E Akono i te Au Tuatua Taputou a te Atua na te Akarongo Anga

“Ko [te Atua ko Iehova] tei oronga mai ia tatou i te meitaki maata rava i tuatuaia maira.”​—2 PETERO 1:4.

1. Na teaa e raukai ia tatou te akono i te akarongo mou?

TE ANOANO ra a Iehova kia akarongo tatou i tana au taputou. Inara, “kare oki i ope katoatoa te tangata i te akarongo.” (2 Tesalonia 3:2) Ko teia tu e ua ia no te vaerua tapu me kare, e mana angaanga no te Atua ra. (Galatia 5:22, 23) E no reira, ko te aronga anake ua te aratakiia ra e te vaerua o Iehova te ka rauka ia ratou kia akono i te akarongo.

2. Akapeea ta te apotetoro ko Paulo ra akataka anga i te “akarongo”?

² Inara eaa te akarongo? Kua tapa te apotetoro ko Paulo i te reira e ko “te kite ïa i te au mea kare i akaraia nei.” No te taka meitaki tikai o te kite i teia au mea kare i akaraia nei kua akatauia atu te akarongo ki te reira. E kua karanga katoaia te akarongo e “ko te tumu tikai ïa i te au mea i tatariia nei” no te mea ko te aronga tei ia ratou teia tu, e akapapu anga ta ratou e ko te au mea ravarai i taputouia maira e te Atua ko Iehova e mea papu anake ia mei te mea rai e kua akatupuia.​—Ebera 11:1.

Akarongo e te Au Taputou a Iehova

3. Eaa ta te aronga Kerititiano akatainuia ra ka kite me ka akono ratou i te akarongo?

³ E marekaʼi a Iehova, ka tau tatou kia akono i te akarongo i tana au taputou. Kua akaari mai te apotetoro ko Petero i teia i roto i te rua o tana puka i akauruia ra, kua tataia i vaitata i te 64 T.N. Kua tou mai aia e me ka akono tona au taeake Kerititiano akatainuia ra i te akarongo, ka kite ia ratou i te tupu anga “te meitaki maata rava i tuatuaia maira” e te Atua. Ei tupuanga no te reira mai, ka rauka ia ratou “te tu Atua [i tuangaia] i te reira” ei aronga tuangaia ma Iesu Karaiti i te Patireia o te rangi ra. Ma te akarongo e pera katoa ma te tauturu a te Atua ko Iehova ra, kua ora mai ratou i te tuikaanga i te au peu e te au ravenga viivii o teianei ao. (2 Petero 1:2-4) E tamanako ua ana! Te rekareka nei te aronga te akono ra i te akarongo mou ra i taua tu rangatira meitaki maata rai i teia tuatau nei.

4. Eaa te au tu ka tau tatou kia kapiti atu ki to tatou akarongo?

⁴ Ka tau te akarongo i ta Iehova ra au taputou e te akameitaki anga no to tatou tu rangatira na te Atua ra i oronga mai, kia akakeu ia tatou kia rave i te meitaki te ka rauka ia tatou kia riro ei au Kerititiano tau tikai. Kua na ko maira Petero: “Ka akamaroiroi ua i te kapiti katoa to kotou akarongo ki te [tu tika-meitaki, NW]; e te [tu tika-meitaki] oki, ki te kite; Te kite oki, ki te [akono meitaki, NW], te akono meitaki, ki te akakoromaki; te akakoromaki oki, ki te akono i te Atua; Te akono i te Atua oki, ki te aroa taeake; te aroa taeake oki, ki te aroa i te tangata katoa.” (2 Petero 1:5-7) E kua oronga maira Petero i tetai papaanga te ka meitaki no tatou kia tauru ki roto i to tatou manako. E akara matariki tatou i teia au tu i teianei.

Au Tuanga Puapinga Maata o te Akarongo

5, 6. Eaa te tu tika-meitaki, e akapeea e raukai ia tatou te kapiti atu i te reira ki to tatou akarongo?

