Te Tuakaouanga—E Apiianga te Akakeu ra ia Koe
“Te irinaki nei au ki te Atua . . . e e tuakaouanga to tei mate, te aronga tuatua-tika e te aronga tuatua-tika kore.”—ANGAANGA 24:15.
1. Akapeea te tuakaouanga i riro mai ei e maroanga i mua i te Sunederi?
I TE openga o tona tere mitinari e toru i te 56 T.N., tei Ierusalema te apotetoro ko Paulo. I muri ake i te opuia anga e te au Roma, kua akatikaia aia kia aere ki mua i te akava ngati Iuda teitei, te Sunederi. (Angaanga 22:29, 30) Ia Paulo e akara ra i te au mema o taua paepae, kua kite atu aia e ko etai ia ratou e aronga Sadukea e ko tetai ia ratou e au Pharisea. E tuke maata teia nga pupu e rua i roto i tetai tu. Kare te au Sadukea e irinaki ana i te tuakaouanga; kua ariki ra te au Pharisea i te reira. Kia akaari e teiea aia e tu ra no runga i taua maroanga, kua akakite a Paulo: “E tāma, e te au taeake, e Pharisea au, e tamaiti oki na te Pharisea: no te tapapa i te tuakaouanga o tei mate ra i akavaia mai ei au nei.” I te rave anga i te reira, kua tuku aia i te akaputuputuanga ki roto i te manako oripu!—Angaanga 23:6-9.
2. No teaa ra a Paulo i akapapaia ai kia rave i tetai paruru anga no tona irinaki i roto i te tuakaouanga?
2 I te au mataiti i mua atu ana, iaia i runga i te mataara ki Damaseko, kua kite atura a Paulo i tetai orama i tona akarongo anga i to Iesu reo. Kua ui katoa a Paulo kia Iesu: “E te Atu, e akapeea au?” Kua pau maira a Iesu: “Ka tu, ka aere ki Damaseko; ei reira koe e akakiteia mai ei i te au angaanga katoa i akonoia naau e rave ra.” Te taenga ki Damaseko, kua kiteaia mai a Paulo e tetai pipi Kerititiano tauturu, ko Anania, tei akamarama mai e: “Kua akonoia na koe e te Atua o to tatou ai metua, kia kite koe i tona anoano, e kia akara koe i taua Tangata Tuatua-tika [te Iesu tei akatuia] ra, e kia akarongo oki koe i te reo i tona vaa.” (Angaanga 22:6-16) No reira rai, ra, i akapapaia ai a Paulo kia rave i tetai paruru anga o tona irinaki i roto i te tuakaouanga.—1 Petero 3:15.
Akakite Aere Anga ki te Katoatoa i te Manakonakoanga no te Tuakaouanga
3, 4. Akapeea a Paulo i te akapapuia anga ei tangata turu tiratiratu i te tuakaouanga, e eaa te apiiia maira kia tatou mei tana akaraanga?
3 Kua tu atu a Paulo i muri mai ki mua i te Tutara ko Feliki. I taua atianga, ko “tetai tumu korero” ko Teretulo, tei oronga atu ki te ngati Iuda i te akava anga no runga ia Paulo, i te akaapa anga iaia no te riro anga ei arataki no tetai pupu e te apa anga no te taoriorianga. Kua pau tika atu a Paulo na te akakite anga e: “E aaki atura au kia koe i teia, ta ratou e tuatua nei e, e airesi, te akapera nei au i te akamori i te Atua o toku ai tupuna.” Ei reira, i te akakite anga i te maroanga maata, kua tuatua atu aia: “Te irinaki nei au ki te Atua, ko ta ratou katoa oki ïa e tiaki nei, e e tuakaouanga to tei mate, te aronga tuatua-tika e te aronga tuatua-tika kore.”—Angaanga 23:23, 24; 24:1-8, 14, 15.
