Au Uianga a te Aronga Tatau

I roto ia Ebera 11:26, kua tuatuaia ainei a Mose e ko “te Karaiti,” me kore ra e akatutu ua ainei aia ia Iesu Karaiti?

Te uriurianga i to Mose akarongo, kua tata te apotetoro ko Paulo e “kua akateitei aia i te akakino anga i te Karaiti ei apinga maata rava atu i te au poe o Aiphiti; kua akara tikai aia ki te tutaki o te oko.” (Ebera 11:26, NW) Te akara anga e te tuatua ra a Paulo ia Mose e ko “te Karaiti,” me kore ko tei akatainuia ra, i tetai tu ra.

I tetai tu ra kua akanoo a Mose i tetai akara anga no te Mesia te ka aere mai. Noatu e e peroveta rai a Mose, kua akakite aia i tetai peroveta tei maata atu iaia ‘mei iaia nei.’ E manganui te au ngati Iuda tei kite e ko Iesu ‘Te Peroveta,’ tei akapapuia e tana au pipi. (Deuteronomi 18:15-19; Ioane 1:21; 5:46; 6:14; 7:40; Angaanga 3:22, 23; 7:37) Kua riro katoa a Mose ei rotopu no te Ture koreromotu, inara kua rauka ia Iesu tetai “taoonga meitaki rava” ei “Arai i te koreromotu meitaki maata ra,” koia te koreromotu ou ma te kaka ra. (Ebera 8:6; 9:15; 12:24; Galatia 3:19; 1 Timoteo 2:5) No reira i etai au tu ra ka rauka kia karangaia a Mose ei tutu no te Mesia te aere maira.

Inara, kare ko te reira te aiteanga tikai o Ebera 11:26. Kare e akakite anga e kua kite a Mose i te au papaanga tuatua no runga i te Mesia, te akateiteianga i tana i na roto i Aiphiti e mei te rave anga i te reira no te Mesia me kore ei komono Nona ra.

Kua manako etai pae e ko ta Paulo au tuatua i roto ia Ebera 11:26 e e aiteite tona puapinga ki tana tuatua e kua na roto te au Kerititiano i te ‘au mate i te Mesia.’ (Ebera 1:5) Kua kite ke ana te au Kerititiano akatainuia e kua mamae ana a Iesu Karaiti e me ka ‘mate kapipiti ra ma ia katoa ka akakakā kapipitiia ma ia katoa’ i te rangi. Inara kare a Mose i kite ana i te aerenga mai o te Mesia, e kare katoa o Mose manakonakoanga no te rangi.​—Roma 8:17; Kolosa 1:24.

Te vaira tetai maramaanga ngoie e akapeea a Mose i te ‘akateitei anga i te akakino anga i te Karaiti ei apinga maata rava atu.’

I to Paulo tata anga i “te Karaiti” i roto ia Ebera 11:26, kua taangaanga aia i te tuatua Ereni Khri·stouʹ, koia oki te aiteite o te tuatua Epera Ma·shiʹach, me kore Mesia. Ko te aite anga o te “Mesia” e te “Karaiti” ko “tei akatainuia.” No reira te tata ra a Paulo no runga ia Mose te ‘akateiteianga i te akakino anga o tei akatainuia ra.’ Ka rauka ainei a Mose uaorai kia kapikiia e ko tetai “tei akatainuia ra”?

Ae. I te au tuatau Puka Tapu penei ka akapapuia tetai tangata i roto i tetai taoonga takake na roto i te riringi anga i tetai manongi ki runga i tona upoko. “Kua rave iorā Samuela i tetai ue manongi, e kua riringi atura ki rungao i [to Saula] mimiti.” “Kua rave iorā Samuela i taua āriki manongi ra, e kua akatainu atura [ia Davida] i rotopu i tona ai tuakana ra: e mei taua rā maira te Vaerua o Iehova i te tae anga mai ki runga ia Davida.” (1 Samuela 10:1; 16:13; akaaiteia atu kia Exodo 30:25, 30; Levitiku 8:12; 2 Samuela 22:51; Salamo 133:2.) Inara ko etai pae mei te peroveta ko Elisaia e te ariki o Suria ko Hazaela, kua karangaia raua e kua “akatainuia” noatu e kare e akapapu anga e kua ririnigiia tetai manongi ki runga ia raua. (1 Ariki 19:15, 16; Salamo 105:14, 15; Isaia 45:1) No reira, ka riro tetai tangata e ko “tei akatainuia” na te iki angaia me kore te tono takake angaia.

Na teia tu ra ko Mose uaorai ta te Atua i akatainu ra, e kua oronga katoa mai etai au Puka Tapu i te tuatua mei te “Tei Akatainuia a te Atua” me kore “Tei Akatainuia ra” i roto ia Ebera 11:26. Kua tonoia a Mose ei komono no Iehova e ko tei arataki ia Iseraela ki vao ia Aiphiti. (Exodo 3:2-12, 15-17) Noatu e kua utuutuia mai a Mose i rotopu i te au apinganui e te kaka o Aiphiti, kua akaperepere tikai aia i tona tono angaia, tei ariki ra aia e kua akatupu. Ma te tau i reira, i raukaʼi ia Paulo i te tata no Mose e kua “akateitei aia i te akakino anga i te Karaiti ei apinga maata rava atu i te au poe o Aiphiti; kua akara tikai aia ki te tutaki o te oko.”