⁵ Kua tuatua maira Petero e ko te tu tika-meitaki, te kite, te akono meitaki, te akakoromaki, te akono i te Atua, te aroa taeake, e te aroa i te tangata katoa e kapitiia tetai ki tetai e ki to tatou akarongo katoa oki. Ka tau tatou kia rave pakari i te akariro i teia au tu puapinga maata ei tuanga no to tatou akarongo. Ei akatauanga, kare te tu tika-meitaki i tetai tu te ka rauka ia tatou kia akaari takake i te akarongo ra. Kua tou maira te tangata tata tikitinari ko W. E. Vine e ia 2 Petero 1:5, “kua kapitiia atu te tu tika-meitaki ei tetai tu umuumuia i te akono anga i te akarongo.” Te au tu tataki tai ke atura ta Petero i tuatua maira e tuanga tau anake no to tatou akarongo.

⁶ Te mea mua, ka tau tatou kia kapiti atu i te tu tika-meitaki ki to tatou akarongo. Ko te aite anga o te tu tika-meitaki ko te raveanga i te meitaki ki mua i te aroaro o te Atua ra. No te tuatua Ereni tei uriia ra i konei e “tu tika-meitaki,” te taikuia ra i etai urianga e “tu meitaki.” (New International Version; The Jerusalem Bible; Today’s English Version) Te akakeu ra te tu tika-meitaki ia tatou kia kopae ke i te rave kino me kare kia kopae ke i te akatupuanga kino ki to tatou au tangata. (Salamo 97:10) Te tamata katoa maira te reira i te angaanga mataku kore i te raveanga meitaki ei puapinga no etai ke ra i te pae vaerua, te pae kopapa, e te pae manako ngakau katoa oki.

7. Eaa i tau ei tatou kia kapiti atu i te kite ki to tatou akarongo e to tatou tu tika-meitaki oki?

⁷ Eaa ra a Petero i raurau ei ia tatou kia kapiti atu i te kite ki to tatou akarongo e te tu tika-meitaki? Me ka aro atu tatou i etai akaaoanga ou i to tatou akarongo, ka anoano ra tatou i te kite me ka rave tatou i te akataka anga i te tika mei te tarevake ra. (Ebera 5:14) Na te apii Puka Tapu e te matau i te akapiri atu anga i te Tuatua a te Atua e te akonoanga i te pakari tau i te oraanga i te au ra tataki tai, ka akamaata atu tatou i to tatou kite i reira. E ka riro mai kia rauka ia tatou i te akatinamou i to tatou akarongo e kia rave tamou i te tu tika-meitaki me tei raro ake tatou i te timataanga.​—Maseli 2:6-8; Iakobo 1:5-8.

8. Eaa te akono meitaki, e akapeea te kapiti angaia te reira ki te akakoromaki?

⁸ Ei tauturu ia tatou kia aravei atu i te au timata anga ma te akarongo, ka anoanoia tatou kia kapiti atu i te akono meitaki ki to tatou kite. Te akataka maira te tuatua Ereni no te “akono meitaki” i te kite anga i te akatere ia tatou uaorai. Ka tauturu teia ua o te vaerua o te Atua ra ia tatou kia akaari i te akakoromaki anga i te pae o te manako, te tuatua, e te tu akono. Na te rave tamou i te akono meitaki, ka kapiti atu tatou i te akakoromaki i reira. Ko te tuatua Ereni no te “akakoromaki” te akataka maira i te tu tinamou te mataku kore, kare ma te mata maromaroa unui ua ki muri ki roto i te tu ngata kare e ora mai. No te rekareka tei akanooia mai ki mua iaia ra i akakoromaki ei a Iesu i te rakau tamamae anga. (Ebera 12:2) Na te maroiroi no ko mai i te Atua ra kapiti katoaia ma te akakoromaki anga e pange i to tatou akarongo e ka tauturu oki ia tatou kia rekareka i te mate, e kia kopae ke i te timata anga, e kia kore e tuku ua me ka takinga kinoia mai.​—Philipi 4:13.