4 Mei te rua mataiti i muri mai, kua pati atu a Pokio Fesito, tei tupau ia Feliki, ki te Ariki ko Heroda Ageripa kia taokotai mai kiaia i te uiui anga i te tangata ko Paulo tei tapekaia ra. Kua akamarama atu a Fesito e te patoi ra te aronga akaapa i ta Paulo tuatua no “tetai tangata kua mate ko Iesu . . . e, te ora ra.” I roto i tana paruru anga kua ui a Paulo: “Eaa! te maara na kotou e, e mea tika kore kia akarongo e, e akatu akaou te Atua i tei mate?” I reira kua akakite aia: “I turuia maira au e te Atua, e tae rava akenei i teianei rā, i te akakite anga atu ki te aronga mamaata e te tangata rikiriki, e te tuatua anga atu i taua au tuatua anake ra i ta te peroveta tini e ta Mose i tuatua maira e, ka tupu; E ka mate rai te Mesia, e koia te ka tu mai ana i te aronga i mate ra, e ka akakite aia ki te tangata, e te au etene, i te mārama.” (Angaanga 24:27; 25:13-22; 26:8, 22, 23) E tangata turu tiratiratu tikai a Paulo i te tuakaouanga! Mei ia Paulo rai, ka rauka katoa ia tatou i te akakite ma te irinaki e e tuakaouanga tetai. Inara eaa te manako ta tatou ka tapapa atu? Penei mei tei tupu ra kia Paulo.
5, 6. (a) Eaa te manako tei akakeuia te turu tiratiratu anga te apotetoro i te tuakaouanga? (e) Ia tatou e akakite ra i to tatou manakonakoanga i roto i te tuakaouanga, eaa te mea puapinga maata?
5 E akamanako ana eaa tei tupu i mua ake i te tuatau o ta Paulo tere mitinari rua (mei te 49-52 T.N.) i tona atoro anga ia Atene. Kua akamarama aia ki te au tangata tei irinaki ki roto i te au atua e manganui, e kua raurau atu aia ia ratou kia akamanako i to te Atua akakoroanga i te akava anga i te ao katoa nei ma te tuatua tika na tetai tangata Tana i iki ra. Kare ko tetai ke mari ra ko Iesu. Kua akamarama a Paulo e kua oronga mai te Atua i tetai akapapuanga no teia na roto ia Iesu tei akatu akaouia mai. Eaa ra te manako? Ka tatau tatou: “Kite akera ra ratou i te tuatua i te tuakaouanga i tei mate ra, kua taitoito maira tetai pae; na ko maira oki tetai pae, E akarongo akaou atu matou ia koe i tenana tuatua.”—Angaanga 17:29-32.
6 Kua aite te manako ta Petero raua ko Ioane i kite ana i muri ua ake ia Penetekote 33 T.N. Kua riro akaou mai te au Sadukea ei tuanga maata i roto i te taumaro anga. Kua akakite mai a Angaanga 4:1-4 eaa tei tupu: “E te tuatua ua ra raua ki te tangata tini ra, tei runga ua maira ia raua te kau taunga, e te rangatira o te iero ra, e te au Sadukea katoa ra. I mainaina ratou, i te mea i apii atu raua i te tangata, e i tuatua oki i te tuakaouanga o tei mate ra ia Iesu.” Inara, ko tetai pae kua ariu meitaki mai. “E manganui ra tei akarongo i taua aronga i akarongo i te tuatua ra, ka rima atura paa tausani i te tangata kia tatau.” I te akara anga, ka tapapa atu tatou i te au manako tukeke me tuatua tatou no runga i te manakonakoanga no te tuakaouanga. I te akamanako anga i te reira, e mea puapinga kia akaketaketa tatou i to tatou akarongo i roto i teia apiianga.
Te Akarongo e te Tuakaouanga
7, 8. (a) Mei tei akaariia i roto i tetai reta ki te putuputuanga Kerititiano i te anere mataiti mua, akapeea te akarongo e puapinga kore ei? (e) Akapeea te marama anga tika o te manakonakoanga no te tuakaouanga i te akataka ke anga i te au Kerititiano mou?
