Au Uianga a te Aronga Tatau

Eaa te aiteanga o te tuatua ia Ebera 12:4: “Kare akerai ta kotou māro anga i tae i te maringi anga toto”?

Te tuatua “māro anga i tae i te maringi anga toto” te akakite ra e te aere ua atura ki tetai tamate anga, i te akamaringi tikai anga i to tetai oraanga.

Kua kite te apotetoro ko Paulo e no te tumu o to ratou akarongo ra, ko etai o te au Kerititiano Epera kua “akakoromaki [takere] i te au tamaki mamae maata.” (Ebera 10:​32, 33) I te tou atu anga ki te reira, i te akaraanga te taangaanga ra a Paulo i te akatutu anga no tetai putoto anga i roto i tetai taemoemo oro anga Ereni, penei e te kapitiia maira te oroanga vaevae, te kukumianga, te motoanga, e te discus e te peianga i te korare. Kia tau i te reira, ia Ebera 12:1, te raurau ra aia i te au Kerititiano akarongo: “E kopae atu tatou i te au mea teiaa ravarai, e te ara e rokoia ngoie ei tatou nei, e oro tamou marie ei i teianei oroanga i tukuia mai ki mua ia tatou nei.”

E toru irava i muri mai, ia Ebera 12:4, penei e te neke ra a Paulo mei tetai tutu anga o tetai oroanga ki tetai taemoemo motoanga. (Ko nga manako kua mama mai ia 1 Korinetia 9:26.) Kua tapekaia te au rima e te puku rima o te aronga moto taito ma te au papa anga pakiri. Penei e kua akateiaaia te au papa anga “ki te tapou, te auri, me kare te au stud auri, te ka akatupu i te mamae kino ki te aronga moto.” Te akatupu ra taua au taemoemo anga kino i te toto kia tae, i tetai taime ei mate.

I tetai atu tu, e maata te au akatauanga o te tavini akarongo o te Atua ki te au Kerititiano Epera tei takinokino mamaeia e tei takinga kinoia, e tae roa ki te matenga, “i tae i te maringi anga toto.” E akara i te tata anga ta Paulo i akamaara maira ta te aronga akarongo taito ra i kite:

“I peîia ratou i te toka, i kekeia rotopu ïa ratou e taka ke atura, i timataia, i tamate takiriia i te koke; i koka aere ua ratou ma te kakau kiri mamoe e te kiri puaka-nio, ma te puapinga kore, te tairoia, e te takinga-kinoia ra.” I muri mai, kua akakite a Paulo i te Akaoti o to tatou akarongo, ko Iesu: “Tei akakoromaki i te satauro, kare i akono i te akama, i te meitaki i tukuia mai ki mua i tona aroaro, e te noo ra i teianei i te pae katau i te terono o te Atua ra.”​—Ebera 11:37; 12:2.

Ae, e manganui tei ‘māro e tae ua atu i te maringi anga toto,’ koia oki, i te taeanga ki te matenga. To ratou maro anga e maata atu i te putoto anga i roto i te ara no te ngere anga i te akarongo. Kua tiratiratu ratou i raro ake i te akakino anga kino o roto ra, i te tamouanga i to ratou tu akarongo e tae ua atu ki te matenga.

Penei te aronga ou i roto i te putuputuanga o Ierusalema, kua riro mai ei Kerititiano i muri ake i te akameangiti mai anga te tamamae anga kino i te tuatau i topa, kare roa i aro atu ana i taua au timata anga pakari. (Angaanga 7:​54-60; 12:​1, 2; Ebera 13:7) Inara, te au timata anga e iti ua te tu pakari te akamaroiroi kore ra i etai o ratou i te apai ua atu i te taemoemo anga; te ‘akaroiroi ra e te akaparuparu ra to ratou au meta,’ ia ratou. (Ebera 12:3) Te anoanoia ra ratou kia tere ki mua ki te pakari. Ka patu atu te reira i to ratou kite kia akakoromaki noatu eaa te ka aere mai, me ka kapitiia mai te akakino anga i te pae kopapa e tae roa atu i te akamaringi anga i to ratou oraanga.​—Ebera 6:1; 12:​7-11.

E manganui te au Kerititiano i teia tuatau nei tei ‘māro e tae ua atu i te maringi anga toto,’ kua tamateia no te mea kare ratou i tuku ana i to ratou tu Kerititiano. Ma te kore i tuku i te au tuatua a Paulo ia Ebera 12:4 kia akatupu i te mataku, ka rauka ia tatou i te apai ia ratou ei akakiteanga i te maata o ta tatou e aruaru ra i te aere ua atu kia vai tiratiratu ki te Atua. I muri ake i roto i taua reta ra ki te au Ebera, kua tata a Paulo: “E tāpu marie rai tatou i taua aroa ua ra, kia akamori tatou i te Atua ma te kiteia mai, ma te akaaka e te mataku.”​—Ebera 12:28.