9. (a) Eaa te tu akono Atua? (e) Eaa i tau ei tatou kia kapiti atu i te aroa taeake ki to tatou tu akono Atua? (ng) Akapeea tatou i te kapiti anga i te aroa ki te tangata katoa ma to tatou aroa taeake katoa oki?

⁹ Ka tau katoa tatou kia kapiti atu i te akono i te Atua​—te akatapu anga, te akamori, e te tavini ia Iehova, ki to tatou akakoromaki anga. Ka tupu to tatou akarongo ia tatou e rave ra i te akono i te Atua e te kite anga i akapeea ta Iehova akono i tona au tangata ra. Inara, e raukai te akakite i te tu akono i te Atua, ka anoanoia tatou kia akono i te aroa taeake. No te mea, “ko tei kore e aroa i tona taeake tei akaraia e ia ra, eaa e tikaʼi iaia kia anoano i te Atua tei kore i akaraia e ia ra.” (1 Ioane 4:20) Ka tau to tatou ngakau kia akakeu ia tatou kia akakite i te aroa mou no etai atu au tavini o Iehova e kia kimi oki i te meitaki no ratou i te au tuatau ravarai. (Iakobo 2:14-17) Inara eaa tatou i akaueia mai ei kia kapiti atu i te aroa ki to tatou aroa taeake ra? I te akara anga te akakite maira Petero e e mea tika no tatou kia akono i te aroa i te au tangata katoa, kare e no to tatou au taeake anake ra. Te akaariia ra teia aroa na roto i te tutuanga i te tuatua meitaki e te tauturuanga i te au tangata i te pae vaerua ra.​—Mataio 24:14; 28:19, 20.

Au Tupu Anga Tuke

10. (a) Akapeea tatou me rave i te kapiti anga i to tatou akarongo ki te tu tika-meitaki, te kite, te akono meitaki, te akakoromaki, te tu akono Atua, te aroa taeake, e te aroa i te tangata katoa ki to tatou akarongo? (e) Eaa te ka tupu me te ngere ra tetai te manako ra e e Kerititiano aia, i teia au tu nei?

¹⁰ Me ka kapiti tatou i te tu tika-meitaki, te kite, te akono meitaki, te akakoromaki, te akono i te Atua, te aroa taeake, e te aroa oki i te au tangata katoa ki to tatou akarongo, ka manako tatou, ka tuatua, e ka akono na roto i te au tu te ka akamareka i te Atua ra. Ko te tuke anga, me ka kore tetai te manako ra e e Kerititiano aia, e akaari i teia au tu, ka riro aia ei matapo i te pae vaerua. Kua ‘topiri aia i tona mata ki te marama’ mei ko mai i te Atua ra e kua akangaropoina e i tamaia ana aia i tana ara i rave i mua ana. (2 Petero 1:8-10; 2:20-22) Auraka tatou kia topa na te reira mataara e ka ngere ei i te akarongo i ta te Atua ra au taputou.

11. Eaa ta tatou ka tika kia manakonako atu i te aronga akatainuia e tiratiratu ra?

¹¹ E akarongo to te aronga Kerititiano akatainuia tei tiratiratu ra i te au taputou a Iehova e kua akamaroiroi ia ratou uaorai kia akariro kia tika tana kapikianga e te ikianga ia ratou ra. Noatu rai te vaira etai toka turorianga i to ratou arataa, ka rauka ia tatou te manakonako atu kia akaari mai ratou i te au tu akono i te Atua ra. No te aronga tiratiratu tei akatainuia ra ‘ka oronga uaia mai te o anga no ratou ki roto i te basileia mutu kore o Iesu Karaiti ra’ na to ratou tuakaou anga ki te oraanga vaerua i te rangi ra.​—2 Petero 1:11.