7 Kare te katoatoa tei riro mai ei au Kerititiano i te anere mataiti mua T.N. i ariki viviki mai ana i te manakonakoanga no te tuakaouanga. Ko etai tei kite ei mea ngata te reira kua taokotai mai ki te putuputuanga i Korinetia. Kia ratou kua tata a Paulo: “Kua tuku atu oki au ia kotou i muatangana, i tei rauka mai na iaku ra e, i mate te Mesia i ta tatou nei ara, mei tei te tuatua i tataia ra: E i tanumia oki aia, e tu akaou maira i te po toru, mei tei te tuatua i tataia ra.” Kua akapapu i reira a Paulo i teia tuatua mou na te akakite anga e ko Karaiti tei akatuia akaouia mai kua ‘kiteaia e te au taeake e rima katoa anere e e ara,’ te maata anga o taua aronga ra, ta Paulo i akakite mai, te ora ua ra. (1 Korinetia 15:3-8) Kua akamarama katoa mai aia: “Te tuatua aereia nei te Mesia e, kua tu akaou aia mei te mate maira, eaa i tuatuaʼi tetai aronga o kotou e, Kare e tuakaouanga to tei mate ra? Kare e tuakaouanga to tei mate ra, kare katoa te Mesia i tu ki runga: E kare te Mesia i tu ki runga ra, e puapinga kore ta matou e ako nei, e e puapinga kore katoa to kotou akarongo.”—1 Korinetia 15:12-14.
8 Ae, e puapinga maata tikai te apiianga no te tuakaouanga e e puapinga kore ua te akarongo o te Kerititiano me kare te tuakaouanga e arikiia ei mea tika tikai. E tikai, te akataka ke ra te marama anga tika no te tuakaouanga i te au Kerititiano mou mei te pikikaa. (Genese 3:4; Ezekiela 18:4) No reira, kua kapiti mai a Paulo i te apiianga no te tuakaouanga ki roto “i te tuatua mua” a te akonoanga Kerititiano. Kia riro oki ta tatou tautaanga kia ‘aere ki mua i te pakari mou.’ “E na reira oki tatou,” ta Paulo i akamaroiroi mai, “kia tika i te Atua ra.”—Ebera 6:1-3.
Te Manakonakoanga no te Tuakaouanga
9, 10. Eaa te aite anga o ta te Pipiria tuatua anga no te tuakaouanga?
9 E akaketaketa maata atu ei i to tatou akarongo no te tuakaouanga, e uriuri akaou tatou i taua au uianga ra: Eaa te aiteanga o ta te Pipiria tuatua anga no te tuakaouanga? Akapeea te apiianga no te tuakaouanga i te akakaka anga i to Iehova aroa? Na te au pauanga ki teia au uianga e akavaitata atu ia tatou ki te Atua e i taua taime rai i te tauturu anga ia tatou kia apii atu i tetai ke.—2 Timoteo 2:2; Iakobo 4:8.
10 Ko te “tuakaouanga” e urianga no te tuatua Ereni te aiteanga tikai “e tuanga akaou ki runga.” Eaa te kapiti maira ki taua tuatua? Kia tau ki te Pipiria, e irinaki ketaketa te manakonakoanga no te tuakaouanga e ka akaora akaouia mai te tangata tei mate. Kua akaari katoa mai te Pipiria e ka akaoraia mai te tangata i roto i tetai kopapa tangata me kore i te vaerua, tei runga ua i te manakonakoanga no te enua nei me no te rangi ra tona. Te umere nei tatou i to Iehova aroa, te pakari, e te mana tei akakiteia mai i roto i teia manakonakoanga umere no te tuakaouanga.
