoa. Te akaari ra aia e akapeea tatou me kopae i te au kino te akatupu ra i te au manamanata i te pae kopapa. E te oronga maira aia kia tatou i te au taeake mou te ka tauturu me tupu te au manamanata.

E akamanako akaou ana ia Iobu. Te aereanga ki te taunga purepure e apinga kino roa atu ta Iobu ka rave! Ka akakore te reira i te paruru anga a te Atua iaia, e ka ngere aia i te au akameitaki anga pouroa te tatari ra iaia i muri ake i tei tupu kiaia. Kare te Atua i akangaropoina ana ia Iobu, e kare katoa aia e akangaropoina ia tatou. “Kua kite kotou i te akakoromaki o Iobu ra, e kua kite oki kotou i ta te Atu i rave i te openga ra,” i tuatuai te pipi ko Iakobo. (Iakobo 5:11) Me kare tatou e tuku ua, ka rauka katoa ia tatou te au akameitaki anga manea i to te Atua tuatau tau.

Eaa tei tupu kia Owmadji meangiti? Kua maara i tona mama tetai atikara i roto i Te Punanga Tiaki e tona tokorua te Awake! no runga i te ravenga tauturu kia rauka te vai na roto i te vaa.b Kua aru aia i ta te reira au ikuiku anga e kua akapapa i tetai vairakau no Owmadji kia inu. I teianei te meitaki ra e te oraora ra i te pae kopapa te tamaine meangiti.

[Au Tataanga Rikiriki i Raro]

[Au Tutu i te kapi 7]

Kua akapapa a Iehova i tetai pau anga tamou ki te manamanata o te maki