Maara Ainei ia Koe?

Kua ariki ainei koe i te tatauanga i te au itiu i ou akenei o Te Punanga Tiaki? Ka akara ana me ka rauka ia koe i te pau i te au uianga te ka aru mai:

• Eaa te porokaramu naau uaorai te piri maira te Akoanga i runga i te Maunga taau ka taangaanga kia akakore i te taitaia?

I te au ra tataki tai, ka rauka ia koe i te tatau e tai o ta Iesu au apiianga mama te akanooia ra i roto i taua akoanga me kare i tetai atu ngai i roto i te au Evangeria. Na te manakonako anga no runga i taua apiianga e te kimianga kia akono uaorai i te reira, penei ka kiteaia e koe te akamaata angaia te mataora e te akameangiti anga i te taitaia.​—12/15, kapi 12-14.

• Eaa te au tumu meitaki e toru no te aronga pakari o te putuputuanga kia tereni i te au tavini orometua kia rave i tetai ua atu au apainga ra?

No te maata i te numero o te Au Kite o Iehova, te anoanoia ra tetai atu au tane tau kia tauturu i te aronga papetito ouia kia tere ki mua. Te kotinga nei te ruaine me kare te au manamanata kopapa i tei rauka ana i etai aronga pakari i te rave kua roa te tavini anga. E te apai ra etai aronga pakari tau i te au apainga te totoa mamao atura i te putuputuanga i reira, penei kare e rauka ia ratou i te rave maata atu i roto i ta ratou putuputuanga mei mua ana.​—1/1, kapi 29.

• Akapeea te au tangata i te irinaki anga i te au atua kare i tika tikai?

E manganui te akamori ra i te au atua o ta ratou akonoanga, inara penei e au atua ora kore ua teia tei kore ra i rauka i te akaora atu i tei kore i rauka ia Baala i te tuatau o Elia ra. (1 Ariki 18:​26, 29; Salamo 135:​15-17) Ko etai te akangateitei ra i te au tangata tamataora me kare te au tangata tarekareka, tei kore e oronga mai i tetai manakonako anga tika tikai no te tuatau ki mua. I tetai tua, te vai tikai ra a Iehova e te akatupu ra i tana au akakoro anga.​—1/15, kapi 3-5.

• Eaa ta tatou i kite mei ta Kaina i rave i ta te Atua ra akamatakiteanga?

Kua oronga mai te Atua i te anoano rangatira kia tatou, e ka rauka ia tatou i te iki i te rave i te tika kare e akaruke i te rave i te meitaki, mei te reira ta Kaina ariu anga. Kua akaari katoa mai te papaanga Pipiria e ka rave a Iehova i tana akautunga anga ki runga i te aronga tataraara kore.​—1/15, kapi 22-3.

• Eaa i puapinga maatai te tu ma i teianei?

Ma te tauiuianga i te pae o te oraanga, e manganui te akapou meangiti ra i te tuatau i te tamaanga i to ratou kainga i tei matauia ana. Te kopaeanga i te tu ma ki to te kai e te vai te ka oronga mai i te au kino ki te oraanga kopapa. Tei kapitiia atu ki te tu ma i te pae kopapa ra, te akakite maira te Pipiria i te akamanako anga i te tu ma i te pae vaerua, te tu akono tau, e te pae manako.​—2/1, kapi 3-6.

• No runga i te au kite Kerititiano mua, te karanga ra a Paulo e “kia kore e rauka te meitaki roa ia ratou anake auraka tatou katoa ra.” Akapeea ra? (Ebera 11:40)

I te tuatau Mareniamu e aere maira, ko Karaiti e tona au taeake akatainuia i te rangi ra, te tavini ra ei au ariki e te kau taunga, ka oronga mai i te au puapinga o te oko ki te aronga tei akatuakaouia mai. Ko taua aronga tiratiratu tei akakiteia mai i roto ia Ebera pene 11 ka riro e kia “meitaki roa.”​—2/1, kapi 23.

• Eaa to Paulo manako i tona akakite anga ki te au Epera e: “Kare akerai ta kotou māro anga i tae i te maringi anga toto”? (Ebera 12:4)

Te akakite maira aia i te maroanga e tae roa ki te matenga. Te vaira te au akatauanga tuatua enua o te aronga tei vai tiratiratu ana e tae ua atu ki te matenga. Noatu e kare te au Epera ta Paulo i tata atu ana i timataia i taua tu, te anoanoia ra ratou kia tere ki mua ki te pakari, i te patuanga i to ratou akarongo kia akakoromaki noatu eaa te ka aere mai.​—2/15, kapi 29.

• Eaa ra i meitaki ei kia kopae i te karangaanga e te akamaru ra a Iehova i tona tuatua tau ma te akaaroa?

I roto i etai au reo, te aite anga o te “akamaru” kia maru me kore kia akakoromaki. E Atua a Iehova no te tuatua tau e te akaaroa, e i tona akaarianga i taua au tu ra, te angaanga rotai nei raua. (Exodo 34:​6, 7; Deuteronomi 32:4; Salamo 116:5; 145:9) Kare to Iehova tuatua tau e anoanoia kia tamaruia me kare kia akamaruia e te akaaroa.​—3/1, kapi 30.

• E mea tau ainei no tetai Kerititiano kia miriia te kopapa o tetai akaperepere tei mate ra?

Te aite anga o te mirianga kia akonoia te kopapa. No te au tumu anga akonoanga i aru ei etai aronga taito ra i te ravenga. Kare te reira e tika ki te aronga akamori mou. (Koheleta 9:5; Angaanga 24:15) Te taroaroa ra te mirianga i te ka tupu mai, te okianga o te kopapa ki te one pueu. (Genese 3:19) Inara kare e anoanoia kia manakoia atu me te umuumu ra te ture i te mirianga, te inangaro ra etai au mema ngutuare i te reira, me kare te anoanoia ra no te mea te aere ra etai i te ngai mamao ki te tanumanga.​—3/15, kapi 29-31.

• Eaa te au akatauanga Pipiria te apii maira ia tatou e te turou ra te Atua i te au tangata no te pa enua katoatoa ra?

Kua tono atura a Iehova ia Iona kia akamatakite i to Nineve ra, e kua raurau atura te Atua ia Iona kia ariki i ta ratou tataraara. Na roto i te tuatua e te akatauanga, kua akamaroiroi a Iesu i te akaarianga i te aroa ki te aronga Samaria. E tuanga ta te nga apotetoro ko Petero raua ko te apotetoro ko Paulo i te apaianga atu i te tuatua meitaki ki te aronga kare i te ngati Iuda. Mei taua au akatauanga, ka rauka ia tatou i te kite i te anoano no te tautaanga kia tauturu atu i te au tangata no te au turanga katoatoa.​—4/1, kapi 21-4.