11. Eaa te au manakoanga no te tuakaouanga tei orongaia ki te au tavini akatainuia a te Atua?
11 Te oronga ra te tuakaouanga o Iesu e tona au taeake akatainuia kia ratou i tetai kopapa vaerua te tau ra no te angaanga i te rangi. (1 Korinetia 15:35-38, 42-53) Ka angaanga taokotai ratou ei au tutara no te Patireia o te Mesia, te ka apai mai i te au turanga Parataito ki te enua nei. I raro ake ia Iesu ei Taunga Maata, kua akanooia tei akatainuia ra ei kau taunga ariki. Ka oronga ratou i te au akameitakianga no to Karaiti atinga oko ki te au tangata i roto i te ao ou o te tuatua tika ra. (Ebera 7:25, 26; 9:24; 1 Petero 2:9; Apokalupo 22:1, 2) I taua taime rai, te aronga o tei akatainuia te ora ua ra i runga i te enua nei te inangaro ra kia arikiia mai e te Atua. Me mate ratou, ka rauka mai ia ratou “tei tau” ia ratou na roto i te tuakaouanga ki te oraanga vaerua mate kore i te rangi ra. (2 Korinetia 5:1-3, 6-8, 10; 1 Korinetia 15:51, 52; Apokalupo 14:13) “I kapiti katoaia oki tatou iaia i te tu o tona mate,” ta Paulo i tata, “e kapiti katoaia ïa tatou i te tu o tona tuakaouanga.” (Roma 6:5) Inara akapeea ra te aronga e oraanga akatuakaouanga to ratou i runga i te enua nei ei au tangata ra? Akapeea te manakonakoanga no te tuakaouanga e akavaitata atu ei ia ratou ki te Atua? E maata atu ta tatou ka kite mei te akaraanga o Aberahama.
Te Tuakaouanga e te Pirianga Oa kia Iehova
12, 13. Eaa te tumuanga ririnui no te akarongo i roto i te tuakaouanga i rauka ia Aberahama?
12 Ko Aberahama, tei akatakaia mai ei ‘oa no Iehova,’ e tangata meitaki tikai no te akarongo. (Iakobo 2:23, NW) E toru taime to Paulo taiku mai anga i to Aberahama akarongo i roto i tana papaanga no te au tane e te au vaine tiratiratu tei tataia i roto i te pene 11 o Ebera. (Ebera 11:8, 9, 17) Te akara tamou ra te toru o tana papaanga ki runga i te akarongo ta Aberahama i akaari i te teateamamao anga aia ma te akarongo i te oronga anga i tana tamaiti ko Isaaka ei atinga. Kua irinaki tikai a Aberahama e kua akapapuia mai e Iehova te totou no tetai uanga na roto ia Isaaka. Noatu e me ka mate a Isaaka ei atinga, kua “karanga oki [a Aberahama] e, e tika i te Atua kia akatu mai iaia mei te mate maira.”
13 I te au tupuanga e tupu maira, te kite anga a Iehova i te ketaketa o to Aberahama akarongo, kua akapapa aia i tetai manu kia mono mai ei atinga. Noatu rai, kua riro to Isaaka tupuanga ei akatutuanga, no te tuakaouanga, mei ta Paulo e akataka maira: “E kua rauka akaou maira iaia [Aberahama] mei reira mai [Isaaka] ei aiteanga.” (Ebera 11:19) Kapiti mai, e tumu anga ririnui takere to Aberahama no tona irinaki i roto i te tuakaouanga. Kare ainei e kua akaora akaou mai a Iehova i te mana anau akaou anga o Aberahama i te kapiti anga mai aia e tana vaine, ko Sara, i to raua ruaine anga e te anau mai anga i ta raua tamaiti, ko Isaaka ra?—Genese 18:10-14; 21:1-3; Roma 4:19-21.
14. (a) Kia tau kia Ebera 11:9, 10, eaa ta Aberahama i tapapa atu? (e) Kia rauka mai te au akameitakianga Patireia i roto i te ao ou, eaa te ka akatupuia kia Aberahama? (nga) Akapeea e rauka ai ia tatou te au akameitakianga Patireia?