12. Eaa ta tatou ka kite i te au tuatua ia 2 Petero 1:12-15 ra?

¹² Kua kite a Petero e kare e roa atu ka mate aia, e kua manakonako aia kia rauka iaia tetai tuakaou anga i muri akera ki te oraanga i te rangi ra. Inara iaia te vai ora ra i roto i “teianei puakapa”​—koia tona kopapa tangata—​kua tamata aia i te akatupu i te akarongo ki roto i tona au taeake akarongo ra e kia akakeu ia ratou na te akamaaraara atu anga kia ratou i te au apinga te anoanoia ra no te akaperepere anga a te Atua ra. I muri ake i tona takakeanga i te mate, kua rauka i te au taeake e te au tuaine o Petero i te pae vaerua ra i te pange i to ratou akarongo na te akamaaraaraanga i tana au tuatua.​—2 Petero 1:12-15.

Akarongo i te Tuatua Totou Ra

13. Akapeea ta te Atua ra oronga anga i te akakiteanga akamaroiroi i te akarongo no to Karaiti aerenga maira?

¹³ Na te Atua uaorai i akakite mai i te akakite anga akamaroiroi akarongo no runga i te papu tikai o to Iesu ra aerenga mai “ma te mana, e te kakā maata.” (Mataio 24:30; 2 Petero 1:16-18) Te ngere anga i te akakite anga tika, kua akakite te au kautaunga peikani i te au tua pikikaa no to ratou au atua, kua akara mata tikai a Petero, a Iakobo, e Ioane i to Karaiti tu kaka i te akatuke angaia ra. (Mataio 17:1-5) Kua kite ratou iaia i te akakaka angaia e kua akarongorongo atura ratou i te reo o te Atua uaorai i te akakiteanga e ko Iesu e Tamaiti akaperepere Nana uaorai. Ko te reira akakiteanga e te mama anga kaka maira i reira ia Karaiti e oronga anga ia i te ngateitei e te kaka ki runga iaia ra. No te reira akakiteanga na te Atua ra, kua tapaia taua ngai ra e Petero, penei ko tetai tuaivi no Heremona, ko “te maunga tapu ra.”​—Akaaite Exodo 3:4, 5.

14. Eaa te mea tau kia akatupuia ki to tatou akarongo no te akatukeanga o Iesu ra?

¹⁴ Eaa te akatupu anga tau a to Iesu akatuke angaia ki to tatou akarongo? Kua tuatua maira Petero: “Tei ia tatou katoa te tuatua [totou] tika maata rava atura o te au peroveta; ko te mea meitaki ïa ia kotou kia akono i te reira, mei te lamepa e kakā ua i te ngai poiri ra, e kia makirata, e kake ei te etu popongi i roto i to kotou ngakau.” (2 Petero 1:19) “Te tuatua [totou]” ra i te akara anga kua kapiti katoa kare i te au totou Tuatua Tapu Ebera anake ra no te Mesia mari ra no te tuatua katoa oki a Iesu e ka aere mai aia “ma te mana e te kakā maata ra.” Akapeea te akariro anga “kia tika maata rava atura” te tuatua na te akatuke angaia ra? Na te reira tupuanga i akataka papu i te tuatua totou no to Karaiti aerenga kaka mai i tona mana Patireia ra.