14 Kua akataka mai a Paulo ia Aberahama ei tangata tuitarere e e tangata noo ua anga i roto i te puakapa “te maara ra aia e e rauka te oire tumu mou, ko te akatu e te tutara o taua oire ra, ko te Atua ïa.” (Ebera 11:9, 10) Kare e oire tika tikai teia mei ia Ierusalema rai, e ngai no te iero o te Atua. Kare, e oire akatutu ua teia. E Patireia no te Atua i te rangi te reira kapiti mai a Iesu Karaiti e tona au oa tutara e 144,000. Kua tuatua katoaia te 144,000 i to ratou kaka i te rangi ei “oire tapu ra, ko Ierusalema ou,” te ‘vaine akaipoipo’ na Karaiti. (Apokalupo 21:2) I te 1914, kua akakorona a Iehova ia Iesu ei Ariki Mesia no te Patireia i te rangi e kua akaue atura iaia kia tutara i rotopu i tona au enemi. (Salamo 110:1, 2; Apokalupo 11:15) Kia rauka mai te au akameitakianga no te tutara Patireia, kia akaora akaouia mai a Aberahama, e ‘oa no Iehova.’ Pera katoa, kia rauka mai ia tatou te au akameitakianga Patireia, e mea tau kia ora tatou i roto i te ao ou o te Atua, me e au mema o te aronga maata rava te aronga i ora mai ia Aramakito me kore te aronga tei akatuia mai mei te mate maira. (Apokalupo 7:9, 14) Eaa, i reira, te tumuanga no te manakonakoanga no te tuakaouanga?
To te Atua Aroa—Te Tumu Manakonakoanga no te Tuakaouanga
15, 16. (a) Akapeea te totou mua i roto i te Pipiria i te akanoo anga i te tumu anga no to tatou manakonakoanga no te tuakaouanga? (e) Akapeea te irinaki anga i roto i te tuakaouanga i te akapiri vaitata anga ia tatou kia Iehova?
15 To tatou pirianga vaitata ki to tatou Metua i te rangi ra, to tatou akarongo ketaketa mei to Aberahama rai, e te akarongo anga tatou ki te au akauenga a te Atua te tuku ra ia tatou kia akakiteia ei aronga tuatua tika e kia manakoia mai e Iehova ei au oa nona. Te oronga maira teia kia tatou i te tuatau kia puapingaia mei te tutara Patireia. E tikai, te totou mua tikai tei tataia i roto i te Tuatua a te Atua, ia Genese 3:15, te oronga maira i te tumu anga no te manakonakoanga no te tuakaouanga e te pirianga oa ki te Atua. Te totou maira te reira kare ua no runga i te akaparuparu anga i te mimiti o Satani mari katoa ra, ei tuke anga, te akaparuparu anga i te pooavae o te Uanga a te vaine a te Atua. Te matenga o Iesu i runga i te rakau tamamae anga e akatutu angaia i te akaparuparu anga i te pooavae. Na tona tuakaouanga i te toru o te ra i rapakau ei i taua kino e i akatuera ai i te mataara no te ravenga tau tikai i rauka ai “i te akangere atu iaia nona te mate ra, koia oki te diabolo.”—Ebera 2:14.
16 Te akamaara maira a Paulo kia tatou e “kua akamaata ua maira te Atua i tona aroa ia tatou nei, i te mea te vai tangata ara ua nei rai tatou, i mate ei te Mesia no tatou nei.” (Roma 5:8) Te ariki rekareka anga no teia takinga meitaki te akapiri vaitata tikai ra ia tatou kia Iesu e ki to tatou Metua aroa i te rangi ra.—2 Korinetia 5:14, 15.
17. (a) Eaa te manakonakoanga ta Iobu i akakite? (e) Eaa ta Iobu 14:15 i akaari mai no runga ia Iehova, e akapeea teia i te akariro anga ia koe kia manako atu?
17 Kua akara katoa a Iobu, e tangata tiratiratu i mua ake i te au tuatau Kerititiano, ki te tuatau ki mua ki tetai tuakaouanga. Kua mamae maata tikai aia i roto i nga rima o Satani. Kare mei tona au oa pikikaa ra, kare rava i taiku mai ana i te tuakaouanga, kua rauka ia Iobu te pumaana mei teia manakonakoanga e kua ui atura: “Kia mate te tangata nei, ka ora akaou ainei aia?” Na roto i te pauanga kua akakite a Iobu uaorai e: “E tapapa rai au i oku puke rā i akonoia ra e kia ope, e tae rava atu ki toku tu ke anga ra.” I te tuatua anga ki tona Atua, kia Iehova, kua akakite aia: “Naau e kapiki mai, e naku e io atu kia koe.” I te akamanako anga i te au manako oonu o Tei Anga aroa mai ia tatou, kua kite a Iobu e: “E tangi rai koe ki te angaanga a to rima ra.” (Iobu 14:14, 15) Ae, te tapapa rekareka ra a Iehova i te tuatau e akaoraia mai te aronga tiratiratu i roto i te tuakaouanga. Te akavaitata tikai ra teia ia tatou kiaia ia tatou e akamanako oonu ra no runga i te aroa e te takinga meitaki tana i akaari mai kia tatou noatu e aronga apa ua tatou!—Roma 5:21; Iakobo 4:8.
18, 19. (a) Eaa te manakonakoanga tei rauka mai ia Daniela no te ora akaou anga mai? (e) Eaa ta tatou ka uriuri akaou i roto i te atikara e aru mai nei?
18 Ko te peroveta ko Daniela, tei akatakaia mai e te angera a te Atua ‘e tangata akaperepere maataia,’ kua roa te ora anga no te angaanga tiratiratu. (Daniela 10:11, 19) Tona tiratiratu kia Iehova kua vai taui kore ua mei tona tuikaaanga i te 617 M.T.N. e tae ua atu ki tona matenga i tetai tuatau i muri mai te rauka anga mai iaia tetai orama i te 536 M.T.N., i te toru mataiti o Kuro, te ariki o Peresia. (Daniela 1:1; 10:1) I roto i etai tuatau i te toru mataiti o Kuro, kua rauka mai ia Daniela tetai orama no runga i te aerenga o te au mana o te ao te akaoti atura ki roto i te tumatetenga maata e tu mai nei. (Daniela 11:1–12:13) No te mea kare aia i marama roa ana i te orama, kua ui a Daniela ki te karere angera tei oake mai i te reira e: “E te Atu, eaa ra te openga i teianei au mea?” Na roto i te pauanga kua arataki atu te angera i te manako “ki te tuatau openga,” i te tuatau “e kite ra te aronga pakari.” No Daniela uaorai ra, eaa ra tona au manakonako anga? Kua akakite te angera e: “Ka akaangaroi oki koe, e ka tu atu rai koe i to tuanga i te openga o te au rā ra.” (Daniela 12:8-10, 13) Ka oki akaou mai a Daniela “ki te tuakaouanga o te aronga tuatua-tika,” i te tuatau o to Karaiti Tutara Anga o te Tauatini Mataiti.—Luka 14:14.
19 Te noo nei tatou i te tuanga openga o te tuatau e te vaitata atura ki te akamata anga o ta Karaiti Tutara Anga Tauatini Mataiti i to tatou akamata mua anga mai ei aronga akarongo ra. No reira, e ui tatou kia tatou uaorai, ‘Ko au ainei tetai i reira i roto i te ao ou i te taokotai atu anga kia Aberahama, Iobu, Daniela, e ki tetai au tane e te au vaine tiratiratu ra?’ Ko tatou tetai i reira, me vai piri vaitata ua atu tatou kia Iehova e te akono anga i tana au akauenga. I roto i ta tatou atikara te aru mai nei, ka uriuri akaou tatou i te manakonakoanga no te tuakaouanga i roto i te au tu tuke tuke kia rauka i te akataka e koai ma te ka akatuia mai.
Maara Ainei ia Koe?
• Eaa te manako ta Paulo i aro atu i te akakite anga aia i tona manakonakoanga ki roto i te tuakaouanga?
• No teaa ra i akataka ke ei te manakonakoanga no te tuakaouanga i te au Kerititiano mou mei te pikikaa ra?
• Akapeea tatou i kite ei e e akarongo to Aberahama, to Iobu, e to Daniela i roto i te tuakaouanga?
[Tutu i te kapi 8]
Kua akakite a Paulo ma te irinaki tikai, i te tu anga i mua i te Tutara ko Feliki, i te manakonakoanga no te tuakaouanga
[Tutu i te kapi 10]
No teaa ra i tuku ei a Aberahama i te akarongo ki roto i te tuakaouanga?
[Tutu i te kapi 12]
Kua rauka mai ia Iobu te pumaana mei te manakonakoanga no te tuakaouanga
[Tutu i te kapi 12]
Ka oki akaou mai a Daniela i roto i te tuakaouanga o te aronga tuatua tika