15. Eaa te o atura ki te manako anga i te tuatua totouia ra?

¹⁵ Ei akamaroiroi i to tatou akarongo, ka tau tatou kia akamaata tikai i te akono i te tuatua totou ra. Te kapiti ra te reira i te apiianga i taua tuatua ra, te uriuri manako anga i te reira i te au uipaanga Kerititiano, e te akono anga i tana ako. (Iakobo 1:22-27) E tuku tatou i te reira mei te “lamepa e kakā ua i te ngai poiri ra,” ei akamarama i to tatou ngakau. (Ephesia 1:18) Ei reira anake te reira e arataki ei ia tatou kia tae roa mai te “etu o te ao,” me kare, “te etu popongi kakā ra,” koia Iesu Karaiti, i te akakite anga mai iaia uaorai ma te kaka. (Apokalupo 22:16) Ka riro te reira akakiteanga ei akapouanga no te aronga akarongo kore e ei akameitakianga no te aronga akono ra i te akarongo.​—2 Tesalonia 1:6-10.

16. Eaa i raukai ia tatou kia akarongo e ka akatupuia te au taputou totouia maira i te Tuatua a te Atua ra?

¹⁶ Kare te au peroveta a te Atua ra i te aronga tangata kite ua tei rave ra i te au totou pakari, no te mea kua tuatua a Petero: “Te au totou ravarai i roto i te tuatua i tataia ra, kare ïa te mea kimiia e te tangata uaorai. Kare oki to te inangaro o te tangata i tae mai ei te totou i taito ra; ko te au tangata tapu ra o te Atua tei tuatua i ta te Vaerua Tapu i tuku mai ia ratou ra.” (2 Petero 1:20, 21) Ei akatauanga, kua karanga a Davida: “Te tuatua nei te Vaerua o Iehova iaku nei.” (2 Samuela 23:1, 2) E kua tata a Paulo e: “Te au tuatua tapu katoa i tataia ra, e mea akauruia mai e te Atua.” (2 Timoteo 3:16) I te mea kua akauruia te au peroveta a te Atua i tona vaerua, ka tau tatou kia akarongo e pouroa te au taputou i roto i tana Tuatua e ka akatupu katoaia.

E Akarongo to Ratou i te Au Taputou a te Atua

17. Eaa te taputou i akatumuia ra to Abela akarongo ki rungao?

¹⁷ E akatumu anga te au taputou a Iehova ra no te akarongo o te ‘urupu maata’ o tana au Kite i mua ake i te tuatau Kerititiano ra. (Ebera 11:1–12:1) Ei akaraanga, e akarongo to Abela i te totou a te Atua ra no tetai “uanga” te ka akaparuparu i te mimiti o “te ovi ra.” E tupu anga akapapu tetai no te akautunga a te Atua ra i nga metua o Abela ra. I vao i Edene, kua kai a Adamu e tana anau i te manga na te pata o te ou o to ratou mata no te teimaa i te one tei akatupu maira i te rakau taratara e te tataramoa. E penei katoa oki i kite a Abela i to Eva ra inangaro anga i tana tane e i kite katoa oki i to Adamu tutara anga i runga ake ia Eva ra. E mea papu e kua tuatua aia i tona mamae i te nui anga. E te paruruia anga te ara ki roto i te kainga i Edene ra e nga Kerubi ma te koke mura i te koraparapa ua anga. (Genese 3:14-19, 24) Pouroa teia ko “te kite ïa” ei akapapuanga kia Abela e ka rauka mai te akaora anga na roto i te Uanga i totouia maira. Na te akonoanga i te akarongo, kua oronga a Abela i te atinga ki te Atua tei tau ra e e maata atu tona puapinga i ta Kaina i oronga ra.​—Ebera 11:1, 4.

18, 19. Na roto i teea au tu to Aberahama raua ko Sara akono anga i te akarongo ra?

¹⁸ E akarongo katoa to nga pateriareka ko Aberahama, ko Isaaka, e Iakoba i te au taputou a Iehova ra. Kua akono oki a Aberahama i te akarongo i ta te Atua ra taputou e ei iaia e meitaki ei te au kopu tangata katoa o te ao nei e ka orongaia tetai enua no tona uanga. (Genese 12:1-9; 15:18-21) Ko tana tamaiti ko Isaaka e tana mokopuna ko Iakoba, ko “nga tangata tuanga ïa ma ia katoa i tei tuatuaia maira.” No te akarongo a Aberahama i “tuitarere ei aia i taua enua i tuatuaia maira” e kua tatari aia i “te oire tumu mou,” koia te Patireia o te Atua i te rangi ra te ka akatu iaia kia ora ki runga i te enua nei. (Ebera 11:8-10) E akarongo ainei toou mei te reira?

¹⁹ Ko Sara, koia te vaine a Aberahama, vaitata e 90 ona mataiti e kua paati roa aia i te mataiti anau tamariki, i tona akono anga i te akarongo i ta te Atua ra taputou e kua akamaroiroiia “i to ei ra” e kua anau maira ia Isaaka. E na reira, na Aberahama e 100 ona mataiti, “mei te tangata mate ra aia te tu” i te pae no te anau tamariki, i te openga ra kua anauia mai e tamariki “mei te etu o te rangi ra te maata.”​—Ebera 11:11, 12; Genese 17:15-17; 18:11; 21:1-7.

20. Noatu rai e kare nga pateriareka ra i kite i te tupu anga akaotianga i ta te Atua ra au taputou kia ratou ra, eaa ta ratou i rave?

²⁰ Kua mate atu aua nga pateriareka tiratiratu ra kare ratou i kite i te tupu takiri anga o ta te Atua ra taputou kia ratou. Inara, “kua akara ra [ratou] i taua au mea [taputouia] ra i te atea ke, e kua akarongo tikai, e kua āriki marie, kua aaki ua e, e tangata ke ke ratou e te tuitarere ua i teianei ao.” E au uki etai i topa i mua ake i te riro anga te Enua Taputouia ra no te au uanga o Aberahama. Inara, i to ratou oraanga katoa, kua akono aua nga pateriareka mataku i te Atua ra, i te akarongo i te au taputou a Iehova ra. No te mea kare i kore to ratou akarongo, kare e roa atu ana ka akatuakaouia ratou kia ora ki runga i te tuanga enua o te “oire” ta te Atua i teateamamao no ratou, koia te Patireia Mesia ra. (Ebera 11:13-16) Na roto i te reira tu rai, ka rauka i to tatou akarongo i te tamou marie i to tatou tiratiratu kia Iehova noatu rai me ka kore tatou e kite i te akamata anga te tupu anga o taua au taputou umere katoa ra. Ka akakeu katoa oki to tatou akarongo kia rave tatou i ta te Atua i akaue maira, mei ta Aberahama i rave ra. Mei tana akatuanga anga i te au apinga vaerua ki tona au uanga, ka rauka katoa oki ia tatou te tauturu i ta tatou au tamariki kia akono i te akarongo i te au taputou oko maata a Iehova ra.​—Ebera 11:17-21.

E Puapinga Maata te Akarongo no te Au Kerititiano

21. E arikiia mai ei e te Atua ra i teia tuatau nei, eaa ta tatou ka kapiti atu i ta tatou akono anga i te akarongo ra?

²¹ Tera ra, e maata atu te vaira no te pae i te akarongo i te irinaki anga anake ua i te tupu anga o ta Iehova ra au taputou. I roto katoa i te tuatua enua o te tangata nei, kua umuumuia te akono i te akarongo i te Atua ra na roto i etai tu tuke tuke e raukai ia tatou te rekareka i tona marekaanga. Kua tou maira Paulo e “kare e akarongo ra kare rava aia e mareka: ko te akamori i te Atua ra, kia akarongo aia e, e Atua e tikaʼi, e koia tei tutaki mai i te aronga i kimi tikai iaia.” (Ebera 11:6) E arikiia mai ei e Iehova i teia tuatau, ka tau tetai tangata kia akono i te akarongo ia Iesu Karaiti e te atinga oko ta te Atua i oronga maira na roto iaia ra. (Roma 5:8; Galatia 2:15, 16) Mei ta Iesu uaorai i tuatua ra: “I aroa mai te Atua i to te ao [tangata] nei, kua tae rava ki te oronga anga mai i tana Tamaiti anau tai, kia kore e mate te akarongo iaia, kia rauka ra te ora mutu kore. Ko te akarongo i te Tamaiti ra, e ora mutu kore tona: e te kore e akarongo i te Tamaiti ra, kare aia e kite i te ora; te vai ra te riri o te Atua ki runga iaia.”​—Ioane 3:16, 36.

22. Na te Patireia Mesia e apai mai i te tupu anga o teea taputou ra?

²² E tuanga puapinga maata ta Iesu no te rave i te akatupu anga i te au taputou a te Atua ra no runga i te Patireia ta te au Kerititiano e pure nei. (Isaia 9:5, 6; Daniela 7:13, 14; Mataio 6:9, 10) Mei ta Petero i akakite maira, kua akataka mai te akatuke anga ra i te tuatua totou no to Iesu ra aerenga mai ma te mana Patireia e te kaka. Ka apai mai te Patireia Mesia ra i te akatupu anga i tetai atu taputou na te Atua, no te mea kua tataia e Petero: “Te tatari nei ra tatou i te rangi ou e te enua ou tana i tuatua maira, i te vai tika anga o te tuatua-tika ra.” (2 Petero 3:13) E totou aiteite tetai tei akatupuia i te akaora angaia te au ngati Iuda tuikaaia ra i Babulonia ki to ratou uaorai enua kainga i te 537 M.T.N. i raro ake i te kavamani ko Zerubabela te kavana e ko Iosua te taunga maata. (Isaia 65:17) Inara kua tou maira Petero ki tetai tuatau i mua nei e tutaraʼi te “au rangi ou”​—koia te Patireia Mesia o te rangi ra—​ki runga i tetai “enua ou,” koia te totaiete au tangata tuatua tika te ka noo ki runga i te enua nei.​—Akaaite Salamo 96:1.

23. Eaa te au uianga no te tu tika-meitaki ta tatou ka uriuri manako a muri akenei?

²³ Ei au tavini tiratiratu no Iehova e ei au pipi na tana Tamaiti akaperepere, koia Iesu Karaiti, te inangaro nei tatou i te ao ou tei taputouia maira e te Atua. Kua kite tatou e te vaitata ra, e e akarongo to tatou e pouroa te au taputou oko maata a Iehova ra ka akatupuia ia. E raukai te aaere arikiia ki mua i te aroaro o te Atua ra, ka tau tatou kia akamaroiroi i to tatou akarongo na te kapitianga i te tu tika-meitaki ki te reira, te kite, te akono meitaki, te akakoromaki, te tu akono Atua, te aroa taeake, e te aroa i te tangata katoa.a I teianei, ka tau kia uiia, Akapeea tatou me akakite i te tu tika-meitaki? E akapeea to tatou akono anga i te tu tika-meitaki i te akapuapinga anga ia tatou e etai atura, e kia maata atu oki i to tatou au oa Kerititiano ra, ko ratou oki tei akarongo ra i te au taputou a te Atua ra na te akono anga i te akarongo?

[Au Tataanga Rikiriki i Raro]

Eaa Taau Au Pauanga?

◻ Akapeea te akataka anga i te “akarongo ra”?

◻ Kia tau ki ta 2 Petero 1:5-7, eaa te au tu tau kia kapitiia atu ki to tatou akarongo?

◻ Eaa te tupu anga tau no to Iesu ra akatuke anga ki rungao i to tatou akarongo?

◻ Eaa te akatauanga no te akarongo tei akakiteia maira e Abela, e Aberahama, e Sara, e etai ke atu oki o te tuatau taito ra?

[Tutu i te kapi 15]

Kua kite ainei koe e akapeea te akatupu anga a te akatukeanga o Iesu ra i te akarongo o tetai tangata ra?